Abalekonka Imibele Isuma Baleya Balecepa

UWALIPO kateka wa ku Germany, Helmut Schmidt atile, “ica musango yo tacalecitika kale.” Aleilishanya pa lwa kubulwa ubufumacumi ukwa babomfi ba buteko ukwali umutwe uukalamba mu nyunshipepala. Atile: “Abantu balileka ukukonka imibele isuma pa mulandu wa bufunushi.”

Abengi kuti basuminisha ifi alandile. Imibele iyaba mu Cebo ca kwa Lesa, Baibolo, kabili iyo pa nshita ntali yalemonwa ku bengi nge yakukonka pa kwishibilako icalungama ne cabipa ilemonwa nomba nge ishacindama. E fyo caba na mu fyalo ifyo batila fya Bwina Kristu.

Bushe Imibele Baibolo lsambilisha Yalicindama?

Imibele yashimpwa pa kusambilisha kwa mu Baibolo isanshamo ubufumacumi na bumpomfu. Lelo, ukubepa, amafisakanwa, no kufutika fili fye mpanga yonse. Inyunshipepala ya The Times iya ku London yashimika ukuti bakapokola bamo abafwailisha imilandu “batunganishiwa ukupanga indalama ukufika na ku mapaundi 100,000 pa nshita fye imo ku miti iikola iyo bakapokola bapokolwele

 bampulamafunde no kupeela bampulamafunde na kabili ukuti bashitishe nelyo ukulufya ubushinino ubwa kwikatilapo amabumba ya bamukukulu babipisha.” Ku Austria ubucenjeshi bwa fya mainshuwalansi bwaliseeka nga nshi. Kabili ku Germany basayantisti balipapile sana lintu bakasapika basangile nomba line “ubucenjeshi bwakapela makufi muli sayansi wa bena German.” Profesa umo, uwaishibikwa nga “kalapashi pa bena German baishibisha icisambilisho ca mfyalo,” apeelwe umulandu wa kufutika nelyo uwa kupanga ifipendo fya ku mutwe fye.

Pa mibele Baibolo isambilisha pasansha na bucishinka mu cupo, icishifwile ukupwa. Lelo abaupana abengi balapwisha ifyupo fyabo mu cilye ca milandu. Inyunshipepala ya ba Katolika iya Christ in der Gegenwart (Umwina Kristu wa Muno Nshiku) ishimika ukuti “nangu ni pa bena Switzerland ‘abakakatila sana ku ntambi’, ifyupo ifingi filepwa.” Ku Netherlands, amapesenti 33 aya fyupo fyonse filapwa. Umwanakashi umo uumwene ifyo imikalile yalwike mu Germany pa myaka fye ya kupenda alembele icalemusakamika ati: “Icupo nomba cimonwa kwati fya kale ifyapitamo no mwela. Abantu nomba tabaleupa uwa kubelelela na o ukufikile mfwa.”

Lubali lumbi, abengi nga nshi batila imibele isambilisha Baibolo yalicetekelwa kabili ilabomba mu mikalile ya ndakai. Abaupana bamo abekala pa mupaka wa calo ca Switzerland na Germany basangile ukuti ukwikala umwalola imibele Baibolo isambilisha kwalibalenga ukuba aba nsansa. Abene batile, “kwaba fye cintu cimo icingatungulula imikalile yonse iya muntu. Ne co ni Baibolo.”

Muletipo shani? Bushe Baibolo kuti yatutungulula bwino? Bushe imibele yaba muli Baibolo ilabomba ilelo?