Inshita Ciwama Ukubutuka

MU CALO lelo mufulile abantu abashipa nelyo abaitunga ukushipa kabili abalwani atemwa abapumbula. Umuntu uwabutuka abantu ilingi line bamumona ukuti takosa nelyo ni kuuwe. Nalimo kuti bayamba no kumupumya.

Lelo, Baibolo yalilondolola bwino ukuti inshita shimo ukubutuka kwalibamo amano kabili kushipa. Pa kushininkisha ici cishinka ca mu Baibolo, ilyo talatuma abasambi bakwe mu butumikishi, Yesu Kristu abebele ati: “Ilintu bakamulamata mu mushi uyu, butukileni ku ubiye.” (Mateo 10:23) Ca cine, abasambi ba kwa Yesu bali no kufulumuka abalebalamata. Tabali no kulwako inkondo shiimya aba mapepo, ukwesha ukubomfya amaka pa kwalula abantu. Bakwete ubukombe bwa mutende. (Mateo 10:11-14; Imilimo 10:34-37) E co ukucila ukukalipa, Abena Kristu bali no kubutuka, ukutaluka ku balebakalifya. Ukucita ifi kwabalengele ukutwalilila na kampingu musuma no kuba ne senge lishaiwamina na Yehova.—2 Abena Korinti 4:1, 2.

Ica kumwenako capusanako caba mwi buuku lya mu Baibolo ilya Amapinda. Citweba pa lwa mulumendo, uushabutwike lintu atunkilwe, lelo aile alekonka cilende “nge ng’ombe ilume iileya ku kwipaiwa.” Cinshi cacitike? Kayofi pantu aumfwilile itunko lyakumine umweo wakwe wine.—Amapinda 7:5-8, 21-23.

Ni shani nga ca kutila mwatunkwa ukucita ubulalelale nelyo mwasanga ifintu fimbi ifingamuletela ubwafya? Ukulingana ne Cebo ca kwa Lesa, icingalinga ukucita kufulumuka, ukuya ukutali ne yo ncende mu kwangufyanya.—Amapinda 4:14, 15; 1 Abena Korinti 6:18; 2 Timote 2:22.