Afweni Bambi Ukuti Bende Umwawamina Yehova

“Ifwe . . . tatwaleka kumupepela, no kulombo kuti . . . mwende umwawamina Shikulu ku kutemuna konse. Mu mulimo onse usuma mube abatwale fisabo.”—ABENA KOLOSE 1:9, 10.

1, 2. Cinshi ukucilisha icingaleta insansa ne cimwemwe?

“TWIKALA mu cikuliko ca kuli motoka pe farmu. Apo twalyangusha imikalile yesu, twalikwata inshita ikalamba iya kushimikila imbila nsuma ku bantu abengi. Twalipaalwa icine cine pantu twaliba ne shuko lya kwafwa abengi ukupeela imyeo yabo kuli Yehova.”—E fyasosa abaupana babili ababa mu mulimo wa nshita yonse ku South Africa.

² Bushe tamulesumina ukuti ukwafwa bambi kulaletela insansa? Bamo balesha inshita ne nshita ukwafwa abalwele, abapusulwa, nelyo abatalalilwa—kabili ici cilabaletela icimwemwe. Abena Kristu ba cine balishininkisha ukuti ukushimikila kuli bambi ukuti beshibe Yehova Lesa na Yesu Kristu e kwafwa kwawamisha bengafwa abantu. Ici e cingalenga fye bambi ukutetekela icilubula ca kwa Yesu, ukuba na bucibusa na Lesa, lyene no kusubila umweo wa muyayaya.—Imilimo 3:19-21; 13:48.

3. Kwafwa kwa musango nshi tulingile ukupoosako amano?

³ Lelo, ni shani pa lwa kwafwa ababombela Lesa kale, abatwalilila ukukonke “Nshila”? (Imilimo 19:9) Ukutemwa mwabatemwa takwashibantukila napacepa, lelo napamo teti mumone ifyo mwingabafwa ukucishapo nelyo ukutwalilila ukubafwa. Atemwa imibele mwabamo teti imusuminishe ukwafwa sana bambi, ne co kuti calenga muleba fye ne cimwemwe cinono. (Imilimo 20:35) Kuti twasambililako kwi buuku lya Abena Kolose pa lwa ifi fibili.

4. (a) Ifintu fyali shani ilyo Paulo alembeele abena Kolose? (b) Ni shani fintu Epafra aisamo?

⁴ Ilyo umutumwa Paulo alembeele Abena Kristu ku Kolose, ali mu ng’anda ya cifungo ku Roma, nangu ca kuti aletandalilwa. Paulo nga fintu mwingenekela, alebomfya ubuntungwa bwakwe ubwa cimpelesha ukushimikila pa lwa Bufumu bwa kwa Lesa. (Imilimo 28:16-31) Abena Kristu banankwe balesuminishiwa ukumutandalila, napamo bamo balebikwa pamo na o mu cifungo inshita shimo. (Abena Kolose 1:7, 8; 4:10) Umo pali aba ali ni kabila wapimpa Epafra uwa mu musumba wa Kolose mu Frugia, mu cibwandanshi ca ku kabanga ka Efese mu Asia Minor (pali nomba umwaba icalo ca Turkey). Epafra alibombeshe mu kupanga icilonganino mu Kolose kabili alicucutikiile ifilonganino fyabelele lwa mupepi mu Laodikea na mu Hierapoli. (Abena Kolose 4:12, 13) Mulandu nshi Epafra ailile ku kumona Paulo ku Roma, kabili cinshi twingasambilila ku fyo Paulo ayankwileko?

Ukwafwa Kusuma ku Bena Kolose

5. Cinshi calengele Paulo ukulemba fintu alembele ku bena Kolose?

⁵ Pa kuti engalanshanya na Paulo pa lwa fyali icilonganino ca ku Kolose, Epafra aimine ubulendo bwayafya ukuya ku Roma. Ashimike ulwa citetekelo, ukutemwa, no mulimo wa kubila imbila uwa balya Bena Kristu. (Abena Kolose 1:4-8) Lelo, afwile alilandile na pa fyo asakamikwe pa lwa fibi ifyalecitika ifingonaula bumupashi bwa bena Kolose. E calengele Paulo ukulemba kalata wapuutwamo uwalesuusha ifintu fimo ifyo bakasambilisha ba bufi balesabankanya. Alandile sana pa mulimo ukalamba untu Yesu Kristu alingile ukucita. * Bushe ukwafwa kwa kwa Paulo kwali fye  kwa kukomaila pa fishinka fikalamba ifya mu Baibolo? Ni nshila nshi imbi engafwilamo abena Kolose, kabili finshi twingasambililako pa lwa kwafwa bambi?

6. Finshi Paulo akomailepo muli kalata wakwe ku bena Kolose?

⁶ Pa mubalo fye wa kalata wakwe, Paulo alandile pa musango wa kwafwa uko napamo tulabako. Yali ni nshila ya kwafwilamo bwino ilyo umo ali ukutali. Paulo na Epafra bali ukutali ku Kolose. Paulo abebekeshe ati: “Tutotela kuli Lesa, kuli Wishi wa kwa Shikulwifwe Yesu Kristu, inshita pe pa kumupepela [utulembo twa pe samba muli NW tutila “ukumupepela lyonse”].” Aya yali mapepo ya kulungatika aya kupepela Abena Kristu mu Kolose. Paulo akonkenyepo ati: “E ico na ifwe, ukufuma ku bushiku twaumfwile, tatwaleka kumupepela, no kulombo kuti mwisulemo ukwishibo kufwaya kwakwe mu mano yonse no mucetekanya ifya bumupashi.”—Abena Kolose 1:3, 9.

7, 8. Mulandu nshi umo amapepo ya pa lwesu na ya ku cilonganino yalandapo?

⁷ Twalishiba ukuti Yehova e ‘Umfwo kupepa,’ e co kuti twacetekela ukuti aliiteyanya ukumfwa amapepo yesu nga yapepwa mu kulingana no kufwaya kwakwe. (Amalumbo 65:2; 86:6; Amapinda 15:8, 29; 1 Yohane 5:14) Lelo bushe amapepo yesu yaba shani ilyo tulepepela bambi?

⁸ Ilingi kuti twatontonkanya pa lwa ‘bamunyinefwe ba pano isonde’ no kubapepelako. (1 Petro 5:9) Inshita shimo kuti twaeba Yehova ulwa Bena Kristu na bantu bambi abali mu ncende umuponene akayofi. Lintu abasambi ba mu mwanda wa myaka uwa kubalilapo abali mu ncende shalekanalekana baumfwile ulwa cipowe mu Yudea, bafwile balipepele amapepo ayengi nga nshi, ukupepelako bamunyinabo ilyo bashilatuma ne fya kukumbusuka. (Imilimo 11:27-30) Mu nshiku shesu, amapepo ya kupepelako bamunyinefwe bonse nelyo ibumba likalamba ilya bamunyina, ilingi yalapepwa pa kulongana kwa Bwina Kristu, uko abengi bakabila ukukutikisha pa kuti bengasosako abati “Amene.”—1 Abena Korinti 14:16.

Lungatikeni pa Kupepa

9, 10. (a) Fya kumwenako nshi filangilila ukuti calilinga ukupepelako abantu bamo mu kulungatika? (b) Ni shani ifyo Paulo bamupepeeleko amapepo ya kulungatika?

⁹ Lelo, Baibolo ilatupa ifya kumwenako fya mapepo ya kupepelako bambi ayali ya kulungatika, ukupepela umuntu umo umo pa lwakwe. Tontonkanyeni pa fyo Yesu alandile ifyalembwa pali Luka 22:31, 32. Ali na batumwa bakwe aba busumino 11. Bonse bene bakabile ukwafwa kwa kwa Lesa mu nshita shayafya ishali ku ntanshi, kabili Yesu alibapepeele. (Yohane 17:9-14) Nalyo line, Yesu asobwelepo Petro, ukupepela ulya musambi mu kulungatika. Ifya kumwenako fimbi ni fi: Elisha apepeeleko umuntu umo ukuti Lesa engamwafwa, no yu ni kalume wakwe. (2 Ishamfumu 6:15-17) Umutumwa Yohane apepele ukuti Gai engatwalilila umutuntulu lwa ku mubili na lwa ku mupashi. (3 Yohane 1, 2) Amapepo yambi yapepeelwe amabumba ya bantu bambi mu kulungatika.—Yobo 42:7, 8; Luka 6:28; Imilimo 7:60; 1 Timote 2:1, 2.

¹⁰ Bakalata ba kwa Paulo bakomaila pa lwa mapepo ya kulungatika nga nshi. Alombele ukuti wene nelyo abo ali na bo balepepelwako. Pa Abena Kolose 4:2, 3 tubelengapo atuti: “Koseleleni mu kupepa, na mu kupepa mwine mube abalola no kutootela; mulepepela na ifwe bene, ukuti Lesa atwiswileko ukwa kwingilile cebo, ku kuleka tulande ica nkaama ca kwa Kristu, ico kabili nakakilwapo.” Moneni ne fi fya kumwenako fimbi: Abena Roma 15:30; 1 Abena Tesalonika 5:25; 2 Abena Tesalonika 3:1; AbaHebere 13:18.

11. Ilyo Epafra ali mu Roma, ni bani alepepelako?

¹¹ E fyo na kabomba munankwe Paulo ku Roma alecita. “Amucelela Epafra, umwina mwenu, . . . uulepilikitila imwe pe mu kupepa.” (Abena Kolose 4:12) Ishiwi lyapilibulwa pano ati ‘ukupilikita’ kuti lyalola mu “kushomboka,” nga fintu uwa fyangalo mu nshiku sha ku kale aalecita. Bushe Epafra alekoosha ukupepela fye aba bwananyina basumina aba mwi sonde lyonse  nelyo alepepela na bakapepa ba cine mu Asia Minor monse? Paulo alangilila ukuti Epafra alepepela mu kulungatika aba mu Kolose. Epafra alishibe ifyo balepitamo. Tatwabeshiba amashina bonse, kabili tatwaishiba amafya balepitamo, lelo elenganyeni ifyo napamo balepitamo. Napamo Lini wacaice aleshomboka ukukaana amano yaseekele, e lyo Rufu napamo alekabila inkosho pa kucincintila ukulembula kwa ncitilo sha mu buYuda umo aali kale. Bushe Persida alekabila ukushipikisha na mano ya kukushishamo abana muli Shikulu ico aupilwe ku ushasumina, kabili bushe Asunkriti uwalwele ubwa kufwa, alekabila ukumusansamusha sana? Cine cine, Epafra alishibe aba mu cilonganino ca ku mwabo, kabili alekoosho kubapepelako pantu wene na Paulo balefwaya balya abaipeelesha ukwenda umwawamina Yehova.

12. Kuti twacilapo shani ukulungatika mu mapepo ya pa lwesu?

¹² Bushe mwamona ico twingapashanyako—mwamona inshila twingafwilamo bambi? Nga fintu tulandilepo, amapepo ya pa cintubwingi ku kulongana kwa Bwina Kristu tayaba aya kulungatika sana, pa mulandu wa kuti kusangwa abapusanapusana. Lelo amapepo ya pa lwesu nelyo aya mu lupwa kuti yaba aya kulungatika nga nshi. Inshita shimo kuti twalomba Lesa ukukunkumba bakangalila benda nelyo abacemi ba ku mupashi no kubapaala, lelo bushe te kuti tulelungatika inshita shimbi? Ku ca kumwenako, ilyo mulepepa, mulandu nshi mushingalumbwila ishina lya kwa kangalila wa muputule uulemutandalila nelyo katungulula we Sambililo lya Citabo? Amalembo ya Abena Filipi 2:25-28 na 1 Timote 5:23 yalangisha ifyo Paulo ayangilwe mu kulungatika ku bumi bwa kwa Timote na Epafroditi. Bushe na ifwe kuti twayangwako muli uyo musango ku balwele abo twaishiba amashina?

13. Fintu nshi ifyalinga ukusansha mu mapepo ya pa lwesu?

¹³ Ca cine ukuti tatufwile ukwingila mu milandu ya bambi iya pa lwabo, lelo calilinga ukuti amapepo yesu yaleumfwika ukuti twalyangwa icine cine abo twaishiba kabili abo twatemwa. (1 Timote 5:13; 1 Petro 4:15) Napamo munyina umo incito yalipwa, kabili tatwingamufwaila imbi. Lelo kuti twamulumbula mwi shina ilyo tulepepa amapepo ya pa lwesu no kulanda pa lwa bwafya bwakwe. (Amalumbo 37:25; Amapinda 10:3) Bushe twalishibapo nkashi umushimbe uwakula ukwabula umulume na bana pantu apampamina pa kuupilwa “muli Shikulu epela”? (1 Abena Korinti 7:39) Ilyo mulepepa amapepo ya pa lwenu, kuti mwalomba Yehova ukumupaala no kumwafwa ukutwalilila uwa cishinka mu mulimo alebomba. Tubuule ica kumwenako na cimbi, baeluda babili kuti balifundile munyina uwatenene. Mulandu nshi umo umo uwa bene ashingalumbwila uyo muntu mwi shina mu mapepo ya pa lwabo mu nshita mu nshita?

14. Ni shani ifyo amapepo ya kulungatika yayampana no kwafwa bambi?

¹⁴ Fingi sana ifingalenga ukuti musansheko abantu mu mapepo yenu abo mwaishiba ukuti balekabila ukutungilila kwa kwa Yehova, ukusansamushiwa, amano, no mupashi wa mushilo, nelyo ifisabo fya uko ifili fyonse. Pa mulandu wa ntamfu nelyo ifintu fimbi, napamo tapali ifyo mwingapako abo bantu nelyo nga kubafwa, finono mwingacita. Lelo mwilalaba ukupepelako bamunyinenwe ne nkashi. Mwalishiba ukuti bafwaya ukwenda umwawamina Yehova, lelo kuti bakabila ukwafwa pa kuti bengatwalilila ukucite fyo. Inkama ku kubafwa yaba mapepo yenu.—Amalumbo 18:2; 20:1, 2; 34:15; 46:1; 121:1-3.

 Bombeleni pa Kukosha Bambi

15. Mulandu nshi tulingile ukwangilwa ku lubali lwa kulekelesha ulwe buuku lya Abena Kolose?

¹⁵ Amapepo ya kulungatika ayabilima kwena, te nshila fye yeka iya kwafwilamo bambi, ukucilisha balya mwapalamishako kabili abo mwatemwa. Ico calyumfwika bwino bwino mwi buuku lya bena Kolose. Abasoma ifya pali Baibolo abengi basumina ukuti pa numa ya kubalembela pa lwa fisambilisho no kufunda bengabomfya, Paulo alundileko ne mitende. (Abena Kolose 4:7-18) Lelo natumona kale ukuti ulu lubali lwa kulekelesha ulwa ili buuku lwabamo ukufunda kusuma, kabili kuli na fimbi twingasambilila kuli ulu lubali.

16, 17. Finshi twingasosa ulwa bamunyina balumbulwa pa Abena Kolose 4:10, 11?

¹⁶ Paulo alembele ati: “Aristarki umufungwa munandi amucelela; na Marko umufyala wa kwa Barnaba, uo mwapeelelwe ifunde (nga aisa kuli imwe, mumusekelele); na Yesu uwitwa Yusti. Pa basembululwa, aba beka e babomfi banandi ku bufumu bwa kwa Lesa, kabili [baba aba kukosha, NW] kuli ine.”—Abena Kolose 4:10, 11.

¹⁷ Pano Paulo alumbwile bamunyina bamo abalingile ukulumbulwa. Atile bali pa basembululwa, abakuliile mu buYuda. Mwali abaYuda basembululwa abengi mu Roma, kabili bamo pali ilya nshita bali Bena Kristu. Lelo abo Paulo alumbwile e balemukosha. Cimoneka kwati tabaleshimba ukubishanya na Bena Kristu abali kale Bena fyalo, kabili bafwile baliitemenwe ukushimikila pamo na Paulo ku Bena fyalo.—Abena Roma 11:13; Abena Galatia 1:16; 2:11-14.

18. Ni shani fintu Paulo atashishe bamo abali nankwe?

¹⁸ Moneni ifyo Paulo alandile: ‘Baba aba kukosha kuli ine.’ Abomfya ishiwi lya ciGriki ilimoneka fye apa pene pamo muli Baibolo. Bakapilibula  abengi balipilibula ati “icisansamushi.” Lelo kwaba ishiwi na limbi ilya ciGriki ilipilibulwa ku bengi ati “icisansamushi” (pa·ra·ka·le’o). E shiwi Paulo abomfeshe mumbi muli uyu kalata lelo te pa Abena Kolose 4:11.—Mateo 5:4; Imilimo 4:36; 9:31; 2 Abena Korinti 1:4; Abena Kolose 2:2; 4:8.

19, 20. (a) Bushe ishiwi Paulo abomfeshe ku kulondolola bamunyina abalemwafwa mu Roma lyalolele mwi? (b) Ni mu nshila nshi pambi balya bamunyina bayafwile Paulo?

¹⁹ Abo Paulo alumbwile bafwile balecite fingi te kusansamusha fye kwa pa kanwa. Ishiwi lya ciGriki ilyapilibulwa “icisansamushi” pa Abena Kolose 4:11 inshita shimo lyalebomfiwa mu fyalembwa fya ku calo nga balelanda pa muti utontololako ubukali. Baibolo wa New Life Version atila: “Fintu baba aba kwafwa!” Today’s English Version wena abomfya amashiwi ya kuti: “Baliba aba kwafwa kuli ine icine cine.” Cinshi balya bamunyina ba Bwina Kristu abaleikala lwa mupepi na Paulo bafwile bacitile ku kumwafwa?

²⁰ Paulo alesuminishiwa ukukwata abatandashi, lelo kwali ifingi ifyo ashingaicitila, pamo ngo kushita ifyo alekabila—ifya kulya ne fya kufwala mu mpepo. Kuti asanga shani ifimfungwa fya kusambililamo nelyo ukushita ifya kulembapo? (2 Timote 4:13) Bushe teti mutile bamunyina balya baleafwa Paulo mu fyo alekabila, ukumubombelako ifinono finono pamo nge fya kushita nelyo utumilimo twa kwenda tumbi? Kuti limbi afwaya ukubebeta icilonganino cimo no kucikosha. Apantu alikakilwe, kuti afilwa, e co balya bamunyina kuti bamwimininako ukutandalila ifi filonganino, ukutwala ubukombe no kwisashimike fyo fili. Fintu cali ca kukosha!

21, 22. (a) Mulandu nshi tufwile ukufwaisha ukumona amashiwi ya pa Abena Kolose 4:11? (b) Ni mu nshila nshi twingacita ifyalecita abali na Paulo?

²¹ Ifyo Paulo alembele pa lwa kuba ‘aba kukosha’ fitulenga ukumona ifyo twingafwa bambi. Kuti pambi baleendela umwawamina Yehova ukupitila mu kusunga ifipimo fyakwe ifya mibele isuma, balasangwa ku kulongana kwa Bwina Kristu, kabili balabombako no mulimo wa kushimikila. Pali uyo mulandu calilinga ukubatasha. Lelo bushe kuti twacishapo ukuba ‘aba kukosha’ nge fyacitile balya bali na Paulo?

²² Nga ca kuti mwalishibako nkashi uyo mano  mano aumfwila ifya pali 1 Abena Korinti 7:37 lelo uushakwata balupwa bapalamisha, bushe kuti mwamusanshako mu fyo ulupwa lwenu lulecita, napamo ukumulaalika aisalyako ica kulya nelyo ukusangwa ku kubungana kwa ba bwananyina nelyo ukwa lupwa lwenu? Ni shani pa lwa kumwitako muleendela pamo na o ukuya kwi bungano nelyo ilyo mwaya ku kutuusha? Nelyo kuti mwamweba ukumushindikako pa nshita muleya mu kushita ifya kulya. E fyo twingacita na kuli bamukamfwilwa nelyo abashingakumamo ukwenda. Kuti mwamwenamo sana ukumfwa ifyo bapitamo nelyo ukusambililako fimo pa lwa tuntu tunono pamo nge fya kusala ifisabo fisuma nelyo ifya kufwala fya bana. (Ubwina Lebi 19:32; Amapinda 16:31) Ici kuti calenga mwaba bacibusa bene bene kabili kuti baba abakakuka ukulomba ubwafwilisho nga balefwaya umuti ku mashitolo nelyo ifyapalako. Bamunyina bali na Paulo ku Roma bafwile balemwafwa mu fintu alekabila icine cine, nga fintu ukwafwa kwenu na imwe kwingaba. Ilya nshita ku kale na lelo line, ipaalo lyalundwapo ilifuma mu kucite fyo lyaba lya kuti ukutemwa kulakoshiwa, e lyo tulapampamina sana pa kubombela Yehova pamo mu cishinka.

23. Ni mu kucita cinshi cingawama ifwe bonse ukupoose nshita?

²³ Ifwe umo umo kuti twatontonkanya pali fimo ificitika ifilandilwepo muli ci cipande. Fili fye fya kumwenako, lelo ifi kuti fyatucinkulako ulwa fingacitika icine cine ifingalenga twaba ‘aba kukosha’ bamunyinefwe ne nkashi. Tatulelosha mu kuti nomba tufwile fye ukulapekanishisha abantu akaliilo. Ifyo te fyo bamunyina balumbulwa mu Abena Kolose 4:10, 11 baimininepo. Baali “babomfi [banankwe] ku bufumu bwa kwa Lesa.” Ukukosha kwabo kwali maka maka mu kumfwana ne fya bufumu. Nacibe fyo fine na kuli ifwe.

24. Mulandu nshi ukalamba tupepelako bambi no kufwaya ukubakosha?

²⁴ Umulandu tulumbwila bambi mu mapepo ya pa lwesu no kwesha ukubakosha ni uyu: Twasumina ukuti bamunyinefwe ne nkashi bafwaya ‘ukwenda umwawamina Shikulu ku kutemuna konse.’ (Abena Kolose 1:10) Ico cishinka cumfwana na cimbi ico Paulo alandilepo ilyo alelemba pa mapepo ya kwa Epafra ayo alepepela abena Kolose, ica kuti “[beminine] abapwililila kabili abaishibisha [abashininkisha, NW] muli conse ico Lesa afwaya.” (Abena Kolose 4:12) Bushe ifwe pa lwesu kuti twacita shani co? Natumone.

[Futunoti]

Bushe Mwacimona Ifi Fishinka?

• Kuti twacishapo shani ukwafwa mu mapepo ya pa lwesu?

• Kuti twasosa shani atuti Abena Kristu bamo bali ‘aba kukosha’ kuli Paulo?

• Ni mu mibele ya musango nshi twingaba ‘aba kukosha’?

• Lintu tulepepela ubukose pali bamunyinefwe ne nkashi , cinshi tufwaya?

[Amepusho]

[Icikope pe bula 18]

Bushe kuti mwasanshako Umwina Kristu umbi ilyo ulupwa lwenu luleya ku kutandala?

[Abatusuminishe]

Capeelwe na ba Green Chimney’s Farm