Bushe Cinshi Mupiminako Ukuti Umo Aletunguluka?

DIKISHONARI umo alondolola ukuti, ukutunguluka kukwata ifyuma, ububile, nelyo icifulo ca pa muulu.” Bushe ubu bulondoloshi bwaumfwika? Bushe ifyuma, ububile, nelyo icifulo ca pa muulu e fya kupiminako fye ukutunguluka? Ilyo tamulayasuka, bebeteni ci: Yesu Kristu takwete ifyuma fya ku mubili mu bumi bwakwe. Abengi tabalemubisha; kabili abaletungulula abantu umwa kuya aba mu nshiku shakwe tabamucindike. Lelo Yesu alitungulwike. Mulandu nshi?

Ilyo ali pe sonde, Yesu ali “uwacindama kuli Lesa.” (Luka 12:21) Pa numa ya kubuuka kwakwe, Lesa alimulambwile pa kumufwika icilongwe ca “bukata no bucindami.” Yehova alisansabike Umwana wakwe “pa cifulo casumbuka no kumupeele shina ilyacila amashina yonse.” (AbaHebere 2:9; Abena Filipi 2:9) Imikalile ya  kwa Yesu yalengele umutima wa kwa Yehova ukusamwa. (Amapinda 27:11) Ukubapo kwakwe pe sonde kwalitungulwike pantu kwalifikilishe imifwaile. Yesu acitile ukufwaya kwa kwa Lesa no kuleete lumbo kwi shina Lyakwe. Lesa na o, alicindike Yesu ne fyuma, ububile, ne cifulo ca pa muulu ifyo nangu muntu wasambilila, nangu wa mapolitiki, nelyo fye kalapashi wa fyangalo ashingakwata. Cine cine Yesu e muntu watungulwike sana ukucila bonse abaikalako pe sonde.

Abafyashi ba Bwina Kristu balishiba ukuti nga ca kuti abana babo bakonka mu nkasa sha kwa Kristu, nga bacindama kuli Lesa nga fintu Yesu ali, bakalobolola amapaalo yawamisha pali nomba no kuipakisha filambu fishingelenganishiwa mu bwikashi buleisa. Ku wacaice, inshila yawamisha pa kukonka mu nkasa sha kwa Kristu, yaba kubombako umulimo Yesu abombeleko, e kuti ubutumikishi bwa nshita yonse nga kuti akumanisha.

Lelo, mu ntambi shimo mwaba umwata wa kuti abacaice tabafwile kwingila mu butumikishi bwa nshita yonse. Ilyo umulumendo apwisha isukulu, napamo kuti aenekelwa ukwingila incito, ukuupa no kutendeka ukuikalila. Inshita shimo, abacaice aba fikulilo fya musango yo, balakwinda ukutendeka ubutumikishi bwa nshita yonse. (Amapinda 3:27) Mulandu nshi? Balabapatikisha ukukonka intambi shikonkwa na bonse. E fyacitikile Robert. *

Ulutambi Nga Talumfwanene na Kampingu

Robert akushiwe nge Nte ya kwa Yehova. Mu myaka yakwe iya bupungwe, imikalile yakwe ne fibusa alesala tafyaweme. Banyina batendeke ukusakamikwa pa lwa wene. E co banyina baipwishe painiya, umutumikishi wa nshita yonse, Inte ya kwa Yehova ukumukoselesha. Robert alondolola icaishilecitika.

“Nalitashishe nga nshi pa fyo painiya ayangilwe kuli ine. Ica kumwenako cakwe icisuma canengele ukufwaya ukubombako bupainiya nga napwisha fye isukulu. E lintu bamayo basakamene na kabili, lelo pa mulandu umbi. Namwishiba, mu lutambi lwesu caliba fye bwino ku mukashana ukubomba bupainiya nga apwisha fye sukulu, lelo umulumendo enekelwa ukukwata indalama ishingi intanshi, pa numa, e lyo engatontonkanya pali bupainiya.

“Nasambilile imilimo no kutendeka ubukwebo ne mwine. Mu kwangufyanya nayobeke sana mu fya makwebo kabili ukulongana no kushimikila fyali fye nge cibelesho ukwabula no kubikako amano. Kampingu wandi alencusha, nalishibe ukutila kuti nabombela Yehova na maka yandi yonse. Nalyo line, kwali kushomboka kwine kwine pa kuputukako ku fyo abengi baenekele ine ukucita, lelo ndi uwa nsansa ukuti naliputwikeko. Nomba nalyupa, kabili ine no mukashi wandi twalibomba bupainiya pa myaka ibili. Nomba line fye nasontelwe ukuba umubomfi utumikila mu cilonganino. Kuti nalanda mu bufumacumi ukuti nomba nalisekelamo icibi mu kubombela Yehova no mutima wandi onse, na maka yandi yonse.”

Iyi magazini libili libili yalikoselesha abacaice ukusambilila imilimo nelyo ukwishibako fimo nga kuti bakumanisha ilyo bali ku sukulu, ifikabafwa ku ntanshi. Ku mifwaile nshi? Bushe ni pa kuti bakwate ifyuma? Iyo. Umulandu ukalamba wa kuti bakaikalile nga bakula no kubombela Yehova na maka yabo yonse, maka maka mu butumikishi bwa nshita yonse. Lelo cilacitika ilingi ukuti abalumendo na bakashana balakonkelela sana imilimo ya ku calo ica kuti bacefya no bucindami bwa butumikishi. Bamo tabatontonkanya napo pa  kwingila mu mulimo wa nshita yonse. Mulandu nshi?

Ifyo Robert alandilepo fyalatwafwa ukumfwikisha ici. Pa numa ya kusambilila imilimo yakwe, Robert atendeke ubukwebo. Bwangu bwangu aishilekobwa mu milimo ya mutatakuya iishamunonseshe. Ubuyo bwakwe bwali kukwata indalama ishingi. Lelo bushe kwaliba uuli onse uwa mu cilonganino nelyo uushaba mu cilonganino uwafika pali ubo buyo? Abena Kristu bafwile ukutukuta ukukanaonaula indalama, ukusakamanishisha nga nshi ifipooswa fyabo; lelo bafwile na kabili ukwishiba ukuti muli shino nshita shayafya, banono fye e bafika ku cipimo ca kuimona ukuti balikwata indalama ishingi. E mulandu wine ubulayo bwa kwa Yesu ubwalembwa pali Mateo 6:33 busansamushisha sana Abena Kristu.

Robert aba uwa nsansa ukuti alipingwilepo ukukonke co umutima wakwe walefwaya ukucila ukukonka ulutambi lwakwe. Pali nomba, aleipakisha ubutumikishi bwa nshita yonse. Cine cine, umulimo wa nshita yonse mulimo wa mucinshi. Robert alikwata umutende wa pa lwakwe pantu alabombela Yehova, nga fintu umwine asosa ukuti ‘na maka yakwe yonse.’

Bomfyeni Bwino Ukulamuka Kwenu

Pa Nte sha kwa Yehova paliba abantu abalamuka abengi. Bamo balicenjela mu mano; bamo balilamuka mu ncito sha kubomfya sana amaka. Fyonse ifi ifya bupe fifuma kuli Yehova, uupeela “bonse umweo, no kupema, na fyonse.” (Imilimo 17:25) Ukwabula umweo ifi fya bupe fyonse te kuti fibe ifyacindama.

Kanshi, nacilinga ukuti tubomfye ubumi bwesu Yehova atupeela ku kumubombela. Ifi e fyo umulumendo umo uwalamuka acitile. Aikeleko mu mwanda wa myaka uwa kubalilapo C.E. Afumine ku lupwa ulukankaala, ku bwaice aikele mu musumba waishibikwa bwino uwa Tarsi mu Kilikia. Nangu line ali mu Yuda ku kufyalwa, aishileba umwikashi wa mu Roma pa mulandu wa bawishi. Ico calengele akwate insambu ishingi na mashuko. Ilyo akulileko, asambilile ifya mu Malango kuli Gamaliele uwali umo uwa “baprofesa” ba kubalilapo pali ilya nshita. Camoneke kwati bwangu bwangu, ali no kukwata ifyuma, ububile, ne cifulo casumbuka.—Imilimo 21:29; 22:3, 27, 28.

Bushe uyu mulumendo ali nani? Ishina lyakwe ali ni Sauli. Lelo Sauli aishileba Umwina Kristu kabili mu kupita kwa nshita aishileba umutumwa Paulo. Ashiile amabuyo yakwe aya ntanshi no kutendeka ukubombela Yehova ngo Mwina Kristu mpaka ne mfwa. Paulo taishibikwe ngo waishibisha amalango, lelo aishileishibikwa nga kabila wapimpa uwa mbila nsuma. Pa numa ya kubomba bumishonari mupepi ne myaka 30, Paulo alembele kalata ku ba bwananyina mu Filipi. Muli iyi kalata apitulwike muli fimo ifyo abombele ku kale ilyo ashilaba Umwina Kristu, e lyo aishilesosa ati: “Pa mulandu [wa kwa Yesu Kristu] nalufishe fyonse (kabili ntunga fyonse ubusali), ukuti inonke Kristu.” (Abena Filipi 3:8) Kwena, Paulo tabalile aba na malangulushi pa fyo abomfeshe ubumi bwakwe!

Ni shani pa lwa kukansha Paulo akanshiwe kuli Gamaliele? Bushe alikubomfeshe? Cine cine! Ilingi aleafwa “mu kusosele mbila nsuma, kabili mu kuiikasha.” Lelo umulimo ukalamba uwa kwa Paulo wali wa kuba kashimikila wa mbila nsuma, untu ashakanshiwe mu masambililo yakwe aya pa kubala.—Abena Filipi 1:7; Imilimo 26:24, 25.

Na lelo line, bamo balibomfya ifya bupe fyabo no kulamuka nangu fye masomo yabo ku kubombe fya Bufumu. Ku ca kumwenako, Amy alikwata digiri pa numa ya kusambilila ifya makwebo ne fya mafunde pa yuniversiti. Inshita imo alebomba incito yalemuletela indalama ishingi ku kampani ka baloya, lelo pali nomba abomba ngo mutumikishi wa kuitemenwa uushifola pa maofeshi yanono aya Watch Tower Society. Ifi e fyo Amy alondolola ubumi bwakwe pali nomba. Atila: “Nalishininwa ukuti nalisalile icintu icawamisha mu bumi bwandi. . . . Nshikumbwa incito shibomba abanandi nali nabo ku yuniversiti. Nalitemwa umulimo nasala. Nalikwata conse ico nkabila no kufwaisha—ubumi busuma kabili ubwa nsansa no mulimo usuma uwa kusekelamo.”

Amy asalile umulimo uumuletela umutende wa ku muntontonkanya, ukusekelamo, na mapaalo ya kwa Yehova. Cine cine abafyashi ba Bwina  Kristu bafwaya abana babo ukukwata cimo cine!

Ukutunguluka mu Butumikishi bwa Bwina Kristu

Kwena, calikatama ukwishiba bwino icaba ukutunguluka mu butumikishi bwa Bwina Kristu bwine. Tacafya ukuyumfwa ukuti natutunguluka nga ca kuti twabomba bwino mu butumikishi bwa mwi bala, twashalika impapulo sha Baibolo, nelyo abene mayanda basekelela mu kulanshanya pa lwa Baibolo. Lelo nga ca kuti tatulesanga ukutwi kwingomfwa, kuti twasondwelela ukuti tuleonaula fye inshita. Nalyo line, muleibukisha ukuti, ubulondoloshi bumo ubwa kutunguluka bwaba ‘kukwata ububile.’ Bushe bubile bwa bani tufwaya? Kwena, bwa kwa Yehova. Ubu bubile kuti twabukwata nampo nga bantu balekutika ku bukombe bwesu nelyo iyo. Yesu asambilishe abasambi bakwe isambililo lya maka ukulosha kuli ci.

Mwalaibukisha ukuti Yesu atumine bakabila ba Bufumu 70 “ku mushi onse ne mpanga yonse uko alaswa aye umwine.” (Luka 10:1) Bali no kushimikila mu mishi na mu matauni beka ukwabula Yesu. Ici icacitike cali cipya kuli bene. E co Yesu alibebele bwino bwino ifya kucita ilyo ashilabatuma. Nga basanga “umwana wa mutende,” bali no kumushimikila pa lwa Bufumu. Lelo nga babakaana, bali no kufumapo, ukwabula ukusakamikwa. Yesu alondolwele ati uwakaana ukukutika kuli bene ninshi akaana Yehova umwine.—Luka 10:4-7, 16.

Lintu balya 70 bapwishishe umulimo wabo uwa kushimikila, babwelele kuli Yesu “no kusekelela, abati, Mwe Shikulu, ifiwa na fyo filatunakila mwi shina lyenu.” (Luka 10:17) Balya bantu abashapwililika bafwile balicankilwe sana pa kutamfya ifibumbwa fya mupashi ifyakwatisha amaka! Lelo, Yesu asokele abakonshi bakwe abacincimwike ati: “Mwisamwa muli ici, ica kuti imipashi ilemunakila; lelo samweni ico amashina yenu nayalembwa mu muulu.” (Luka 10:20) Te lyonse abasambi 70 bali no kukwata amaka ya kufumya ifiwa, nelyo ukubomba bwino mu butumikishi. Lelo nga batwalilile aba busumino, lyonse bali no kukwata ububile bwa kwa Yehova.

Bushe Mulatasha Ababomfi ba Nshita Yonse?

Umulumendo alyebelepo eluda wa Bwina Kristu ukuti: “Nga napwisha isukulu lya ku sekondari, nkesha ukufwaya incito. Nga nshisangile ncito, lyene nkatontonkanya pa lwa kubombako umulimo wa nshita yonse.” Lelo ifyo te fitontonkanya abengi ababomba bupainiya. Bamo balisha incito sha pa muulu pa kuti fye babe bapainiya. Bamo balikaana amashuko ya kusambilila ayashaiwamina. Ukupala umutumwa Paulo, baliipusula, lelo aba nabo bene ukupala Paulo, Robert, na Amy, tabalangulushiwa pa fyo basala ukucita. Balatasha pa mashuko bakwata aya kubomfya ifya bupe fyabo ku kulumbanya Yehova, uwayana ukupeela ifyawamisha.

Kwaba ifingi ifilenga Inte sha kwa Yehova ishingi isha busumino ukukanabombako bupainiya. Napamo balikwata imilimo ya mu malembo iya kusakamana. Nalyo line, nga babombela Lesa no ‘mutima wabo onse, na ku mweo wabo onse, na ku muntontonkanya wabo onse,’ Yehova alatemunwa. (Mateo 22:37) Nangu line, tababa na maka ya kubomba bupainiya, balishiba ukuti ababomba bupainiya balisala umulimo usuma.

Umutumwa Paulo alembele ukuti: “Mwipalana no bwikashi buno.” (Abena Roma 12:2) Pa kumfwila ukufunda kwa kwa Paulo, tatufwile ukuleka intambi nelyo ifipimo fya ku calo ukumumunga imitontonkanishishe yesu. Nampo nga kuti mwabomba bupainiya nelyo iyo, lekeni ukubombela Yehova eko kube ukwacindamisha mu bumi bwenu. Mukatunguluka fye nga ca kuti mwaba no bubile kuli Yehova.

[Futunoti]

[Icikope pe bula 19]

Mwiikatwa ku mibombele ya mutatakuya iishinonsha