Bacincishiwa Ukuya Ku Kubomba

CINSHI cingalenga abaupana 24 abacaice ukusha indupwa shabo, abanabo, ne ncende babelesha no kutendeka ukubomba bumishonari mu ncende shimbi? Mulandu nshi bengabekelwa mu kuya ku ncende pamo nga Papua New Guinea na Taiwan, kumo fye na ku Afrika na ku Latin-Amerika? Bushe kuti caba kufwaya ukwishiba ifyabako? Napacepa, lelo mulandu wa kuti balitemwa Lesa na bantu banabo.—Mateo 22:37-39.

Bushe bantu nshi bacitile ci? Bantu baali mwi kalasi lyalenga 109 ilye Sukulu lya Baibolo Ilya Gileadi Ilya Watchtower. Pa Cibelushi, pa September 9, 2000, abantu 5,198 bakumene ku Watchtower Educational Center—iyabela ku Patterson, ku New York—e lyo na mu ncende shimbi umo baletambila ulya programu pali ba TV pa kutila bomfwe amafunde ya kwafwilisha abalepwisha isukulu ukuti bakatunguluke mu mulimo wabo uwa bumishonari.

Ceyamani wa ulya programu aali ni Stephen Lett, uwaba muli Komiti wa Kusambilisha uwe Bumba Litungulula ilya Nte sha kwa Yehova. Atendeke na mashiwi ya pali Mateo 5:13 ayatila, “Imwe muli mucele wa pano isonde.” Munyina Lett atile amashiwi ya kwa Yesu kuti yabomba icine cine ku balepwisha isukulu. Ku ca kumwenako, umucele ulenga ifya kulya ukumfwika bwino. Cimo cine ne cicitika nga babomba bwino umulimo wa kushimikila, bamishonari bapashanishiwa ku mucele.

Amashiwi ya Kulekelesha aya Kubakoselesha

Munyina Lett aitile ababombela Yehova pa nshita ntali ukwisalanda amalyashi ayepi ayaleshimpwa pa Malembo, lelo ayakwafwa apakalamba. Uwalandile ilya kubalilapo ni John Wischuk, uwaba mu Dipartmenti wa Kulemba. Ilyashi lyakwe lyakwete umutwe waleti, “Icipandwa Caipipisha mwi Buuku lya Amalumbo Cikoselesha Umupashi wa Bumishonari,” ilyashimpilwe pa Amalumbo 117. Kwaliba ukukabila mwi sonde lyonse ukwa kucitila ubunte ku “nko” ne “mikowa” pa lwa kwa Yehova no Bufumu bwakwe. Abasambi bakoseleshiwe ukufikilisha fintu Amalumbo 117 yalanda, ukwebako bambi ukuti “Tasheni Yehova.”

Lyene ceyamani aitile Guy Pierce uwaba mwi Bumba Litungulula. Uyu munyina alandile ilyashi ilyali no mutwe waleti “Muleteuluka, Lelo Muleshangila.” Icebo ca kwa Lesa tacaluka. Pa Amalango 32:4 Yehova Lesa etwa Icilibwe, lelo icebo cakwe icalembwa mu Baibolo cilasuminisha ukuteuluka pantu calembelwa abantu ba ndimi shonse ne myata—na kuba calembelwa abantu fye bonse. Abasambi bakonkomeshiwe ukushimikila Icebo ca kwa Lesa, ukulenga ubukombe bwabamo bufike pa mitima na muli bakampingu ba bantu. (2 Abena Korinti 4:2) Munyina Pierce akonkomeshe ukuti: “Beni abashangila ku fishinte fyalungama, lelo muleteuluka. Mwisuula abo mubomba na bo umulimo pa mulandu wa kuti intambi shabo shalipusana ne shenu.”

Karl Adams, umo uwa bakafundisha ba mwi sukulu lya Gileadi, uwabombela pa maofeshi yakalamba aya calo conse mupepi ne myaka 53, alandile  ilyashi lyakwete umutwe wa kutontonkanyapo uwaleti “Ni Kwi Mukaya?” Ca cine, balya abaupana 24 balipeelwe umulimo, bakaya mu kubombela ku fyalo 20 pano isonde, lelo munyina aipwishe icipusho ca kuti, ilyo mukafika ku ncende ipya kuntu muleya kabili mwamona ne fyo kwaba, cinshi mukacita? Ino nshita twikelemo abantu balafwaisha ukucita ifintu fyalekanalekana. Bafwaya ukuya uko bashayapo kale no kucita ifipya pa kutila baisekeshe abene beka. Abasambi bena bapeelwe umulimo ukufuma kuli Yehova ukuya uko alefwaya ukuti baye mu kusakamana “impaanga” shakwe. Tabalingile ukupala abena Israele ba ku kale abo pa mulandu wa bukaitemwe Yehova akeene ukubabomfya ku kupaalilamo abantunse bonse. Lelo, balingile ukupala Yesu Kristu, uwacitile ukufwaya kwa kwa Wishi lyonse no kuba uwacumfwila te mulandu ne camuponene.—Yohane 8:29; 10:16.

Umutwe we lyashi lyalandile Wallace Liverance, kalemba we Sukulu lya Gileadi waleti “Katamikeni Ifyashika fya kwa Lesa.” Libili libili, Amalembo yalanda ukuti Icebo ca kwa Lesa caba nga icuma, nge fintu fyauma umutengo, nga mabwe ya mutengo wa patali, kabili nge fintu fyacindama kabili ififwaikwa icine cine. Amapinda 2:1-5 yalangilila ukuti tukabila ukufwayo “kwishiba Lesa” nga filya twingafwaya ‘ifyuma fyashikama.’  Kalanda akoseleshe abasambi ukutwalilila ukusambilila ifyashika fya kwa Lesa ilyo balebomba umulimo wabo uupya. Munyina Liverance alondolwele ukuti: “Ici cilabomba, pantu cikosha icitetekelo cesu muli Yehova kabili cikakosha umupampamina wenu uwa kukakatila ku mulimo. Cikamwafwa ukuba abashininwa ilyo mulelanda no kuba bakafundisha bafikapo ilyo mulelondolola ukufwaya kwa kwa Lesa kuli bambi.”

Ukubomfya imitantikile ya mu kalasi, kafundisha wa mwi Sukulu lya Gileadi na umbi alandile pa fyo Yehova apaalile umulimo wa mwi bala uwa basambi pa myeshi isano iyapitile. Lawrence Bowen alandile pa mashiwi ya mutumwa Paulo ayaba pa Imilimo 20:20 ukulosha ku butumikishi bwakwe ubwa ku cintubwingi mu Efese, alandile ukuti Paulo alecitila ubunte lyonse ilyo ashukila akashita. Ifyo abasambi bapitilemo filangilila ukuti, abatemwa Lesa na bantu banabo mu nshita twikelemo tabafilwa ukulanda icine no kuleka amaka ya Cebo ca kwa Lesa ukubomba mu bantu. Ici cilenga ukupaalwa nga nshi na Yehova.

Abakokole Balanda

Ilyo balesambilila, abasambi mwi kalasi lya Gileadi balinonkelemo nga nshi mu kubishanya na ba mu Komiti wa Musambo abafumine mu ncende 23, na bo baali ku Patterson Educational Center mu kusambilila amasambililo yambi ayaibela. Leon Weaver na Merton Campbell ababa mu Dipartimenti ya Mulimo baipwishe ababa muli Komiti wa Musambo, bamo pali abo akale balipitilemo na mwi sukulu lya Gileadi. Ukumfwa ku fyo aba bamishonari abakokole balelanda kwakoseshe abasambi ne ndupwa shabo e lyo fye ne fibusa.

Ukupanda amano abalepwisha isukulu bapokelele ukwa kubafwa ukuteuluka ukulingana ne fyo uko baaya mu kubombela kwaba kwasanshishemo aya mashiwi: “Lemeneneni ku busuma. Nga mwasanga ukuti ifilecitika fyaibela nelyo mwafilwa ukufyumfwikisha, mwinenuka. Lelo shintilileni pali Yehova”; “beni abaikushiwa ne fyo mukwete, no kucetekela ukuti Yehova akamupayanishisha ifyo mukabila mu bumi.” Amashiwi yambi ayalandilwe yali yakwafwa abasambi ukuipakisha umulimo wabo. Yamo yaali ya kuti: “Te kwesha ukulinganya incende mulebombelako no ko mwafumine”; “sambilileni ululimi lwa kuli yo ncende no kululanda bwino pa kutila mulelanshanya bwino na bantu babako”; “sambilileni imyata ya abo bantu, pantu ici cikamwafwa ukutwalilila no mulimo wenu.” Aya mashiwi yalikoseleshe bamishonari bapya apakalamba.

Pa numa ya lyashi lya kwipusha, David Splane, uwali mishonari kale kabili uwalipo mwi kalasi lyalenga 42 ilye sukulu lya Gileadi uyo nomba aba mwi Bumba Litungulula ilya Nte sha kwa Yehova, alandile ilyashi lyaleti “Bushe Mucili Abasambi Nelyo Bushe Namupwisha?” Kalanda aipwishe abalepwisha isukulu ukuti: “Bushe mukalaimona shani ilyo mukaya mu kubomba umulimo wa bumishonari? Bushe mwakulaimona ukuti apo mwalipita mwi sukulu ninshi mwalishiba fyonse ifya mu mulimo wa bumishonari nelyo bushe mwakulaimona ukuti mucili abasambi abalekabila ukusambilila na fimbi ifingi?” Munyina Splane alandile ukuti uwapwisha isukulu uwa mano aimona ukuti acili musambi. Bamishonari balingile ukwishiba ukuti onse uo bakumanya mu mulimo wabo kuti abasambilishako fimo. (Abena Filipi 2:3) Abasambi bakoseleshiwe ukutila baleumfwana sana na bamishonari banabo, iofeshi lya musambo, ne cilonganino ca cikaya. Munyina Splane akonkomeshe ukuti: “Namucita fye bwino mu mashindano yenu, lelo mukatwalilila ukusambilila. Langeni abantu bonse ukuti mulefwaya ukusambilila.”

Ilyo ili lyashi lyapwile, abasambi bapokele amadiploma, kabili kwali ukubilisha ifyalo bakaya mu kubombelako kuli bonse abaliko. Kaali kashita ka filamba fya kusekelela ku balepwisha isukulu ilyo umusambi waiminineko abanankwe muli lilye kalasi abelengele inkalata yalelanda pa lwa mupampamina wa balepwisha isukulu uwa kuti ifyo basambilile ukufuma mu Cebo ca kwa Lesa fikabalenga ukucita ifyacilapo mu mulimo washila.

Bonse abasangilweko balisuminishe ukuti ukufunda uko balya basambi balepwisha isukulu bapokelele kwakoseshe ukusalapo kwabo ukwa kulanga ukutemwa kwabo uko batemwa Lesa na bantu banabo. Kabili kwabacincishe ukupampamina sana pa kwafwa abantu lwa ku mupashi mu mulimo wabo ukucila kale lyonse.

[Akabokoshi pe bula 25]

UKULONGANIKA IFIPENDO FYA BALI MU KALASI

Bafumine mu fyalo: 10

Bakaya mu fyalo: 20

Ubwingi bwa basambi: 48

Imyaka ya kufyalwa nga kwabanya pamo: 33.7

Imyaka ya kuba mu cine nga kwabanya pali umo: 16.2

Imyaka ya kuba mu mulimo wa nshita yonse nga kwabanya pali umo: 12.5

[Icikope pe bula 26]

Ikalasi Lyalenga 109 Ilyalepwisha Isukulu lya Watchtower Bible School of Gilead

Mu mutande uli pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ku kuso ukuya ku kulyo mu mutande umo umo.

(1) Collins, E.; Miles, L.; Alvarado, A.; Lake, J.(2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.