Tabakoteshe Ica Kuti Teti Basambilile

BA KSENIYA bafyelwe mu 1897. Bakwata abana banakashi batatu, umwana mwaume umo, abeshikulu 15, ne fishikulula 25. Lyonse balecita ifyo abafyashi babo babasambilishe ukucita. Nangu baishile ku Moscow ilyo bali imbutushi ukufuma ku calo ca Abkhaz, icaonaulwa ku nkondo, icabela pa kati ka Bemba wa Fiita na Caucasus, balitemwe ifyo imikalile yabo yali, sana sana imipepele iyo bapyene.

Mu 1993, umwana wa baKseniya, Meri alyalwike no kuba Inte ya kwa Yehova. Meri atendeke ukulanda na baKseniya pali Yehova Lesa na Baibolo, lelo tabalefwaya ukukutika. BaKseniya baleeba fye umwana wabo ati, “Ala ninkota teti nsambilile nangu cimo icipya.”

Lelo, umwana wabo Meri; umukashi wa mwishikulu wabo, Londa; ne fishikulula fyabo Nana na Zaza, bonse abo nomba bali Inte sha kwa Yehova, batwalilile ukulanda na bo pali Baibolo. Bushiku bumo icungulo, mu 1999, babelengele baKseniya ilembo ilyabafikile pa mutima. Muli ili lembo mwali amashiwi ya kwa Yesu ku batumwa bakwe aba busumino ilyo aletendeka ukusefya Umulalilo wa kwa Shikulu. (Luka 22:19, 20) Cilya cungulo, BaKseniya abali ne myaka 102 bapingwilepo ukutendeka ukusambilila Baibolo.

BaKseniya batila: “Pa numa ya kwikala imyaka 102, nasukile naumfwikisha ubufwayo bwa bumi. Nomba naliluka ukuti takwaba icawamisha ukucila ukubombela Lesa wesu umusuma, uwa kutemwa, Yehova. Ncili uwacincila kabili uwakosa. Kuti nabelenga ukwabula amakalashi no kubishanya no lupwa lwandi.”

Pa November 5, 2000, baKseniya balibatishiwe. Batila: “Nomba mpela ubumi bwandi kuli Yehova ukuti mubombele no kutemwa. Ndashalika bamagazini na matrakiti ninshi ninjikala pa citesheni ca basi icabela mupepi ne ng’anda yandi. Balupwa balantandalila ilingi line, kabili ndasansamuka ilyo ndebeba icine pali Yehova.”

BaKseniya balelolela ubushiku ilyo ‘umubili wabo ukalelema ukucila uwa mwaice, bakabwelele ku nshiku sha bukashana bwabo.’ (Yobo 33:25) Nga ca kuti umuntu uwacila imyaka 100 taleumfwa ukuti nakota ukusambilila ubufwayo bwa bumi muli Baibolo, ni shani kuli imwe?