“Iseni Kuli Ine, . . . na Ine Nalamupeelo Kutuusha”

Ukulongana Ukucincimusha ku Kutemwa Kabili ku Kubombe Milimo Isuma

UKUFUMA ku Toronto ukufika ku Tokyo, ukufuma ku Moscow ukufika ku Montevideo—imiku iingi cila mulungu, Inte sha kwa Yehova abengi nga nshi ne fibusa fyabo balaya ku fifulo fyabo ifya kupepelako. Pali aba paba imitwe ya ndupwa ababombesha, abanaka pa numa ya kubomba akasuba konse; abakashi abapikintika na bafyashi abanakashi na bana babo abanono; abacaice ba maka abawisha akasuba ku sukulu; abakalamba abanakuka abenda panono panono pa mulandu wa kukalipwa mu mubili; ba mukamfwilwa na bana ba nshiwa abashipa; na bapopomenwa abafwaya icisansamushi.

Ishi Nte sha kwa Yehova babomfya ifya kwendelamo fyapusanapusana—amashitima yabutukisha nelyo impunda, amashitima yapita pa nshi ne fimbayambaya. Bamo balaabuka imimana umwaba ing’wena, e lyo bambi bashipikisha ukwenda mu misebo ya mu misumba ikalamba iyaisulamo bamotoka, kabili ici cilakalifya. Mulandu nshi aba bantu bonse babombesesha ifi?

Icilenga sana ni co ukusangwa ku kulongana kwa Bwina Kristu no kwasukapo e nshila yacindamisha iya kupepelamo Yehova Lesa. (AbaHebere 13:15) Umutumwa Paulo alandile pa mulandu na umbi ilyo alembele ati: “Twetetule umwa kucincimushanisha ku kutemwa kabili ku kubombe milimo isuma; twiba abaleko kulongana, . . . lelo tukonkomeshanye, pali bufi apo mulemono Bushiku bulya bulepalama.” (AbaHebere 10:24, 25) Paulo pano alandile pa fyo Davidi ayumfwile, uwaimbile ati: “Nasaminwe ilyo basosele kuli ine, abati, Tuleya ku ng’anda ya kwa Yehova.”—Amalumbo 122:1.

Mulandu nshi Abena Kristu basekelela ilyo basangwa ku kulongana? Pantu abasangwa ku kulongana te bakutambako fye. Lelo, ukulongana kubalenga ukwishibana. Uku kulongana kuba ni nshita maka maka iya kupeela no kucincimushanya ku kuba no kutemwa no kubombe milimo isuma, te kupokelela fye iyo. Ici cilenga ukulongana ukuba inshita ya kukoselesha. Na kabili ukulongana e nshila na imbi Yesu afishishapo ubulayo bwakwe ubwa kuti: “Iseni kuli ine, . . . na ine nalamupeelo kutusha.”—Mateo 11:28.

 Icifulo uko Tusansamushiwa no Kusakamanwa

Kwaba ifingi ifisuma ifilenga Inte sha kwa Yehova ukusumina ukuti ukulongana kwabo kulabapeela ukutusha. Cimo ni co pa kulongana “umusha wa cishinka kabili uwashilimuka” alatupeela ifya kulya fya ku mupashi pa nshita iyene. (Mateo 24:45) Ukulongana na kabili kulafwa ababomfi ba kwa Yehova ukuba bakasambilisha wa Cebo ca kwa Lesa abalamuka kabili abapimpa. Na kabili, pa Ng’anda ya Bufumu e po umo engasanga ibumba lya fibusa ababa no kutemwa, abayangwa bambi, abasakamana abanabo kabili abaitemenwa ukwafwa no kusansamusha bambi mu nshita sha mafya.—2 Abena Korinti 7:5-7.

E fyo cali kuli Phillis, mukamfwilwa uo umulume afwile ilyo abana bakwe babili bali ne myaka 5 na 8. Alondolola ifyo ukulongana kwa Bwina Kristu kwayafwile wene na bana bakwe, atila: “Twalesansamushiwa nga twaya ku Ng’anda ya Bufumu pantu abasumina banensu lyonse baletulanga ukuti balitutemwa kabili balatusakamana. Balecite co pa kutukumbatila, ukutwebako ifyebo ukufuma mu Malembo, nelyo ukutwikatisha mu maboko. E cifulo nalefwaya ukubapo lyonse.”—1 Abena Tesalonika 5:14.

Ilyo Marie alepwilwe, dokota wakwe amwebele ukuti pakapita mupepi ne milungu 6 pa kuti icilonda cikapole pantu cali icikalamba. Mu milungu ya kutendekelako iya kupuupuutuka kwakwe, Marie talelongana. Dokota amwene ukuti talesansamuka nga fintu ali kale. Ilyo aishibe ukuti taleya ku kulongana, amukoseleshe ukutendeka ukulongana. Marie ayaswike ati umwina mwakwe uushali ni Nte tengamusuminisha ukuya ku kulongana pantu alyangilweko ku bumi bwakwe. E co, dokota alembele icipepala ca “kweba” Marie ukuti aleya ku Ng’anda ya Bufumu pa kuti alekoseleshiwa no kukuulililwa ukupitila mu kubishanya. Pa kusondwelela Marie atila: “Pa numa ya kusangwa ku kulongana kumo, nalyumfwileko bwino. Natendeke ukulya, nalele ubushiku bonse, nshanwene sana umuti wakulesha ubukali, kabili natendeke ukumwentula na kabili!”—Amapinda 16:24.

Ukutemwa kubapo pa kulongana kwa Bwina Kristu kulamonwa na ku ba ku nse. Umusambi wa pa koleji umo asalile ukubebeta Inte sha kwa Yehova pa kuti alembe lipoti wa ku sukulu pa bantu ba mishobo yalekanalekana. Alembele pa fyo ciba pa kulongana ati: “Nalitemenwe . . . sana ifyo bansengele bwino. . . . Bucibusa bwa Nte sha kwa Yehova bwalimonekesha kabili iyi mibele e yapulilemo sana pali uku kulongana.”—1 Abena Korinti 14:25.

Muli ici calo ca mafya, icilonganino ca Bwina Kristu cifulo ca kulenga ukutuusha. Cifulo ca mutende no kutemwa. Nga mwasangwako ku kulongana, kuti mwaimwena mwe bene ukuti ya cine amashiwi ya kwa kemba wa Amalumbo ayatila: “Moneni, ifyo kwawama kabili ifyo kwa nsansa ukwikalilila pamo kwa ba bwananyina!”—Amalumbo 133:1.

[Akabokoshi ne Cikope pe bula 25]

UKWIKUSHA UKUKABILA KWAIBELA

Bushe bankomamatwi kuti bamwenamo shani mu kulongana kwa Bwina Kristu? Mwi sonde lyonse, Inte sha kwa Yehova balepanga ifilonganino fya bankomamatwi. Mu myaka 13 iyapita, ifilonganino fya bankomamatwi 27 na mabumba 43 fyalipangwa mu United States. Mu fyalo fimbi ifili nalimo 40, pali nomba muli ifilonganino mupepi na 140 ifya bacibulu. Impapulo sha Bwina Kristu shalipekanishiwa pa vidio mu ndimi 13 isha bacibulu.

Icilonganino ca Bwina Kristu cipeela bankomamatwi ishuko lya kulumbanya Yehova. Odile, uwali kale Katolika mu France uwalelwala sana ukupopomenwa kabili uwalefwaya ukuipaya, alatasha sana pa masomo ya Baibolo ayo asambilila pa kulongana kwa Bwina Kristu. Atila: “Nalipuupuutwike no kubukulula insansa mu bumi bwandi. Lelo, icacindamisha ca kuti, nasangile icine. Nomba nalishiba ico nabela pa calo.”