Ifyo Umwana Mwaume Ayafwile Bawishi

JAMES, uwa ku England, uuli ne myaka 32, alilwala ubulwele bwa ku muntontonkanya kabili apukumana fye no kwelenganya ifintu. Lelo, alisangwa ku kulongana kwa Nte sha kwa Yehova pa myaka iingi pamo na banyina no mukalamba wakwe umwanakashi. Nalyo line, bawishi tabapooseleko sana amano ku fyo ulupwa lwabo lwasuminemo. Icungulo cimo pa numa ya kusangwa ku kulongana ukwali ne cilangililo pa fya kulaalika uo twaishiba ku Cibukisho ca mfwa ya kwa Kristu, James mukwangufyanya aile ku muputule wakwe. Banyina balimukonkele pa kufwaya ukwishiba ico ayangufyanishishe ukuya ku muputule kabili ba musangile alepita lubilo lubilo muli bamagazini ba kale aba Ulupungu lwa kwa Kalinda na Loleni! Asalilepo imo iyalembelwepo ubwite bwa Cibukisho pe bula lya kulekelesha no kubutukila kuli bawishi. Intanshi asontele pa cikope e lyo asonta na bawishi no kutila “Imwe!” Banyina na bawishi baloleshenye ukulolesha kwa kusunguka ilyo bakutulwike ukuti James alelaalika bawishi ku Cibukisho. Bawishi batile napamo bakasangwako.

Ubushiku bwa Cibukisho mu nshita ya cungulo, James ailebulila bawishi itoloshi mulya babika ifya kufwala no kubapeela, no kulandila ku minwe ukuti e lyo bafwale. Bawishi batile tabayeko ku kulongana. Awe, e fyo James na banyina baimine no kuya ku Ng’anda ya Bufumu beka.

Lelo, pa numa, James atendeke ukukanina banyina nga bamweba ukuiteyanya pa kuti baye ku kulongana kwa cilonganino. Alefwaya ukushala pa ng’anda na bawishi. Lyene bushiku bumo pa mulungu, James na kabili alikeene ilyo banyina bamwebele ukuiteyanisha pa kuti baye na o ku kulongana. Banyina balipapile pa kumfwa bawishi bamwipusha ati, “James, bushe nga naya ku kulongana, na iwe walaya?” James alimwentwile. Ailekumbatila bawishi no kubeba ati “Ee!” kabili bonse batatu baile ku Ng’anda ya Bufumu.

Ukufuma bulya bwine bushiku, bashi James batwalilile ukusangwa ku kulongana kwa pa Mulungu konse kabili tapakokwele batile nga balefwaya ukulunduluka, bafwile ukulasangwa ku kulongana na kumbi. (AbaHebere 10:24, 25) Awe e fyo bacitile, kabili pa numa ya myeshi ibili batendeke ukusambilila Baibolo lyonse. Balilundulwike bwangu, kabili tabashingashingile ukwaluka, awe nga fino batendeka no kubomba umulimo wa kushimikila pa lwa Bufumu. Pashipita fye umwaka umo ukutula apo batendekele ukusambilila Baibolo, baipeele kuli Yehova no kulanga ukuipeela kwabo pa kubatishiwa mu menshi. Nomba babomfi batumikila mu cilonganino baba. Kabili ulupwa lonse balebombela Yehova pamo.