Ifipusho Ukufuma ku Babelenga

Bushe kufika pi Abena Kristu pali lelo bengomfwila ifibindo fya Malango ya kwa Mose pa kuupana na lupwa?

Amafunde Yehova apeele uluko lwa bena Israele tayalandapo sana pa kusefya ubwinga ne fyo bufwile ukuba. Lelo, yalibinda bamo ukuupana. Ku ca kumwenako, pa Ubwina Lebi 18:6-20, paba ukusendama pamo ukwa mu cupo ukwalekanalekana ukwabindwa, no ku kusanshamo “uwa ku mulopa wa mubili wakwe” [“lupwa uwapalamisha,” NW]. Ifi fikomo fyalondolola bwino bwino ba lupwa abashifwile ukusendama pamo ukwa mu cupo. Kwena, Abena Kristu tabakonka Amalango ya kwa Mose. (Abena Efese 2:15; Abena Kolose 2:14) Nalyo line ici tacilolele mu kuti Abena Kristu te kuti bangweko kuli uyu mulandu ilyo balesala uwa kuupana nankwe. Kwaba ifingi ifyalenga ukuti cibe fi.

Ica kubalilapo fye, kwaba amafunde ya buteko ayabinda ukuupana na lupwa wapalamisha, kabili Abena Kristu balingile ukumfwila amafunde ya mu calo bekala. (Mateo 22:21; Abena Roma 13:1) Kwena aya mafunde yalapusanapusana ukulingana ne fifulo. Muno nshiku amafunde yakuma icupo ayengi yashimpwa pa mibombele ya mfyalo. Cishinka ukuti ukuupana na lupwa kuti kwalenga abana ukufyalwa na malwele nelyo ukuba ifilema. Ici pamo no ‘kunakila bakateka abacilamo,’ cilenga Abena Kristu ukukonka amafunde ya calo ayalanda pa cupo.

Lyene kwaba ne fyasuminishiwa ne fishasuminishiwa mu bwikashi bwesu. Mu mekalo yonse mwaba amafunde ne myata ifikanya balupwa bapalamisha ukuupana. Batila ukuupana pa lupwa lishiku, e co, kwalibindwa. Nangu line ukuupana kwabindwa kuti kwapusanapusana ukulingana ne ntambi, icitabo ca The Encyclopædia Britannica catila: “icishinka ca kuti, abaleupana nga ni ba lupwa bapalamisha, e lyo ciba ishiku sana pantu ukusendama na lupwa wapalamisha kwalibindwa.” E co, nangu line tabaleupaana na lupwa, Abena Kristu tabafwaya ukusulililako fye ku myata nelyo ku fikonkwa mu bwikashi, pa kuti tabaletele umuseebanya pa cilonganino ca Bwina Kristu nelyo pe shina lya kwa Lesa.—2 Abena Korinti 6:3.

Tatufwile ukusuula kampingu wesu uo Lesa atupeela. Abantu bonse bafyalwa na kampingu uubeba icisuma ne cibi. (Abena Roma 2:15) Kampingu nga taonaulwa ku micitile ibi, aleba abantu icasuminishiwa kabili icisuma ne cishili ca cifyalilwa kabili icikalifya bambi. Yehova alandile pali ici ilyo apeele Abena Israele ifunde lyalekanya balupwa bapalamisha ukuupana. Tubelenga ukuti: “Mwilacitilo mwabele micitile ya mu calo ca Egupti ico mwaikelemo, kabili mwilacitilo mwabele micitile ya mu calo ca Kanaani ico ine ndemutwalako; kabili mu fipope fyabo mwilaendelamo.” (Ubwina Lebi 18:3) Abena Kristu balikatamika kampingu wabo uwasambilishiwa na Baibolo kabili tabafwaya wene ukonaulwa ku fyapotongana ifyo inko shasumina pa lwa calungama ne calubana.—Abena Efese 4:17-19.

E co, kuti twatila shani? Twaumfwa ukuti nangu line Abena Kristu tabakonka Amalango ya kwa Mose, kampingu wabo alabeba bwino bwino ukuti ukuupana na lupwa wapalamisha—pamo nga wishi no mwana mwanakashi, nyina no mwana mwaume, munyina na nkashi yakwe—tacasuminishiwa nangu panono ku Bena Kristu. * Apo indupwa shilekulilako, Abena Kristu balishiba ukuti kwaba amafunde ayalanda pa fyupo fya mwi funde no kuti kwaba ifipimo fyasuminishiwa mu bwikashi na mu ntambi. Tufwile ukufitontonkanyapo sana pa kuti tumfwile ukukonkomesha kwa mu Malembo ukwa kuti: “Ukuupana kube kwa mucinshi kuli bonse.”—AbaHebere 13:4.

[Futunoti]