Ukupeelesha Kulalete Nsansa

PAMO nga kangalila wa Bwina Kristu uwa ba no kutemwa, umutumwa Paulo alisakamene kabili alefwaya ukwafwilisha abasumina banankwe. (2 Abena Korinti 11:28) E ico, ilyo cali mu kati ka mwanda wa myaka uwa kubalilapo uwa Nshita Yesu ateyenye umusangulo uwa Bena Kristu aba mu Yudea ababulilwe, no kubomfya iyi inshita ukubasambilisha isambililo lisuma ilya bukapekape. Paulo akomaile pa kutila ukupeela kwa nsansa kwalikatama nga nshi kuli Yehova. Atile: “Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.”—2 Abena Korinti 9:7.

Mu Bubusu Bukalamba, Lelo na Bakapekape

Abena Kristu abengi aba mu mwanda wa myaka wa kubalilapo tabalumbwike mu bwikashi. Paulo atile ‘te bengi abali na maka’ mu kati kabo. Bali “ifyanaka fya pano isonde,” ‘ifyasaalulwa fya pano isonde.’ (1 Abena Korinti 1:26-28) Ku ca kumwenako, Abena Kristu abaleikala mu Makedonia bali mu “bubusu bukalamba” kabili “mu bucushi.” Nalyo line, aba basumina aba mu Makedonia ababusu balombele ukuti bakwateko fimo ifya kusangula ku “kwafwa abashila”; kabili pa fintu bapeele, Paulo ababeleleko ubunte ukuti fyali “ukucila amaka yabo”!—2 Abena Korinti 8:1-4.

Kabili, bukapekape bwa musango yo tabwapimiinwe mu bwingi bwa fyo umo apeele. Lelo ifyacindeme fyali kucincishiwa, ukuba uwaiteyanya ukwakana na bambi, pamo ne mibele ya mutima. Paulo alangilile ku Bena Kristu ba mu Korinti ukuti balingile ukubikako amano no mutima pa kusangula. Atile: “Ninjishibo kupimpa kwenu, uko ndetakishisha pa mulandu wenu ku bena Makedonia, . . . Kabili ukupimpa kwenu kwacincisha icinabwingi pali abo.” Abena Kristu mu Korinti ‘balipangile mu mitima yabo’ ukupeela mu kuitemenwa.—2 Abena Korinti 9:2, 7.

‘Imitima Yabo E Yabalengele’

Napamo umutumwa Paulo aleibukisha ica kumwenako ca ku numa ica kupeela kwa bukapekape, icacitikile mu matololo ukucila pa myanda ya myaka 15 ilyo talabako. Imikowa 12 iya kwa Israele yalilubwilwe mu busha mu Egupti. Bali mwi samba lya lupili lwa Sinai, kabili Yehova abebele ukukuula ihema lya kupepelamo no kwisushamo ifipe fya kubomfya. Ici calefwaya ifintu ifingi, kabili uluko lwalilalikwe ukusangula.

Ni shani fintu balya bena Israele bayankwileko? “Awe baishileko umuntu onse uo umutima wakwe wamwimishe kabili onse uo umutima wakwe wamulengele ukuitemenwa, na bo balete ca musangulo ca kwa Yehova, ku mulimo we hema lya Kulaishanya.” (Ukufuma 35:21) Bushe ulu luko lwalipeele umusangulo uwingi? Lwapeele uwingi icine cine! Lipoti ukonkelepo apeelwe kuli Mose: “Abantu baleleta fimbi pa fikumene ku bubomfi bwa mulimo uo Yehova aebele ukucita.”—Ukufuma 36:5.

Bushe ukukuma ku lwa fikwatwa abena Israele bali shani pali ilya nshita? Tapaalepele sana, bali abasha abapelelwa, ‘abacululushiwa ku fisendo ifyafina,’ baikele ‘abashikitika,’ mu mikalile iya “kucululuka.” (Ukufuma 1:11, 14; 3:7; 5:10-18) E co, tacimoneka ukuti bali ne fikwatwa ifingi. Ca cine, abena Israele bafumine mu calo ca busha pamo ne mikuni na maombe. (Ukufuma 12:32) Lelo ifyo bafumishe nga tafyafikile ku bwingi bonse basangwile, pantu bwangu bwangu fye pa numa ya kusha Egupti, baliilishenye ukuti tabakwete nama nangu ica kulya.—Ukufuma 16:3.

 Lyene ni kwi kuntu abena Israele bafumishe ifipe basangwilile ku bukuule bwe hema? Bafumishe ku bali kale bashikulu wabo, e kuti abena Egupti. Baibolo itila: “Abana ba kwa Israele . . . balombele ku bena Egupti ifisamo fya silfere ne fisamo fya golde, ne fya kufwala. . . . [Abena Egupti] babapeele ifyo balombele.” Ubu bukapekape bwa bena Egupti bwali lipaalo ukufuma kuli Yehova, te kuli Farao. Icalembwa ca kwa Lesa citila: “Yehova apeele abo bantu ububile mu menso ya bena Egupti, na bo babapeele ifyo balombele. Awe batapile abena Egupti.”—Ukufuma 12:35, 36.

E co, elenganyeni, ifyo abena Israele bayumfwile. Inkulo sha bena Israele shaculile ukupita mu busha bwa kushikitika no kubulwa. Nomba bali abantungwa kabili bali ne fikwatwa ifingi. Ni shani bayumfwile pa lwa kusangwilako fimo ifya ifyo fikwatwa? Napamo nga bayumfwile ukuti balifibombele kabili balikwete nsambu sha kufisunga. Nangu cali fyo, ilyo baebelwe ukusangula ku kwafwilisha ukupepa kwasanguluka, balicitile fyo fine—ukwabulo kufilwa nelyo ukukwata akaso! Tabalabile ukuti Yehova e walengele bene ukukwata ifi fipe. E co, bapeele mu kufusha silfere na golde ne fitekwa fyabo. ‘Baliitemenwe mu mutima.’ ‘Imitima yabo yalibemishe.’ Imitima yabo e yabalengele.’ Icine cine “baletele ica kuitemenwa kuli Yehova.”—Ukufuma 25:1-9; 35:4-9, 20-29; 36:3-7.

Abapimpa mu Kupeela

Ubukulu bwa musangulo te cilangisha bukapekape bwa muntu. Inshita shimo Yesu alemona uko abantu balepoosa indalama mu cipao ce tempele. Aba fyuma bapooselemo indalama ishingi, lelo Yesu atashishe mukamfwilwa mubusu uwapooselemo utunyampuku tubili utwa ndalama. Atile: “Uyu mukamfwilwa mubusu apooselemo icacilamo kuli bonse. . . . ku kubulwa kwakwe apooselemo fyonse ifya maliila ifyo akwete.”—Luka 21:1-4; Marko 12:41-44.

Ukulanda kwa kwa Paulo ku bena Korinti kwali mu kumfwana na ya matontonkanyo ya kwa Yesu. Ukulosha ku kupeelo musangulo wa kwafwilisha abasumina banabo, Paulo atile: “Pantu ukupimpa nga kwabako, kwasekelelwa umo umuntu akwatila, te umo ashakwatila.” (2 Abena Korinti 8:12) Icine cine, imisangulo tayaba cintu cimo ica kulacimfyanishishapo nangu ukulailinganya kuli bambi. Umuntu umwine alingile ukupeela ukulingana no mo akwatile, kabili Yehova asekelela muli bukapekape.

Nangu ca kutila takuli nangu umo uwinganonsha Yehova, umwine uwa fintu fyonse, ukusangula caba lishuko bakapepa bakwata ilya kulangisha ifyo bamutemwa. (1 Imilandu 29:14-17) Ukusangula kuleta ukusekelela ne paalo lya kwa Lesa ni kulya kushiminina pa kumonwa ku bantu nelyo ukwaba na amatontonkanyo ya kaso, lelo ni kulya kufuma ku mutima usuma no  kwafwilisha ukupepa kwa cine. (Mateo 6:1-4) Yesu atile: “Ukupeela ce shuko ukucilo kupokelela.” (Imilimo 20:35) Kuti twaipakisha insansa ukupitila mu kubombesha mu mulimo wa kwa Yehova kabili mu kupatulako ifikwatwa fyesu ku kwafwilisha ukupepa kwa cine no kwafwilisha abalinga ukwafwilisha.—1 Abena Korinti 16:1, 2.

Abapimpa mu Kupeela Ilelo

Lelo, Inte sha kwa Yehova shilasekelela ukumona ukulunduluka mu mulimo wa kushimikila “imbila nsuma iya bufumu” mwi sonde lyonse. (Mateo 24:14) Mu myaka 10 iyapita iya mwanda wa myaka uwalenga 20, ukucila pa bantu 3,000,000 balibatishiwa mu kulangisha ukuipeela kwabo kuli Yehova Lesa, kabili mupepi ne filonganino 30,000 fyalipangwa. Icine cine, cimo muli fitatu ifya filonganino fya Nte sha kwa Yehova ifilipo lelo fyapangilwe mu myaka 10 iyalekelesheko! Uku kulunduluka kuli pa mulandu wa kubombesha kwa baume na banakashi abafumaluka aba Bwina Kristu abaleipeelesha ukutandalila abena mupalamano no kulanda nabo icaba imifwaile ya kwa Yehova. Ukulunduluka kumbi kuli pa mulandu wa mulimo wa bamishonari, abasha amayanda yabo no kuya ku fyalo fya kutali ku kuyaafwilisha mu mulimo wa kushimikila Ubufumu. Ukulunduluka kwalenga ukuteyanishiwa kwa miputule ipya, ne ci calenga ukusontwa kwa bakangalila ba miputule abapya. Ukulundapo, amaBaibolo yalundwako yalakabilwa ukubomfya mu kushimikila na mwi sambililo lya pa lwesu. Ifitabo na fimbi filekabilwa. Kabili mu fyalo ifingi, amaofeshi yalikushiwako nangu ukupyanikwapo ku yakalambako. Konse uku kukabila kwayafwilishiwa ukupitila mu kwafwilishiwa ne misangulo ya kuitemenwa iifuma ku bantu ba kwa Yehova.

Ukukabila kwa Mayanda ya Bufumu

Ukukabila ukukalamba ukulemoneka nomba pa mulandu wa kulunduluka kwa mpendwa ya Nte sha kwa Yehova kuli kwa Mayanda ya Bufumu. Ukufwailisha ukwacitilwe mu kubangilila ukwa mu mwaka wa 2000 kwalangilile ukuti kuli kukabila kwa Mayanda ya Bufumu ukucila pali 11,000 mu fyalo ifipiina. Tontonkanyeni pa calo ca Angola. Te mulandu ne nkondo ya bana calo pa myaka iingi, cilya calo bakasabankanya ba Bufumu balefula pa cipimo ca 10 pesenti cila mwaka . Kabinge, ubwingi ubwa filonganino ifili 675 muli ici calo cikalamba ica mu Africa filonganina pa lwalaala. Mwaba fye Amayanda ya Bufumu 22 mu calo conse, kabili muli aya yonse 12 fye eyakwetepo ifyaba ngo mutenge.

E fyo cili na ku Democratic Republic of Congo. Nangu ca kuti mu musumba wa bwangalishi uwa Kinshasa muli ifilonganino 300, muli fye Amayanda ya Bufumu 10. Ici calo nacikwata ukukabila kwa mu kampampa ukwa Mayanda ya Bufumu 1,500. Pa mulandu wa kwingilishiwako kwa mu kwangufyanya ukwa mu fyalo fya mu Eastern Europe, mu calo ca Russia na Ukraine bacitile lipoti ukuti balekabila Amayanda ya Bufumu ayengi. Ukukula lubilo lubilo ukulecitika ku Latin Amerika kulemoneka sana mu Brazil, umwaba Inte ukucila pali citika wa milioni umo kabili namo mwine muli ukukabila kwa Mayanda ya Bufumu na yambi.

Pa kukumanisha uku kukabila muli fyo fyalo, Inte sha kwa Yehova nashikwata programu uwa kukuula Amayanda ya Bufumu mu kwangufyanya. Uyu programu aleyafwilishiwa ukupitila mu misangulo ya kuitemenwa iya bamunyina ba mwi sonde lyonse, pa kuti ne filonganino fipiina nakalya nakalya, fingakwatako icifulo cisuma ica kupepelamo.

Nga fintu cali na muli Israele wa pa kale, ifingi kuti fyapwishishiwa pantu Abena Kristu abafumaluka ‘balacindika Yehova ku fyuma fyabo.’ (Amapinda 3:9, 10) Ibumba Litungulula ilya Nte sha kwa Yehova kuti lyatemwa ukutasha nga nshi bonse abo imitima yabo yabalenga ukupeelako uyu musangulo wa kuitemenwa. Kabili kuti twacetekelo kuti umupashi wa kwa Yehova ukatwalilila ukucincisha imitima iya bantu bakwe ukwafwilisha umulimo wa Bufumu uulelunduluka cila bushiku umo ulekabila ukwafwilishiwa.

Ilyo ukulunduluka kuletwalilila mwi sonde lyonse, shi natutwalilile ukusange nshila sha kulangishishamo insansa no kuba abaitemenwa mu kupeela amaka yesu, inshita yesu, no bukumu bwesu. Kabili shi natukwate ubuseko bwine bwine ubufuma mu kupeela kwa musango yu.

[Akabokoshi pe bula 29]

“SHIBOMFYENI BWINO!”

Cindy alembele ukuti: “Ndi ne myaka 10. Ndetuma ishi ndalama pa kuti mukashitemo amapepala nelyo icili conse ica kutulembela ifitabo.”

Pam uwa myaka 7 alembele ukuti: “Natemwa ukumutumine shi ndalama sha kutulembela ifitabo na fimbi. Lintu twalebomba na batata e lyo nalesunga isho balempako. E co shibomfyeni bwino!”

Allison uwa myaka 4 alembele ukuti: “Ndi uwa bulanda pa cipuupu ca mwela icacitike. Ndesubila muli fye bwino. Ishi e ndalama [badola babili] shonse shintu nasungile mu kapao kandi.”

“Ishina lyandi nine Rudy, kabili nkwete imyaka 11. Munyinane Ralph ali ne myaka 6. Kabili nkashi yandi Judith ali ne myaka ibili na hafu. Tulasunge ndalama pa sho abafyashi batupa pa myeshi itatu pa kwafwilisha bamunyina [mu fyalo fya nkondo]. Twalisunga amadola 20 ayo tuletuma pali nomba.”

Maclean uwa myaka 8 alembele ukuti: “Ndeumfwilako bulanda bamunyina [abali mu ncende iyo icipuupu ca mwela ca kukileko]. Ilyo nabombele na batata nafolele amadola 17. Nshamwebe ico mufwile ukushita muli ishi ndalama, lelo namulekela ukuipingwila.”

 [Akabokoshi pe bula 31]

Inshila Bamo Babomfya pa Kusangwilako

KU MULIMO WA MWI SONDE LYONSE

Abengi balapaatulako, nelyo ukupekanyako indalama isho babika mu tubokoshi twa misangulo utwalembwapo ati: “Imisangulo ya Mulimo wa mwi Sonde Lyonse uwa Sosaite—Mateo 24:14.” Cila mweshi ifilonganino filatuma ishi ndalama ku maofeshi yakalamba aya calo conse ku Brooklyn, New York, nelyo ku maofeshi yabela mupepi.

Imisangulo ya kuitemenwa iya ndalama na kabili kuti yatumwa mu kulungatika ku Treasurer’s Office, Watch Tower Bible and Tract Society of Pennsylvania, Akabokoshi 33459, Lusaka 10101. Ifibeekobeeko nelyo ifikwatwa fimbi ifya mutengo na fyo fiine kuti fyasangulwa. Kalata umwipi uulelondololo kuti uyu musangulo bupe bwa mu kulungatika, alingile ukutuminwa pamo ne yi misangulo.

UMUSANGULO WA CIPANGANO

Indalama kuti shapeelwa ku Watch Tower Society ukupitila mu kutantika kwaibela ukwa kuti, uulepeela nga alefwaya ukushibomfya kuti bamubwesesha. Nga mulefwaya ukwishibilapo na fimbi, kuti mwalembela ku Treasurer’s Office, Watch Tower Bible and Tract Society of Pennsylvania, Box 33459, Lusaka 10101.

UKUPEKANISHISHA UKUPEELA

Ukusansha pa kupeele ndalama ukwa kulungatika ne misangulo ya cipangano iya ndalama, kwaliba inshila na shimbi isha kupeelelamo ku kwafwilisha umulimo wa Bufumu mwi sonde lyonse. Pali isho nshila paba:

Inshuwalansi: Watch Tower Society kuti yalumbulwa ukuti e ikapokelela indalama sha cipangano ca inshuwalansi nelyo ica kuleke ncito nangu ukupoka penshoni.

Amaakaunti ya ku Banki: Amaakaunti ya ku Banki, amasetifiketi ya ndalama shili ku Banki, nelyo indalama sha kulekelapo incito, kuti fyaseekeshiwa nelyo ukulipilwa ilyo umwine afwa ku Watch Tower Society, ukulingana ne fyo ibanki abikishako indalama lifwaya.

AmaStock na maBond: Amastock na mabond kuti fyasangulwa ku Watch Tower Society ngo bupe bwa mu kulungatika.

Impanga ne Fikuulwa: Impanga ne fikuulwa ifingashitishiwa kuti fyasangulwa ku Watch Tower Society ukupitila mu bupe bwa mu kulungatika nelyo ukwikatila impanga ya ulepeela, uwingatwalilila ukwikalamo ilyo acili umumi. Umo alingile ukwipusha Sosaite ilyo talalembesha ifipepala fya buteko ifya kupeelelapo Sosaite impanga ne fikuulwa.

Ifya Cishale no Kuseekesha: Ifipe nelyo indalama ifya cishale kuti fyapeelwa ku Watch Tower Society ukupitila mu fipepala fya cishale ifya mwi funde, nelyo Sosaite kuti yalembwa mu cipangano ca kuseekesha ifipe nelyo indalama. Inshita shimo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Ishiwi lya kuti “ukupekanishisha ukupeela” lilangilila ukuti uulesangula ukubomfya ishi nshila alekabila ukupekanishisha kabela. Pa kwafwilishako abo bengatemwa ukupeela Sosaite ukubomfya inshila sha kupekanishisha ukupeela, Sosaite yalilembako broshuwa mu ciNgeleshi ne cina Spain uwa mutwe wa kuti Planned Giving to Benefit Kingdom Service Worldwide. Uyu broshuwa alembelwe ukwasuka amepusho ayengi ayo Sosaite yapokelela pa lwa kupeela ubupe ku Sosaite, na pa lwa kupeela ifipe fya cishale no kuseekesha ku Sosaite. Na kabili mwaba ifyebo fya kwafwa nga nshi pa lwa kupeela nelyo ukuseekesha impanga ne fikuulwa, ukupeela indalama, ne fya kupekanishisha ukulipila imisonko. Na kabili yalembelwa ku kwafwa aba ku United States, abalefwaya ukupeela Sosaite ifya bupe fyaibela pali ino ine nshita, nelyo ukuti ilyo bakafwa bakalemba ifipepala fya kushiila Sosaite ifya cishale ifingabawamina pamo ne ndupwa shabo. Nga mulefwaya uyu broshuwa kuti mwalembela iofeshi.

Pa numa ya kubelenga broshuwa no kulanshanya ne ofeshi, abengi balyafwilisha Sosaite kabili pa nshita imo ine, balipusushako sana icuma ku misonko yaluma. Iofeshi lya Charitable Planning Office lifwile ukwishibishiwa pa lwa fipepala fyonse ifya misangulo ya musango yo. Nga mulefwaya ukupeela ukupitila mu nshila ya kupekanishisha ukupeela mulingile ukwipusha iofeshi lya Charitable Planning Office, ukupitila mu kulemba nelyo ukutuma lamya ukubomfya akeyala kali pe samba.

TREASURER’S OFFICE

Watch Tower Bible and Tract Society of Pennsylvania

Box 33459, Lusaka 10101

Telefoni: 272062