Imilimo Isuma Icindika Lesa

ABENA Kristu ba cine bacindika Lesa ku myendele yabo isuma ne milimo isuma. (1 Petro 2:12) Kuti twamwene ci ku cacitike mu Italy mu myaka ya ndakai.

Mu September 1997, icinkukuma cikalamba caonawile incende ishingi isha mu Marche na mu Umbria, ica kuti amayanda nalimo 90,000 yalyonawilwe. Amabumba ya Nte sha kwa Yehova lilya line fye batendeke ukwafwilisha abasumina banabo na bantu bambi. Baletele ifikuliko fya bamotoka, ifya kulaalamo ifyaba nge fyola, ifitofu, fimashini fya malaiti, ne fipe fimbi ifyalekabilwa. Abantu abengi balimweneko iyi milimo ya kukumbusuka.

Inyunshipepala ya Il Centro yashimike ati: “Ababalilepo ukuleta ifya kukumbusuka mu ncende shaonawilwe bali ni baNte ba ku Roseto [mu citungu ca Teramo] . . . Aba cishinka kuli Yehova tabakumana fye cila nshita ku kupepa, no kubomba balabomba, ukwafwa abalecula, nangu ca kutila bapepa kumbi.”

Mwine mushi wa mu Nocera Umbra, itauni lyaonawilwe pali yalya ayatebelelwe, alembeele Inte ati: “Ndemutasha icine cine pa fyo mwayafwile abena Nocera. Nshiletwishika ukuti aya mashiwi nalanda kuli imwe e yali na mu mitima ya bekashi bonse.” Kabili, ne Cipani cangalila ifya mu calo capeele Congregazione Cristiana dei Testimoni di Geova (Icilonganino ca Bwina Kristu ica Nte sha kwa Yehova) setifiketi wa mwabombeni ne mendulo “ngo bushininkisho bwa ncito babombele no bwafwilisho bayafwilishe abantu ilyo ifitungu fya Umbria na Marche fyatebelelwe.”

Mu October mu mwaka wa 2000, ilyeshi lya boni lyapitile mu citungu ca Piedmont ku kapinda ka ku kuso aka Italy. Na kabili, bwangu bwangu baNte batendeke ukuiteyanya ukupeela ifya kukumbusuka. Abantu abengi balimweneko ne yi milimo isuma. Abalashi ba mu Citungu ca Piedmont babapeele icipampa calembwapo amashiwi ya kutasha pa mulandu wa “kuitemenwa ukubomba umulimo uukankaala uwa kwafwilisha abena Piedmont abatebelelwe ne lyeshi.”

Yesu Kristu asambilishe abasambi bakwe ati: “Ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu muulu.” (Mateo 5:16) Inte sha kwa Yehova tabaicindamika, lelo basanga insansa ilyo balebomba ‘imilimo isuma’ iicindika Lesa pa kwafwilisha abantu banabo mu fya kwa Lesa na mu fintu fimbi.