Bushe Muleibukisha?

Bushe mwalyumfwikishe ifyo mwabelengele muli bamagazini ba nomba line aba Ulupungu lwa kwa Kalinda? Cisuma, moneni nga kuti mwayasuka ifi fipusho:

• Fintu nshi mwingabomfya ifyaba mu Lyashi lya pa Lupili ku kupwisha ukufunshika?

Cila bushiku, kuti mwabelenga icisambilisho cimo pa fisambilisho fya kutendekelako ifyaba mu lyashi lya kwa Yesu nelyo mu lyashi limbi ilyalembwa mu Malandwe. Ukwetetula pali kulya kufunda no kufwaya ukubomfya kwene mwe bene, kuti kwamupeela insansa ishingi no kucefyako ukufunshika.—12/15, amabula 12-14.

• Milandu nshi itatu iisuma iyo baeluda ba pa cilonganino bafwile ukukanshisha ababomfi batumikila ukubombako imilimo na imbi?

Pa mulandu wa kufulilako kwa mpendwa ya Nte sha kwa Yehova, abaume bacetekelwa na bambi balefwaikwa ku kwaafwa abapya abalebatishiwa ukulunduluka. Ubukote nelyo ukulwala pali nomba kulelenga baeluda bamo ababomba imyaka iingi ukucepelwa amaka. Kabili baeluda bamo abafikapo sana balebombako ne milimo imbi iishili ya pa cilonganino cabo, e co teti babombe sana mu filonganino fyabo nga fintu balebomba kale.—1/1, ibula 29.

• Bushe abantu bacetekela shani balesa ba bufi?

Abengi bapepa balesa ba mu mipepele yabo, lelo aba balesa kuti baba fintu fye ifishipeema ifishingabapususha nga filya fine Baali ashapuswishe abantu bakwe mu nshiku sha kwa Eliya. (1 Ishamfumu 18:26, 29; Amalumbo 135:15-17) Bambi bacindikisha abacita ifya kusekesha nelyo abangala amangalo, abashingabapeela ne subilo line line ilya ku nshita ya ku ntanshi. Lelo, Yehova wena e ko aba icine cine kabili alafishapo na malayo yakwe.—1/15, amabula 3-5.

• Cinshi twingasambilila ku fyo Kaini ayankwile ku kusoka kwa kwa Lesa?

Lesa alitupeela insambu ya kuisalila, kabili kuti twasala ukucita icalungama ukucila ukuleka ukucita ifisuma, nga filya Kaini acitile. Ili lyashi lya mu Baibolo lilanga no kuti Yehova alapingula abashilapila.—1/15, amabula 22-3.

• Mulandu nshi ubusaka bufwaikilwa maka maka pali nomba?

Pa mulandu wa kwaluka kwa mikalile, abengi tabapoosa inshita iikulu ukuwamya pa ng’anda pa mwabo nga fintu cali kale. Ukukanasunga ifya kulya bwino na menshi kuti kwaleta malwele. Baibolo tailanda fye pa busaka bwa ku mubili, lelo ilakomaila na pa kupoosa amano ku busaka bwa ku mupashi, ubusaka bwa mibele no bwa ku muntontonkanya.—2/1, amabula 3-6.

• Ukulanda pali bante batangilile Abena Kristu, Paulo atile “ukuti belengwa abapwililila ukwabula ifwe.” Cali shani ifyo? (AbaHebere 11:40)

Mu Myaka Ikana Limo iileisa, Kristu na bamunyina basubwa mu muulu, abakaba imfumu kabili bashimapepo, bakapeela abakabuushiwa icibwesha ca cilubula. Aba bantu ba citetekelo nga cilya cakwete balya balembwa mu AbaHebere icipandwa 11 “bakalengwa ukuba abapwililila.”—2/1, ibula 23.

• Cishinka nshi Paulo alelandapo ilyo aebele abaHebere ati: “Mucili tamulalukaanya ukufika no kusuumo mulopa”? (AbaHebere 12:4)

Alelanda pa kuikaanya mpaka ne mfwa. Kwaba ifya kumwenako fya kale ifya bantu bali no busumino mpaka ne mfwa. Nangu ca kutila abaHebere abo Paulo alembele tabaeshiwe mpaka ne mfwa, balekabila ukulunduluka ukufika ku kukosoka, ukukosha icitetekelo pa kuti bengashipikisha conse icabipa icali no kubacitikila.—2/15, ibula 29.

• Mulandu nshi cawamina ukukanasosa ati uluse lwa kwa Yehova lulanashako ubupingushi bwakwe?

Indimi shimo, ishiwi lya kuti “ukunashako” kuti lyalola mu kuti ukulinga nelyo ukuikaanya. Yehova ni Lesa wa bulungi no luse, kabili pa kulanga iyo mibele, yonse ibili ilingile ukwendela pamo. (Ukufuma 34:6, 7; Amalango 32:4; Amalumbo 116:5; 145:9) Ubulungi bwa kwa Yehova tabukabila ukucefiwako ku luse.—3/1, ibula 30.

• Bushe caliba fye bwino ku Mwina Kristu ukusuminisha ukuti umubili wa mutemwikwa wakwe uwafwa ukangwe?

Ukukanga ni nshila ya kusungilamo icitumbi. Bamo abena kale balekanga ifitumbi pa milandu ya mipepele. Ifyo te fyo cifwile ukuba kuli bakapepa ba cine. (Lukala Milandu 9:5; Imilimo 24:15) Ukukanga icitumbi kutantalishako fye inshita ya kubwesesha umubili ku lukungu, e kutila icintu ico mushingalesha. (Ukutendeka 3:19) Lelo tamulingile ukusakamana nga ca kutila ifunde lyatila icitumbi cilingile ukukangwa, nga balupwa bamo e fyo balefwaya, nelyo nga ca kuti cilekabilwa pa mulandu wa kutila bamo balingile ukwenda intamfu iitali ukuya ku cililo.—3/15, amabula 29-31.

• Fya kumwenako nshi ifya mu Baibolo ifitusambilisha ukuti Lesa alasengela abantu ba mu nko shonse?

Yehova atumine kasesema Yona ukuyasoka abena Ninebe, kabili Lesa akoseleshe Yona ukusuminisha ukulapila kwa bena Ninebe. Amashiwi ya kwa Yesu ne ca kumwenako cakwe, fyakoseleshe ukutemwa abena Samaria. Umutumwa Petro no mutumwa Paulo balibombeleko umulimo wa kutwala imbila nsuma ku bashali baYuda. Ifi fya kumwenako, fyatulanga ukuti cilakabilwa ukwesha ukwaafwa abantu ba fikulilo fyonse.—4/1, amabula 21-4.