Bushe Muleibukisha?

Bushe mwalyumfwikishe bamagazini ba Ulupungu lwa kwa Kalinda aba nomba line abo mwabelengele? Cisuma, moneni nga kuti mwayasuka ifi fipusho:

• Cinshi Cingatwafwa sana ukuwikishanya no muntu?

Pa kubala tulingile ukwishiba ukuti bonse kuti twakwata imintontonkanishishe ne mibele yalubana. Lyene tulekabila ukuibebeta fwe bene intanshi ukumona nga ni fwe tuli no bwafya, te uyo muntu umbi.—8/15, ibula 23.

• Ni lilali kukabe “nshita sha kubweseshamo ifintu fyonse,” ishalandwapo pa Imilimo 3:21?

Ukubweseshamo ifintu fyonse kwaba pabili. Pa kubala, kwaba ukubweseshamo kwa paradise wa ku mupashi ukucili kulecitika ukwatendeke mu 1919. Ukubweseshamo ukwa cibili kukatendeka ilyo isonde lyesu likaba paradise.—9/1, amabula 17,18.

• Ni mu mano nshi ububenshi bushakwatila cilolo, nga fintu calembwa pa Amapinda 6:6-8, bwabela ca kumwenako cisuma kuli ifwe?

Ububenshi, bwalikwata cinyina, lelo ni pa mulandu wa kuti alabikila amani kabili e nyina wa bubenshi bonse. Ububenshi bwalipikintika, kabili e fyo na ifwe tulingile ukuba, ukutukuta ukuwamya imibombele yesu, ne lyo fye kushili wa kutuceeceeta.—9/15, ibula 26.

• Bushe ubusesemo bwa kwa Hulda ubwalembwa pali 2 Ishamfumu 22:20 ubwa kuti Yoshia ali no kufwa ‘mu mutende,’ bwali bwa cine apo alicenenwe bubi bubi mu bulwi?

Ca cine, Yoshia afwile mu mutende mu mano ya kutila afwile ilyo akayofi ka mu 609 ukufika mu 607 B.C.E., kabe takalafika, ilyo abena Babele bashingile no konaula umusumba wa Yerusalemu.—9/15, ibula 30.

• Bushe Solomone aletasha ilyo alondolwele umukashi ukuba pamo nga “insebula nkota iya kutemwa”? (Amapinda 5:18, 19)

Imbushi mabwe nkota, yalitalalila mu cifyalilwa kabili isuma mu kumoneka. Lelo, kuti yaikala no kufyala mu ncende shabamo amabwe, ishayafya ukufikako kabili umushaba fya kulya.—10/1, amabula 30, 31.

• Bushe Henry Grew na George Storrs bali ni bani?

Aba bantu babili baliko mu myaka ya ba 1800, kabili bali basambi ba Baibolo bacincila. Grew asambilile ukuti icisambilisho ca kuti kwaba Balesa Batatu te ca mu Malembo, pamo pene ne ca kuti umweo taufwa e lyo ne ca kuti ku helo kwaliba umulilo. Storrs asangile ukuti abantu bamo bakakwata ubumi bwa muyayaya pe sonde. Aba bonse babili baliko pa ntanshi ya kwa Charles Taze Russell, uwatendeke ukusabankanya uyu magazini mu 1879.—10/15, amabula 26-30.

• Bushe Inte sha kwa Yehova shimona shani ukundapa kwa kubomfya umulopa wa muntu umwine?

Apo bashimpa ifisumino fyabo muli Baibolo, tabasunga umulopa wabo mu cintu cimbi e lyo pa numa no kusumina ukubwekeshamo ulya mulopa mu mubili wabo nakalya. Umwina Kristu umo na umo alasalapo umwine eka ifyo umulopa wakwe wingabomfiwa ilyo alebombelwapo, pa kupimwa ku cipatala, nelyo ukundapa kwa ndakai. Alingile ukulanguluka fintu Baibolo ilanda pa lwa mulopa no kwibukisha ukutila aliipeela kuli Lesa.—10/15, amabula 30, 31.

• Cinshi calefwaikwa sana ku Nte sha kwa Yehova ukushinguluka isonde icasangilwe pa numa ya kufwailisha kwacitilwe mu kutendeka kwa uno mwaka?

Amayanda ya Bufumu ukucila 11,000 yalekabilwa mu fyalo fipiina, umushaba sana indalama. Imisangulo ukufuma ku Bena Kristu mu ncende shalekanalekana ilebomba mu kwafwa ukukuula amayanda ya kulonganinamo ayasuma.—11/1, ibula 30.

• Mashiwi nshi yamo aya mu ciGriki cine cine ayabomfiwa mu Baibolo ayalanda pa kupepa?

Limo pali ayo ni lei·tour·giʹa, ilyapilibulwa ukuti “umulimo wa ku cintubwingi.” Limbi nalyo ni la·treiʹa, ilyapilibulwa ukuti “umulimo washila.” (AbaHebere 10:11, NW; Luka 2:36, 37, NW)—11/15, amabula 11,12.

• Lisambililo nshi ilyacindama twingasambililapo pa lyashi lya kwa Adamu na Efa?

Lya kuti ukuitunga konse ukwa kuba caibela ukufuma kuli Yehova Lesa bupumbu fye.—11/15, amabula 24-7.

• Bushinino nshi ubwa mu Malembo ubulangilila ifyo Lesa alapa amaka ku babomfi bakwe?

Davidi, Habakuki, no mutumwa Paulo bapayanya ubushininkisho bwa kuti Yehova Lesa alibakoseshe, nelyo ukubapa amaka. (Amalumbo 60:12; Habakuki 3:19; Abena Filipi 4:13) E co kuti twacetekela ukuti Lesa aliitemenwa kabili aba na maka ya kutukosha.—12/1, amabula 10, 11.