Ilyasha lya Bakabilisha ba Bufumu

Yehova Alapeela Abantu Bakwe Icifulo ca Kutushamo

UMUYENDO uufunshike alatemwa sana nga amona icifulo ca kutushamo icaba mu cintelelwe pa kashila ka mu mpili. Mu Nepal, ifi fifulo fya kutushishamo fitwa chautara. Ilingi chautara kuti abela mupepi no muti wafumba uwitwa banyan, ciba cintelelwe ca kwikalamo no kutusha. Ukupanga chautara kulangilila icikuuku, kabili na bapanga tabeshibikwa.

Ifya kukumanya ku Nepal filangilila ifyo Yehova Lesa asanguke Ntulo ya kusekelela no kupembesula kwa ku mupashi ku “bayendo” bafunshika muli buno bwikashi.—Amalumbo 23:2.

• BaLil Kumari bekala mu musumba wayemba uwa Pokhara, uko ulupili lwa lulumbi ulwa Himalaya ulwakupwa ne mfula yabuuta lumoneka. Lelo, pa mulandu wa kusakamikwa pa lwa ndalama sha lupwa, baLil Kumari bamwene ukuti takwali sana ifya kusubila. Ilyo Inte ya kwa Yehova imo yabatandalile, isubilo lya mu Baibolo lyalibafikile pa mutima kabili apo pene fye baipwishe ukubatungulula isambililo lya Baibolo ilya mu ng’anda.

Nangu ca kutila baLil Kumari baleipakisha ukusambilila, tacayangwike ukutwalilila pantu balupwa balebakanya sana. Lelo tabalekele. Balesangwa ku kulongana lyonse kabili balekonka ifyo balesambilila, maka maka pa fyo mukashi afwile ukunakila umulume. Ne ci calengele abalume babo na banyinabo ukukutuluka ukuti ulupwa lonse lwalemwenamo mwi sambililo lya Baibolo ilyo baLil Kumari balesambilila.

Abena myabo na balupwa lwabo abengi nomba balesambilila Icebo ca kwa Lesa. Pa kulongana kukalamba ukwali nomba line mu Pokhara, baLil Kumari balisangilweko pamo pene na balupwa lwabo 15. Batila: “Ing’anda yandi yasanguka icifulo ca kutushishamo pantu ulupwa lwesu nomba lwalikatana mu kupepa kwa cine, kabili nalisanga umutende wine wine uwa mutontonkanya.”

• Nangu ca kutila umusobolola wa bantu walibindwa mu Nepal, ulamoneka sana mu mikalile yabo. E co abengi balafwaya ukwishiba ico Baibolo isosa pa lwa mulinganya na kapaatulula. Ukwishiba ukuti “Lesa taba na kapaatulula ka bantu” kwayalwile sana imikalile ya baSurya Maya no lupwa lwabo.—Imilimo 10:34.

Ulufyengo lwa kusobolola abantu no kutitikishiwa ku myata ne fishilano fyakosa kwalengele baSurya Maya ukumanama. Apo bali banakashi baipeleesha, pa myaka iingi baleipusha utulubi ukubafwa. Lelo amapepo yabo tayaleyasukwa. Bushiku bumo ilyo balelomba ukwafwa, Babita, umwishikulu wabo, umukashana uwa myaka 6 aile kuli bene no kubepusha ukuti: “Ninshi mulelombela ku tulubi utushingacita nangu cimo?”

Caishilesangwa ukuti banyina kwa Babita balesambilila Baibolo ne Nte ya kwa Yehova. Babita mu kucincimuka alaalike banakulu ku kulongana kwa Bwina Kristu. Ilyo baSurya Maya bailelongana, balisungwike ukumona abantu bapusanapusana baleipakisha ukubishanya capamo ukwabula impatila. Apo pene fye baipwishe ukulatungululwa isambililo lya Baibolo. Nangu line ici calengele abena mupalamano ukubataluka, tabasakamene; nangu fye kukanaishibisha ukubelenga no kulemba tafyabaleseshe ukulunduluka lwa ku mupashi.

Napapita imyaka 8, kabili aba mu lupwa lwabo 6 ukusanshako abalume na bana babo batatu baba ni Nte sha kwa Yehova. BaSurya Maya nomba batumikishi ba nshita yonse, bapainiya wa nshita yonse, abasekelela ukwafwa bambi ukutuula ifisendo fyafina pa cifulo cine cine ica kutushapo ico Yehova fye engapeela.