Ifipusho Ukufuma ku Babelenga

Bushe kuti caba bwino ku Mwina Kristu wa cine ukusangwa ku lyashi lya cililo nelyo ku bwinga mu calici?

Ukupepa ku mipepele yonse iya bufi kulakalifya Yehova kabili tatufwile ukuitumpamo. (2 Abena Korinti 6:14-17; Ukusokolola 18:4) Ilyashi lya cililo mu calici ilingi liba mapepo umuba ilyashi lilekoselesha amasambililo yashili ya mu malembo pamo nga bumunshifwa bwa mweo no kuti abantu basuma baya ku muulu. Kabili kuti mwaba ne micitile pamo ngo kupanga icishibilo ca musalaba no kupepela pamo na shimapepo. Amapepo ne micitile imbi iyapusana ne fyo Baibolo isambilisha na fyo kuti fyabapo pa bwinga bwa bamipepele ububelele mu calici nelyo kumbi. Ilyo Umwina Kristu aisanga pe bumba apo bonse balecita imicitile ya kupepa kwa bufi, kuti camwafya ukukana ukucitako ifya musango yo. Kwena kuti caba butumpe ukuibika mu bwafya bwa musango yo!

Ni shani nga ca kuti Umwina Kristu aumfwa ukuti afwile ukusangwa ku lyashi lya cililo nelyo ukusangwa ku bwinga mu calici? Ku ca kumwenako, umulume uushipepa kuti acincisha umukashi wakwe Umwina Kristu ukuba nankwe pali iyo nshita. Bushe kuti aya na o no kulamonako fye ifilecitika? Pa mulandu wa kucindika ifyo umulume alefwaya, umukashi nalimo kuti apingulapo ukuya nankwe, ukupampamina pa kukanaipoosa mu mitebeto yonse iya mipepele. Lubali lumbi, kuti nalimo asalapo ukukanaya, ukutontonkanya ifyo napamo kuti atitikishiwa sana ica kuti fyamwansha, nalimo ukumulenga ukutoba amafunde ya bukapepa. Umwine e ufwile ukupingulapo. Kuti afwaya ukukanalunguluko mutima, ukuba na kampingu wasanguluka.—1 Timote 1:19.

Te mulandu ne fyo apingula, kuti camuwamina nga alondolwela umulume wakwe ukuti kampingu wakwe teti amusuminishe ukuipoosa mu mitebeto ya mipepele nelyo ukwimbako inyimbo atemwa ukukontama ilyo balepepa. Ilyo umulume aumfwa ifyo alondolola, nalimo kuti apingula ukuti umukashi wakwe nga asangwako teti cimuwamine sana. Kuti asalapo ukuya eka pa mulandu wa kutemwa umukashi wakwe, ukucindika ifisumino fyakwe, nelyo ukukanafwaya ukuseebanishiwa. Lelo nga apampamina fye pa kuti umukashi aye nankwe, umukashi kuti aya no kulamona fye ifilecitika, te kuipoosamo iyo.

Cimbi ico tushifwile ukusuula ni fyo abasumina banensu bengomfwa ilyo twasangwa mu calici. Bushe bakampingu ba bamo kuti bapunushiwa? Bushe ukucita ifi kuti kwanashako ukufwaisha kwabo ukwa kukanapepa utulubi? Umutumwa Paulo akonkomeshe ati: “Musuminishe ifyacilamo, ukuti mube abafumacumi kabili ababulo mulandu bukasuke abwiso Bushiku bwa kwa Kristu.”—Abena Filipi 1:10.

Nga ca kuti lupwa e uleupa nelyo ukuupwa nelyo e ufwile, balupwa na bo kuti bamupatikisha ukusangwako. Nga cabe fyo, Umwina Kristu afwile ukubebeta bwino ifintu. Nalimo kuti asondwelela ukuti tapali amafya yakafumamo nga asangwa ku lyashi lya cililo atemwa ku bwinga mu calici no kutambako fye ifilecitika. Lelo, ifintu kuti fyaba ukuti pa kusangwako, kampingu kuti acenwa nelyo bakampingu ba bambi ica kuti fyacila na pa busuma bwingafuma mu kusangwako. Te mulandu ne fyo cingaba, Umwina Kristu afwile ukushininkisha ukuti ifyo apingulapo tafyakamucilikile ukuba na kampingu musuma kuli Lesa na ku bantu.