Tufwile Ukwishiba Untu Lesa Aba

BUSHE tamucankwa ukumona ulwelelele lwaisulamo intanda inshita ya bushiku ilyo kushili amakumbi? Bushe icena canunkila ica maluba yabalabata tacimulenga ukumfwa bwino? Bushe tamuipakisha ukukutika ku nyimbo sha tuni no kulila kwa mabula ilyo akamwela kalepeepelesha? Kabili fintu ifisabi fya maka ifitwa whale ne fibumbwa fimbi ifya pa mumana fiwama ukutamba! Kwaba na bantu ababa na kampingu ya kufyalwa na yo na bongobongo uwapikana. Bushe mutila ifi fyonse ifyawama tumona fyaishileko shani?

Bamo batila fyonse ifi fyaishileko fye ifine. Lelo, nga e fyo caba, mulandu nshi abantu basuminina muli Lesa? Mulandu nshi ukusaakana kwa miti yalekanalekana iyine yeka kwingaletela ifibumbwa fikabila ifya ku mupashi?

“Abantu mu cifyalilwa fye balafwaya sana ukupepa, te mulandu ne ndalama bakwata na masomo yabo.” Aya mashiwi yasupula ifyo Profesa Alister Hardy alandile mu citabo cakwe ica The Spiritual Nature of Man. Ifyo bafwailishe nomba line pali bongobongo fyalenga badokota basambilila pa mishipa ukutubulula ukuti abantunse bafyalwa na “maka ya kupepa.” Icitabo ca Is God the Only Reality? citila: “Ukutula apo umuntu abela pano sonde ukufwailisha umo ifintu fyalola ukupitila mu mipepele . . . kwaliseeka sana ku bantu bonse na ku ba nkulo shonse.”

Moneni ifyalandile umwaume umo uwasambilila sana imyaka 2,000 iyapita. Alembele ati: “Ing’anda yonse yakuulwa kuli umo; lelo uwakuulile ifintu fyonse ni Lesa.” (AbaHebere 3:4) Na kuba ilembo lya kubalilapo ilya mu Baibolo litila: “Ku kutendeka Lesa alengele umuulu na pano isonde.”—Ukutendeka 1:1.

Lelo, bushe Lesa nani? Abantunse bakwata ifyasuko fyapusanapusana kuli ici cipusho. Ilyo Yoshi, kalume umwina Japan bamwipwishe ati Lesa nani, ayaswike ati: “Nshamwishiba bwino. Ndi muBuddha, kabili kuli ine ukwishiba Lesa tacacindama.” Nalyo line, Yoshi alisumine ukuti Buddha wine amonwa nga kalesa ku bengi. Nick, shimakwebo uuli mu myaka ya ba 60, alisumina muli Lesa kabili atontonkanya ukuti aba maka yakulisha. Ilyo bamwipwishe ukulondolola ifyo aishibapo pali Lesa, Nick alikutumene pa nshita ntali e lyo ayasuka ati: “Ico cipusho cakosa sana, mune. Ico ningasosa fye ca kuti Lesa e ko aba.”

 Bamo “bapepa no kubombela ifyo Lesa abumba ukucila Kabumba umwine.” (Abena Roma 1:25, Today’s English Version) Abengi nga nshi bapepa ifikolwe fyafwa, basumina ukuti Lesa aba ukutali ica kuti te kuti tufikeko. Mu mipepele ya ciHindu, mwaba imilungu iyaume ne yanakashi iingi. Imilungu yalekanalekana, pamo nga Seu na Herme, yalepepwa mu nshiku sha batumwa ba kwa Yesu Kristu. (Imilimo 14:11, 12) Amacalici ya mu Kristendomu ayengi yasambilisha ati Lesa abamo Batatu, e kuti Lesa Tata, Lesa Mwana na Lesa Mupashi wa Mushilo.

Cine cine, Baibolo itila, “Kuli imilungu iingi na bashikulu abengi.” Lelo isosa no kuti, “kuli ifwe kwaba Lesa umo fye, Shifwe, ni uyo fyonse fyafuma kuli wene.” (1 Abena Korinti 8:5, 6) Ca cine kwaba fye Lesa umo. Lelo nani uyu wine? Aba shani? Nacicindama ukwishiba ifyasuko kuli ifi fipusho. Yesu umwine mwi pepo kuli Lesa atile: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.” (Yohane 17:3) Kwaliba umulandu wa kusuminina ukuti ubumi bwesu ubwa ciyayaya bwashintilila pa kwishiba icine pali Lesa.

[Icikope pe bula 3]

Bushe ifi fyaishileko shani?

[Abatusuminishe]

Ci whale: No kusuminisha kwa ba Tourism Queensland

 [Abatusuminishe Ukubomfya Icikope pe bula 2]

COVER: Index Stock Photography © 2002