Loleni, Akuyeni ku Ntanshi no Kushipa!

Ilyashi Pa Kulongana Kwaibela

NANI engakaana ukutila tatuleikala mu “nshita ishayafya”? Fwe Nte sha kwa Yehova tatwalubukako ku mafya yesa ilyo tuleikala mu “nshiku sha kulekelesha.” (2 Timote 3:1–5) Lelo twalishiba ukuti abantu balekabila ubwafwilisho. Tabomfwikisha umulandu ifintu fibelele ifi mu calo. Balekabila icisansamushi ne subilo. Cinshi, sana sana, icaba umulimo wesu mu kwafwilisha abantu banensu?

Twaba no mulimo Lesa atupa uwa kushimikila imbila nsuma ya Bufumu bwa kwa Lesa ubuleteka. (Mateo 24:14) Abantu balingile ukwishiba ukuti ubu Bufumu bwa mu muulu epela e bupeela abantu isubilo. Kwena, te lyonse abantu basumina ubukombe bwesu. Mu fyalo fimo balibinda umulimo wesu na bamunyinefwe balipakaswa. Lelo, tatunenuka. Apo twatetekela Yehova, tupampamine pa kuba abalola no kutwalilila ukuya ku ntanshi no kushipa, ukubilisha imbila nsuma ukwabula ukuleka.—Imilimo 5:42.

Uyu mupampamina walimoneke pa kulongana kwaibela ukwaliko mu October mu mwaka wa 2001. Pa Cibelushi, pa 6 October, kwali ukukumana kwa pa mwaka ukwa Watch Tower Bible and Tract Society of Pennsylvania ukwabelele mu Cikuulwa ca Kulonganinamo ica Nte sha kwa Yehova icabela mu Jersey City, ku New Jersey, mu United States. * Ubushiku bwakonkelepo, ukulongana kumbi nako kwabelele mu ncende shine, kutatu mu United States e lyo kumbi mu Canada. *

Mu mashiwi yakwe aya kubalilapo pali uku kukumana kwa pa mwaka, uwali ceyamani, Samuel F. Herd, uwa mwi Bumba Litungulula ilya Nte sha kwa Yehova, alandile pa Amalumbo 92:1, 4 no kutila: “Tufwaya Ukuba Abatasha.” Na kuba, imilandu tulingile ukubela abatasha yalipeelwe mu malipoti yasano aya mwi sonde lyonse.

Amalipoti Ukufuma Konse Konse

Munyinefwe Alfred Kwakye ashimike pa fyo umulimo wa kushimikila ulelunduluka mu Ghana, icalo baleita kale ati Gold Coast. Umulimo wesu muli ici calo walibindilwe pa myaka iingi. Abantu baleipusha ukutila: “Cinshi bamubindila? Nga kanshi cinshi  mwacitile?” Munyinefwe Kwakye alondolwele ukutila ici calengele kube amashuko ya kushimikila. Mu 1991 ilyo bafumishepo icibindo, kwali Inte sha kwa Yehova 34,421 mu Ghana. Mu August 2001, bonse pamo bali 68,152—e kuti bafulile na mapesenti 98. Kuli amapange ya kukuula Icikuulwa ca kulonganinamo umwingekala abantu 10,000. Kanshi twamona ukuti bamunyinefwe mu Ghana balebombesha ku mwabo ukwaba amaipepele.

Nangu ca kuti ku Ireland kwaba icimfulumfulu calengwa ku fikansa fya calo, bamunyinefwe kulya balebombesha mu butumikishi, kabili balicindikwa pa kukanaipoosa mu fya calo. Peter Andrews, kampanya wa Komiti wa Musambo, atile mu Ireland mwaba ifilonganino 115 ne miputule 6. Munyinefwe Andrews ashimike pali Liam, kalume wa myaka 10 uushitiina ukushimikila ku sukulu. Liam ashalike Icitabo Candi ca Malyashi ya mu Baibolo, icasabankanishiwa ne Nte sha kwa Yehova, ku bo asambilila na bo 25 e lyo na kuli kafundisha wakwe. Liam alefwaya ukubatishiwa, lelo umo amwipwishe nga ca kuti tali umwaice sana. Liam ayaswike ati: “Ukutemwa natemwa Yehova e kufwile ukuba icipimo te mushinku wandi iyo. Ukubatishiwa kukalanga ifyo namutemwa.” Ubuyo bwa kwa Liam kuba mishonari.

Mu 1968, mu Venezuela mwali bakasabankanya ba mbila nsuma 5,400. Stefan Johansson, kampanya wa Komiti wa Musambo, atile nomba kwaba bakasabankanya ukucila 88,000. Kabili kuti bafulilako na kabili pantu abantu ukucila 296,000 balisangilwe ku Cibukisho mu 2001. Mu December 1999, imfula yalengele amatipa yalekunkuluka ayaipeye abantu nalimo 50,000, kabili na baNte bamo na bo balifwile. Ing’anda ya Bufumu imo yaiswilemo fye amatipa ni cikanga fye yafike na mu mutenge. Ilyo umo atile baleke ukubomfya iyi nga’nda, bamunyinefwe batile: “Iyo! Iyi ni Ng’anda yesu iya Bufumu, kabili tatulefwaya ukuleka ukuibomfya nomba.” Batendeke ukubombelapo, ukufumyamo amatipa, amabwe, ne fisoso fimbi ifingi nga nshi. Ing’anda yalikuulilwe cipya cipya, kabili bamunyinefwe batila nomba naiwamisha ukucila ifyo yali ilyo akayofi kashilacitika!

Munyinefwe Denton Hopkinson, kampanya wa Komiti wa Musambo, atile kwaba indimi 87 isho balanda ku Philippines. Mu mwaka wa mulimo uwapwile, Baibolo wa New World Translation of the Holy Scriptures alifumine mu ndimi shikalamba shitatu isha muli ici calo—e kuti mu ciCebuano, iciIloko, ne ciTagalog. Munyinefwe Hopkinson ashimike pa mulumendo wa  myaka 9 uwabelengele icitabo ca Imbila Nsuma iya Kukulenga uwa Nsansa, icasabankanishiwa ne Nte sha kwa Yehova. Apokele ifitabo na fimbi ku maofeshi yanono aya baNte, no kufibelenga, lelo balupwa lwakwe balemukaanya. Ilyo papitile imyaka lintu ali pa sukulu lya fya cipatala, alandile na ba ku maofeshi yanono aya baNte no kulomba ukumusambilisha Baibolo. Abatishiwe mu 1996 kabili tapapitile ne nshita atendeka ubutumikishi bwa nshita yonse. Nomba abombela pa maofeshi yanono pamo no mukashi wakwe.

Kampanya wa Komiti wa Musambo , Ronald Parkin, alondolola ukuti ‘icishi ca Puerto Rico cilatuma baNte abengi ku fyalo fimbi.’ Pali ici cishi paba bakasabankanya nalimo 25,000, kabili impendwa e fyo yaba imyaka iingi. Mulandu nshi? Kwena, batunga ukuti bakasabankanya nalimo 1,000 ukufuma pa cishi ca Puerto Rico balaya ku United States cila mwaka, kabili abengi bakuuka pa mulandu wa ndalama ukwafya. Munyinefwe Parkin ashimike ifyo icilye capingwile pali Luis, Nte wa myaka 17 uwalwele ubulwele bwa leukemia ne fyo uku kupingula kwayalwile ifintu. Apo Luis alikeene ukumubikamo umulopa, batwele umulandu wakwe ku cilye. Umupingushi alefwaya ukulanda nankwe, e co amutandalile ku cipatala. Luis amwipwishe ati: “Mulandu nshi cabela ukuti nga naba mpulamafunde, kuti mwampingula ngo mukalamba, lelo nga ndefwaya ukumfwila Lesa, mulempingula ngo mwaice?” Umupingushi alishininwe ukuti uyu mulumendo ali mwaice wakosoka kabili kuti aipingwila umwine.

Ilyo bapwile ukushimika amalyashi ya ku fyalo fya kutali, Harold Corkern, uwaba muli Komiti wa Musambo uwa ku United States aipwishe ababomfi ba kwa Yehova bane ababombela Lesa imyaka iingi. Arthur Bonno abomba imyaka 51 mu butumikishi bwa nshita yonse kabili nomba aba muli Komiti ya Musambo uwa ku Ecuador. Angelo Catanzaro abomba imyaka 59 mu butumikishi bwa nshita yonse, kabili imyaka iingi ali kangalila wenda. Richard Abrahamson apwishishe Isukulu lya Gileadi mu 1953, kabili apeelwe umulimo waibela uwa kwangalila umulimo mu Denmark pa myaka 26 ilyo ashilabwelela ku Bethel ya ku Brooklyn. Pa kulekelesha, bonse balitemenwe ukukutika kuli Carey W. Barber uuli ne myaka 96. Munyinefwe Barber, uwabatishiwe mu 1921, abomba imyaka 78 mu butumikishi bwa nshita yonse kabili aba mwi Bumba Litungulula ukutula mu 1978.

Amalyashi ya Kukoselesha

Pa kukumana kwa pa mwaka pali na malyashi ya kucincimusha. Munyinefwe Robert W. Wallen alandile ilyashi lyaleti “Abantu abe Shina Lyakwe.” Tuli bantu abainikwa ishina lya kwa Lesa, kabili tulasangwa mu fyalo ukucila 230. Yehova alitupa “icilayo ne cilolelo.” (Yeremia 29:11) Tufwile ukutwalilila ukusabankanya Ubufumu bwa kwa Lesa, ukwebako bambi ubukombe bwa kusansamusha no kukoselesha. (Esaya 61:1) Munyinefwe Wallen asondwelele ati: “Shi cila bushiku natutwalilile ukwikala umwabela ishina twitwa, e kuti Inte sha kwa Yehova.”—Esaya 43:10.

Ulubali lwa kulekelesha ulwa programu lwali lyashi lya kukonkana ilyalandilwe na batatu aba mwi Bumba Litungulula. Lyaleti “Nomba Ni Nshita ya Kuba Abalola, Ukwiminina Abashangila, no Kukosa.”—1 Abena Korinti 16:13.

Intanshi, Munyinefwe Stephen Lett alandile ilyashi lyaleti “Beni Abalola Ino Nshita ya ku Mpela.” Munyinefwe Lett alondolwele ukuti ukulaala bupe. Kulatukosha. Lelo, ukulaala kwa ku mupashi kwena takwawama nangu panono. (1 Abena Tesalonika 5:6) Lyene, kuti twatwalilila shani abalola lwa ku mupashi? Munyinefwe Lett alandile pali fitatu ifyo twingeta umuti wa ku mupashi, e kuti (1) Ukupikintika mu mulimo wa kwa Shikulu. (1 Abena Korinti 15:58) (2) Ukuba abaibukila ukuti tulakabila ifya ku mupashi. (Mateo 5:3) (3) Ukwankula ku kufunda kwa mu Baibolo pa kuti tulecita ifintu mano mano.—Amapinda 13:20.

Munyinefwe Theodore Jaracz alandile ilyashi lya kucincimusha ilyaleti “Iminineni Abashangila Ilyo Muleeshiwa.” Ilyo alelanda pa Ukusokolola 3:10, Munyinefwe Jaracz aipwishe ati: “Bushe ‘inshita ya kweshiwa’ cinshi?” Aya mesho yesa “mu bushiku bwa kwa Shikulu,” umo tuleikala nomba. (Ukusokolola 1:10) Icilenga  aya mesho cintu cimo, nampo nga tutungilila Ubufumu bwa kwa Lesa ubuleteka nelyo ubwikashi bwa kwa Satana ubwabipa. Ukufikila iyi nshita ya kweshiwa yapwa, tukalakwata amesho nelyo amafya. Bushe tukatwalilila aba cishinka kuli Yehova no kuteyanya kwakwe? Munyinefwe Jaracz alondolwele ukuti ‘umo umo afwile ukuba na bucishinka bwa musango yo.’

Pa kulekelesha, Munyinefwe John E. Barr alandile ilyashi lyaleti: “Koseni ku Kuba Abantu ba Bumupashi.” Ilyo alelanda pali Luka 13:23-25, alondolwele ukuti tufwile ukupilikita “ukwingila pa mwinshi wa kamfyemfye.” Abengi balafilwa pantu tabangwa sana ku kuba abakosa. Pa kuti tube Abena Kristu bafikapo, tufwile ukusambilila ukubaka ifishinte fya mu Baibolo mu mikalile yesu yonse. Munyinefwe Barr acincinshe ati: “Ndesubila mwalasuminisha ukuti ino ni nshita ya (1) kucindamikisha Yehova; (2) ukukosa; no (3) kupilikita ukucita ukufwaya kwa kwa Yehova. Nga twacite fi tukapita pa nshila ya kamfyemfye iitungulula ku bumi busuma ubwabula impela.”

Ilyo ukukumana kwa pa mwaka kwalepwa, kwali icipusho cimo icalekabila ukwasukwa: Bushe ilembo lya mwaka wa mulimo uwa 2002 likalati shani? Ici cipusho cayaswikwe ubushiku bwakonkelepo.

Ukukumana Kumbi

Abantu baleenekela ifingi pa Mulungu ulucelo ilyo programu ya kukumana kumbi yatendeke. Yatendeke no kusupawila isambililo lya Ulupungu lwa kwa Kalinda ilya ulya mulungu, e lyo ukulanda ifishinka fikalamba fimo ifya pa kukumana kwa pa mwaka. Lyene, bonse balitemenwe ukukutika ku lyashi lyalelanda pe lembo lya mwaka wa 2002 ilileti: “Iseni kuli ine, . . . na ine nalamupeela ukutuusha.” (Mateo 11:28) Ilyashi lyafumine mu fipande fya kusambililamo ifyasabankanishiwe mu Ulupungu lwa kwa Kalinda ulwa December 15, 2001.

Lyene, bamo abasangilwe ku Mabungano ya “Bakasambilisha wa Cebo ca kwa Lesa” mu France na Italy mu August 2001 bashimike ifyo bamwene. * Kabili, icikalamba pali programu wa ubu bushiku cali malyashi yabili ayalandilwe na bakalanda abatandashi abafumine ku Bethel ya ku Brooklyn.

Ilyashi lya kubalilapo lyaleti “Ukutetekela Yehova no Kushipa Muli Shino Nshiku Shaibela.” Kalanda alondolwele ifishinka fikalamba ukuti: (1) Ukutetekela Yehova no kushipa lyonse kwalicindama ku bantu ba kwa Lesa. Mu Baibolo mwaba ifya kumwenako ifingi ifya bantu abali abashipa kabili aba citetekelo nangu balepakaswa. (AbaHebere 11:1–12:3) (2) Yehova alapeela ifintu ifingi ifya kutulenga ukumutetekela no mutima onse. Imilimo yakwe ne Cebo cakwe filashinina ukuti alasakamana ababomfi bakwe no kuti takabale abalaba. (AbaHebere 6:10) (3) Ukushipa ne citetekelo filakabilwa ukucilisha muno nshiku. Nga filya Yesu asobele, twaba “abapatwa.” (Mateo 24:9) Pa kuti tushipikishe, tufwile ukushintilila pa Cebo ca kwa Lesa, ukutetekela ukuti umupashi wakwe waba na ifwe, no kushipa pa kuti tutwalilile ukubila imbila nsuma. (4) Ifya kumwenako filanga ukuti baletukaanya ino ine nshita. Bonse balikoseleshiwe nga nshi ilyo kalanda ashimike ifyo bamunyinefwe bashipikisha mu Armenia, France, Georgia, Kazakhstan, Russia, na ku Turkmenistan. Cine cine nomba e nshita ya kushipa no kutetekela Yehova!

Kalanda wa kulekelesha alandile ilyashi lyaleti “Ukuya ku Ntanshi Abaikatana no Kuteyanya kwa kwa Yehova.” Ilyashi lyalandile pa fishinka fimo ifya pa nshita iyene. (1) Abantu konse balamona ukuya pa ntanshi ukwa bantu ba kwa Yehova. Umulimo wesu uwa kushimikila na mabungano yesu filacebusha abantu. (2) Yehova  apanga ukuteyanya ukwaikatana. Mu 29 C.E., Yesu asubilwe no mupashi wa mushilo pa kufwaya ukuleta “fyonse”—e kuti ababa ne subilo lya kwikala ku muulu na baba ne subilo lya kwikala pe sonde—mu lupwa lwa kwa Lesa ulwaikatana. (Abena Efese 1:8-10) (3) Amabungano yaba cilangililo caibela ica kwikatana kwa fyalo ifingi. Ici calimoneke nga nshi mu mabungano yaibela ayali mu France na Italy mu August umwaka wapwile. (4) Ukusuminishanya kwa kucincimusha kwalicitilwe mu France na Italy. Kalanda alandile fimo ifyali muli uku kusuminishanya kwa kukoselesha. Ifyebo fyonse ifyali mu kusuminishanya fili pe samba.

Pa mpela ya lyashi lya kulekelesha, kalanda umutandashi abelengele ukubilisha kusuma ukwapekanishiwe ne Bumba Litungulula. Amashiwi yamo ayalimo yaleti: “Nomba ni nshita ya kuba abalola, ukwiluka ifyo ifilecitika mu calo filelunduluka. . . . Tulefwaya ukumweba ukuti Ibumba Litungulula lyalimutemwa pamo na bantu ba kwa Lesa bonse. Shi Lesa namupaale nga nshi ilyo mulecita ukufwaya kwakwe no mweo onse.” Abantu ba kwa Yehova konse bapampamina pa kuba abalola muli shino nshita shaibela no kutwalilila ukuya ku ntanshi no kushipa pamo no kuteyanya kwa kwa Yehova ukwaikatana.

[Amafutunoti]

[Akabokoshi ne Fikope pe bula 29-31]

Ukusuminishanya

Mu August 2001, kwali Amabungano yaibela aya “Bakasambilisha wa Cebo ca kwa Lesa” mu France na Italy. Pali aya mabungano ukusuminishanya kwa kucincimusha kwalicitilwe. Amashiwi yalakonkapo e yali muli uku kusuminishanya.

“APO tuli Nte sha kwa Yehova, bonse fwe balongene pali lino Ibungano lya ‘Bakasambilisha wa Cebo ca kwa Lesa’ natufundwa isambilisho ilinonsha nga nshi. Uwaba intulo ya uku kusambilisha nalondololwa bwino. Uku kusambilisha takwafuma ku bantunse. Kwafuma ku Muntu uwalondolwelwe na kasesema wa ku kale Esaya ukuti ni ‘Kasambilisha’ wesu. (Esaya 30:20) Moneni ifyo Yehova atucinkulako pali Esaya 48:17, apatila: ‘Ine ndi Yehova Lesa obe, uukusambilisho kuti ucenjele, uukwensha mu nshila iyo ufwile ukuyamo.’ Bushe acita shani ici? Inshila ikalamba acitilamo ici kubomfya icitabo capilibulwa sana kabili icasabankanishiwa nga nshi mwi sonde lyonse, e kuti Baibolo, umo twaebwa bwino ukutila: ‘Amalembo yonse yantu yapuutwamo kuli Lesa, kabili ya mulimo.’—2 Timote 3:16.

“Ndakai, abantunse balekabila nga nshi uku kusambilisha kusuma. Mulandu nshi twingasosela ifi? Bushe cinshi abantu ba mano basondwelela ilyo bamona imicitile ya cino calo iilealuka kabili iilepapusha? Ni ici: Nangu abantu iminshipendwa balisambilishiwa amasomo ya cino calo, kuli ukubulisha kwabipisha ukwa fishinte fine fine no kufilwa ukulekanya icalungama ne cabipa. (Esaya 5:20, 21) Abantu abengi tabaishiba Baibolo ne fyabamo. Nangu kwaba ifyebo ifingi pali kompyuta pa mulandu wa fya kupangapanga, bushe ni kwi twingasanga ifyasuko ku fipusho pamo nga, Bushe cinshi caba ubufwayo bwa bumi? Bushe ifilecitika muno nshiku filetulanga cinshi? Bushe kwaba isubilo line line ilya ku ntanshi? Bushe umutende no mutelelwe fikatala afibako? Kabili, mu malaibrari mwaba ifitabo ifingi ifilanda nalimo pa mbali shonse isha milimo ya buntunse. Nalyo line, abantunse balabwekeshapo ifilubo fyacitilwe kale. Imisoka ilebipilako fye. Amalwele ayo kale baleti yalipwa yalebwela na kabili, kabili yambi, pamo nga AIDS, yaleanana nga nshi. Indupwa shilebongoloka pa cipimo  ca kupapusha. Ukukowesha umwela kuleonaula ubwikashi. Ukusansa kwa fipondo ne fyanso fingepaya abantu abengi filecilikila umutende no mutelelwe. Amafya yabula inshila ya kuyapwishishamo yalefulilako fye. Bushe mulimo nshi uwalinga tufwile ukucita ku kwaafwa abantu banensu muli shino nshiku shayafya? Bushe kwaba isambilisho ililondolola icilenga amafya ya bantunse kabili ililondolola ifya kukwata ubumi busuma nomba no kutupeela isubilo line line ilya ku ntanshi?

“Umulimo wesu uwa mu Malembo wa ‘kuya no kulenga aba nko shonse ukuba abasambi, ukubasambilisha ukubaka fyonse ifyo Kristu aebele.’ (Mateo 28:19, 20) Uyu mulimo wapeelwe na Yesu Kristu ilyo afwile no kubuushiwa, kabili lintu apeelwe amaka yonse mu muulu na pe sonde. Uyu mulimo walicindama ukucila imilimo yonse iyo abantunse bacindikisha. Lesa amona umulimo wesu, uyo maka maka utonta pa fya ku mupashi ifyo abantu baba ne nsala ya bulungami bakabila, ukuti e wacindamisha. Twalikwata imilandu isuma iya mu Malembo iyo tulingile ukupoosela sana amano kuli uyu mulimo.

“Pa kucita ici tufwile ukucindamika nga nshi uyu mulimo mu mikalile yesu. Nga twapaalwa na Lesa no kwafwilishiwa na wene, uyu mulimo ukabombwa, nangu kwingaba ifya kupumfyanya ifingi, ifipindami, ukukaanya ku ba mipepele na bakateka, abafwaya ukulesha ukulunduluka kwa uyu mulimo wa kusambilisha uwa mwi sonde lyonse. Natushininkisha kabili natucetekela ukuti uyu mulimo ukatwalilila ukulunduluka no kupwishishiwa. Mulandu nshi twingacetekela ifyo? Pantu Shikulu Yesu Kristu alaile ukuti akaba na ifwe mu mulimo wesu uo Lesa atupeela ukufika na ku kupwa kwa nshita.

“Abantunse babombomana nabapalamina nga nshi ku mpela. Umulimo tulebomba nomba ufwile ukucitwa ilyo impela ishilafika. E ico, ifwe, fwe Nte sha kwa Yehova tulepingulapo ukuti:

“Intanshi: Apo tuli bakapyunga baipeela, tupampamine pa kucindamika ifya Bufumu mu mikalile yesu no kutwalilila ukulunduluka lwa ku mupashi. Pa kucite ifi, ipepo lyesu lilomfwana na mashiwi yaba pa Amalumbo 143:10, ayatila: ‘Nsambilisheni ukucite co mutemenwe, pantu ni mwe Lesa wandi.’ Pa kucite ici kano twaba abasambi basuma, ukutukuta ukubelenga Baibolo cila bushiku, ukusambilila fwe bene no kufwailisha ifishinka. Pa kulenga ukulunduluka kwesu ukumoneka ku bantu bonse, tukabombesha ukupekanishisha no kunonkelamo nga nshi mu masomo ya bulesa ayaba pa kulongana kwa cilonganino, pa kulongana kukalamba mu muputule, na pa mabungano ya citungu, aya calo, na ya pa kati ka nko.—1 Timote 4:15; AbaHebere 10:23-25.

“Ica bubili: Pa kuti tulesambilishiwa na Lesa, tukalalya sana pe tebulo lyakwe no kumfwila ukusoka kwa mu Baibolo pa fisambilisho fya kulufya ifya fiwa. (1 Abena Korinti 10:21; 1 Timote 4:1) Tukesha nga nshi ukutaluka ku fyabipa, pamo nga imipepele ya bufi, ukupelulula kwa fye, imicitile ya kuselausha iya kulalaana, icikuko ca kutambe fye shiku, ifya kusekesha fyabipa, na fyonse ifishaba umwabela ‘isambilisho ilituntulu.’ (Abena Roma 1:26, 27; 1 Abena Korinti 3:20; 1 Timote 6:3; 2 Timote 1:13) Pa kucindika ‘ifya bupe ku bantu,’ abafikapo ukusambilisha ifituntulu, twakulabacindika icine cine pa fyo babombesha no kubombela pamo na bo no mutima onse mu kutungilila ifipimo fya ku mupashi ifyasanguluka kabili ifyalungama ifya mu Cebo ca kwa Lesa.—Abena Efese 4:7, 8, 11, 12; 1 Abena Tesalonika 5:12, 13; Tito 1:9.

“Ica butatu: Fwe bafyashi Abena Kristu, ico tukafwaisha ukucita no mutima onse kufunda abana besu ku fyebo na ku fyo tucita. Ico tulefwaisha kubaafwa ukufuma ku bwaice ‘ukwishiba amalembo ya mushilo ayaba na maka ya kubalenga aba mano.’ (2 Timote 3:15) Twakulaibukisha ukuti nga twabakusha mu kufunda no kukonkomesha kwa kwa Yehova, tukabapeela ishuko lyawamisha ilya kumona ukuti ukulaya kwa kwa Lesa ukwa kuti ‘kukawama kuli bene,  kabili bakaba ne nshiku ishingi pano nse’ kwa cine.—Abena Efese 6:1-4.

“Ica bune: Ilyo twaba na masakamika nelyo amafya yabipisha, intanshi, ‘tukaleka ifya kulomba fyesu fiishibikwe kuli Lesa,’ ukucetekela ukuti ‘umutende wa kwa Lesa uwapulamo mu kwiluka konse’ ukatulinda. (Abena Filipi 4:6, 7) Ilyo twasenda ikoli lya kwa Kristu, tukapuupuutulwa. Ukwishiba ukutila Lesa alatusakamana, tatwakashingashinge ukupoosa amasakamika yesu pali wene.—Mateo 11:28-30; 1 Petro 5:6, 7.

“Ica busano: Pa kutasha Yehova pa kutupeela umulimo wacindama uwa kuba bakasambilisha wa Cebo cakwe, tukalabombesha ‘ukulungiko kusose cebo ca Cine’ no ‘kufishapo bukapyunga bwesu.’ (2 Timote 2:15; 4:5) Apo natwishiba ifyo tufwile ukucita, ico tulefwaisha kufwaya abayana no kukusha ulubuto lwabyalwa. Kabili, tukawamyako imisambilishishe yesu pa kulasambilisha abantu na bambi Baibolo mu mayanda yabo. Ukucita ifi kukatulenga ukubombesha umwabela ukufwaya kwa kwa Lesa ukwa kuti ‘abantu bonse bapusuke no kufika ku kwishibe Cine.’—1 Timote 2:3, 4.

“Icalenga mutanda: Ukufuma kale ukufika na lelo, mu fyalo ifingi abantu balikaanya no kupakasa Inte sha kwa Yehova mu misango yalekanalekana. Lelo Yehova aba na ifwe. (Abena Roma 8:31) Icebo cakwe icishibepa citulaya ukuti ‘icilwilo conse icafulilwa ifwe’ ku kutukaanya, ukutufuupula, nelyo ukulesha umulimo wesu uwa kubila pa Bufumu no kusambilisha tacakashuke. (Esaya 54:17) Nampo nga ni mu nshita iiyene nelyo ishiyene, teti tuleke ukulanda icine. Ico tupampaminepo kufishapo umulimo wesu uwa kushimikila no kusambilisha mu kampampa. (2 Timote 4:1, 2) Ico tulefwaya kubombesha apo twingafisha ukwebako abantu ba mu nko shonse imbila nsuma ya Bufumu bwa kwa Lesa. Kanshi, pe fye bakaba ne shuko lya kusambilila pa kuteyanya kwa kunonka umweo wa muyayaya mu calo cipya ica bulungami. Apo tuli bumba lya bakasambilisha wa Cebo ca kwa Lesa, tupampamine pa kutwalilila ukupashanya Kasambilisha wesu Umukalamba, Yesu Kristu, no kupashanya imibele yakwe iya bulesa. Tukacita fyonse ifi pa kuti Kasambilisha wesu Uwakulisha kabili Kapeela wa Bumi, Yehova Lesa akacindikwe no kulumbanishiwa.

“Bonse mwe bali pali lino ibungano mwe balesuminisha uku kupingulapo, shi soseni ati EE!”

Ilyo baipwishe icipusho ca kusondolwela ica kusuminishanya ku bantu 160,000 abalongene pa mabungano yatatu mu France na 289,000 mu ncende 9 mu Italy, abantu bapundile ati “Ee” mu ndimi ishingi isha bantu basangilweko.