Twalilileni Ukubombela Yehova No Mutima Washikimana

“Washikimano mutima wandi, mwe Lesa, washikimano mutima wandi.”—AMALUMBO 57:7.

1. Mulandu nshi twingabela abashininwa nga Davidi?

YEHOVA kuti atulenga twaba abashikimana mu citetekelo ca Bwina Kristu, pa kuti tukakatile ku Bwina Kristu bwa cine pamo nga babomfi bakwe abaipeela. (Abena Roma 14:4) E co, kuti twashininwa nga kemba wa malumbo Davidi, uwaimbile ukuti: “Washikimano mutima wandi, mwe Lesa.” (Amalumbo 108:1) Nga ca kuti umutima wesu walishikimana, tukacincishiwa ukufishapo ukuipeela kwesu kuli Lesa. Kabili ilyo tulekonka ubutungulushi bwakwe no kulomba ukuti atukoshe, kuti twaba abashitelententa, aba mupampamina kabili abashininwa nga ba mpomfu, ‘abapikintika pe mu mulimo wa kwa Shikulu.’—1 Abena Korinti 15:58.

2, 3. Ukukonkomesha kwa kwa Paulo ukwalembwa pali 1 Abena Korinti 16:13 kwalola mwi?

² Ilyo alecincisha abakonshi ba kwa Yesu mu Korinti wa pa kale kabili ukucincisha ukubomba na ku Bena Kristu ba lelo, umutumwa Paulo atile: “Loleni, iminineni ndi mu kutetekela, mube abaume, koseni.” (1 Abena Korinti 16:13) Mu ciGriki aya mashiwi yonse yalanga ukuti tufwile ukutwalilila ukucite fyo. Bushe uku kukonkomesha kwalola mwi?

³ Kuti twaba ‘abalola’ lwa ku mupashi ukupitila mu kukaana Kaseebanya no kutwalilila ukupalama kuli Lesa. (Yakobo 4:7, 8) Ukucetekela Yehova kutulenga ukutwalilila ukuba abaikatana no ‘kwiminina ndi mu kutetekela kwa Bena Kristu.’ Ifwe, pamo na banakashi abengi pali ifwe, twaba nga “baume” ukupitila mu kubombela Lesa mu kushipa nga bakabila aba Bufumu. (Amalumbo 68:11) ‘Tulakosa’ ukupitila mu kulomba Shifwe wa mu muulu amaka ya kucita ukufwaya kwakwe.—Abena Filipi 4:13.

4. Finshi twacitile ilyo tushilabatishiwa nga Bena Kristu?

 ⁴ Twalangile ukuti natupokelela icitetekelo ca cine ilyo twaipeele no mutima onse kuli Yehova no kulangisha uko kuipeela ukupitila mu lubatisho lwa mu menshi. Lelo finshi fyatutungulwile ku lubatisho? Ica kubalilapo ca kuti twanonkele ukwishiba kwine kwine ukwa Cebo ca kwa Lesa. (Yohane 17:3) Ici calengele twaba ne citetekelo no kutulenga ukulapila, ukulanga ukuti tuli no bulanda pa fintu fyabipa ifyo twalecita kale. (Imilimo 3:19; AbaHebere 11:6) Lyene pakonkele ukwaluka kwesu, pantu twalekele imicitile yabipa pa kuti twikale umwabela ukufwaya kwa kwa Lesa. (Abena Roma 12:2; Abena Efese 4:23, 24) Pa numa ya ico pakonkele ukuipeela no mutima onse kuli Yehova mwi pepo. (Mateo 16:24; 1 Petro 2:21) Twalombele Lesa ukutupeela kampingu musuma kabili twalibatishiwe mu kulanga ukuipeela kwesu kuli wene. (1 Petro 3:21) Ukutontonkanya pali ifi fintu kukatwafwa ukutwalilila ukwibukisha ifyo tukabila ukulabombesha ukwikalila umwabela ukuipeela kwesu no kutwalilila ukubombela Yehova no mutima washikimana.

Twalilileni Ukufwayafwaya Ukwishiba Kwine Kwine

5. Mulandu nshi tulingile ukutwalilila ukunonka ukwishiba kwa mu Malembo?

⁵ Pa kwikala umwabela ukuipeela kwesu kuli Lesa, tufwile ukutwalilila ukunonka ukwishiba kwa mu Malembo ukukosha icitetekelo. Fintu cali icintu cisuma ukulya ifilyo fya ku mupashi ilyo twaishibe fye icine ca kwa Lesa! (Mateo 24:45-47) Filya “filyo” fyali ifisuma icine cine—kabili fyaletunonsha lwa ku mupashi. Nomba cili icacindama ukutwalilila ukulya ifilyo fya ku mupashi ifya mulyo pa kuti tutwalilile ukuba no mutima washikimana nga babomfi ba kwa Yehova abaipeela.

6. Bushe napamo mwaafwiwe shani ukulundulula ukutasha kwa pa mutima ukwa cine ca mu Baibolo?

⁶ Ukubombesha kulakabilwa pa kunonka ukwishiba kwalundwapo ukwa mu Malembo. Caba kwati kufwayafwaya ifyuma fyashikama—icintu icikabila ukuibikilishako. Lelo fintu cawama ukusanga “ukwishiba Lesa”! (Amapinda 2:1-6) Lintu kasabankanya wa Bufumu asambilile Baibolo na imwe, napamo alebomfya icitabo ca Ukwishiba Uko Kutungulula ku Mweo wa Muyayaya. Nalimo palepita ne nshita pa kuti mupwishe ukusambilila icipandwa cimo na cimo, napamo ukusambilila icipandwa cimo ukucila pa muku umo. Mwalinonkelemo ilyo amalembo yaloshiweko yalebelengwa kabili mwalilanshenye. Nga ca kuti icishinka cakosa ukumfwa balemulondolwela. Uwalemutungulula isambililo lya Baibolo alepekanya bwino, alepepela umupashi wa kwa Lesa, kabili amwafwile ukulundulula ukutasha kwa pa mutima ukwa cine.

7. Finshi filenga umuntu ukufikapo ukusambilisha bambi icine ca kwa Lesa?

⁷ Uku kubombesha kwali ukwalinga, pantu Paulo alembele ukuti: “Uusambilishiwe cebo aleke uumusambilisha akumeko ku fisuma fyakwe fyonse.” (Abena Galatia 6:6) Pano ili lembo lya ciGriki lilanga ukuti ifisambilisho fya Cebo ca kwa Lesa fyalebikwa mu muntontonkanya no mutima wa muntu ‘uwalesambilishiwa.’  Ukusambilishiwa muli uyo musango kumulenga mwafikapo ukusambilisha na bambi. Pa kwikalila umwabela ukuipeela kwenu, mufwile ukusungilila ubutuntulu bwenu ubwa ku mupashi no kuba abashikimana pa kutwalilila ukusambilila Icebo ca kwa Lesa.—1 Timote 4:13; Tito 1:13; 2:2.

Ibukisheni Ukulapila Kwenu no Kwaluka

8. Bushe kuti twatwalilila shani ukuba ne myendele ya bukapepa?

⁸ Bushe muleibukisha ifyo mwailulwikwe ilyo mwasambilile icine, ukulapila, no kuyumfwa ukuti Lesa namulekelela pa citetekelo cenu mu cilubula ce lambo lya kwa Yesu? (Amalumbo 32:1-5; Abena Roma 5:8; 1 Petro 3:18) Ukwabula no kutwishika tamulefwaya ukubwelela ku mikalile ya lubembu. (2 Petro 2:20-22) Pa fintu fimbi, Ukupepa lyonse kuli Yehova kukamwafwa ukutwalilila ukuba ne myendele ya bukapepa, ukwikalila umwabela ukuipeela kwenu no kutwalilila ukubombela Yehova muli bucishinka.—2 Petro 3:11, 12.

9. Pa numa ya kufuma ku micitile ya lubembu, ni nshila nshi tufwile ukukonka?

⁹ Pa numa ya kwaluka ukufuma ku micitile ya lubembu, twalilileni ukulomba ubwafwilisho bwa kwa Lesa mu kuba no mutima washikimana. Na kuba, cali kwati mwalilubile mu nshila mwaleendamo lyene mwaipusha umuntu no kusanga inshila yalungama. Mwifuma muli iyo nshila nomba. Twalilileni ukucetekela ubutungulushi bwa kwa Lesa, kabili pampamineni pa kuba mu nshila itwala ku mweo.—Esaya 30:20, 21; Mateo 7:13, 14.

Mwilaba Ukuipeela Kwenu no Lubatisho

10. Fishinka nshi tulingile ukulaibukisha pa lwa kuipeela kwesu kuli Lesa?

¹⁰ Muleibukisha ukuti mwaipeele kuli Yehova mwi pepo, ukuba no buyo bwa ku mubombela ku ciyayaya kabili muli bucishinka. (Yuda 20, 21) Ukuipeela cipilibula ukupaatwilwa ku mulimo uwashila. (Ubwina Lebi 15:31; 22:2) Ukuipeela kwenu takwali cipangano ca pa kashita kanono nelyo ukuipeela ku muntu. Kwali kuipeela kwa ciyayaya kuli Mulopwe wa Kubumbwa konse, kabili ukwikalila umwabela uku kuipeela kukabila ukuba na bucishinka kuli Lesa ubumi bwesu bonse. Cine cine, ‘ni kuli Yehova twabela no mweo, kabili ni kuli Yehova tufwila.’ (Abena Roma 14:7, 8) Insansa shesu shaba mu kunakila ku kufwaya kwakwe no kutwalilila ukumubombela no mutima washikimana.

11. Mulandu nshi mulingile ukwibukisha ulubatisho lwenu na fintu lulangilila?

¹¹ Lyonse muleibukisha ulubatisho lwenu ngo lulangilila ukuipeela kwenu no mutima onse kuli Lesa. Tabamupatikishe ukubatishiwa, pantu mwaitemenwe fye. Bushe nomba mwalapampamina pa kubomba ukulingana no kufwaya kwa kwa Lesa ubumi bwenu bonse? Mwalombele Lesa ukumupeela kampingu musuma kabili mwalibatishiwe ku kulanga ukuipeela kwenu kuli wene. Sungilileni uyo kampingu musuma ukupitila mu kufishapo ukuipeela kwenu kuli Lesa kabili amapaalo yashaiwamina aya kwa Yehova yakaba pali imwe.—Amapinda 10:22.

Ukuisalila Kulaafwa

12, 13. Ukuisalila kwesu kwayampana shani no kuipeela no lubatisho?

¹² Cine cine, ukuipeela no lubatisho fyaliletela iminshipendwa ya bantu mwi sonde lyonse amapaalo ayengi nga nshi. Lintu twalangisha ukuipeela kwesu kuli Lesa ukupitila mu lubatisho lwa mu menshi, tulafwa ukukuma ku mikalile yesu iya kale lelo tulatwalilila ukuisalila. Pamo nga basumina abasambilishiwa bwino, twaliitemenwe ilyo twaipeele kuli Lesa mwi pepo no kubatishiwa. Ukuipeela no lubatisho  fikabila twaishiba ukufwaya kwa kwa Lesa lyene no kusalapo ukucita uko kufwaya. (Abena Efese 5:17) Na muli fyo tupashanya Yesu, uwaisalile lintu ashile umulimo wa bukabasa, ukubatishiwa no kuipeela no mutima onse ku kucita ukufwaya kwa kwa Wishi wa mu muulu.—Amalumbo 40:7, 8; Yohane 6:38-40.

¹³ Yehova Lesa alefwaya ukuti Umwana wakwe abe “uwapwililila mu kucula.” E co Yesu alekabila ukuisalila pa kuti ashipikishe amacushi ya musango yu mu citetekelo. E co, ‘aninike ukulomba no kupaapaata pamo no kukuuta kwa kalanda ne filamba, kabili aumfwilwe pa mulandu wa kutiina Lesa.’ (AbaHebere 2:10, 18; 5:7, 8) Nga ca kuti na ifwe twaba na katiina ka kuli Lesa aka musango yu, kuti twashininkisha ukuti ‘akatumfwa,’ kabili kuti twacetekela ukuti Yehova akatulenga ukuba abashikimana pamo nge Nte shakwe ishaipeela.—Esaya 43:10.

Kuti Mwatwalilila Ukuba no Mutima Washikimana

14. Mulandu nshi tulingile ukubelengela Baibolo cila bushiku?

¹⁴ Cinshi cikamwafwa ukutwalilila ukuba no mutima washikimana na muli fyo ukwikalila umwabela ukuipeela  kwenu kuli Lesa? Pa kufwaya ukutwalilila ukwishiba ifingi pa lwa Cebo ca kwa Lesa, mulebelenga Baibolo cila bushiku. Ici cintu ico “umusha wa cishinka kabili uwashilimuka” lyonse atukonkomesha ukucita. Ukufunda kwa musango yu kulapeelwa pantu ukwikalila umwabela ukuipeela kwesu kukabila ukuti twatwalilila ukwenda mu cine ca kwa Lesa. Nga ca kuti ukuteyanya kwa kwa Yehova kwalesuminisha ifisambilisho fya bufi, Inte sha kwa Yehova na bantu bashimikila te kuti bakoseleshiwe ukulabelenga Baibolo.

15. (a) Finshi tufwile ukumona ilyo tulesala ifintu? (b) Mulandu nshi twingasosela ukuti umulimo wa ku mubili waba wa bubili ku Mwina Kristu?

¹⁵ Ilyo mulesala, lyonse mulemona ifyo fingakuma ukufishapo kwenu ukwa kwikalila ku kuipeela kwenu kuli Yehova. Ici napamo kuti cakuma incito yenu. Bushe mulesha ukulenga incito ukumwafwa ukutwala pa ntanshi ukupepa kwa cine? Nangu ca kuti abengisha incito basanga ukuti Abena Kristu baipeela balicetekelwa kabili balabomba bwino, na kabili balamona ukuti Inte sha kwa Yehova tabaobelwa no kufwaya ukulumbuka mu calo kabili tabacimfyanya na bambi ukuti bakwate ififulo fya pa muulu. Ni pa mulandu wa kuti ubuyo bwa Nte sha kwa Yehova te kufwaya ukunonka icuma, ukulumbuka, nelyo ukukwata amaka. Ku baleikala umwabela ukuipeela kwabo kuli Lesa, icacindama kucita ukufwaya kwa kwa Lesa. Incito iibalenga ukukwata ifikabilwa mu bumi, icintu ca bubili, umulimo wa bubili mu bucindami. Ngo mutumwa Paulo, umulimo wabo uukalamba butumikishi bwa Bwina Kristu. (Imilimo 18:3, 4; 2 Abena Tesalonika 3:7, 8; 1 Timote 5:8) Bushe ifya Bufumu e fyaba ifya ntanshi mu bumi bwenu?—Mateo 6:25-33.

16. Cinshi twingacita nga ca kuti amasakamika yacilamo yalelenga cakosa ukwikalila umwabela ukuipeela kwesu kuli Lesa?

¹⁶ Bamo napamo bapene banshiwe ku masakamika yalekanalekana ilyo bashilasambilila icine. Lelo fintu bali no kusekelela, ukutasha, no kutemwa Lesa ilyo bapokelele isubilo lya Bufumu! Ukutontonkanya pa mapaalo bakwata ukutula lilya kuti kwabaafwa ukwikalila umwabela ukuipeela kwabo kuli Yehova. Lubali lumbi, ni shani nga ca kuti ukucilamo ukusakamikwa pa mafya ya mu bumi muli buno bwikashi kwafwaya ukutushe “cebo ca kwa Lesa,” nga fintu fye imyunga ingalesha imbuto ukumena? (Luka 8:7, 11, 14; Mateo 13:22; Marko 4:18, 19) Nga mwamona ukuti ici catendeka ukucitika kuli imwe nelyo ku lupwa lwenu, pooseni amasakamika yenu pali Yehova kabili pepeni ukuti amwafwe ukulundulula ukutemwa no kutasha. Nga ca kuti mwapoosa icisendo cenu pali wene, akamwafwa no kumupeela amaka ya kutwalilila ukumubombela ne nsansa no mutima washikimana.—Amalumbo 55:22; Abena Filipi 4:6, 7; Ukusokolola 2:4.

17. Kuti twashipikisha shani amesho yatapata?

¹⁷ Twalilileni ukupepa kuli Yehova Lesa lyonse, nga fintu fye mwalepepa ilyo mwaleipeela kuli wene. (Amalumbo 65:2) Lintu mwatunkwa ukucita icalubana nelyo lintu kwaisa ubwesho bwatapata, fwayeni ubutungulushi bwa kwa Lesa no kulomba ukuti amwafwe ukubukonka. Muleibukisha ubucindami bwa kuba ne citetekelo, pantu umusambi Yakobo alembele ukuti: “Nga umo uwa muli imwe abulwa amano [ya kushipikisha ubwesho], alombe kuli Lesa uupeela fye kuli bonse ukwabulo kwebaula, kabili yakapeelwa kuli wene. Lelo alombele mu citetekelo, no kutwishika nakalya; pantu uutwishika apale bimbi lya muli bemba ilyaimiwa no kusensenunwa ku mwela; umuntu ulya elolelo kuti akapokelele cintu cimo kuli Shikulu, pa kubo muntu wa mitima ibili, uwalauka mu mibele yakwe yonse.” (Yakobo 1:5-8) Nga ca kuti ubwesho bwamoneka kwati bwalatwansha, kuti twaba abashininkisha ulwa ici: “Ica kwesha tacamusanga kano ica buntuuntu fye; lelo wa cishinka Lesa, uushakamuleke ukweshiwa ukucila muli ico mwinganasha; lelo pamo ne ca kwesha akacita na pa kufuminamo, ukuti mube na maka ya kucishipikishako.”—1 Abena Korinti 10:13.

18. Cinshi twingacita nga ca kuti ulubembu ulukalamba ulwafiswa lulenasha ukusalapo kwesu ukwa kwikalila umwabela ukuipeela kwesu kuli Yehova?

¹⁸ Ni shani nga ca kuti ulubembu ulukalamba ulo mwafisa lulelungulusha kampingu wenu no kunasha ukupingulapo kwenu ukwa  kwikalila umwabela ukuipeela kwenu kuli Lesa? Nga ca kuti mwalapila, kuti mwasansamushiwa ukwishiba ukuti Yehova ‘takasuule umutima uwalopota kabili uwafunshika.’ (Amalumbo 51:17) Fwayeni ubwafwilisho bwa baeluda ba Bwina Kristu aba kutemwa, ukwishiba ukuti bene—mu kupashanya Yehova—tabakangushe ukufwaya kwenu ukwa kuba na kabili no kwampana kusuma na Shinwe wa mu muulu. (Amalumbo 103:10-14; Yakobo 5:13-15) Lyene pa kukoshiwa na kabili lwa ku mupashi e lyo na pa kuba no mutima washikimana, mukatambalike nshila sha makasa yenu no kwikalila umwabela ukuipeela kwenu kuli Lesa.—AbaHebere 12:12, 13.

Twalilileni Ukubombela Yehova no Mutima Washikimana

19, 20. Mulandu nshi cabela icacindama ukuti twatwalilila ukwikalila umwabela ukuipeela kwesu?

¹⁹ Muli ino nshita yaibela, tufwile ukubombesha ukwikalila umwabela ukuipeela kwesu no kutwalilila ukubombela Yehova no mutima washikimana. Yesu atile: “Uwashipikisha ukufika ku mpela, wene akapusuka.” (Mateo 24:13) Apo tuleikala mu “nshiku sha kulekelesha,” impela kuti yaisa inshita fye iili yonse. (2 Timote 3:1) Na kabili, tapali umuntunse uwaishiba nga tukabako mailo. (Yakobo 4:13, 14) E co cili icacindama ukuti twatwalilila ukwikalila umwabela ukuipeela kwesu lelo line!

²⁰ Umutumwa Petro akomaile pali ici muli kalata wakwe uwa cibili. Alangile ukuti nga fintu fye abashalepepa balobele mu Lyeshi, e fyo ne sonde lya mampalanya, nelyo ubwikashi bubifi ubwa bantunse, bukonaulwa mu “bushiku bwa kwa Shikulu.” E co Petro atile: “Imwe mufwile ukuba abenda mu mibele ya mushilo kabili iya bukapepa”! Abakonkomeshe no kuti: “Mwe batemwikwa, pa kwishibila kabela ifi fintu, ilindeni ukuti mwikulilwa [kuli bakasambilisha wa bufi na bantu abashipepa], no kuwa ku kushangila kwenu kwine.” (2 Petro 3:5-17) Fintu cingaba ica bulanda nga ca kuti umuntu uwabatishiwe alufiwa no kufwa ngo muntu uwafililwe ukutwalilila ukuba no mutima washikimana!

21, 22. Amashiwi ya pa Amalumbo 57:7 yafishiwapo shani kuli Davidi na ku Bena Kristu ba cine?

²¹ Umupampamina wenu uwa kwikala umwabela ukuipeela kwenu kuli Lesa kuti wakoshiwa nga mwatwalilila ukwibukisha ubushiku bwa nsansa ubwa lubatisho lwenu no kufwayafwaya ubwafwilisho bwa kwa Lesa pa kuti amashiwi yenu ne micitile fyaletela umutima wakwe insansa. (Amapinda 27:11) Yehova talenga abantu bakwe insoni, kabili na ifwe tufwile ukuba aba bucishinka kuli wene. (Amalumbo 94:14) Alangile inkumbu ne cililishi mu kufulunganya amapange ya balwani no kupususha Davidi. Pa kutasha pali ci, Davidi asosele pa lwa fyo ukutemwa akwatile Kalubula wakwe kwakosa na fintu kushingatelentenshiwa. Ukufuma pa mutima, aimbile ukuti: “Washikimano mutima wandi, mwe Lesa, washikimano mutima wandi; ndeimba, kabili ndelumba.”—Amalumbo 57:7.

²² Nga Davidi, Abena Kristu ba cine tabapungaila mu kuipeela kwabo kuli Lesa. Ne mitima yashikimana, batila uubalubula no kubasungilila ni Yehova uo bembila amalumbo mu nsansa. Nga ca kuti umutima wenu walishikimana, mukacetekela Lesa, kabili ku bwafwilisho bwakwe mukafishapo ukuipeela kwenu kuli wene. Cine cine, kuti mwaba ngo “walungama” uyo kemba wa malumbo aimbile ukuti: “Ulukumo lubi takatiine, umutima wakwe walishikimana, atetekela Yehova.” (Amalumbo 112:6, 7) Nga mwatetekela Lesa no kumucetekela umupwilapo, kuti mwaikalila umwabela ukuipeela kwenu no kutwalilila ukubombela Yehova no mutima washikimana.

Bushe Muleibukisha?

• Mulandu nshi tulingile ukutwalilila ukunonka ukwishiba kwine kwine ukwa mu Baibolo?

• Mulandu nshi tufwile ukulaibukishisha ukulapila kwesu no kwaluka?

• Tunonkelamo shani mu kwibukisha ukuipeela kwesu no lubatisho?

• Cinshi cikatwafwa ukutwalilila ukubombela Yehova no mutima washikimana?

[Amepusho]

[Ifikope pe bula 18]

Bushe mulesungilila ubutuntulu bwenu ubwa ku mupashi ukupitila mu kubelenga Icebo ca kwa Lesa cila bushiku?

[Icikope pe bula 18]

Ukulenga ubutumikishi bwa Bwina Kristu ukuba e mulimo ukalamba kutwafwa ukutwalilila ukubombela Yehova no mutima washikimana