‘Ukutemwa Kwesu Nakukulilako’

PALI Cisano, pa March 31, 2000, Ulupili lwa Usu mu Hokkaido, ku Japan, ulo lushabalapuukapo mu myaka 23, lwalipuukile. Iminshipendwa ya bekashi bafulumwike ukwali ubusanso. Abengi balufishe amayanda ne sha ncito, lelo icawemeko ca kuti takwali uwafwile. Pa bantu abafulumwike pali ne Nte sha kwa Yehova 46, lelo tabalekeleshiwe.

Pali bulya bwine bushiku ulupili lwapuukile, baliteyenye ifya kukumbusuka kabili bacitile co no bwafwilisho bwa kwa kangalila enda uwa Bwina Kristu uwalebombela muli ilya ncende. Tapakokwele, ifya kukumbusuka fyatendeke ukufika ukufuma mu filonganino fya mupepi. Komiti ya kukumbusuka yalipangilwe bwangu bwangu kwi ofeshi lya ku Japan, kabili Inte sha kwa Yehova mu Japan monse balisangwile imisangulo icine cine ku kukumbusuka abalecula. Ku kutungilila imilimo ya ku mupashi, abatumikishi ba nshita yonse aba Nte sha kwa Yehova balituminwe ku cilonganino caculile sana no bu busanso, kabili kangalila wa muputule aletandalila icilonganino libili libili ku kwaafwa bamunyina lwa mu muntontonkanya na lwa ku mupashi.

Inte sha muli ilya ncende umwali ubusanso batwalilile ukulongana kwa Bwina Kristu muli ilya nshita ya mafya ukubomfya amayanda ayali mu ncende mwaliko bwino. Lintu nomba basuminishiwe ukubwelela kuli ilya ncende kwali Ing’anda ya Bufumu, bamunyina balibwelele no kusanga icikuulwa nacisendamina lubali lumo, nacikwata imilale, kabili naconaulwa. Mupepi fye ne Ng’anda ya Bufumu, icilindi capangike muli ulu lupili lwapuukile cilefuuka icushi. BaNte baipwishe abati, ‘Bushe kuti cawama ukutwalilila ukulonganina mu ncende ya musango yu? Bushe kuti twawamya Ing’anda ya Bufumu?’

Basalilepo ukukuula Ing’anda ya Bufumu iipya mu ncende yali mupepi iyali bwino. Komiti wa Makuule uwa mu Citungu alyafwilishe umwalekabilwa. Indalama baNte muli cilya calo basangwile shabomfiwe ku kukuula. Bwangu bwangu bashitile incende, kabili pa mulandu wa bwafwilisho bwa minshipendwa ya bakabomba ba kuitemenwa, Ing’anda ya Bufumu iipya yalikuulilwe mu nshita fye iinono. Pa Mulungu, July 23, 2000, abantu 75 basangilwe ku kulongana kwa kubalilapo ukwacitilwe muli ilya Ng’anda ya Bufumu iipya iyakuulilwe. Abengi abali mwi bumba balilile ifilamba pantu balitemenwe. Ilyo Ing’anda ya Bufumu yapeelwe mu October ulya wine mwaka, eluda umo mu cilonganino cilya atile: “Ukupuuka kwa lupili kwaletele amafya no bucushi. Lelo, uku kukuula nakufumyapo umwenso no kuleta insansa. Ukutemwa twatemwa Yehova na bamunyinefwe aba Bwina Kristu abatemwikwa nakukulilako!”

[Abatusuminishe Ukubomfya Icikope pe bula 19]

Ukupuuka kwa Lupili lwa Usu: AP Photo/Koji Sasahara