Bushe Ifishimiko fya kwa Yehova Mwalifitemwisha?
Bushe Ifishimiko fya kwa Yehova Mwalifitemwisha?
“Umutima wandi wasunge fishimiko fyenu, kabili nalifitemwisha.”—AMALUMBO 119:167.
1. Ni mwi buuku nshi na kucilisha tusanga amashiwi yalanda pa fishimiko fya kwa Yehova mu kubwekeshabwekeshapo?
YEHOVA afwaya abantu bakwe ukuba aba nsansa. Nalyo line, pa kuipakishe nsansa shine shine, tufwile ukwendela mwi funde lya kwa Lesa no kumfwila amafundisho yakwe. Pa kuti cibe fyo, alatupa ifishimiko. Ifishimiko fyalilandwapo mu kubwekeshabwekeshapo mu Malembo, na kucilisha mwi Lumbo lyalenga 119, ilyashikilwe nalimo na Hisekia Cilolo wacaice uwa mu Yuda. Ulu lwimbo lushaiwamina lutendeka na mashiwi ya kuti: “Balishuka ababa ba mpomfu mu mibele yabo, abenda mu malango ya kwa Yehova! Balishuka abasunge fishimiko fyakwe, abamufwaya imitima yabo yonse.”—Amalumbo 119:1, 2.
2. Bushe ifishimiko fya kwa Lesa kuti fyaleta shani insansa?
2 ‘Twenda mu malango ya kwa Yehova’ ukupitila mu kusambilila ukwishiba kwine kwine ukwa Cebo cakwe no kucibomfya mu mikalile. Kabinge, apo twaba abashapwililika, tukabila ifishimiko. Ishiwi lya ciHebere ilyapilibulwa “ifishimiko” lilangilila ukuti Lesa alatucinkulako pa lwa malango yakwe, ifya kulangulula, amafunde yakwe, ne fipoope fyakwe. (Mateo 10:18-20) Tukatwalilila aba nsansa lyeka fye lintu tulebaka ifyo fishimiko, pantu filatwafwa ukutaluka ku fiteyo fya ku mupashi ifingaleta amafya no bulanda.
Lambatileni ku Fishimiko fya kwa Yehova
3. Ukulingana na Amalumbo 119:60, 61, kucetekela nshi twakwata?
3 Ifishimiko fya kwa Lesa fyalicindeme kuli kemba wa malumbo uwaimbile ati: “Naendesha, no kukanashingashinga, ku kubaka amafunde yenu; imyando ya babifi yankobana, amalango yenu nshalaba.” (Amalumbo 119:60, 61) Ifishimiko fya kwa Yehova filatwafwa ukushipikisha ifya kwesha pantu twacetekela ukuti Shifwe wa ku muulu kuti aputaula imyando ya kutukanya iyo abalwani bengatukaka. Mu kuya kwa nshita, alatupokolola ku fipindami fya musango yo pa kuti twingabomba umulimo wa kushimikila pa lwa Bufumu.—Marko 13:10.
4. Bushe tulingile ukwankulako shani ku fishimiko fya kwa Lesa?
4 Inshita shimo shimo, ifishimiko fya kwa Yehova filatulungika. Shi lyonse natuletasha pali uko kulungika, nge fyo kemba wa malumbo acitile. Mwi pepo aebele Lesa ukuti: “Ifishimiko fyenu e kupekwa kwandi . . . natemwe fishimiko fyenu.” (Amalumbo 119:24, 119) Twalikwata ifishimiko fya kwa Lesa ifingi ukucila ifyo kemba wa malumbo akwete. Imintapendwa ya Malembo ya ciGriki ayaambulwa mu Malembo ya ciHebere yatucinkulako pa lwa mafundisho ya kwa Yehova ayo apeele abantu bakwe abali pe samba lye Funde na pa lwa mifwaile yakwe ukulosha ku cilonganino ca Bwina Kristu. Ilyo Lesa amona ukuti nacilinga ukutucinkulako pa fintu fyakuma amafunde yakwe, tulatasha pa butungulushi bwa musango yo. Kabili ukupitila mu ‘kulambatila ku fishimiko fya kwa Yehova,’ tulataluka ku fya kubeleleka fya lubembu ifishisekesha Kalenga wesu kabili ifitupusula insansa.—Amalumbo 119:31.
5. Kuti twatemwisha shani ifishimiko fya kwa Yehova?
5 Kufika pi tulingile ukutemwa ifishimiko fya kwa Yehova? Kemba wa malumbo aimbile ati, “umutima wandi wasunge fishimiko fyenu, kabili nalifitemwisha.” (Amalumbo 119:167) Tukatemwisha ifishimiko fya kwa Yehova nga ca kutila tulemona no kupokelela fyene nge fyafuma kuli Shifwe uutusakamana. (1 Petro 5:6, 7) Tulakabila ifishimiko fyakwe, kabili ukufitemwisha kwesu kukakula lintu twamona ifyo filetunonsha.
Umulandu Tukabila Ifishimiko fya kwa Lesa
6. Mulandu nshi umo uo tukabila ifishimiko fya kwa Yehova, kabili cinshi cikatwafwa ukufibukisha?
6 Umulandu umo uo tukabila ifishimiko fya kwa Yehova wa kuti twaba ne cilafi. Icitabo ca The World Book Encyclopedia cisosa ukuti: “Abantu bonse, balaya balelaba mu kupita kwa nshita. . . . Napamo na imwe bene mwalilabako ishina nelyo ifyebo fimo ifyo mwaleibukisha. . . . Ico cilafi ca pa kashita kanono, icicitika libili libili, citwa ati retrieval failure (e kuti ukufilwa ukusanga). Basayantisti balinganya icilafi ca musango yo ku kufilwa ukusanga icintu cimo mu muputule umuli ifintu ifingi ifili insansalila. . . . Inshila isuma iya kushininkishishamo ukuti tamulabile ilyashi limo yaba kusambililapo sana.” Ukupoosako amano kwi sambililo no kubwekeshabwekeshapo kukatwafwa ukwibukisha ifishimiko fya kwa Lesa no kufikonka pa kuti cituwamine.
7. Mulandu nshi ifishimiko fya kwa Lesa fibelele ifyakabilwa lelo ukucila lyonse?
7 Tulekabila ifishimiko fya kwa Yehova lelo ukucila lyonse pantu ububifi nabufulisha ukucila ifyo bwali kale. Nga twayangwa ifishimiko fya kwa Lesa, tulaba no kushilimuka kukabilwa pa kutaluka ku kucebusha kutwala mu mibele yabipa iya calo. Kemba wa malumbo atile, “Nailuko kucila bakasambilisha bandi bonse, pantu ifishimiko fyenu e kwetetula kwandi. Nabo wailuko kucila abakote, pantu nsunge fya kulangulula fyenu. Ndama amakasa yandi ku nshila yonse ibi, ku kuleka ndebake cebo cenu.” (Amalumbo 119:99-101) Ukubaka ifishimiko fya kwa Lesa kukatutalusha ku “nshila yonse ibi” kabili tatwakabe nge cinabwingi ca bantu, abo “amano yabo yayaluke mfifi, pa kuba abanunuka ku mweo wa kwa Lesa.”—Abena Efese 4:17-19.
8. Kuti twaipangasha shani bwino no kutunguluka ilyo tulepita mu mesho ya citetekelo?
8 Ifishimiko fya kwa Lesa na kabili filakabilwa pa mulandu wa kuti filatukosha ku kushipikisha amesho ayengi muli ino “nshita ya ku mpela.” (Daniele 12:4) Ukwabula ifyo fishimiko kuti twaba ‘bakoomfwa ba cilafi.’ (Yakobo 1:25) Lelo isambililo lya pa lwesu ne sambililo lya cilonganino ukubomfya impapulo shifuma ku “musha wa cishinka kabili uwashilimuka,” fikatwafwa ukutunguluka mu kushipikisha amesho. (Mateo 24:45-47) Ukuteyanya kwa musango yo ukwa ku mupashi kutulenga ukumona ifyo tulingile ukucita pa kusekesha Yehova ilyo tuleeshiwa.
Ulubali Lwacindama Ulwa Kulongana Kwesu
9. Ni bani baba “fya bupe ku bantu,” kabili baafwa shani abasumina banabo?
9 Inshila imo iyo ukukabila kwesu ukwa fishimiko fya kwa Lesa kufishiwamo yaba kupitila mu kulongana kwa Bwina Kristu, uko tusambilishiwa kuli bamunyina basontwa. Umutumwa Paulo alembele ukuti ilyo Yesu ‘aninine aile mu muulu, atwele umulalo muli bunkole, apeele ne fya bupe ku bantu.’ Paulo alundilepo ukuti: “[Kristu] apeele bamo ukuba abatumwa, na bambi ukuba bakasesema, na bambi ukuba ababile mbila nsuma, na bambi ukuba abacemi na bakasambilisha, ku kuwamya abashila, ku mulimo wa kupyungila, ku kukuulo Mubili wa kwa Kristu.” (Abena Efese 4:8, 11, 12) Mwandi tulatasha pa fyo ababa “fya bupe ku bantu”—baeluda basontwa—batusambilisha ifishimiko fya kwa Yehova ilyo tukumana pamo ku kupepa!
10. Cishinka nshi icikalamba icaba pa AbaHebere 10:24, 25?
10 Ukutasha pa kupela kwa bulesa ku katulenga ukusangwa ku kulongana kwesu kusano ukwa pa cilonganino cila mulungu. Paulo akomaile pa bucindami bwa kulongana capamo. Alembele ati: “Twetetule umwa kucincimushanisha ku kutemwa kabili ku kubombe milimo isuma; twiba abaleko kulongana, ifyo wabo musango wa bamo, lelo tukonkomeshanye, pali bufi apo mulemono Bushiku bulya bulepalama.”—AbaHebere 10:24, 25.
11. Ni shani fintu ukulongana kumo kumo ukwa cila mulungu kutunonsha?
11 Bushe mulatasha pa fyo ukulongana kutucitila? Isambililo lya Ulupungu lwa kwa Kalinda ilya cila mulungu lilakosha icitetekelo cesu, lilatwafwa ukukonka ifishimiko fya kwa Yehova, kabili lilatukosha ukutaluka ku “mupashi wa pano isonde.” (1 Abena Korinti 2:12; Imilimo 15:31) Pa Kulongana kwa pa Cintubwingi, bakalanda batungulula ukufuma mu Cebo ca kwa Lesa, ukubikapo ne fishimiko fya kwa Yehova ne “fyebo fya mweo wa muyayaya” ifishaiwamina ifya kwa Yesu. (Yohane 6:68; 7:46; Mateo 5:1–7:29) Imisambilishishe yesu ilawaminako ilyo tuli pe Sukulu lya Butumikishi bwa Teokrasi. Ukulongana kwa Mulimo kwalicindama mu kutwafwa ukuwamya imishimikile ya mbila nsuma ku ng’anda ne ng’anda, mu fipempu fya kubwelelamo, pa masambililo ya Baibolo aya pa ng’anda, ne nshila shimbi isha butumikishi bwesu. Ibumba ilinono iliba pe Sambililo lya Citabo pa Cilonganino litupeela ishuko likalamba ilya kulandapo ifintu ifyo ilingi line fisanshamo ifishimiko fya kwa Lesa.
12, 13. Abantu ba kwa Lesa mu ncende imo iya ku Asia balangile shani ukutasha pa kulongana kwa Bwina Kristu?
12 Ukusangwa lyonse ku kulongana kwa pa cilonganino kutucinkulako pa mafunde ya kwa Lesa kabili kutwafwa ukuba abakosa lwa ku mupashi mu nshita ya nkondo, ubupiina, na fimbi ifyesha icitetekelo cesu. Abena Kristu 70 abali mu calo cimo icabela ku Asia abafulumwike mu mayanda yabo no kupatikishiwa ukwikala mu mpanga, balimwene ubucindami bwa kulongana. Pa mulandu wa mupampamina wabo uwa kutwalilila ukulongana pamo lyonse, babwelele ku musumba wabo uwapomwenwe ku nkondo, basopolwele ifyashele ku Ng’anda ya Bufumu, no kuyakuula imbi mu mpanga.
13 Pa numa ya kushipikisha mu myaka ya nkondo mu ncende imbi iya ico cine calo, abantu ba kwa Yehova bacili abapimpa mu kubomba. Ilyo eluda umo uwa muli ilya ncende bamwipwishe ukuti: “Cinshi cayafwako ukubaka bamunyina pamo?” Atile: “Pa myaka 19 tatwatala atutelulapo ukulongana. Limo limo pa mulandu wa mabomba nelyo amafya yambi, bamunyina bamo te kuti bese uko tulonganina, lelo tatwabala atuteululapo ukulongana.” Aba bamunyina na bankashi abatemwikwa cine cine balyumfwikisha ubucindami bwa ‘kukanaleka ukulongana capamo.’
14. Cinshi twingasambililako ku musango wa kwa Ana wa cikoloci?
14 Ana uwa myaka 84 kabili uwali ni mukamfwilwa “[talepuswa, NW] pe tempele.” E mulandu wine asangilweko na lintu Yesu atwelwe kulya pa numa fye ya kufyalwa kwakwe. (Luka 2:36-38) Bushe mwalipampamina pa kukanapuswa ku kulongana? Bushe muleesha na maka yonse ukusangwa ku fiputulwa fyonse ifya kulongana kukalamba na mabungano? Ubutungulushi bunonsha lwa ku mupashi ubo tupokelela pali uku kulongana butupeela ubushinino bwaumfwika ubwa kuti Shifwe wa ku muulu alasakamana abantu bakwe. (Esaya 40:11) Inshita sha musango yo shilaleta no buseko, kabili ukubapo kwesu kulangilila ukutasha kwesu pa lwa fishimiko fya kwa Yehova.—Nehemia 8:5-8, 12.
Ifishimiko fya kwa Yehova Filatupaatulako
15, 16. Ukubaka ifishimiko fya kwa Yehova kwakuma shani imyendele yesu?
15 Ukubaka ifishimiko fya kwa Lesa kulatwafwa ukupaatuka kuli ici calo ca bubifi. Ku ca kumwenako, ukumfwila ifishimiko fya kwa Lesa kututalusha ku kuitumpa muli bucisenene. (Amalango 5:18; Amapinda 6:29-35; AbaHebere 13:4) Amatunko ya kubepa, ukubulwa bucishinka, nelyo ukwiba kuti yacincintilwa bwino ukupitila mu kukonka ifishimiko fya bulesa. (Ukufuma 20:15, 16; Ubwina Lebi 19:11; Amapinda 30:7-9; Abena Efese 4:25, 28; AbaHebere 13:18) Ukubaka ifishimiko fya kwa Yehova na kabili kulatulesha ukucita icilandushi, ukuba ne mpatila, nelyo ubukwakwa.—Ubwina Lebi 19:16, 18; Amalumbo 15:1, 3.
16 Ukumfwila ifishimiko fya kwa Lesa, kulatushisha, nelyo ukutupaatulako, ku kubomba umulimo wakwe. Kabili ifyo caba icacindama ukupaatukako kuli ici calo! Mwi pepo apepele kuli Yehova pa bushiku bwa kupelako pe sonde, Yesu alombeeleko abasambi bakwe ukuti: “Ine nabapeele cebo cenu; na ba pano isonde nababapata ico tabali ba pano isonde, ifyo ine nshili wa pano isonde. Nshilelomba ukuti mubafumye pano isonde, lelo ukuti mubabake ku mubifi. Tabali ba pano isonde, ifyo na ine nshili wa pano isonde. Bashishisheni ku cine cenu: icebo cenu e cine.” (Yohane 17:14-17) Natutwalilile ukuteesa Icebo ca kwa Lesa, icitupaatulako ku mulandu wa mulimo wakwe uwashila.
17. Cinshi cingacitika nga ca kutila twasuula ifishimiko fya kwa Lesa, kabili cinshi tulingile ukucita?
17 Apo tuli babomfi ba kwa Yehova, tufwaya ukuba abalinga ukubomba umulimo wakwe. Lelo, nga twasuula ifishimiko fya kwa Lesa, kuti twasendwa no mupashi wa ici calo, uumonekela sana mu milandile ya ciko, ifitabo, ifya kusekesha, ne myendele. Kabili cine cine tatulefwaya ukuba abatemwa indalama, aba mataki, aba miiya, abashitootela, ababula bucishinka, abankalwe; bacintalika, abatuumikwa, abatemwo kwangala ukucisho kutemwa Lesa—ukulumbulapo fye imisango iinono iyo abantu banunuka kuli Lesa bakwata. (2 Timote 3:1-5) Apo tuleikala mu kati na nkati ka nshiku sha kulekelesha isha buno bwikashi bwabipa, natutwalilile ukupepela ubwafwilisho bwa bulesa pa kuti twingatwalilila ukubaka ifishimiko fya kwa Yehova pa ‘kuibaka umwabele cebo cakwe.’—Amalumbo 119:9.
18. Ukubaka ifishimiko fya kwa Lesa kukatulenga ukucita finshi ifisuma?
18 Ifishimiko fya kwa Yehova ficita ifyacila pa kutulenga ukuba abaibukila ku fyo tushilingile kucita. Ukubaka ifishimiko fyakwe kukatulenga ukucitapo cimo, ukutulenga ukucetekela Yehova umupwilapo kabili ukumutemwa no mutima wesu onse, umweo wesu onse, amano yesu yonse, na maka yesu yonse. (Amalango 6:5; Amalumbo 4:5; Amapinda 3:5, 6; Mateo 22:37; Marko 12:30) Na kabili ifishimiko fya kwa Lesa fitulenga ukutemwa abantu banensu. (Ubwina Lebi 19:18; Mateo 22:39) Tulalanga ukutemwa kwesu kuli Lesa na banensu maka maka ukupitila mu kucita ukufwaya kwa bulesa no kushimikilako bambi ‘ukwishiba Lesa’ ukupeelo mweo?—Amapinda 2:1-5.
Ukubaka Ifishimiko fya kwa Yehova Kupilibulo Mweo!
19. Bushe kuti twalanga shani bambi ukuti ukumfwila ifishimiko fya kwa Yehova kulabomba kabili kulanonsha?
19 Nga twabaka ifishimiko fya kwa Yehova no kwafwa bambi ukucita cimo cine, tukaipususha fwe bene nabaletumfwa. (1 Timote 4:16) Bushe kuti twalanga shani bambi ukuti ukumfwila ifishimiko fya kwa Yehova cine cine kulabomba kabili kulanonsha? Kupitila mu kubomfya ifishinte fya Baibolo mu bumi bwesu. Kabinge ‘abasontwa ku kuya mu mweo wa muyayaya’ bali no kulanga ubushinino bwa kuti inshila yaba mu Cebo ca kwa Lesa cine cine e yawamisha ukusupila. (Imilimo 13:48) Kabili bakamona ukuti ‘Lesa aba muli ifwe cine cine’ no kuilunda kuli ifwe mu kupepa Mulopwe Shikulu Yehova.—1 Abena Korinti 14:24, 25.
20, 21. Ifishimiko fya kwa Lesa no mupashi wakwe fikatwafwa ukucita cinshi?
20 Nga twatwalilila ukusambilila Amalembo, ukubomfya ifyo tusambilila, no kubomfya fyonse ifya ku mupashi ifyo Yehova atuteyanishisha, tukaba abatemwisha ifishimiko fyakwe. Nga tuleumfwila ifi fishimiko, fikatwafwa ukufwalo “buntu bupya, ubwalengelwe mu cipasho ca kwa Lesa mu kulungama no kushila kwa Cine.” (Abena Efese 4:20-24) Ifishimiko fya kwa Yehova no mupashi wakwe uwa mushilo fikatwafwa ukulanga ukutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima—imibele iyapusana nga nshi ne yaba mu calo calaala mu maka ya kwa Satana! (Abena Galatia 5:22, 23; 1 Yohane 5:19) E co, kuti twaba aba kutasha ilyo tulecinkulwako ukupitila muli baeluda basontwa, ulwa fyo Yehova afwaya ilyo tuli pe sambililo lya Baibolo ilya pa lwesu, na pa kulongana kwa cilonganino, pa kulongana kukalamba, na pa mabungano.
21 Pa mulandu wa kuti tulabaka ifishimiko fya kwa Yehova, tulaba no buseko nangu tulecushiwa pa mulandu wa bulungami. (Luka 6:22, 23) Tulolesha kuli Lesa ukutupususha ukutufumya mu mibele ya kutiinya nga nshi. Ico nacicilapo ukucindama pali nomba pantu ifyalo fyonse filelonganikilwa ku “kulwa kwa bushiku bukalamba bwa kwa Lesa wa maka yonse” ubwa Armagedone.—Ukusokolola 16:14-16.
22. Umupampamina wesu ulingile ukuba shani ukulosha ku fishimiko fya kwa Yehova?
22 Nga tuli no kupokelela ubupe bwa mweo wa muyayaya ubo tushalinga na kupokelela, tufwile ukutemwisha ifishimiko fya kwa Yehova no kufibaka no mutima wesu onse. Shi natube no mutima ngo wa kwa kemba wa malumbo uwaimbile ati: “Ifishimiko fyenu bulungami bwa muyayaya; munenge ukwiluka, no kuleka mbe no mweo.” (Amalumbo 119:144) Kabili natulange umupampamina uo kemba wa malumbo alangile mu mashiwi yakwe aya kuti: “Nakuuta kuli imwe [Yehova], mpususheni, e lyo nkabake fishimiko fyenu.” (Amalumbo 119:146) Cine cine, mu milandile na mu micitile, natushininkishe ukuti twalitemwisha ifishimiko fya kwa Yehova.
Kuti Mwayasuka Shani?
• Ni shani fintu kemba wa malumbo alemona ifishimiko fya kwa Yehova?
• Mulandu nshi tukabila ifishimiko fya kwa Yehova?
• Lubali nshi ukulongana kwesu kubomba ukulosha ku fishimiko fya bulesa?
• Bushe ifishimiko fya kwa Yehova fitupaatulako shani kuli ici calo?
[Amepusho]
[Icikope pe bula 15]
Kemba wa malumbo alitemwishishe ifishimiko fya kwa Yehova
[Ifikope pe bula 16, 17]
Ukukonka ica kumwenako ca kwa Ana, bushe mwalipampamina pa kukanapuswa ukulongana?
[Icikope pe bula 18]
Ukumfwila ifishimiko fya kwa Yehova kulatupaatulako nga aba busaka kabili abapokelelwa ku kubomba umulimo wakwe