Yehova E ca Kumwenako Capulamo ica Busuma
Yehova E ca Kumwenako Capulamo ica Busuma
“Tooteleni Yehova wa milalo, pantu Yehova musuma.”—YEREMIA 33:11.
1. Cinshi citucincisho kulumbanya Lesa pa busuma bwakwe?
YEHOVA LESA musuma umupwilapo. Kasesema Sekaria abilishe ati: “Yangu ifyo bwakula ubusuma bwakwe!” (Sekaria 9:17, NW) Cine cine, fyonse ifyo Lesa acitile ku kupekanye sonde ukuti tuleipakisha filanga ubusuma bwakwe. (Ukutendeka 1:31) Tatwakatale atwishiba amafunde yapikana ayo Lesa abomfeshe pa kubumba imyulu. (Lukala Milandu 3:11; 8:17) Lelo fimo fimo ifyo twaishiba e fitucincisha ukulumbanya Lesa pa busuma bwakwe.
2. Ubusuma cinshi?
2 Ubusuma cinshi? Mibele isuma. Lelo, te mibele fye iyacila pa bubi bonse. Ubusuma, ubwaba cisabo ca mupashi, mibele iifuma mu kucite cisuma. (Abena Galatia 5:22, 23) Tucito busuma ilyo twacitila bambi ifisuma ku kubaafwa. Mu bwikashi buno, ifyo bamo batila fisuma, kuli bambi fibi. Lelo, nga tulefwaya ukuipakisha umutende ne nsansa, kufwile kwabako icipimo cimo ica busuma. Nani engabikako ico cipimo?
3. Cinshi Ukutendeka 2:16, 17 kulanda pa cipimo ca busuma?
3 Lesa e ubika icipimo ca busuma. Ku ntendekelo ya bantunse, Yehova aebele umuntu wa ntanshi ati: “Umuti onse wa mwi bala, ukulya ulelyako: lelo umuti wa kulengo kwishibo busuma no bubi te kuti ulyeko: pantu mu bushiku walyako ukufwa ukafwa.” (Ukutendeka 2:16, 17) Ca cine, abantunse bakabila ukushintilila pali Kabumba wabo pa kuti beshibe ubusuma no bubi.
Ubusuma Ubwa ku Luse Fye
4. Cinshi Lesa acitila abantunse ukutule lyo Adamu abembwike?
4 Isubilo lya bantunse ilya kukwata insansa sha muyayaya ishapwililika lyapumfyanishiwe ilyo Adamu abembwike no kukaana insambu sha kwa Lesa isha kubikako ifipimo fya busuma. (Ukutendeka 3:1-6) Lelo, ilyo abana ba kwa Adamu bashilafyalwa ku kupyana ulubembu ne mfwa, Lesa asobele ukwisa kwa Bufyashi bwapwililika. Pa kulanda ku “cisoka cikote,” Satana Kaseebanya, Yehova abilishe ati: “Ndebika no bulwani pa kati ka iwe no mwanakashi, kabili pa kati ka bufyashi bobe no bufyashi bwakwe: bwene bwakulakulasa ku mutwe, nobe wakulabulasa ku citende.” (Ukusokolola 12:9; Ukutendeka 3:15) Cali bufwayo bwa kwa Yehova ukulubula abantunse ababembwike. Pa mulandu wa busuma bwakwe ubwa ku luse fye, Yehova alipekanya ipusukilo kuli abo abatetekela mwi lambo lya cilubula ilya Mwana wakwe uwatemwikwa.—Mateo 20:28; Abena Roma 5:8, 12.
5. Nangu twapyana ukulinga kwa mutima ukubi, mulandu nshi twingacitila ubusuma eyefilya?
5 Kwena, pa mulandu wa lubembu lwa kwa Adamu, twalipyana ukulinga kwa mutima ukubi. (Ukutendeka 8:21) Lelo icawamako fye ca kuti Yehova alatwafwa ukucito busuma eyefilya. Ukwikalilila mu fyo twasambilila mu malembo yakwe aya mushilo ayacindama ‘kutulenga aba mano ukulola ku kupusuka’ kabili ‘kututeyanya ku kubombo mulimo onse usuma’ no kutwafwa ukucite cisuma mu menso yakwe. (2 Timote 3:14-17) Lelo, pa kuti tunonkelemo mu kufunda kwa mu Malembo no kucito busuma, tufwile ukuba nga kemba wa malumbo uwaimbile ati: “Imwe [mwe Yehova] mwaliwama kabili mulawamya; nsambilisheni ifipope fyenu.”—Amalumbo 119:68.
Yehova Atootelwa pa Busuma Bwakwe
6. Ilyo Imfumu Davidi yaletele icipao ca cipingo ku Yerusalemu, mashiwi nshi yali mu lwimbo abena Lebi baimbile?
6 Imfumu Davidi iya Israele wa pa kale yasumine ukuti Lesa musuma kabili yalombele ubutungulushi Bwakwe. Davidi atile: “Yehova musuma, kabili alitambalala; e ico alanga ababembu umwa kwenda.” (Amalumbo 25:8) Pa kufunda kwa kwa Lesa ukwapeelwe ku bena Israele pali amafunde 10 ayacindama, e kutila, Amafunde Ikumi ayalembelwe pa fipaapaatu fibili ifya mabwe no kusungilwa mu mbokoshi yashila iitwa icipao ca cipingo. Ilyo Davidi aletele Icipao ku Yerusalemu, umusumba ukalamba mu Israele, abena Lebi baimbile ulwimbo abati: “Tooteleni Yehova, pantu musuma, pantu lwa muyayaya uluse lwakwe.” (1 Imilandu 16:34, 37-41) Fintu caweme ukumfwa ayo mashiwi ku milomo ya bakemba abena Lebi!
7. Cinshi cacitike ilyo Icipao caletelwe Umwashilisha na pa numa Solomone apepele ipepo lya kupeela itempele?
7 Amashiwi yamo yene aya kulumbanya yalilumbwilwe pa kupeele tempele lya kwa Yehova ilyakuulilwe na Solomone mwana Davidi. Ilyo icipao ca cipingo cabikilwe Umwashilisha mwe tempele ilipya, abena Lebi batendeke ukulumbanya Yehova, “pantu musuma, pantu lwa muyayaya uluse lwakwe.” Lilya line fye itempele lyaiswilemo ikumbi ukulangilila ukubapo kwa kwa Yehova ukwa bukata. (2 Imilandu 5:13, 14) Ilyo Solomone apepele ipepo lya kupeela itempele, “umulilo waponene mu muulu, no koce ca kuninika na malambo.” Pa kumone fi, “abana ba kwa Israele . . . e lyo bakonteme ne finso pa nshi apalambatikwa amabwe, balashinshimuna, no kutootela Yehova, abati, Pantu musuma, pantu lwa muyayaya uluse lwakwe.” (2 Imilandu 7:1-3) Pa numa ya kusefya inshiku 14, abena Israele babwelele ku mwabo “bali ne nsansa ne mitima iyasekela pa busuma ubo Yehova acitile kuli Davidi, na kuli Solomone, na ku bena Israele abantu bakwe.”—2 Imilandu 7:10.
8, 9. (a) Nangu abena Israele balumbenye Yehova pa busuma bwakwe, cinshi baishilecita pa numa? (b) Cinshi casobelwe pali Yerusalemu ukupitila muli Yeremia, kabili uko kusesema kwafishiwepo shani?
8 Ku ca bulanda, abena Israele tabatwalilile ukwikala umwabela inyimbo shabo isha kulumbanya Lesa. Mu kupita kwa nshita, abena Yuda ‘bacindike fye Yehova ku milomo yabo.’ (Esaya 29:13) Tabakonkele ifipimo fya kwa Lesa ifya busuma, lelo batendeke ukucito bubi. Kabili bubi nshi bacitile? Balepepo tulubi, balecito bulalelale, balefyenga abapiina, no kucita imembu shimbi ishikalamba! Ico calengele ukuti Yerusalemu onaulwe, na bekashi ba uko basendwe bunkole ku Babele mu 607 B.C.E.
9 E ico Lesa asalapwile abantu bakwe. Lelo, ukupitila muli kasesema Yeremia, asobele ukuti mu Yerusalemu mukomfwika kabili ishiwi lya bakatila: “Tooteleni Yehova wa milalo, pantu Yehova musuma, pantu lwa muyayaya uluse lwakwe.” (Yeremia 33:10, 11) Na kuba ici e cacitike. Ilyo icalo cali amapopa pa myaka 70, mu 537 B.C.E., abashelepo abaYuda babwelele ku Yerusalemu. (Yeremia 25:11; Daniele 9:1, 2) Bakuulile icipailo cipya cipya apabelele itempele lya kale pa Lupili lwa Moria, balaninikapo na malambo. Ica kukuulapo itempele cabikilwe mu mwaka walenga ibili pa numa ya kubwela kwabo. Awe mwandi yali ni nshita ya kusekelela! Esra atile: “Abalekuula, ilyo babikile ica kukuulapo itempele lya kwa Yehova, kwaiminine bashimapepo nabafwale fya bushimapepo, bali na mapenga, na bena Lebi abana baume ba kwa Asafi bali na malimba ku kutasha Yehova umwabelo lutambi lwa kwa Davidi imfumu ya bena Israele. Awe baleasukana mu kutasha na mu kutootela Yehova, abati, Pantu musuma, pantu lwa muyayaya uluse lwakwe pa bena Israele.”—Esra 3:1-11.
10. Amalumbo 118 yatendeka no kulekelesha na mashiwi nshi ayacindama?
10 Amashiwi yapalako aya kulumbanya ubusuma bwa kwa Yehova e mo yaba mu malumbo yamo yamo. Pali aya paba na yaba mu Amalumbo 118, ayaimbilwe ne ndupwa sha bena Israele pa kusondwelela ukusefya kwa ca Kucilila. Aya malumbo yatendeka no kulekelesha na mashiwi ayatila: “Tooteleni Yehova, pantu musuma, pantu lwa muyayaya uluse lwakwe.” (Amalumbo 118:1, 29) Nalimo aya e mashiwi ya kulumbanya aya kulekelesha ayo Yesu Kristu aimbile ubushiku pamo na batumwa bakwe aba busumino ilyo ashilafwa mu 33 C.E.—Mateo 26:30.
“Shi Nangeni Ubukata Bwenu”
11, 12. Ilyo Mose amwene icitontonshi ca bukata bwa kwa Lesa, kubilisha nshi aumfwile?
11 Ukwampana kwa busuma bwa kwa Yehova no luse lwakwe fyalumbwilwe umuku wa kubalilapo imyanda ya myaka ilyo Esra ashilabako. Inshita fye inono ilyo abena Israele bapepele umwana wa ng’ombe uwa golde mu matololo, ninshi incitatubi shali nashikandwa, Mose apaapeete kuli Yehova ati: “Shi nangeni ubukata bwenu.” Pa kwishiba ukuti Mose taali na kumona icinso Cakwe no kuba no mweo, Yehova atile: “Ine ndepisho busuma bwandi bonse pa cinso cobe.”—Ukufuma 33:13-20.
12 Ubushiku bwakonkelepo, ubusuma bwa kwa Yehova bwapitile pa cinso ca kwa Mose pa Lupili lwa Sinai. Lilya line, Mose amwene icitontonshi ca bukata bwa kwa Lesa no kumfwa ukubilisha kwa kuti: “Yehova, Yehova, Lesa wa nkumbu kabili uusenamina, uukokolo kukalipa, kabili uwafulisho luse ne cishinka; uusungila aba makana uluse, uulekelela amampuulu no bupulumushi no lubembu: kabili ababi takabalinge aba kaele nangu pamo; uulingulwila amampuulu ya bashibo pa bana, na pa bana ba bana, ukufika ku ba nkulo iyalenga shitatu ne yalenga shine.” (Ukufuma 34:6, 7) Aya mashiwi yalango kuti ubusuma bwa kwa Yehova bwalyampana no luse lwakwe ne mbali shimbi isha mibele yakwe. Ukubebete iyi mibele kukatwafwa ukucita ubusuma. Natubale tubebete imibele iyalumbulwa imiku ibili muli uku kubilisha kushaiwamina pa busuma bwa kwa Lesa.
“Lesa . . . Uwafulisho Luse”
13. Mu kubilisha pa busuma bwa kwa Lesa, mibele nshi iyalumbulwa imiku ibili, kabili mulandu nshi cibelele icalinga?
13“Yehova [ni] Lesa . . . uwafulisho luse . . . , uusungila aba makana uluse.” Ishiwi lya ciHebere ilyapilibulwa “uluse” na kabili lyalola mu kutila “ukutemwa kwa cishinka.” Iyi e mibele fye yalumbulwa imiku ibili mu kubilisha kwa kwa Lesa kuli Mose. Fintu cili icalinga, pantu ukutemwa e mibele yapulamo iya kwa Yehova! (1 Yohane 4:8) Amashiwi yalumbuka aya kulumbanya Yehova aya kuti “pantu musuma, lwa muyayaya uluse lwakwe” yakomaila pali iyi mibele.
14. Ni bani maka maka abaipakisha ubusuma bwa kwa Lesa no luse?
14 Imibele imo iya busuma bwa kwa Yehova ya kuti ‘alifulisho uluse.’ Acite ci maka maka pa kusakamana ababomfi bakwe abaipeela kabili aba busumino. (1 Petro 5:6, 7) Nga fintu Inte sha kwa Yehova bengashimiko bunte, ‘abelelo luse’ abamutemwa no kumubombela. (Ukufuma 20:6) Yehova alilekele ukubelela uluko lwa Israele uluse nelyo ukubalanga ukutemwa kwa cishinka, pantu bakeene Umwana wakwe. Lelo ubusuma bwa kwa Lesa no kutemwa kwakwe ukwa cishinka ku Bena Kristu ba busumino fikatwalilila umuyayaya.—Yohane 3:36.
Yehova—Wa Nkumbu Kabili Uusenamina
15. (a) Ukubilisha uko Mose aumfwile pa Lupili lwa Sinai kwatendeke na mashiwi nshi? (b) Inkumbu cinshi?
15 Ukubilisha uko Mose aumfwile pa Lupili lwa Sinai kwatendeke na mashiwi ayatila: “Yehova, Yehova, Lesa wa nkumbu kabili uusenamina.” Ishiwi lya ciHebere ilyapilibulwa “inkumbu” kuti yalosha ku “mala” kabili lyalipalana ne shiwi “mu nda.” E ico inkumbu e kutila icitemwishi icaba mu nda ya muntu. Lelo inkumbu te kumfwila fye umuntu ubulanda. Shifwile ukutulenga ukutontololako ukucula kwa bambi. Ku ca kumwenako, baeluda abakwata ukutemwa bakabila ukuba ne nkumbu ku basumina banabo, ‘ukubabelelo luse ne nsansa’ ilyo caba icalinga.—Abena Roma 12:8; Yakobo 2:13; Yuda 22, 23.
16. Mulandu nshi cingasoselwo kuti Yehova aba uusenamina?
16 Ukusenamina e mibele na imbi iya busuma bwa kwa Lesa. Umuntu uusenamina “alalangulukilako ifyo umunankwe aleumfwa” no kuba uwa ‘cikuuku maka maka ku bantu abo acilile.’ Yehova e ca kumwenako cawamisha pa kusenamina ababomfi bakwe aba busumino. Ku ca kumwenako, ukupitila muli bamalaika, Lesa uusenamina akoseshe kasesema umukote Daniele kabili aebele nacisungu Maria ulwe shuko ali no kukwata ilya kufyala Yesu. (Daniele 10:19; Luka 1:26-38) Apo tuli bantu ba kwa Yehova, tulatasha nga nshi ukusenamina kwakwe ukwa kutupaapaata ukupitila muli Baibolo. Tulamulumbanya pali ubu busuma bwakwe, kabili tulafwaisha ukusenaminako bambi. Lintu aba bumupashi bapuupuutula uwasumina munabo “ne mitima iyanakilila,” besha ukucite co mu bufuuke no kusenamina.—Abena Galatia 6:1.
Lesa Uukokolo Kukalipa
17. Mulandu nshi tutashisha pa kuti Yehova aba “uukokolo kukalipa”?
17“Lesa . . . uukokolo kukalipa.” Aya mashiwi yakomaila pa mibele na imbi iya busuma bwa kwa Yehova. Yehova mu kutekanya alashipikisha ifilubo fyesu no kutupeela inshita ya kucimfya ubunake bwesu ubukalamba ukuti tulunduluke. (AbaHebere 5:12–6:3; Yakobo 5:14, 15) Ukutekanya kwa kwa Lesa na kabili kunonsha abashilati babe bakapepa bakwe. Bacili bali ne nshita ya kwankulako ku bukombe bwa Bufumu no kulapila. (Abena Roma 2:4) Lelo, nangu Yehova aba uwatekanya, ubusuma bwakwe limo limo bumulenga ukukalipa, nga filya acitile ilyo abena Israele bapepele umwana wa ng’ombe uwa golde pa Lupili lwa Sinai. Nomba line, Lesa akalanga ubukali bwakwe apakalamba lintu akonaula ubwikashi bwa kwa Satana.—Esekiele 38:19, 21-23.
18. Mu kulaya icishinka, Yehova apusana shani ne ntungulushi sha pano isonde?
18“Yehova [ni] Lesa . . . uwafulisha . . . icishinka.” Awe Yehova wena taba nge ntungulushi sha pano isonde, abalaya ifingi no kukanafisha! Lelo, bakapepa ba kwa Yehova kuti bacetekela fyonse ifyalandwa mu Cebo cakwe icapuutwamo. Apo Lesa alifulisha icishinka, lyonse kuti twacetekela amalayo yakwe. Mu busuma bwakwe, Shifwe wa mu muulu alasuka amapepo yesu nga twalomba icine ca ku mupashi kabili alatupa mu kupaka.—Amalumbo 43:3; 65:2.
19. Bushe Yehova alanga shani apakalamba ubusuma bwakwe ku babembu abalapila?
19“Yehova [ni] Lesa . . . uulekelela amampuulu no bupulumushi no lubembu.” Ku busuma bwakwe, Yehova aba uwaiteyanya ukulekelela ababembu abalapila. Ukwabulo kutwishika, tulatasha nga nshi ukuti Shifwe wa mu muulu uwa kutemwa alenga kwaba ukulekelela kwa membu mwi lambo lya kwa Yesu. (1 Yohane 2:1, 2) Cine cine, tuli ne nsansa ukuti bonse abatetekela mu cilubula kuti baipakisha ukuba ifibusa fya kwa Yehova, pa kuba ne subilo lya bumi bwa muyayaya mu calo cipya ico alaya. Awe iyi e milandu ikalamba iya kulumbanishisha Yehova pa busuma bwakwe acita ku bantunse!—2 Petro 3:13.
20. Bushininkisho nshi twakwata ubwa kuti Lesa tatekelesha bubi?
20“Ababi takabalinge aba kaele nangu pamo.” Uyu e mulandu umbi uwa kutootela Yehova pa busuma bwakwe. Mulandu nshi? Pantu imibele yacindama iya busuma ya kukanatekelesha ububi nangu pamo. Kabili, “ilyo Shikulu Yesu akasokololwa ukufuma mu muulu pamo na bamalaika ba maka yakwe,” icilandushi cikesa “ku bakaano kwishiba Lesa, na ku bashinakila mbila nsuma.” Aba e ‘bakamono kukandwa, uboni bwa muyayaya.’ (2 Abena Tesalonika 1:6-9) Lyene bakapepa ba kwa Yehova abakapusuka bakaipakisha nga nshi ubumi ukwabula ukupumfyanishiwa ku bantu abashipepa, “abashatemwa busuma.”—2 Timote 3:1-3.
Pashanyeni Ubusuma bwa kwa Yehova
21. Mulandu nshi tulingile ukucitila ubusuma?
21 Ukwabulo kutwishika twalikwata imilandu iingi iya kulumbanishisha Yehova no kumutootela pa busuma bwakwe. Apo tuli babomfi bakwe, bushe te kuti tuibikilisheko ukukwatako iyi mibele? Na kuba, e fyo umutumwa Paulo acincishe Abena Kristu banankwe ati: “Mube abapashanya Lesa, nga bana abatemwikwa.” (Abena Efese 5:1) Shifwe wa mu muulu lyonse alacita ubusuma, e fyo na ifwe tufwile ukucita.
22. Cinshi tukabebeta mu cipande cikonkelepo?
22 Nga twaliipeela no mweo onse kuli Yehova, ukwabulo kutwishika tulafwaisha ukupashanya ubusuma bwakwe. Pantu twatuntwike kuli Adamu uwabembwike, tacayanguka ukucita icisuma. Lelo, mu cipande cikonkelepo, tukamona umulandu na ifwe bene twingacitilo busuma. Na kabili tukabebeta inshila shalekanalekana umo tufwile ukupashanya Yehova—uwaba e ca kumwenako capulamo ica busuma.
Kuti Mwayasuka Shani?
• Ubusuma cinshi?
• Mashiwi nshi aya mu Malembo ayakomaila pa busuma bwa kwa Lesa?
• Mibele nshi imo iya busuma bwa kwa Yehova?
• Mulandu nshi tulingile ukupashanishisha ica kumwenako ca kwa Yehova ica busuma?
[Amepusho]
[Icikope pe bula 12]
Yehova asalapwile abantu bakwe pantu tabakonkele amashiwi yabo aya kumulumbanya
[Icikope pe bula 12]
Abashalapo ba busumino babwelele ku Yerusalemu
[Icikope pe bula 13]
Mose aumfwile ukubilisha kushaiwamina pa busuma bwa kwa Lesa
[Icikope pe bula 15]
Yehova acita ubusuma bwakwe pa kutupaapaata ukupitila muli Baibolo