Ukufulilako Kukalamba Kwalenga Amakuule Ukwangufyanya
“Iseni Kuli Ine, . . . na Ine Nalamupeelo Kutusha”
Ukufulilako Kukalamba Kwalenga Amakuule Ukwangufyanya
YESU KRISTU atile: “Iseni kuli ine, . . . na ine nalamupeelo kutusha.” (Mateo 11:28) Mwandi bwite bushaiwamina ukufuma ku Mutwe wa cilonganino ca Bwina Kristu! (Abena Efese 5:23) Nga twatontonkanya bwino pali ayo mashiwi, kuti tuleteesa nga nshi intulo ya kutusha iya cine—ukubishanya na bamunyinefwe ba ku mupashi na bankashi pa kulongana kwa Bwina Kristu. Cine cine tulesuminishanya na kemba wa malumbo, uwaimbile ati: “Ifyo kwawama kabili ifyo kwa nsansa ukwikalilila pamo kwa ba bwananyina!”—Amalumbo 133:1.
Abo tubishanya na bo uko tulongene ku kupepa e banensu bene bene, kabili bumupashi buba kulya bulatucingilila kabili bulatuletela insansa. Kanshi, e calengele Umwina Kristu wacaice ukulanda ati: “Lyonse ilyo ndi ku sukulu ndapomponteka no kupelelwa. Lelo ukulongana kuba nga menshi mu ciswebebe, ayo nwa no kuba na maka ya kushipikisha amesho ku sukulu ubushiku bwakonkapo.” Uwacaice wa ku Nigeria atile: “Ukubishanya sana na batemwa Yehova kulangafwa ukupalamina kuli wene.”
Ing’anda ya Bufumu iya Nte sha kwa Yehova iyaba kuntu mwikalila e cikuulwa cacindamisha mu kupepa kwa cine. Mu fifulo ifingi, ukulongana kubela pa Ng’anda ya Bufumu imiku nangu ibili cila mulungu, kabili abasambi ba Baibolo balakoseleshiwa ukusangwako lilya line batendeka fye ukusambilila pa kuti bengalaipakisha ukubishanya kwa kukoselesha ukuba kulya.—AbaHebere 10:24, 25.
Ukukabila kwa mu Kampampa
Nalyo line, calishibikwa ukuti, te bonse Inte sha kwa Yehova abalonganina mu Ng’anda ya Bufumu iisuma. Ukufulisha kwa bakabilisha ba Bufumu mu calo conse nakulenga ukuti kube ukukabila kwa mu kampampa. Amayanda ya Bufumu ayengi yalefwaikwa, maka maka mu fyalo ifipiina.—Esaya 54:2; 60:22.
Ukulangilila: Mu musumba wa bwangalishi uwaba mu Democratic Republic of Congo mwali fye Amayanda ya Bufumu 10 ayalelonganinamo ifilonganino 290. Ici calo calekabila Amayanda ya Bufumu ayengi nga nshi mu kampampa. Mu Angola, ifilonganino ifingi filonganina pa nse pantu bakwata fye Amayanda ya Bufumu ayanono. Uku kukabila na mu fyalo fimbi ifingi e mo kuli.
E ico, ukutula mu 1999, kwaliba ukubombela capamo mu kwafwilisha ukukuula Amayanda ya Bufumu mu fyalo ifipiina. Pa kusakamana umulimo wa makuule muli ifi fyalo, baNte baishiba imilimo imo baliipeela ukwaafwilisha. Ilyo kwaba ukubombesha no mutima wa kuitemenwa na bakabomba ba kuitemenwa ababa muli ifi fyalo, ifitumbukamo filakoselesha icine cine. Ico cilenga baNte abene abekala muli ifi fyalo nabo balemwenamo pa kukanshiwa kuntu balekanshiwa. Ukubombesha kwa musango yu kuleyafwilisha ukukuula Amayanda ya Bufumu ayalekabilwa mu fyalo bekala.
E co kulaba ukwafwilisha mu kukuula Amayanda ya Bufumu ukulingana ne mikulile ya muli iyo ncende ne fisolobelo fyabamo. Ubuyo buli bwa kukuula Amayanda ya Bufumu ayengi ayalekabilwa no kutendekako umulimo wa kuyasakamana bwino ukulingana ne yo ncende.—2 Abena Korinti 8:14, 15.
Ukulunduluka kwa Kukoselesha
Cinshi cacitika pa mulandu wa uku kubombesha kwa kuteyanya umwa kupepela? Ku kwamba kwa 2001, ilyashi lyafumine ku Malawi lyatile: “Umulimo ubombelwe muli cino calo usuma nga nshi. Mu myeshi ibili ileisa, tukapwisha na yambi Amayanda ya Bufumu.” (Ifikope 1 na 2) Mu Togo bakabomba ba kuitemenwa balikuulile Amayanda ya Bufumu ayayanguka mu myeshi ya nomba line. (Icikope 3) Umulimo uusuma uulebombwa na bakabomba ba kuitemenwa uleyafwilisha ukukuula Amayanda ya Bufumu ayasuma mu Mexico, Brazil, ne fyalo fimbi.
Ifilonganino fimona ukuti Ing’anda ya Bufumu nga yakuulwa, abekala mushi baleshiba ukuti Inte sha kwa Yehova shaisa mu kwikala. Abengi baleshimunuka ukubishanya ne Nte sha kwa Yehova mpaka bakwata icifulo ca kupepelamo icisuma. Icilonganino ca Nafisi mu Malawi cashimike ukutila: “Apo nomba natukwata Ing’anda ya
Bufumu iisuma, cilelenga kube ubunte busuma. E co, nacanguka ukutendeka amasambililo ya Baibolo.”Ababa mu cilonganino ca Krake mu Benin balishipikishe ukupumya balebapumya pa mulandu wa kukwata Ing’anda ya Bufumu iishalemoneka bwino nga kuilinganya ku macalici yamo. (Icikope 4) Pali nomba icilonganino calikwata Ing’anda ya Bufumu iisuma iimininako ukupepa kwa cine bwino kabili mu mucinshi. (Icikope 5) Ici cilonganino cakwete bakashimikila ba Bufumu 34 kabili ku kulongana kwa pa Mulungu kwalesangwa abantu nalimo 73, lelo abaliko ilyo Ing’anda ya Bufumu yalepeelwa bali 651. Abengi pali aba bali bekashi ba muli ulya musumba kabili balitemenwe sana pa kumona
Inte sha kwa Yehova bakuula ing’anda mu nshita fye iinono. Ukutontonkanya pa kulunduluka kwaliko kale, iofeshi lya Nte sha kwa Yehova mu Zimbabwe lyalembele ati: “Nga papita fye umweshi umo pa numa ya kukuula Ing’anda ya Bufumu, impendwa ya besa ku kulongana ilingi line ilafulilako imiku ibili.”—Ifikope 6 na 7.Ukwabula no kutwishika, Amayanda ya Bufumu ayapya ayengi yalenga kwaba ififulo umo Abena Kristu baipeela na balefwaya ukusambilila bakoseleshiwilwa lwa ku mupashi. Ilyo icilonganino catendeke ukubomfya Ing’anda ya Bufumu iipya Nte umo uwa ku Ukraine atile: “Tuli ne nsansa ishingi. Twaliimwenene fwe bene ifyo Yehova afwilisha abantu bakwe.”
[Akabokoshi ne Fikope pe bula 10, 11]
Tulatasha Pali Bukapekape Bushaikulila
Inte sha kwa Yehova balesekelela pa kumona ukulunduluka kukalamba ukwacitwa pa kufishapo ukukabila kwa mu kampampa ukwa Mayanda ya Bufumu ayapya mu calo conse. Ukufulilako kwa bakapepa ba kwa Yehova mu fyalo fyalekanalekana kufwaya ukuti Amayanda ya Bufumu ayapya ayengi yakakuulwe ku ntanshi. Pantu mu mwaka wa mulimo uwa 2001, ifilonganino fipya 32 fyalepangwa cila mulungu! Ifyo filonganino fikabila ififulo fya kulonganinamo no kupepa.
Kuti kwaba icipusho ca kuti, ‘Ni kwi kufuma indalama sha kukuulila Amayanda ya Bufumu ayapya, maka maka mu fyalo umo bamunyina bashakwata ndalama?’ Icasuko ca kuti ukutungilila kwa kwa Lesa e lyo na bukapekape bwa bantu e filenga uyu mulimo ukubombwa.
Nga fintu alaile, Yehova apongolwela umupashi wakwe uwa mushilo pa babomfi bakwe, ukubalenga “ukucite cisuma, ukuba abacindama ku milimo isuma, ukuba abape.” (1 Timote 6:18) Umupashi wa kwa Lesa e ucincisha Inte sha kwa Yehova ukutungilila umulimo wa kushimikila pa lwa Bufumu mu nshila shonse—balapeela inshita yabo, amaka, ukuipeela abene, no kupeela ifintu fimbi ku milimo ya Bwina Kristu.
Umupashi wa bukapekape ulenga Inte sha kwa Yehova na bantu bambi ukusangwilako indalama sha kwafwilisha imilimo yakuma ukulunduluka na makuule. Balafwilisha ukulipila ku fyo icilonganino cabo cikabila lyonse, kabili balasangwilako na ku mulimo wa bukuule mu ncende shimbi ishe sonde.
Mu cilonganino cimo cimo, mwaliba utubokoshi twalembwapo bwino ukuti “Umusangulo wa Mulimo wa mwi Sonde Lyonse—Mateo 24:14.” Mulya e mo cila muntu engapoosa imisangulo ya kuitemenwa nga alefwaya. (2 Ishamfumu 12:9) Tulatasha imisangulo yonse, iikalamba ne inono. (Marko 12:42-44) Ishi ndalama shilabomfiwa mu nshila ishingi ukulingana ne filekabilwa, kumo fye no kukuula Amayanda ya Bufumu. Ishi ndalama tashili sha kufolesha bamaneja pantu Inte sha kwa Yehova tashakwata bamaneja.
Bushe imisangulo ya mulimo wa mwi sonde lyonse ilabomfiwa ku mulimo isangwilwa? Ee, e ko ibomfiwa. Iofeshi lya Nte sha kwa Yehova ku Liberia—icalo catebelelwa ne nkondo ya bana calo—lyashimike ukuti baNte ba muli cilya calo abengi tababomba kabili balikwata amafya yene yene mu fya ndalama. Ni shani fintu abantu ba kwa Yehova muli ici calo bengakwata amayanda yasuma aya kupepelamo? Ili ofeshi lya Nte sha kwa Yehova lyashimike ukuti, “imisangulo ya bukapekape bwa bamunyina mu fyalo fimbi ikabomfiwa ku mulimo. Mwandi kuteyanya kusuma kabili ukwa kutemwa!”
Bamunyina ba muli cilya calo basangwila na bo balasangula, nangu ca kutila balipelebela. Icalo ca Sierra Leone ica mu Afrika cashimike ukuti: “Bamunyina muli cino calo baletungilila imibombele kabili nabaitemenwa ukubombako no kusangwilako indalama apo bakwatile ku kutungilila ubukuule bwa Mayanda ya Bufumu.”
Kuli pele pele, uku kubombesha konse kuleta ilumbo kuli Yehova. Bamunyina ba ku Liberia bali ne nsansa ilyo batiile: “Ukukuula mu calo conse amayanda yasuma aya kupepelamo kukalanga abantu ukuti ukupepa kwa cine kuli no kutwalilila mu Liberia kabili kukacindika no kupulamika ishina lya kwa Lesa ilikulu.”