Fwayeni Lesa no Mutima Wenu no Muntontonkanya

UbuKristu bwa cine bukoselesha ukubomfya umutima no muntontonkanya pa kukuula icitetekelo iciteemuna Lesa.

NA KUBA Yesu Kristu, uwatendeke ubuKristu, asambilishe ati tufwile ukutemwa Lesa ‘ku mutima onse’ na ‘ku mweo onse,’ e lyo na ‘ku kutontonkanya kwesu konse,’ nelyo ku mano. (Mateo 22:37) Ca cine, tulakabila sana ukutontonkanya mu kupepa kwesu.

Ilyo aleeba abalekutika kuli wene ukutontonkanya pa fyo alesambilisha, ilingi Yesu alesosa ati: “Muletila shani?” (Mateo 17:25; 18:12; 21:28; 22:42) E fyo no mutumwa Petro asosele ilyo alembele abasumina banankwe pa kuti ‘acincishe ukutontonkanya kwabo.’ (2 Petro 3:1, NW) Umutumwa Paulo, mishonari wa kubalilapo uwaendawike sana pali bonse, akonkomeshe Abena Kristu ukubomfya “amaka ya kupelulula, NW” no ‘kulinge cabo kufwaya kwa kwa Lesa, icisuma kabili ica kutemuna kabili icapwililila.’ (Abena Roma 12:1, 2) Ni lintu fye babeebeeta sana ifyo basumina e lintu Abena Kristu bengakuula icitetekelo iciteemuna Lesa kabili icingabafwa ukucimfya amafya yesa mu bumi.—AbaHebere 11:1, 6.

Pa kwafwa bambi ukukwata icitetekelo ca musango yo, bakabila ba Bwina Kristu aba kubalilapo ‘balepelulushanya na bo ifya mu malembo, baleilula no kushininkisha’ ifyo balesambilisha. (Imilimo 17:1-3) Uko kupelulushanya kusuma kwalengele aba mitima ya bufumacumi ukwankulako bwino. Ku ca kumwenako, abengi mu musumba wa mu Berea uwa Makedonia “bapokelele icebo [ca kwa Lesa] no kucankwa konse, balefwayafwaya mu malembo akasuba na kasuba, beshibe ifi fintu [ifyo Paulo na banakwe baleilula] nga ni fyo  fine.” (Imilimo 17:11) Muli ili Lembo muli ifintu fibili ifyo tulingile ukulandapo. Ica ntanshi, abena Berea balicankilwe ukukutika ku Cebo ca kwa Lesa; ica bubili, tabasumine ukuti ifyo baumfwile fya cine ukwabula ukutontonkanyapo, lelo babeebeetele Amalembo pa kuti bashininkishe nga fya cine. Mishonari wa Bwina Kristu, Luka alicindike no kutasha abena Berea pali ici, kabili balebeta ati “abakankaala.” Bushe na imwe muba no mutima uukankaala ilyo mulebeebeeta ifya ku mupashi?

Umuntontonkanya no Mutima Fibombela Pamo

Nga fintu tulandilepo kale, ukupepa kwa cine kusanshamo umuntontonkanya no mutima. (Marko 12:20) Tontonkanyeni pa cilangililo cili mu cipande cifumineko ica muntu baingishe incito ya kupenta uwabomfeshe penti yapusana pa kupenta ing’anda. Nga ca kuti alyumfwikishe ifyo uwa mwingishe incito alemweba, nga abombele incito yakwe no mutima onse kabili nga alicetekele ukuti uwamwingishe ncito alasekelela pa mulimo abombele. E fyo caba na ku kupepa kwesu.

Yesu atile, “bakapepa bene bene bakapepela Tata mu Mupashi na mu cine.” (Yohane 4:23) E co, umutumwa Paulo alembele ati: “E ico na ifwe . . . tatwaleka kumupepela, no kulombo kuti mwisulemo ukwishibo kufwaya kwakwe mu mano yonse no mucetekanya ifya bumupashi, ku kuleka mwende umwawamina Shikulu ku kutemuna konse.” (Abena Kolose 1:9, 10) Uko “ukwishiba” kwafwa abantu bafumaluka ukupepa ku mutima na ku mweo no kucetekela sana pantu ‘bapepe co baishiba.’—Yohane 4:22.

E mulandu wine Inte sha kwa Yehova bashibatishisha utunya nelyo abatendeka nomba line ukusambilila Baibolo abashilaishiba bwino bwino Amalembo. Yesu atumine abakonshi bakwe ati: “Kalengeni aba nko shonse ukuba abasambi, . . . mulebasambilisha ukubaka fyonse ifyo namwebele.” (Mateo 28:19, 20) Ni lintu fye baishiba Lesa bwino bwino e lyo abasambi ba Baibolo abafumaluka bengapingulapo ukumupepa ukulingana no ko kwishiba. Bushe muletukuta ukuba no ko kwishiba kwafikapo?

Ukumfwikisha Ipepo lya We Shifwe

Pa kumona ifyo ukwishiba Baibolo bwino bwino kwapusana no kwishiba fye patali patali ifyo ilanda, natubeebeete ico abengi beta ati Ipepo lya We Shifwe nelyo Ipepo lya kwa Shikulu, ilyalembwa pali Mateo 6:9-13.

Abantu abengi nga nshi balapepa ipepo lya kwa Yesu ilya We Shifwe lyonse ku calici. Lelo, ni banga basambilishiwa umo lyalola, maka maka iciputulwa ca ntanshi ice pepo icilanda pe shina lya kwa Lesa no Bufumu? Ifi fibili fyalicindama sana ica kuti Yesu e fyo alandile pa kubala.

Litendeka ati: “Shifwe wa mu muulu, ishina lyenu libelwe akatiina,” icalola mu kuti licindikwe nelyo ukushishiwa. Moneni ukuti Yesu atile tupepe ukuti ishina lya kwa Lesa lishishiwe. Pa lwa ico, abengi kuti baipusha ifipusho fibili. Ica ntanshi, bushe ishina lya kwa Lesa nani? Ne ca bubili, mulandu nshi lilingile ukushishiwa?

Icasuko ku cipusho ca kubalilapo cisangwa imiku ukucila pali 7,000 muli Baibolo walembelwe mu ndimi sha kutendekelako. Pamo apo lisangwa ni pa Amalumbo 83:18 apatila: “Ku kuleka beshibe ukuti imwe mweka, ishina lyenu Yehova, mwapulamo pano isonde ponse.” Ulwe shina lya kwa Lesa, Yehova, pa Ukufuma 3:15 patila: “Ili e shina lyandi umuyayaya, kabili ici e ciibukisho candi ku nkulo ne nkulo.” * Lelo, mulandu nshi ishina lya kwa Lesa ilyasanguluka kabili ilya mushilo,  lilingile ukushishiwa? Pantu lyalisebanishiwa no kusaalulwa ukutula pa kutendeka kwa muntunse.

Mu Edene, Lesa aebele Adamu na Efa ukuti bakafwa nga balya ku cisabo cabindwa. (Ukutendeka 2:17) Satana alipamine fye, asusha Lesa pa kweba Efa ati: “Ukufwa tamwakafwe.” E co, Satana atungile ukuti Lesa alebepa. Nalyo line tapelele apo pene. Aseebenye ishina lya kwa Lesa na kabili, pa kweba Efa ati Lesa alimufyengele pantu alemupusula ukwishiba kumo ukwacindama. Atile: “Pantu Lesa aliishibo kuti mu bushiku mukalyako [ku muti wa kulengo kwishibo busuma no bubi], e mukashibulwa amenso yenu, kabili mukaba nge milungu, abaishibo busuma no bubi.” Mwandini bwali bukwakwa!—Ukutendeka 3:4, 5.

Pa kulya icisabo cabindwa, Adamu na Efa batungilile Satana. Ukutule lyo, abantunse abengi, balaseebanishishako ishina lya kwa Lesa. Bacite ci pa kukaana ifipimo fyalungama ifya kwa Lesa, nampo nga bacitila ku mufulo nelyo iyo. (1 Yohane 5:19) Abantu bacili balasaalula Lesa pa kumupeela umulandu wa kuti e ulenga balecula—nangu ca kuti mibele yabo iyabipa ilenga. Muli The New English Bible, pa Amapinda 19:3, patila: “Ubupumbu bwa muntu umwine bonaula ubumi bwakwe, kabili lyene afimbila Shikulu.” Bushe mwamona ico Yesu, uwatemenwe Wishi icine cine, apepele ukuti ishina Lyakwe libelwe akatiina?

“Ubufumu Bwenu Bwise”

Pa numa ya kupepa ukuti ishina lya kwa Lesa licindikwe, Yesu atile: “Ubufumu bwenu bwise. Ukufwaya kwenu kucitwe pano nse nga mu muulu.” (Mateo 6:10) Ulwa ayo mashiwi kuti twaipusha ati: ‘Bushe Ubufumu bwa kwa Lesa cinshi? Kabili bushe ukwisa kwa buko kwayampana shani no kufwaya kwa kwa Lesa ukukacitwa pano isonde?’

Muli Baibolo, ishiwi, “ubufumu” nga kulikonka fye lipilibula “ukutekwa ne mfumu.” Kanshi, Ubufumu bwa kwa Lesa buteko bwa kwa Lesa, ubutekwa ne mfumu asala. Ne yi Mfumu ni Yesu Kristu uwabuushiwa—“Imfumu ya shamfumu kabili Shikulu wa bashikulu.” (Ukusokolola 19:16; Daniele 7:13, 14) Ulwa Bufumu bwa kwa Lesa ubwa buMesia ubwaba mu maboko ya kwa Yesu Kristu, Kasesema Daniele alembele ati: “Mu nshiku sha shamfumu ishi [amabuteko ya bantunse ayalipo] Lesa wa mu muulu akemyo bufumu ubushakonaulwe umuyayaya, no bufumu bwa buko tabwakashiilwe ku bantu bambi; bukashonaula no kupesha aya mabufumu yonse, kabili bukeminina umuyayaya.”—Daniele 2:44.

Cine cine, Ubufumu bwa kwa Lesa bukateka isonde lyonse, ukufumyapo ababifi bonse no kuteka “umuyayaya.” E co, Ubufumu bwa kwa Lesa e bo Yehova akabomfya ku kushisha ishina lyakwe, ukufumyapo umuseebanya onse uwaleta Satana na bantunse ababifi.—Esekiele 36:23.

Nga fintu caba ku mabuteko yonse, Ubufumu bwa kwa Lesa bwalikwata abatekwa. Ni bani aba? Baibolo yasuka ati: “Abalanda bakapyaninine calo, no kuilemeno bwingi bwa mutende.” (Amalumbo 37:11) Yesu na o atile: “Balishuka abafuuka; pantu bakakwate calo.” Ca cine, aba bantu balishiba Lesa bwino bwino, icintu icikabilwa pa kukwata umweo.—Mateo 5:5; Yohane 17:3.

Bushe kuti mwaelenganya ifyo cikaba, icalo conse nga caisulamo abantu abafuuka, abatemwa Lesa kabili abatemwana icine cine? (1 Yohane 4:7, 8) Ici e co Yesu apepele ilyo atile: “Ubufumu bwenu bwise. Ukufwaya kwenu kucitwe pano nse nga mu muulu.” Bushe mwamona ico Yesu afundile abakonshi bakwe ukupepe fyo? Ne cacindama sana, bushe mwamona ifyo ukufishiwapo kwa lilya ipepo kwamukuma?

Abengi Nga Nshi Nomba Balebebeta Amalembo

Yesu asobele ukuti kukaba lulu wa masambililo ya ku mupashi uwa kubilisha ukwisa kwa Bufumu bwa kwa Lesa. Atile: “Ne mbila  nsuma iyi ya Bufumu ikabilwa ku fyalo fyonse ku kubo bunte ku nko shonse; e lyo impela ikesa.”—Mateo 24:14.

Mwi sonde lyonse, Inte sha kwa Yehova ukucila pa mamilioni 6 baleebako abena mupalamano babo pali iyo mbila nsuma. Balemulaalika ukusambilila na fimbi pali Lesa no Bufumu bwakwe ukupitila mu ‘kufwayafwaya mu Malembo’ ukubomfya amaka yenu aya kupelulula. Ukucite co kukakosha icitetekelo cenu no kulenga imwe ukucankwa ilyo mwatontonkanya pa calo ca paradise, “icikesulamo ukwishiba Yehova, ifyo amenshi yafimba pali bemba.”—Esaya 11:6-9.

[Futunoti]

 [Akabokoshi ne Cikope pe bula 8]

PASHANYENI KASAMBILISHA MUKALAMBA

Yesu ilingi pa kusambilisha, alelanda sana pa malyashi ya kulungatika ukufuma mu Baibolo. Ku ca kumwenako, pa numa ya kubuushiwa, alondolwele umulimo wakwe mu bufwayo bwa kwa Lesa ku basambi bakwe babili abasungwike pa mfwa yakwe. Pali Luka 24:27 patila: “Ukutendeka pali Mose na pali bakasesema bonse, alabelwila ifya mu Malembo yonse ifyamulembelwe.”

Moneni ukuti Yesu alandile mu kulungatika pa “fyamulembelwe,” pali Mesia—kabili mu lyanshi lyakwe, aambwile ukufuma mu “Malembo yonse.” Na kuba Yesu aampenye Amalembo ya mu Baibolo nga filya umo engalundanya utupimfya twa cikope. Ne ci caafwile abasambi bakwe ukumona bwino ifyo icine ca ku mupashi caba. (2 Timote 1:13) Ici calengele beshibe cine no kucincishiwa kuli cene. Icalembwa citila: “Balisoshenye, abati, Bushe imitima yesu taibilime mu nda ilyo aletulandila mu nshila, no kutukupukwila Amalembo?”—Luka 24:32.

Inte sha kwa Yehova balatukuta ukupashanya imibombele ya kwa Yesu ilyo bali mu butumikishi. Impapulo sha kwafwa ukusambilila isho babomfya sana ni broshuwa wa Cinshi Cintu Lesa Afwaya Kuli Ifwe? ne citabo ca Ukwishiba Uko Kutungulula ku Mweo wa Muyayaya. Ishi mpapulo shilanda pa fisuma ifyalandwapo muli Baibolo pamo nga: “Lesa Nani?,” “Mulandu Nshi Lesa Asuminishisha Ububifi?,” “Ni Shani Fintu Wingasanga Ukupepa kwa Cine?,” “Shino ni Nshiku sha Kulekelesha!,” na “Ukukusha Ulupwa Ulucindika Lesa.” Isambililo limo na limo lilakwata Amalembo ayengi.

Kuti mwamona Inte sha kwa Yehova uko mwikala nelyo kuti mwalembela ku keyala kali pe bula 2 ilya uno magazini ukuti bakese mu kumutungulula isambililo lya Baibolo pali aya malyashi e lyo na yambi.

[Icikope]

Fikeni umusambi wenu pa mutima pa kulanda pa malyashi ya kulungatika ukufuma muli Baibolo

[Ifikope pe bula 7]

Bushe mwalyumfwikisha umwalola ipepo lya kwa Yesu ilya We Shifwe?

“Shifwe wa mu muulu, ishina lyenu libelwe akatiina”

“Ubufumu bwenu [ubwa buMessia] bwise”

“Ukufwaya kwenu kucitwe pano nse nga mu muulu”