Ifipusho Ukufuma ku Babelenga

Bushe ukwimitwa kwa kwa Yesu kwalyambukilwe no kukanapwililika kwa kwa nacisungu Maria?

Ukukuma ku “kufyalwa kwa kwa Yesu,” icalembwa icapuutwamo citila: “Nyina Maria akobekelwe kuli Yosefe, lelo ilintu bacili tabalapalamana asangilwe ali ne fumo ilyafuma ku Mupashi wa mushilo.” (Mateo 1:18) Ukwabulo kutwishika, umupashi wa mushilo uwa kwa Lesa wabombele umulimo wacindama kwi fumo lya kwa Maria.

Lelo, ni shani pa lwa kwa Maria? Bushe ulusandesande lwa lini ulwa kwa Maria lwalibombele icili conse mu kwimitwa kwakwe? Ukukonka amalayo Lesa apeele ifikolwe fya kwa Maria e kuti Abrahamu, Isaki, Yakobo, Yuda ne Mfumu Davidi, umwana wali no kufyalwa ali no kuba icine cine ni ntuntuko yabo. (Ukutendeka 22:18; 26:24; 28:10-14; 49:10; 2 Samwele 7:16) Ni mu nshila nshi imbi uyu mwana uwafyelwe kuli Maria engaba impyani yalinga iya malayo ya kwa Lesa? Alingile ukuba mwana wa cine cine uwa kwa Maria.—Luka 3:23-34.

Malaika wa kwa Yehova amonekele ku mukashana nacisungu Maria, ukusosa ati: “Witiina, Maria, pantu nausango kusenaminwa kuli Lesa. Kabili mona, ukemite fumo, no kufyalo mwana mwaume, ne shina lyakwe ukamwinike Yesu.” (Luka 1:30, 31) Ukwimita kufwaya ulusandesande lwa lini lwanona. Cimoneka ukuti Yehova Lesa alengele ulusandesande lwa lini mwi fumo lya kwa Maria ukunoniwa, kabili acitile ici ukupitila mu kukuusha ubumi bwa Mwana wakwe uwafyalwa eka ukufuma ku muulu ukwisa pe sonde.—Abena Galatia 4:4.

Bushe umwana uwaimitwe muli iyi nshila ku mwanakashi uushapwililika kuti aba uwapwililika no wabula ulubembu mu mubili wakwe? Bushe amafunde ya bupyani yabomba shani ngo kupwililika no kukanapwililika fyakumbinkanishiwa? Ibukisheni ukuti umupashi wa mushilo walibomfiwe mu kukuusha ubumi bwapwililika ubwa Mwana wa kwa Lesa no kulenga Maria ukwimita. Ici cafuutile ukukanapwililika ukwaliko mu lusandesande lwa lini ulwa kwa Maria, no kuletamo imfyalo iyalimo ukupwililika ukufuma fye mu kubangilila.

Te mulandu ne fyo ulusandesande lwa lini lya kwa Maria lwanoniwe, kuti twaba abashininkisha ukuti imibombele ya mupashi wa mushilo uwa kwa Lesa pali ilya nshita yalifikilishe ubufwayo bwa kwa Lesa. Malaika Gabriele atile kuli Maria: “Umupashi wa mushilo ukesa pali iwe, na maka ya Wapulamo yakakufimba; kabili e co icikafyalwa ciketilwa ica mushilo, Umwana wa kwa Lesa.” (Luka 1:35) Icine cine, umupashi wa mushilo uwa kwa Lesa walipangile, ico twingeta ati ica kucinga pa kuti ukukanapwililika nelyo ububi tabukumine akaana akalepangwa mu nda ukufuma pa kwimitwa.

Nacimoneka fye ukuti ubumi ubwapwililika ubwa kwa Yesu tabwafumine ku muntu lelo kuli Wishi wa ku muulu. Yehova ‘ewamupekanishe umubili,’ kabili ukufuma pa kwimitwa kwakwe Yesu ali cine cine “uushakowela, uwapaatuka ku babembu.”—AbaHebere 7:26; 10:5.

[Icikope pe bula 19]

“Ukemite fumo, no kufyalo mwana mwaume”