Ilyashi lya Bakabilisha ba Bufumu

“Nalefwaya Ukubombela Lesa”

“FUMENIMO muli wene, mwe bantu bandi.” Uku kwali kukuuta kwa kwa malaika uko umutumwa Yohane aumfwile mu mwanda wa myaka uwalenga 1 C.E. Ilelo imintapendwa ya bantu ba mitima ya bufumacumi balyankula kuli ubu bwite no kufulumuka muli “Babele Mukalamba,” ubuteko bwa calo conse ubwa kupepa kwa bufi. (Ukusokolola 18:1-4) Pali aba paba na Wilner uwa ku Haiti, uwashimika fintu cali.

“Nafyelwe mu 1956 mu musumba unono uwa St. Marc ku Haiti, ulupwa lwesu lwali ulwaipeelesha ku Katolika. Tontonkanyeni ifyo ulupwa lwandi lwatemenwe ilyo ine na bambi babili mu musumba umo wine batusalile ukuya ku seminario mu St. Michel de l’Atalaye, mu Haiti. Lyena, mu 1980, batutumine ku Stavelot, mu Belgium, ku kuyalundapo amasambililo. Kabili kulya kwine e ko twailesambilila na pa yuniversiti ya ba Katolika.

“Pa kubala nalefwaisha ukuba shimapepo. Bushiku bumo mu muputule wa kuliilamo ica kulya ca kasuba, shimapepo walelolekesha pe bumba lyesu anjebele ukushalilako panono pantu alefwaya ukunjebako fimo. Tontonkanyeni ifyo napelenganishiwe lintu anjebelepo fye ukuti alefwaya ine ukubembuka nankwe! Nalikeene ifyo anjebele kabili nalikalifiwe sana pantu ifyalecitika fintu nshaleenekela. Natumine kalata ku lupwa lwandi pa fyacitike kabili nafumine pa seminario imyeshi inono iyakonkelepo, nangu ca kutila tabatemenwe. Nafwaile ukwa kwikala kumbi mu mushi no kwamba ukusambilila imilimo imbi.

“Ilyo nabwelele ku St. Marc, ubucetekelo nakwete mu Calici ca Katolika bwalipwile. Nalyo line, nalefwaya ukubombela Lesa, lelo nshaishibe ifya kucita. Naile ku calici lya Adventist, icalici lya Ebenezer, ne calici lya Mormon. Lwa ku mupashi nalelulumba fye.

“Lyena naibukishe ukuti ilyo nali ku seminario ku Belgium, nalebelenga Baibolo wa Crampon. Muli uyu Baibolo nasangile ukuti Lesa alikwata ishina. E co napepele ipepo lya pa mutima kuli Lesa, ukulumbula ishina lyakwe ukuti angafwe nsange ukupepa kwa cine.

“Tapakokwele ukufuma apo, Inte sha kwa Yehova babili bakukiile mupepi na pa mwandi. Tabali na ciwowo, bali aba mucinshi, kabili abacindikwa. Nalitemenwe ifyo imikalile yabo yali. Bushiku bumo, Nte umo pali balya, andalike ukusangwa ku Cibukisho ca mfwa ya kwa Kristu icibako pa mwaka. Naliipakishe sana ukulongana kabili nasumiine ukusambilila Baibolo lyonse na baNte. Mu myeshi nalimo 6, nalishininwe ukuti ninsanga inshila isuma iya kubombelamo Lesa. Napeele ubumi bwandi kuli Yehova no kubatishiwa pa November 20, 1988.”

Mu kuya kwa nshita, Wilner ayambile umulimo wa nshita yonse. Ilelo, ni eluda mu cilonganino. Ena no mukashi wakwe, kumo na bana babo babili, balabomba ne nsansa mu cilonganino.

[Icikope pe bula 9]

Pa kubelenga Baibolo, Wilner asangile ukuti ishina lya kwa Lesa ni Yehova