Bushe Mulatesekesha Ukutemwa kwa kwa Lesa?

INSHITA imo Yobo alondolwele ukukanapwililika kwa bantunse muli aya mashiwi: “Umuntu uwafyalwa ku mwanakashi wa nshiku shinono, kabili uwaisulamo ukutenkana. Aba nge luba ilyabalula, no kubonsa; kabili afyuka nge cinshingwa, no kwiminina iyo.” (Yobo 14:1, 2) Ubumi nga fintu cali kuli Yobo pali ilya nshita bwaiswilemo ukulunguluka no bulanda. Bushe na imwe mwalyumfwapo ifyo?

Lelo, te mulanda na macushi na mafya yengatuponena, kwaliba isubilo line line, ilyashimpwa pa cikuuku no kutemwa kwa kwa Lesa. Ica ntanshi ca kuti Shifwe wa mu muulu uwa nkumbu alipeela icilubula ce lambo ku kulubula abantunse ku lubembu lwabo. Ukulingana na Yohane 3:16, 17, Yesu Kristu atile: “Pantu Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya. Pantu Lesa tatumine Umwana wakwe [Yesu] ese pano isonde ku kupingula aba pano isonde, lelo ukuti aba pano isonde bapusukile muli wene.”

Na kabili moneni icikuuku ca kwa Lesa kuli ifwe fwe bantunse bashapwililika. Umutumwa Paulo atile: ‘‘Kabili alengele kuli umo inko shonse sha bantunse ku kwikala pano nse ponse, pa kulinge nshita sha shiko ishalingilwe kabela, no kupakule mipaka ya bwikalo bwa shiko, ku kuleka shifwaye Lesa, kuumfwa nalimo shingapampanta no kumusanga. Lelo na cine taba kutali kuli ifwe bonse.” (Imilimo 17:26, 27) Citontonkanyeni! Nangu ca kuti tuli bantunse bashapwililika, kuti twakwata bucibusa busuma na Kabumba wesu uwakwata ukutemwa, Yehova Lesa.

Lyene, kuti twaba abacetekela ilyo tuletontonkanya pa fya ku ntanshi, ukwishiba ukuti Lesa asakamana ifwe kabili ku kutemwa alituteyanishisha ifya kutunonsha ku ciyayaya. (1 Petro 5:7; 2 Petro 3:13) E co, ukwabula no kutwishika, twalikwata ifya kutucincisha ukusambilila na fimbi pali Lesa wesu uwakwata ukutemwa ukupitila mu kusambilila Icebo cakwe, Baibolo.