Bushe Mulapenda Ishikapooswapo?

YESU KRISTU atambike abasambi bakwe isubilo lya mweo wa muyayaya, lelo abakoseleshe no kulinga ifyaba mu kuba Umwina Kristu. Alangilile ici cishinka ilyo aipwishe ati: “Nani pali imwe, uutila pa kufwayo kukuulo lupungu, tabala ekala alinge ishikapooswapo [nelyo, ukupenda ishikapooswapo], amone nga akwete isha kulupwishisha?” (Luka 14:28) Ni mwi Yesu aloseshe pa kutila ishikapooswapo?

Abena Kristu bonse balakwata amafya—yamo yantu yabipisha. (Amalumbo 34:19; Mateo 10:36) E co, tufwile ukuiteyanya mu muntontonkanya na lwa ku mupashi pa kuti tatupapushiwe ilyo ukukaanya nelyo amafya yambi yatuponena. Tufwile twalitontonkanyapo kale pa mafya ya musango yo ayeshila abasambi ba kwa Kristu, apo twalishiba ukuti icilambu—ca kulubulwa ukufuma ku lubembu ne mfwa—cikulu sana ukucila conse ico cino calo cingatupeela. Cine cine, takuli nelyo cimo ico Lesa asuminisha—nangu fye ni mfwa—icingatonaula umupwilapo nga twatwalilila ukumubombela.—2 Abena Korinti 4:16-18; Abena Filipi 3:8.

Icitetekelo cesu kuti cakosa shani? Icitetekelo cesu cilakoselako lyonse ilyo twasala ukucita icisuma, ukumfwila ifishinte fya mibele isuma iya Bwina Kristu, nelyo ukucita icintu icumfwana no kufwaya kwa kwa Lesa—maka maka nga twasongwa ukucita icalubana. Ilyo twamona amapaalo ya kwa Yehova pa mulandu wa kuba no busumino, icitetekelo cesu cilakoselako no kushikilako. Nga twacita ifyo, ninshi tulekonka ica kumwenako ca kwa Yesu, abasambi bakwe aba kubalilapo, na bonse abaume na banakashi ba citetekelo abaikeleko inshita sha kale ishapusanapusana, abo ukwabula ukuluba ‘balingile ishingapooswapo’ pa kubombela Lesa.—Marko 1:16-20; AbaHebere 11:4, 7, 17, 24, 25, 32-38.