Tetekeleni Yehova Lesa wa Cine

Bushe mwalibala amulolesha mu muulu ubushiku ilyo kushili amakumbi no kumona intanda ishingi? Bushe mutila shaishileko shani?

UBUSHIKU, intanda mu mampalanya shalandile ku Mfumu Davidi uwa muli Israele wa ku kale, ukumulenga ukulemba ati: “Imyulu ilelondololo bukata bwa kwa Lesa, ne ulu lilelongolo mulimo wa minwe yakwe.” (Amalumbo 19:1) Ca cine, Kalenga e wawaminwo “kupokelelo bukata no mucinshi na maka,” te bubumbo iyo.—Ukusokolola 4:11; Abena Roma 1:25.

Baibolo itila: “Uwakuulile ifintu fyonse ni Lesa.” (AbaHebere 3:4) Ca cine, Lesa wa cine, ‘uo ishina lyakwe ni Yehova, e wapulamo pano isonde ponse.’ (Amalumbo 83:18) Kabili te wakwelenganya fye. Yesu Kristu alandile pali Wishi wa ku muulu, Yehova, ati: “Uwantumine wa cine.”—Yohane 7:28.

Yehova Alafishapo Ubufwayo Bwakwe

Ishina lya kwa Lesa ilyaibela, Yehova, limoneka imiku nalimo 7,000 mu Malembo ya ciHebere mweka fye. Ishina lyakwe lishininkisha ukuti wa cine. Ishina lya kwa Lesa lipilibula ukutila “Ailenga Ukuba.” Yehova Lesa ailondolola ukuti alafishapo ubufwayo bwakwe. Ilyo Mose aipwishe Lesa ishina lyakwe, Yehova alondolwele ubupilibulo bwa liko ati: “Naba uuntu Naba.” (Ukufuma 3:14) Rotherham wena apilibula ati: “Nkaba conse ico nafwaya.” Yehova alaba, nelyo alasala ukuba, conse icilekabilwa pa kulenga ubufwayo bwakwe ubwalungama na malayo ukufishiwapo. E co, alikwata amalumbo ayengi, pamo nga Kalenga, Wishi, Shikulu, Umucemi, Yehova wa milalo, Uumfwa ukupepa, Umupingushi, Kasambilisha, Umulubushi.—Abapingushi 11:27; Amalumbo 23:1; 65:2; 73:28; 89:26; Esaya 8:13; 30:20; 40:28; 41:14.

Lesa wa cine fye eka e wingakwata ishina Yehova, pantu abantunse teti bashininkishe ukuti amapange yabo yakacitwa. (Yakobo 4:13, 14) Ni Yehova fye eka e wingasosa ati: “Ifyo iloke mfula ne mfula yabuuta ukufuma mu muulu, no kukanabwelelamo, lelo itapililo mushili no kuulengo kutwala no kupuuka, wasuka wapeele mbuto kuli katanda ne cilyo ku ulya, e fyo cikabe cebo candi icifuma mu kanwa kandi: tacakabwelele ibusha kuli ine, kano cacite co natemwa, no kushuka muli ico nacitumina.”—Esaya 55:10, 11.

Yehova alafishapo ubufwayo bwakwe bwino bwino ica kuti nangu fintu ifimoneka nge fishingacitwa ku bantunse wene kuti acita. Imyaka iingi pa numa Abrahamu, Isaki, na Yakobo bafwile, Yesu alibalumbwile no kutila: “Awe [Yehova] tali Lesa wa bafwa, lelo wa ba mweo; pantu bonse baba aba mweo kuli wene.” (Luka 20:37, 38) Ifi ifikolwe fya busumino fitatu fyalifwile, lelo ubufwayo bwa  kwa Lesa ubwa kubabuusha bwali no kufishiwapo nangu cibe shani ica kuti kuli wene bali nga ba mweo. Ukubuusha aba babomfi ba cishinka aba ku kale teti kwafye kuli Yehova nge fyo fye cishayafishe kuli wene ukulenga umuntu wa kubalilapo ku lukungu.—Ukutendeka 2:7.

Umutumwa Paulo apeela ica kumwenako na cimbi icilanga ukuti Lesa alalenga ubufwayo bwakwe ukucitwa. Mu Malembo, Abrahamu etwa “shibo wa nko ishingi.” (Abena Roma 4:16, 17) Ilyo Abramu ashilakwata abana, Yehova ayalwile ishina lyakwe ukuba Abrahamu, ilipilibula “Wishi we Bumba (Abengi).” Yehova alengele ubupilibulo bwa ili ishina ukuba ubwa cine cine ilyo mu cipesha amano abweseshe amaka ya bufyashi muli Abrahamu no mukashi wakwe Sara ninshi bali abakote.—AbaHebere 11:11, 12.

Apo Yesu Kristu alipeelwe amaka no bulashi, alandile ifintu fya cine ifyacila nga nshi pa fyo abantunse batontonkanya. Nangu cibusa wakwe Lasaro alifwile, Yesu aebele abasambi bakwe ati: “Lasaro umunensu nalaalo tulo; lelo ndeyamushibusha.” (Yohane 11:11) Mulandu nshi Yesu alandile pa muntu uwafwa ngo waleele fye utulo?

Ilyo Yesu afikile mu mushi wa Betani, umwaleikala Lasaro, aile ku nshishi no kulanda ukuti ilibwe ilyali pa bwingililo lifumishiwepo. Ilyo apepele mwi shiwi likalamba, atile: “We Lasaro, fumina kuno nse.” Kabili ninshi abalemonako bonse balelolekesha mu nshishi, “uwafwile alifumine, nakakwa amakasa na maboko ku nsalu isho apombelwemo, na ku menso nakupombwa icitambala.” Lyene Yesu atile: “Mukakuleni, mulekeni aye.” (Yohane 11:43, 44) Yesu abuushishe Lasaro—ukubwesesha ubumi ku mwaume uwafwile inshiku shine! Kristu talebepa ilyo atile cibusa wakwe aleele fye. Ukulingana ne fyo Yehova na Yesu bamona ifintu, Lasaro uwafwile ali fye ngo uleele. Ca cine, Yesu na Wishi wa mu muulu bayangwa ifintu ifya cine.

Yehova Kuti Alenga Ifyo Twenekela Ukucitika

Ala mwandini paliba ubupusano pa tulubi twa longolo na Lesa wa cine! Abapepa utulubi pa mulandu wa kukanaishiba icine batila ifi fintu bapepa fyalikwata amaka yacila aya bantunse. Lelo, uku kucindikisha takwingapeela amaka ya kucite fipesha amano ku tulubi. Nomba, Yehova Lesa kuti alanda pa babomfi bakwe abafwile kale nga ba mweo, pantu kuti ababuusha. “Yehova Lesa wene e Lesa wa cishinka,” kabili tafutika abantu bakwe.—Yeremia 10:10.

Ala cilasansamusha ukwishiba ukuti mu nshita ya kwa Yehova iyo umwine alinga, abafwa ababa mu cibukisho cakwe bakabuushiwa—ukuba aba mweo na kabili! (Imilimo 24:15) Ca cine, mu kubuuka mwaba ukubwesesha umuntu ku bumi bwakwe bulya bwine. Ukwibukisha ifyo ubumi bwa bantu bwali ilyo bashilafwa no kumubuusha tacayafya kuli Kalenga, uwakwata amano na maka ayashipeleela. (Yobo 12:13; Esaya 40:26) Apo Yehova e wakwatisha ukutemwa, akebukisha bwino bwino bonse abafwa no kubabuusha pa kuti bakekale muli paradise  wa pe sonde nga fintu bali ilyo bashilafwa.—1 Yohane 4:8.

Ilyo impela ya calo ca kwa Satana ilepalamina, abatetekela Lesa wa cine baleenekela ifisuma nga nshi ku ntanshi. (Amapinda 2:21, 22; Daniele 2:44; 1 Yohane 5:19) Kemba wa malumbo atulaya ati: “Pashala panono, e lyo umubifi takabepo; . . . lelo abalanda bakapyaninine calo, no kuilemeno bwingi bwa mutende.” (Amalumbo 37:10, 11) Imisoka no lukakala fikapwa. Ubupingushi e bukacimfya, kabili amafya ya ndalama yakapwa. (Amalumbo 37:6; 72:12, 13; Esaya 65:21-23) Fyonse ifilanga akapaatulula ka mu bwikashi, umushobo, intambi, ne nko fikapwa. (Imilimo 10:34, 35) Inkondo ne fyanso fibomfiwa mu nkondo tafyakabeko. (Amalumbo 46:9) Pali ilya nshita “umwikashi wa mu calo takasose, ati, Nindwala.” (Esaya 33:24) Bonse bakaipakisha ubumi bwapwililika kabili ubusuma. (Ukusokolola 21:3, 4) Paradise wa pe sonde nomba line fye akabako. Yehova afwaya ukuti ikabeko!

Ca cine, amasubilo yonse aya mu Baibolo nomba line fye yakafishiwapo. Mulandu nshi twingasuminina ifya bufi ifipepwa muli cino calo nga kuti twacetekela Yehova no mutima onse? Afwaya “abantu bonse ukupusuka no kufika ku kwishibe Cine.” (1 Timote 2:3, 4) Ukucila ukupoosa inshita ne fikwatwa ku fya kwelenganya fye ifya muli buno bwikashi ne milungu ipepwa, natukule mu kwishiba Lesa wa cine no kumutetekela no mutima wesu onse.—Amapinda 3:1-6; Yohane 17:3.

[Icikope pe bula 6]

Ukulingana ne fyo Yehova na Yesu bamona, Lasaro aleele fye

[Ifikope pe bula 7]

Paradise wa pe sonde nomba line akabako