Baliikwatila Amano

INSOSELO imo ya ku Nigeria itila: “Abakalamba balikwata amano, lelo abana nabo baliikwatila amano.” Edwin, eluda wa Bwina Kristu mu Nigeria, asangile ukuti iyi nsoselo ya cine.

Bushiku bumo, asangile akabokoshi ka cela mwi samba lye tebulo pa ng’anda.

Edwin aipwishe abana bakwe batatu ati: “Kabokoshi ka kwa nani aka?”

Emmanuel uuli ne myaka 8 ayaswike ati: “Kandi.” Apo pene fye akonkenyepo no kusosa ati aka kabokoshi ka ndalawa, akalepele basentimita 12 konse konse, akakwete akapunda pa muulu, ka kupoosamo indalama sha kwafwilisha umulimo wa mwi sonde lyonse uwa Nte sha kwa Yehova. Alondolwele ati: “Apo nshiya ku Ng’anda ya Bufumu cila bushiku, e co napangile aka kabokoshi pa kuti lyonse ilyo nshibomfeshe impiya sha kuliilamo, ndepoosa mu kabokoshi.”

Bashi Emmanuel balikwete akabokoshi pa ng’anda aka kupoosamo indalama sha kwila kwi bungano lya citungu ilibako pa mwaka. Lelo pa mulandu wa kuti pa lupwa paponene ifya bukangalume, babomfeshe indalama shalimo. Pa kushininkisha ukuti indalama tashakabomfiwe kuli fimbi, Emmanuel atwele icikopo ca kale kuli kocelela wa fyela ukuti ocelele bwino akabokoshi. Ilyo kocelela aishibe ico Emmanuel aletele cilya cikopo, amupangile akabokoshi ka cela ukubomfya amalata yapooswa. Michael, munyina wa kwa Emmanuel, uwali ne myaka isano, na o alombele ukumupangilako akabokoshi.

Pa kupeshiwa amano pa co abana bacitile, Edwin abepwishe umulandu bapangishishe utubokoshi. Michael ayaswike ati: “Ndefwaya ukulasangula!”

Abafyashi ba kwa Emmanuel, Michael, na Uchei, nkashi yabo uwa myaka 9, tabaishibe ukuti balebulapo indalama shimo balepeelwa isha kuliilamo no kushipoosa mu tubokoshi. Nga nani wabasambilishe ukupanga utubokoshi twakuposamo indalama? Ilyo aba bana bakulile ica kutila kuti baikata indalama, abafyashi babo babasambilishe ukulapoosa shimo mu tubokoshi twa misangulo utwa mu Ng’anda ya Bufumu. Ukwabula no kutwishika, abana babomfeshe ifyo basambilile.

Ilyo utubokoshi twaiswile, balitupantwile. Basangilemo amadola yatatu na masenti 13—indalama fye shalondoloka mu calo umo amalipilo ya pa mwaka nga kupendela pali avareji yafika nalimo ku madola 300. Ubupe bwa kuitemenwa ubwa musango yu bulafwilisha umulimo wa kushimikila uwa Nte sha kwa Yehova uulebombwa mu fyalo 235 mwi sonde lyonse.