Yehova Alakosha Uwapomponteka
Yehova Alakosha Uwapomponteka
“[Yehova] apeela amaka ku wapomponteka, no kufusho kucincila ku ushakosoboka.”—ESAYA 40:29.
1. Langilileni amaka ayaba mu fintu Lesa alenga.
YEHOVA tapelebela mu maka. Kabili ifintu alenga fyalikwata amaka ayengi! Ka atomu kacepesha—akaba pamo nga matafwali yapanga ifintu fyonse—kanono nga nshi ica kuti nangu fye litoni lya menshi lyakwata amaatomu ukufika kuli batrilioni 100. * Conse icipeema pano calo cashintilila pa maka yapangwa ku kwalukaaluka kwa maatomu ukulengwa na kasuba. Lelo maka ya musango nshi yafuma ku kasuba ayakabilwa pa kuti ubumi butwalilile pe sonde? Pa maka yonse akasuba kakwata paba fye ayanono sana ayesa kwi sonde. Nalyo line, aya maka yanono ayesa kwi sonde yengi nga nshi ica kuti yacila na pa maka yonse ayo amafakitare yaba pano calo yabomfya.
2. Cinshi Esaya 40:26 asosa pa lwa maka ya kwa Yehova?
2 Nampo nga tuletontonkanya pa lwa fyo atomu yaba nelyo pa bubumbo bushaikulila, tupeela Yehova umucinshi pa maka akwata aya kutiinya. E mulandu wine atwebela ukutila: “Inwineni amenso yenu mu muulu, moneni; nani uwalengele intanda ishi? Untu afumya umulalo wa shiko mu mpendwa, shonse shiine eta mwi shina ne shina. Pa kuti afulisho kukosa na maka ayengi, Esaya 40:26) Ca cine, Yehova wa “maka ayengi,” kabili e Ntulo ya ‘kukosa konse’ ukwabomfiwe ku kulenga ukuti ububumbo bonse bubeko.
takubulapo nangu lumo.” (Amaka Yacilamo Yalakabilwa
3, 4. (a) Finshi fimo ifingatulenga ukuba abapomponteka? (b) Cipusho nshi cilekabila ukulangulukwapo?
3 Apo Lesa tapelebela mu maka, abantu bena balapomponteka. Konse uko tuya, tulamona abantu abapomponteka. Ilyo babuka baba abapomponteka, ilyo baya ku ncito nelyo ku sukulu baba abapomponteka, ilyo babwelela ku ng’anda baba abapomponteka, kabili baya mu kulaala ninshi bali abapomponteka kabili abafunshika. Bamo bafwaya fye no kuya kumo uko bengayatusha. Na ifwe bene fwe babomfi ba kwa Yehova, tulapomponteka, pantu imikalile yesu iya bukapepa ifwaya ukupilikita na maka. (Marko 6:30, 31; Luka 13:24; 1 Timote 4:8) Kabili kwaba ifintu na fimbi ifitunasha.
4 Nangu line tuli Bena Kristu, tatwapaatulwako ku mafya yapitamo abantu bonse. (Yobo 14:1) Ukulwala, ukubwelele numa mu fya ndalama, nelyo amafya yambi ayaseeka mu mikalile kuti yaleta ukufuupulwa, na kuli pele pele ukuba abanaka. Fimbi ifyo baculako fyaba kupakaswa bapitamo pa mulandu wa bulungami bwabo. (2 Timote 3:12; 1 Petro 3:14) Pa mulandu wa kutitikishiwa ku fya mu calo cila bushiku no kukanya umulimo wa kushimikila pa lwa Bufumu, bamo pali ifwe kuti bapomponteka ica kuti baneenuka no kubomba umulimo wa kwa Yehova. Na kabili, pa kuti onaule bumpomfu bwesu kuli Lesa, Satana Kaseebanya alebomfya imisango yonse iya nshila engabomfya. E co, kuti twakwata shani ubukose bwa ku mupashi ubukabilwa pa kuti twitompoka no kuleka?
5. Mulandu nshi ubukose ubwacila pa bo umuntunse akwata bufwaikilwa pa kubomba ubutumikishi bwa Bwina Kristu?
5 Pa kuba abakosa lwa ku mupashi, tulingile ukushintilila pali Yehova, Kalenga wakwatisha amaka. Umutumwa Paulo atile ubutumikishi bwa Bwina Kristu bukabila amaka yacila pa maka ya bantunse bashapwililika. Alembele ati: “Tuli ne cuma ici mu fipe fye bumba, ukuti ukucishamo kwa maka kube kwa kwa Lesa, kabili te kuntu kwafuma kuli ifwe.” (2 Abena Korinti 4:7) Abena Kristu basubwa balebomba umulimo wa “bukapyunga bwa kuwikishanya” ukutungililwa na bakabomba banabo abakwata isubilo lya kuba pe sonde. (2 Abena Korinti 5:18; Yohane 10:16; Ukusokolola 7:9) Apo fwe bantunse bashapwililika tubomba umulimo wa kwa Lesa na mesho, te kuti tuubombe mu bukose bwesu. Yehova alatwafwa ukupitila mu kutupa umupashi wakwe uwa mushilo, e co ukunaka kwesu kulenga amaka yakwe ukumoneka. Kabili mwandi tulasansamushiwa ku bulayo bwa kuti “Yehova atungilila abalungama”!—Amalumbo 37:17.
‘Yehova E Bulamba Bwesu’
6. Amalembo yatukoselesha shani ukuti Yehova e Ntulo ya bukose bwesu?
6 Shifwe wa mu muulu alikwata “amaka ayengi” kabili kuti atupa amaka ukwabula ubwafya. Na kuba, twaebwa ukuti: “[Yehova] apeela amaka ku wapomponteka, no kufusho kucincila ku ushakosoboka. Abalumendo kuti bapomponteka no kufunshika, na bapungwe kuti bawe cipupu; lelo abalolela Yehova bapepemuka amaka, banina na mapindo nga bakapumpe, babutuka no kukanafunshika, benda no kukanapomponteka.” (Esaya 40:29-31) Pa mulandu wa kufula kwa fya kutitikisha, limo limo kuti twafunshika nga kabutuka wa lubilo uo amolu yakwe yaleumfwika nga yafinine kabili te kuti abutuke ukufika ukutali. Lelo, umupelwa wa kupwishishapo ulubilo lwa kuya ku mweo naupalama, kabili tatufwile ukunenuka. (2 Imilandu 29:11) Icibambe cesu, Kaseebanya, endauka “nge nkalamo iilelila,” kabili alefwaya ukutulesha. (1 Petro 5:8) Natuleibukisha ukuti ‘Yehova e bukose bwesu kabili ni nkwela yesu,’ kabili aliteyanya ifingi ‘ku kupeela amaka ku bapomponteka.’—Amalumbo 28:7.
7, 8. Bushininkisho nshi bwabako ubwa kuti Yehova apeele ubukose kuli Davidi, Habakuki, na Paulo?
7 Yehova apeele Davidi ubukose ubo alekabila pa kulolenkana ne fipindami fishaikulila. Pa kuba ne citetekelo cakosa no kucetekela, Davidi lyene alembele ukuti: “Muli Lesa e mo tukacitilo bulamba; kabili wene akanyantaule fibambe fyesu.” (Amalumbo 60:12) Yehova apeele na Habakuki amaka pa kuti apwishe umulimo wakwe uwa bukasesema. Habakuki 3:19 atila: “Yehova, Shikulu, e bulamba bwandi, kabili acita amakasa yandi nga ya nsebula nkota, na pa misansama yandi e po anengo kunyanta.” Paulo na o aba ca kumwenako cisuma, uwalembele ukuti: “Ndi na maka aya kucite fintu fyonse mu ulenkoselesha [Lesa].”—Abena Filipi 4:13.
8 Ukupala Davidi, Habakuki, na Paulo, tufwile ukukwata icitetekelo muli Lesa ukuti aliba na maka ya kutupa ubukose kabili kuti atupususha. Apo nomba natwishiba ukuti Mulopwe Shikulu Yehova e Ntulo ya “bulamba” bwesu, natumone inshila shimo isho twingakwatilamo ubukose bwa ku mupashi ukufuma ku fintu ifingi ifyo Lesa ateyanya.
Ukuteyanya kwa ku Mupashi Ukutupeela Amaka
9. Mulimo nshi uo impapulo sha Bwina Kristu shibomba mu kutupeela ifya kulya fya ku mupashi?
9 Ukusambilila Amalembo no kuba aba mukoosha mu kubomfya impapulo sha Bwina Kristu kuti fyatupa amaka no kutupuputula. Kemba wa malumbo aimbile ati: “Alishuko muntu . . . [uyo] mu malango ya kwa Yehova e mwabo kubekwa kwakwe, ne fili mu malango yakwe afitontonkanya akasuba no bushiku. Aba ngo muti uwalimbwa pa tumilonga twa menshi, uutwale fisabo fya uko mu nshita ya fiko, kabili amabuula ya uko tayalokota; conse ico acita cikalengwo kushuka.” (Amalumbo 1:1-3) Nga filya fine tulingile ukulya pa kuba no bukose bwa ku mubili, e fyo tulekabila no kulya ifya kulya fya ku mupashi ifiteyanishiwa na Lesa ukupitila mu Cebo cakwe ne mpapulo sha Bwina Kristu pa kuti tutwalilile no bukose bwa ku mupashi. E co, isambililo lisuma no kwetetula filakabilwa.
10. Ni lilali napamo twingasanga inshita ya kusambilila no kwetetula?
10 Mwaba icilambu icikalamba mu kwetetula pa “fyashika fya kwa Lesa.” (1 Abena Korinti 2:10) Lelo ni nshita nshi twingasanga iya kwetetula? Isaki, umwana mwaume wa kwa Abrahamu ‘pa nshita ya cungulo alifumine ku kwetetula mu mpanga.’ (Ukutendeka 24:63-67) Kemba wa malumbo Davidi “aleetetula pali Lesa mu bulinde bwa bushiku.” (Amalumbo 63:6, NW) Kuti twasambilila pa Cebo ca kwa Lesa no kwetetulapo ulucelo, mu cungulo, mu nshita ya bushiku—cine cine, inshita fye yonse. Ukusambilila kwa musango yo no kwetetula fitungulula ku bukose na bumbi ubwa ku mupashi ubo Yehova ateyanya, e kutila ipepo.
11. Mulandu nshi tufwile ukukatamikila ukupepa lyonse?
11 Ukupepa lyonse kuli Lesa kulatwafwa ukuba aba maka. Kanshi, natube no ‘mukoosha mu kupepa.’ (Abena Roma 12:12) Limo limo, tufwile ukulumbula mu kulungatika ukuti tulelomba amano no bukose ifyo tukabila pa kucimfya ubwesho. (Yakobo 1:5-8) Kabili tuletasha no kulumbanya Lesa ilyo tulemona uko imifwaile yakwe ilefikilishiwa nelyo ilyo twamona ukuti atukosha ukutwalilila ukubomba umulimo wakwe. (Abena Filipi 4:6, 7) Nga twatwalilila ukupalama kuli Yehova mwi pepo, takatushe. Davidi aimbile ati: “Moneni, mwe Lesa kaafwa wandi.”—Amalumbo 54:4.
12. Cinshi ico tulingile ukulombela umupashi wa mushilo kuli Lesa?
12 Shifwe wa mu muulu alatupa maka no bukose ukupitila mu mupashi wakwe uwa mushilo, nelyo amaka yabomba. Paulo alembele ati: “Mfukamina kuli Shifwe . . . ku bucindami bwa bukata bwakwe, amupe ukukoshiwa amaka ku Mupashi wakwe mu buntu bwa mu kati.” (Abena Efese 3:14-16) Tufwile ukupepela umupashi wa mushilo, ukucetekela ukuti Yehova ali no kutupeela wene. Yesu apelulwile ukuti: Nga mwane alomba isabi, bushe wishi uwakwata ukutemwa engamupa insoka? Te kuti acite ifyo. E mulandu wine, asondwelele ukuti: “E ico, nga imwe pa kuba ababi mwaishibo kupa abana benu ifya bupe fisuma, bushe Shinwe wa mu muulu takacishemo nga nshi ukupo Mupashi wa mushilo ku bamulomba?” (Luka 11:11-13) Lekeni tuleba no kucetekela kwa musango yo ilyo tulepepa kabili tuleibukisha lyonse ukuti ababomfi ba kwa Lesa aba cishinka kuti ‘abakosha’ ku maka ukupitila mu mupashi wakwe uwa mushilo.
Icilonganino Caba Ni Nkosho
13. Tulingile ukumona shani ukulongana kwa Bwina Kristu?
13 Yehova atupa amaka ukupitila mu kulongana kwa cilonganino ca Bwina Kristu. Yesu atile: “Ukuli babili napamo batatu abalonganina mwi shina lyandi e ko ndi mu kati kabo.” (Mateo 18:20) Ilyo Yesu alaile ifyo, alelanda pa fyo abaletungulula icilonganino balingile ukwangwa. (Mateo 18:15-19) Lelo, amashiwi yakwe yalabomba na ku kulongana kwesu konse, amabungano yanono na yakalamba, ayatendeka no kwisalila ne pepo mwi shina lyakwe. (Yohane 14:14) E co lishuko ukusangwa ku kulongana kwa musango yo ukwa Bwina Kristu, nangu cingaba ukuti abasangilweko bali fye impendwa inono nelyo iikalamba. Lekeni kanshi tulelanga ubuseko pali utu tushita twabelako ku kutukosha lwa ku mupashi no kucincimusha ku kutemwa kabili ku kubombe milimo isuma.—AbaHebere 10:24, 25.
14. Tumwenamo shani mukubombesha kwa baeluda ba Bwina Kristu?
14 Baeluda ba Bwina Kristu balateyanya ukwafwa kwa ku mupashi no kukoselesha. (1 Petro 5:2, 3) Paulo alyafwile no kukoselesha ifilonganino alebombela, nga filya bakangalila benda bacita lelo. Na kuba, alefulukisha ukuba na basumina banankwe pa kuti kube ukukoseleshanya. (Imilimo 14:19-22; Abena Roma 1:11, 12) Shi natuletasha lyonse pa kuba na baeluda besu aba pa cilonganino cesu na bakangalila bambi aba Bwina Kristu, ababomba ulubali lukalamba mu kutukosha lwa ku mupashi.
15. Ni shani fintu abasumina banensu mu cilonganino cesu baba “cisansamushi”?
15 Abasumina banensu abapanga icilonganino cesu kuti baba “cisansamushi.” (Abena Kolose 4:10, 11) Nga ‘bacibusa bene bene’ kuti batwafwa mu nshita ya kumanama. (Amapinda 17:17) Ku ca kumwenako, ilyo ababomfi ba kwa Lesa 220 bakakwilwe mu nkambi ya kucushiwilwamo iya Sachsenhausen ninshi balebasopa ku baNazi mu 1945, baendele ulwendo lwa ntamfu iyalepele amakilomita 200. Baleenda mwi bumba, kabili abakweteko amaka balekula ifikocikala finono ifyo basendeelemo abanakile. Cinshi cacitike? Pa bulendo ubwafwilepo abantu ukucila pali 10,000 abali mu nkambi sha kucushiwilwamo, tapali Inte ya kwa Yehova nelyo imo iyafwile. Amalyashi ya musango yu ayaba mu mpapulo sha Watch Tower, ukubikapo fye na Yearbook of Jehovah’s Witnesses na Jehovah’s Witnesses—Proclaimers of God’s Kingdom, yalangilila ukuti Lesa alapa amaka ku bantu bakwe, pa kuti benenuka.—Abena Galatia 6:9. *
Ukukoshiwa ku Butumikishi Bwesu Ubwa mwi Bala
16. Bushe ukubombako ubutumikishi lyonse kutukosha shani lwa ku mupashi?
16 Ukubombako lyonse umulimo wa kushimikila Yuda 20, 21) Amalayo ya mu Malembo ayo tulandapo mu butumikishi bwesu yatupeela isubilo kabili kuti yatulenga ukuba no mupampamina nge fyo kasesema Mika ali, uwatile: “twakulaendela mwi shina lya kwa Yehova Lesa wesu umuyayaya umuyayaya.”—Mika 4:5.
pa lwa Bufumu kulatukosha lwa ku mupashi. Uyu mulimo ulatwafwa ukutonta pa Bufumu bwa kwa Lesa no kukwata mu muntontonkanya iciyayaya na mapaalo ya buko. (17. Mitubululo nshi yapeelwa ukulosha ku masambililo ya Baibolo aya pa ng’anda?
17 Isenge lyesu na Yehova lilakoselako lintu tulebomfya sana Amalembo mu kufunda bambi. Ku ca kumwenako, pa kutungulula amasambililo ya Baibolo aya pa ng’anda ukubomfya icitabo ca Ukwishiba Uko Kutungulula ku Mweo wa Muyayaya, calibamo amano ukubelenga no kulanshanya pa malembo yaloshiweko. Ukucite fyo kulafwa umusambi no kulenga ukuti tuleumfwikisha ifya ku mupashi. Nga umusambi camukosela ukumfwikisha icisambilisho ca mu Baibolo nelyo icilangililo, kuti mwasambilila imiku iingi mu cipandwa cimo icaba mu citabo ca Ukwishiba. Ifyo tusekelela nga natupekanya bwino no kubombesha ukwafwa bambi ukupalama kuli Lesa!
18. Langilileni ifyo icitabo ca Ukwishiba cilebomfiwa bwino.
18 Cila mwaka, icitabo ca Ukwishiba cilabomfiwa bwino ku kwafwa abantu abengi ukuba ababomfi baipeela aba kwa Yehova, kabili pali aba bene palaba na bengi abashaishibe nangu kamo pa lwa Baibolo. Ku ca kumwenako, ilyo ali umwaice, umwaume umo umuHindu mu Sri Lanka aumfwile patali patali uko Nte alelanda pa lwa Paradise. Ilyo papitileko imyaka aile kuli uyu mwanakashi, kabili umulume wakwe atendeke ukusambilila Baibolo no yu mwaume. Na kuba, uyu mulumendo aleya mu kusambilila cila bushiku, kabili apwishishe ukusambilila icitabo ca Ukwishiba mu nshita fye iinono. Atendeke ukusangwa ku kulongana konse, alekele no kuya ku mipepele yakwe iya kale, kabili asangwike kasabankanya wa Bufumu. Ilyo alebatishiwa, ninshi kale kale alatungulula isambililo lya Baibolo ilya pa ng’anda ku mubiye.
19. Ilyo tulefwaya Ubufumu intanshi, cinshi twingacetekela?
19 Ukufwaya intanshi Ubufumu kulatuletelo buseko ubutukosha. (Mateo 6:33) Nangu tulapita mu mesho yalekanalekana, tulatwalilila ukuba ne nsansa kabili abacincila mu kushimikila imbila nsuma. (Tito 2:14) Icinabwingi cesu tulafika pa cipimo cifwaikwa mu mulimo wa bupainiya bwa nshita yonse, kabili bambi na bo balebombela ukuli ukukabila kukalamba ukwa bakashimikila. Nampo nga tuletwalako pa ntanshi ifya Bufumu muli iyi nshila atemwa mu nshila shimbi, twalicetekela ukuti Yehova takalabe umulimo wesu no kutemwa uko tulanga kwi shina lyakwe.—AbaHebere 6:10-12.
Twalilileni mu Bukose bwa kwa Lesa
20. Bushe kuti twalanga shani ukuti tulolesha kuli Yehova ukutupeela ubukose?
20 Mu kuitemenwa kabili no mutima onse, natulange ukuti ukusubila kwesu kwaba muli Yehova kabili tulolesha kuli wene kukutupa ubukose. Kuti twacite fyo ukupitila mu kubomfya fyonse ifya ku mupashi ifyo atuteyanishisha ukupitila mu ‘musha wa cishinka.’ (Mateo 24:45) Ukusambilila kwa Cebo ca kwa Lesa ukwa pa lwesu no kwa pa cilonganino ukubomfya impapulo sha Bwina Kristu, ipepo lya kufuma pa nshi ya mutima, ukwafwiwa na baeluda lwa ku mupashi, ifya kumwenako fisuma ifya basumina banensu, no kushimikila lyonse fyaba pa kuteyanya kukosha isenge lyesu na Yehova kabili fitupeela amaka aya kutwalilila mu mulimo wakwe uwashila.
21. Umutumwa Petro no mutumwa Paulo baalanga shani ukuti amaka ya kwa Lesa yalakabilwa?
1 Petro 4:11) Kabili Paulo alangile ukushintilila kwakwe pa maka ayo Lesa apa ilyo atile: “Mbekelwa mu fya kunaka, mu miponto, mu fya bucushi, mu fya kupakasa, mu fya lumanimani, pa mulandu wa kwa Kristu; pantu ilyo nanaka, e lyo naba na maka.” (2 Abena Korinti 12:10) Shi natulangishe ukushininwa kumo kwine no kutwala ubukata kuli Mulopwe Shikulu Yehova, uupeela amaka ku bapomponteka.—Esaya 12:2.
21 Te mulandu no kunaka kwesu ukwa buntunse, Yehova akatukosha ukucita ukufwaya kwakwe nga twashintilila pali wene ku kutwafwa. Pa kwishiba ubucindami bwa kwafwa kwa musango yo, Petro alembele ati: “Ngo muntu apyunga, apyunge ngo upyungila ku maka ayo Lesa apeela.” ([Amafutunoti]
^ para. 1 Ici cipendo, ukulingana ne mipendele ya ba United States catendeka na 1 e lyo pakonka ba 0 ukufika kuli 20.
^ para. 15 Fyasabankanishiwa na Watchtower Bible and Tract Society of New York, Inc.
Kuti Mwayasuka Shani?
• Mulandu nshi abantu ba kwa Yehova bakabila amaka yacilamo?
• Bushininkisho nshi ubwa mu Malembo bulangilila ukuti Lesa alapa amaka ku babomfi bakwe?
• Kuteyanya nshi ukwa ku mupashi uko Yehova ateyanya ku kutupeela ubukose?
• Kuti twalanga shani ukuti tulolesha kuli Lesa ku kutupeela ubukose?
[Amepusho]
[Icikope pe bula 12]
Isenge lyesu na Yehova lilakoselako lintu tulebomfya sana Baibolo mu kufunda bambi