Abena Kristu Balasanga Insansa mu Kubomba

“Mwaliba insansa ishingi mu kupeela ukucila mu kupokelela.”—IMILIMO 20:35, NW.

1. Mibele nshi iyalubana ili mpanga yonse ilelo, kabili mulandu nshi yabipila?

MU MYAKA ya kulekelesha iya ba 1900, ishiwi lya kuti “me-ism” lyaleumfwika sana. Na kuba “me-ism” ipilibula “bukaitemwe” kabili ilangilila bukaitemwe no bufunushi ukwabula ukulangulukilako bambi. Kuti twashininkisha ukuti mu mwaka wa 2000 me-ism e mo icili. Miku inga mumfwa ifipusho fya kuti, “Finshi nalasangamo?” nelyo, “Nalanonkelamo finshi?” Bukaitemwe bwa musango yu tabuleta nsansa. Bupusano bwa cishinte Yesu alandile ica kuti: “Mwaliba insansa ishingi mu kupeela ukucila mu kupokelela.”—Imilimo 20:35.

2. Mulandu nshi twingasosela ati ukupeela kulaleta insansa?

² Bushe ca cine ukuti ukupeela kulaleta insansa shacila pa kupokelela? Ee. Tontonkanyeni ulwa kwa Yehova Lesa. E “kamfukumfuku ka mweo.” (Amalumbo 36:9) Alapayanya fyonse ifyo tukabila ku kuleka tube ne nsansa kabili ababomba bwino. Cine cine, e Kamfukumfuku ka “ca kupeelwa conse icisuma ne ca bupe conse icafikapo.” (Yakobo 1:17) Yehova, “Lesa [wa nsansa, NW],” lyonse alapeela. (1 Timote 1:11) Alitemwa ububumbo bwakwe ubwa bantunse, abo apeela ifingi. (Yohane 3:16) Na kabili, tontonkanyeni pa lupwa lwa bantunse. Nga muli bafyashi, mwalishiba ifyo muipusula mu fingi ne fyo mupeela pa kukusha umwana. Kabili pa myaka iingi umwana teshiba ifyo muipusula. Tapoosako na mano ku fyo muipusula. Nalyo line, mulaba ne nsansa ukumona umwana wenu alelunduluka pa mulandu wa kupeela kwenu ukwabula bukaitemwe. Mulandu nshi? Pa mulandu wa kuti mwalimutemwa.

3. Mulandu nshi cabela ica buseko ukubombela Yehova na basumina banensu?

³ Mu nshila imo ine, ukupepa kwa cine kwishibishiwa ku kupeela kwashimpwa pa kutemwa. Apo twalitemwa Yehova na basumina banensu, ca nsansa ukubabombela, ukuipeela kuli bene. (Mateo 22:37-39) Abali bonse abapepela Lesa muli bukaitemwe tabakwata ubuseko. Lelo ababomba ukwabula bukaitemwe, abaangwa sana ku fyo bengapeela ukucila ifyo bengapokelela, balasanga insansa cine cine. Ici cishinka kuti twacumfwikisha ilyo twabebeta ifyo amashiwi yamo yamo aya mu Baibolo ayalosha ku kupepa kwesu yabomfiwa mu Malembo. Twalalanshanya amashiwi yatatu muli ici cipande ne cikonkelepo.

Umulimo wa kwa Yesu uwa ku Cintubwingi

4. “Umulimo wa ku cintubwingi” mu Kristendomu waba shani?

⁴ Mu ciGriki ca kutendekelako, ishiwi limo ilyakuma ku kupepa ni lei·tour·giʹa, ilyapilibulwa “umulimo wa ku cintubwingi muli Baibolo wa New World Translation. Mu Kristendomu kwi shiwi lya kuti lei·tour·giʹa eko bafumya ishiwi lya kuti  “amapepo.” * Lelo, imipepele ya mu Kristendomu te mulimo uunonsha icintubwingi.

5, 6. (a) Mulimo nshi uwa ku cintubwingi walecitwa mu Israele, kabili busuma nshi bwalimo? (b) Mulimo nshi uwa ku cintubwingi uwacilapo wapyene pali ulya walecitwa mu Israele, kabili mulandu nshi?

⁵ Umutumwa Paulo abomfeshe ishiwi lya ciGriki ilyakuma kwi shiwi lya lei·tour·giʹa ukulosha kuli bashimapepo abena Israele. Atile: “Shimapepo onse eminina akasuba na kasuba [ku kubomba umulimo wa ku cintubwingi, NW] [umusango wa lei·tour·giʹa] aletuula ilingi amalambo yamo yene.” (AbaHebere 10:11) Bashimapepo abena Lebi balebomba umulimo wa ku cintubwingi uwacindama mu Israele. Basambilishe Amalango ya kwa Lesa no kupeela amalambo ayalefimba pa membu sha bantu. (2 Imilandu 15:3; Malaki 2:7) Ilyo bashimapepo na bantu balekonka Amalango ya kwa Yehova, aba muli lulya luko balekwata imilandu ya kubela abasamwa.—Amalango 16:15.

⁶ Ukubomba umulimo wa ku cintubwingi umwabela Amalango kwali lishuko line line kuli bashimapepo abena Israele, lelo umulimo wabo walilekele ukuba uwacindama lintu Israele bamukene pa mulandu wa kubulwa ubusumino. (Mateo 21:43) Yehova atantike icacilapo ukukatama—umulimo wa ku cintubwingi uwacitilwe na Yesu, Shimapepo Mukalamba. Ulwa wene tubelenga ukuti: “Wene, apo aikala umuyayaya, aba na bushimapepo [bushakwata impyani, NW]. E ico kabili aba na maka pe aya kupusushisha abeshila muli wene kuli Lesa, pa kuba no mweo pe ku kubapaapaatila.”—AbaHebere 7:24, 25.

7. Mulandu nshi umulimo wa ku cintubwingi uwa kwa Yesu uletela ubusuma bushingalinganishiwako?

⁷ Yesu atwalilila ukuba shimapepo kuli pe na pe, ukwabula impyani. Na muli fyo, ni wene fye e wingapususha abantu umupwilapo. Abomba uyo mulimo wa ku cintubwingi uushingalinganishiwako, te mwi tempele lyakuulwa ku bantu, lelo mwi tempele lya cimpashanya, ukutantika kukalamba ukwa kwa Yehova ukwa kupepa ukwatendeke mu 29 C.E. Yesu nomba abomba Umwashilisha umwa lilye tempele, mu muulu. “[Mubomfi wa ku cintubwingi, NW] [lei·tour·gosʹ] uubomba umwashila, mwi hema line line ilyaimikwe kuli Shikulu te ku bantu iyo.” (AbaHebere 8:2; 9:11, 12) Nangu cingati Yesu alikwata icifulo casumbuka, acili “mubomfi wa ku cintubwingi.” Abomfya amaka yakwe ayakalamba ku kupeela te ku kupokelela. Kabili ukupeela kwa musango yu kulamuletela ubuseko. Kwaba lubali lwa “kusekelela ukwabikilwe pa ntanshi yakwe” kabili ico calimukoseshe ukushipikisha mu bumi bwakwe bonse pe sonde.—AbaHebere 12:2.

8. Yesu abombele shani umulimo wa ku cintubwingi ku kufumyapo icipingo ce Funde?

⁸ Kwaliba ulubali na lumbi ulwa mulimo wa kwa Yesu uwa ku cintubwingi. Paulo alembele ukuti: “Wene amono mulimo uwacilamo [uwa ku cintubwingi], ifyo aba kabili kawiikishanya wa cipingo icawamisha ukucila, icaimikilwa pa filayo ifyawamisho kucila.” (AbaHebere 8:6) Mose ali kawiikishanya wa cipingo icali e shintililo lya bucibusa bwa kwa Israele na Yehova. (Ukufuma 19:4, 5) Yesu ali kawiikishanya wa cipingo cipya, icalengele ukuti uluko lupya lufyalwe, “Israele wa kwa Lesa,” uwapangwa na Bena Kristu basubwa no mupashi abafuma mu nko ishingi. (Abena Galatia 6:16; AbaHebere 8:8, 13; Ukusokolola 5:9, 10) Mwandi uyo wali mulimo wawamisha uwa ku cintubwingi! Twaliba aba nsansa ukwishiba Yesu, umubomfi wa ku cintubwingi uyo ukupitila muli wene twingapepa Yehova mu nshila iisuma!—Yohane 14:6.

Abena Kristu Nabo Balabomba Umulimo wa ku Cintubwingi

9, 10. Milimo nshi imo iya ku cintubwingi iyo Abena Kristu babomba?

⁹ Takwaba umuntunse uubomba umulimo wa ku cintubwingi uwasumbuka ngo wa kwa Yesu. Lelo, lintu Abena Kristu basubwa bapokelela icilambu cabo ica ku muulu, baba pamo na Yesu no kubombela pamo nankwe umulimo wa ku cintubwingi pa kuba ishamfumu sha mu muulu na bashimapepo. (Ukusokolola 20:6; 22:1-5) Nalyo line, Abena Kristu pe sonde balabomba umulimo wa ku cintubwingi, kabili balasanga ubuseko ubukalamba mu kucite fyo. Ku ca kumwenako, lintu kwali icipowe mu Palestine, umutumwa Paulo asendele ifya bupe ukufuma kuli bamunyina aba ku Bulaya ku kwafwa Abena Kristu ba ciYuda mu Yudea abali mu macushi. Uyo wali mulimo  wa ku cintubwingi. (Abena Roma 15:27; 2 Abena Korinti 9:12) Ilelo, Abena Kristu balatemwa ukubomba umulimo umo wine, ukwafwilisha ilyo line lintu bamunyina bacululuka, lintu kwaba utuyofi tulengwa ne fyabumbwa, nelyo utuyofi tumbi.—Amapinda 14:21.

¹⁰ Paulo alandile pa mulimo wa ku cintubwingi na umbi lintu alembele ukuti: “Nga naitilwa pe lambo na pa kupyunga [ku cintubwingi] ifya citetekelo cenu, ndesekelela no kusaminwa pamo na imwe bonse.” (Abena Filipi 2:17) Umulimo Paulo alebombela abena Filipi wali mulimo wa ku cintubwingi uwa kutemwa no kupikintika. Umulimo wa ku cintubwingi umo wine ulebombwa ilelo, maka maka ku Bena Kristu basubwa, ababomba ngo “musha wa cishinka kabili uwashilimuka,” uulepayanya ica kulya ca ku mupashi pa nshita iyene. (Mateo 24:45-47) Na kabili, pamo nge bumba, aba baba ni ‘bashimapepo ba mushilo’ abatumwa “ukutuulila amalambo ya bumupashi ayasekelelwa kuli Lesa muli Yesu Kristu” no kuti ‘balondolole ifya bulumba fya wabetile ukuti bafume mu mfifi bengile mu lubuuto lwakwe ulwapesha amano.’ (1 Petro 2:5, 9) Ukupala Paulo, balasekelela mu milimo ya musango yu ilyo ‘baleitiila’ mu kufishapo ifishingamo fyabo. Kabili abanabo aba “mpaanga shimbi” bailunda kuli bene no kubatungilila mu mulimo wa kweba abantunse pa lwa kwa Yehova ne mifwaile yakwe. * (Yohane 10:16; Mateo 24:14) Mwandi uyo mulimo wa ku cintubwingi uukalamba kabili uwa buseko!—Amalumbo 107:21, 22.

Bombeni Umulimo Washila

11. Kasesema mwanakashi Ana apayenye shani ica kumwenako cisuma ku Bena Kristu bonse?

¹¹ Ishiwi lya ciGriki limbi ilyakuma ku kupepa kwesu ni la·treiʹa, ilyapilibulwa “umulimo washila” muli Baibolo wa New World Translation. Umulimo washila kupepa. Ku ca kumwenako, mukamfwilwa wa myaka 84 kabili kasesema mwanakashi Ana alondololwa ukuti “talepuswa pe tempele, ubushiku na kasuba alebomba umulimo washila [ishiwi lya ciGriki ilyalosha kuli la·treiʹa], ukuleko kulya kabili ukupepa.” (Luka 2:36, 37, NW) Ana alepepa Yehova lyonse. Aba ca kumwenako cisuma kuli ifwe bonse—abacaice na bakalamba, abaume na banakashi. Nga fintu Ana alepepa kuli Yehova no mukoosha no kumupepa lyonse pe tempele, umulimo wesu uwashila usanshamo amapepo no kusangwa ku kulongana.—Abena Roma 12:12; AbaHebere 10:24, 25.

12. Cinshi caba ulubali lukalamba ulwa mulimo wesu uwashila, kabili caba shani mulimo wa ku cintubwingi?

¹² Umutumwa Paulo alumbwile ulubali lukalamba ulwa mulimo wesu uwashila lintu alembele ukuti: “Inte yandi ni Lesa, uo ndebombela [umulimo washila, NW] no mutima wandi mu mbila nsuma ya Mwana wakwe, ifyo imulumbula pe no kukanaleka pa kupepa kwandi.” (Abena Roma 1:9) Cine cine, ukushimikila imbila nsuma takwaba fye mulimo wa ku cintubwingi ku bomfwa lelo kwaba kupepa kuli Yehova Lesa. Nampo nga twasanga abalekutika nelyo iyo, umulimo wa kushimikila mulimo washila kuli Yehova. Ukwabula no kutwishika ukutukuta kwesu mu kweba bambi imibele isuma ne mifwaile ingatunonsha iya kwa Shifwe wa mu muulu uwa kutemwa kulatuletela ubuseko bukalamba.—Amalumbo 71:23.

Ni Kwi Tubombela Umulimo Washila?

13. Lisubilo nshi lyakwata ababomba umulimo washila mu lubansa lwa mu kati ulwe tempele lya ku mupashi ilya kwa Yehova, kabili ni bani basekelela pamo na bene?

¹³ Ku Bena Kristu basubwa, Paulo alembele ukuti: “Tube abatootela pa kupokelelo bufumu ubushitenshiwa;  kabili e fyo [tubombele Lesa umulimo washila, NW] ukumutemuna no bufuuke na katiina.” (AbaHebere 12:28) Pa kucetekela ukuti bakapyana Ubufumu, abasubwa baba ne citetekelo cishingatenshiwa ilyo balepepa Uwapulishamo. Ni bo fye bengamubombela umulimo washila mu muputule wa Mushilo na mu lubansa lwa mu kati ke tempele lya kwa Yehova ilya ku mupashi, kabili balafwaisha ukubombela pamo na Yesu Umwashilisha, mu muulu mwine. Abanabo, aba mpaanga shimbi, balasekelela pamo na bene mwi subilo lyabo ilishaiwamina.—AbaHebere 6:19, 20; 10:19-22.

14. Busuma nshi ibumba likalamba lisanga mu mulimo wa ku cintubwingi uwa kwa Yesu?

¹⁴ Lelo, ni shani ulwa mpaanga shimbi? Nga fintu umutumwa Yohane amwenene libela, ibumba likalamba ilya ishi mpaanga lyalimoneka muli ishi nshiku sha kulekelesha, kabili ‘balisamba amalaya yabo, no kuyabuutusha mu mulopa wa Mwana wa mpaanga.’ (Ukusokolola 7:14) Ici calola mu kuti, nga bakapepa banabo abasubwa, batetekela mu mulimo wa ku cintubwingi uwa kwa Yesu, ukutuulila abantu umweo wakwe uwa buntunse uwapwililika. Aba mpaanga shimbi na bo balasanga ubusuma mu mulimo wa ku cintubwingi uwa kwa Yesu mu kuti ‘bekaatishe cipingo [ca kwa Yehova].’ (Esaya 56:6) Tababa mu cipingo cipya, lelo balicikatisha mu kuti bomfwila amafunde ya ciko no kubombela pamo no kutantika kucitwa ukupitila muli cene. Babishanya na Israele wa kwa Lesa, ukuliila pe tebulo limo line ilya ku mupashi no kubombela pamo na baba muli Israele wa kwa Lesa, ukulumbanya Lesa ku cintubwingi no kutuula amalambo ya ku mupashi ayamutemuna.—AbaHebere 13:15.

15. Ni kwi ibumba likalamba libombela umulimo washila, kabili ili shuko libakuma shani?

¹⁵ E co, abe bumba likalamba bamonwa “nabeminina ku menso ya cipuna ca bufumu, na ku menso ya Mwana wa mpaanga, nabafwala amalaya yabuuta.” Kabili, “Bali ku cinso ca cipuna ca bufumu ca kwa Lesa, balemubombela [umulimo washila, NW] na mwi tempele lyakwe akasuba no bushiku; kabili uwaikala pa cipuna ca bufumu akabe cintelelwe pali bene.” (Ukusokolola 7:9, 15)  Mu Israele, insangu balepepela mu lubansa lwa ku nse ulwe tempele lya kwa Solomone. Mu nshila imo ine, ibumba likalamba lipepela Yehova mu lubansa lwa ku nse ulwe tempele lyakwe ilya ku mupashi. Ukubombelamo kubalenga ukusamwa. (Amalumbo 122:1) Nangu ni lintu uwa kulekelesha uwa basubwa babishanya na bo apokelela ubupyani bwakwe ubwa ku muulu, bakatwalilila ukubombela Yehova umulimo washila pa kuba abantu bakwe.—Ukusokolola 21:3.

Umulimo Washila Uushipokelelwa

16. Kusoka nshi kupeelwa pa lwa mulimo washila?

¹⁶ Mu nshiku sha kwa Israele wa ku kale, umulimo washila walebombwa mu kumfwana na malango ya kwa Yehova. (Ukufuma 30:9; Ubwina Lebi 10:1, 2) Mu nshila imo ine ilelo, kwaliba ifyo tufwile ukukonka nga ca kuti umulimo wesu uwashila uli no kupokelelwa kuli Yehova. E mulandu wine Paulo alembeele abena Kolose ukuti: “Tatwaleka kumupepela, no kulombo kuti mwisulemo ukwishibo kufwaya kwakwe mu mano yonse no mucetekanya ifya bumupashi, ku kuleka mwende umwawamina Shikulu ku kutemuna konse. Mu mulimo onse usuma mube abatwale fisabo, kabili abalekula mu kwishiba Lesa.” (Abena Kolose 1:9, 10) Te cesu ukupingula inshila isuma iya kupepelamo Lesa. Ukwishiba kwa mu Malembo ukwalungika, ukumfwikisha ifya ku mupashi, na mano ya bukapepa fyalicindama. Naakana nga te ifyo, ifingafumamo kuti fyaba ifyabipa.

17. (a) Umulimo washila waonawilwe shani mu nshiku sha kwa Mose? (b) Umulimo washila kuti waonaulwa shani ilelo?

¹⁷ Ibukisheni abena Israele aba mu nshiku sha kwa Mose. Tubelenga ukuti: “Lesa alipilibwike, no kubalekelesha ku kubombele tulwe lya mu muulu [umulimo washila, NW].” (Imilimo 7:42) Balya bena Israele balimwene imilimo ya maka iyo Yehova abacitile. Lelo bapilibukile ku milungu imbi lintu batontonkenye ukuti ici kuti cabawamina. Tabali ba bucishinka, kabili bucishinka bulakabilwa nga ca kuti umulimo wesu uwashila uli no kutemuna Lesa. (Amalumbo 18:25) Ca cine ukuti banono ilelo abengafuma kuli Yehova ku kuya mu kupepa intanda nelyo abana ba ng’ombe aba golde, lelo kwaliba imisango imbi iya kupepa utulubi. Yesu asokele ukuti tatufwile ukubombela “Mamone,” kabili Paulo aitile ulunkumbwa ukuti kupepa utulubi. (Mateo 6:24; Abena Kolose 3:5) Satana aibika pa kuba umulungu. (2 Abena Korinti 4:4) Ukupepa utulubi ukwa musango yu kwalifula kabili kwaba citeyo. Ku ca kumwenako, tontonkanyeni pa lwa muntu uuitunga ukukonka Yesu lelo ubuyo bwakwe mu bumi bwa kuba umukankaala nelyo umuntu uwaicetekela kabili uwacetekela na mu mfundo shakwe. Ni ani alebombela icine cine? Apusana shani na baYuda ba mu nshiku sha kwa Esaya abalapile ishina lya kwa Yehova lelo abalelumbanya utulubi tushasanguluka pa fikalamba ifyo Yehova alecita?—Esaya 48:1, 5.

18. Umulimo washila wabombwa shani mu nshila iyalubana ku kale na ilelo?

 ¹⁸ Yesu na kabili asokele ukuti: “Ikese nshita iya kuti onse uwamwipaya akatila e kubombela Lesa [umulimo washila, NW].” (Yohane 16:2) Sauli, uwaishileba umutumwa Paulo, ukwabula ukutwishika aleti kubombela Lesa lintu ‘asuminishe ukwipaya Stefani’ no ‘kutusaila amapange yakali ne misoka ku basambi ba kwa Shikulu.’ (Imilimo 8:1; 9:1) Ilelo, abakufyo mukowa bamo bamo no kwipayaula abantu na bo baitunga ukuti balapepa Lesa. Kwaliba abantu abengi abaitunga ukupepa Lesa, lelo bapepa imilungu ya kutemwisha icalo, ukutemwisha umushobo, icuma, ukuitemwa, nelyo imilungu imbi.

19. (a) Tumona shani umulimo wesu uwashila? (b) Mulimo nshi uwashila uukatuletela ubuseko?

¹⁹ Yesu atile: “Sokulu Lesa obe e o ulepepa, kabili wene eka e o ulebombela [umulimo washila, NW].” (Mateo 4:10) Aleeba Satana, lelo ifyo cacindama ukuti ifwe bonse tuleumfwila amashiwi yakwe! Ukubombela Shikulu Mulopwe uwa mu bubumbo bonse umulimo washila lishuko ilikalamba nga nshi kabili ilya kutiinya. Kabili cinshi cingasoswa pa lwa kubomba umulimo washila uwakuma ku kupepa kwesu? Ukucitile ci abantu banensu mulimo wa buseko uuleta insansa shikalamba. (Amalumbo 41:1, 2; 59:16) Nalyo line, umulimo wa musango yu ulaleta insansa shine shine kulila fye wabombwa no mweo onse kabili mu nshila yalungama. Ni bani bapepa Lesa bwino cine cine? Mulimo washila uwa bani Yehova apokelela? Kuti twayasuka ifipusho fya musango yu nga twabebeta ishiwi lya butatu mu Baibolo ilyakuma ku kupepa kwesu. Tuli no kucite ci mu cipandwa cikonkelepo.

[Amafutunoti]

Kuti Mwayasuka Shani?

• Mulimo nshi uukalamba uwa ku cintubwingi uo Yesu abombele?

• Mulimo nshi uwa ku cintubwingi Abena Kristu babomba?

• Umulimo washila uwa Bwina Kristu cinshi, kabili ni kwi ubombelwa?

• Finshi tulingile ukukwata nga ca kuti umulimo wesu uwashila uli no kutemuna Lesa?

[Amepusho]

[Icikope pe bula 10]

Abafyashi balasanga ubuseko bukalamba mu kupeela

[Ifikope pe bula 12, 13]

Abena Kristu balabomba umulimo wa ku cintubwingi lintu baleafwilisha bambi na lintu balebila imbila nsuma

[Icikope pe bula 14]

Tukabila ukwishiba kwalungika no kumfwikisha uko kwishiba ku kushininkisha ukuti umulimo wesu uwashila uli uwapokelelwa kuli Lesa