Ni Kwi Mwingasanga Umutelelwe?

Mu mushi umo unono uwa ku Masamba ka Afrika, umulumendo we shina lya Josué ashalikapo balupwa wakwe ne fibusa. * Lyene aya ku musumba ukalamba ku kufwaya indalama ukuti abeko eyefilya. Lelo, ilyo afika fye, amasubilo yakwe yacepa ilyo amona ukuti tacayanguka ukunonka ifyuma mu musumba.

JOSUÉ abipilwa nga nshi ilyo aletukuta ukubelesha imikalile ya mu musumba. Umusumba ukalamba taupalilenako ku fyo aleelenganya. Pali iyi nshita, mu mutima Josué alefwaisha ukubwelelamo ku lupwa lwakwe ne fibusa kuli ulya mushi upiina afumine. Lelo aletiina ukuti abekala mushi bamo bakulamuseka. Alelanguluka ati: ‘Bakatila nalifilwa pantu nshatungulwike ku musumba naile.’

Icalemusakamika ukucishamo ni fyo abafyashi bakwe bali no kubipilwa. Bashintilile pali wene ukuti akalabapako indalama. Ilyo aleesha ukushipikisha no kupwisha aya masakamika, Josué atendeke ukubomba amaawala ayengi pa ncito ishacindama kabili alefola fye indalama ishinono sana nga kulinganya ku sho aleenekela ukufola. Alenaka nga nshi pantu alebombesha. Kabili inshita aleshala na yo iya kucitamo imilimo ya Bwina Kristu, iyo acindamika nga nshi, yalecepelako fye cila mulungu. Apo ali ukutali sana na balupwa ne fibusa, aleumfwa ubulanda kabili aletalalilwa. Asangile ukuti mu musumba tamwali umutelelwe uo alefwaisha.

Nangu amashina ne fifulo filapusana, icacitikile Josué cilacitika ilingi. Te kuti Josué ali umufunushi pa kufwaya ukukuuka iyo—alefwaya fye umutelelwe. Mu mutima aleti mu musumba kuti aikalako bwino ukucila mu mushi unono. Kwena, limo umuntu kuti akwata indalama ukucila isho akwete kale lelo te kutila ninshi nomba alaba no mutelelwe wine wine. Te fyo cali kuli Josué, kabili nalimo te fyo cikaba na ku bantu abengi abesha ukucita cimo cine. Kwena ici kuti catulenga ukwipusha ukutila, ‘Bushe umutelelwe cinshi?’

Abantu bapusanapusana baishiba umutelelwe mu nshila shalekanalekana. Dikishonari imo itila umutelelwe “kukanaba na masanso” nelyo “ukukanaba no mwenso nelyo amasakamika.” Abantu abengi basanga ukuti teti cicitike lelo “ukukanaba na masanso” umupwilapo. Balaba aba nsansa cikulu fye baleumfwa aba mutelelwe, nangu ca kuti kwaba ifintu ifingabaletela amasanso.

Nga imwe? Ni kwi mwenekela ukusanga umutelelwe? Bushe usangwa mu musumba ukalamba ukucila ku mushi, nga filya Josué atontonkenye? Nelyo bushe usangwa mu ndalama, te mulandu no ko washisanga nelyo ifyo washinonka? Atemwa bushe usangwa nga wakwata icifulo cikalamba? Te mulandu no ko mwasumina ukuti e ko mwingasanga umutelelwe, bushe imwe no lupwa lwenu mukakwata uyo mutelelwe ukufika lilali?

Natumone inshila shitatu abantu bafwailamo umutelelwe, e kuti incende; indalama; ne cifulo. Lyene twalabebeta uko umutelelwe wa cine cine kabili uubelelela wingasangwa.

[Futunoti]