Ifipusho Ukufuma ku Babelenga

Bushe uwalemana icabipisha nelyo uulwalishe ica kutila kuti cayafya no kwibishiwa, afwile ukutumpikwa onse mu menshi pa kubatishiwa?

Ishiwi lya kuti ‘batisha’ lyapilibulwa kwi shiwi lya ciGriki ilya baʹpto ilipilibula ukutumpika. Muli Baibolo, “ukubatisha” cimo cine fye no “kwibisha.” Ukukuma ku kubatishiwa kwa kwa mutungwi umwina Etiopia uwa batishiwe kuli Filipi, Baibolo wa The Emphasised Bible, uwa kwa Rotherham atila: “Batentemukile bonse babili mu menshi, e kutila Filipi na mutungwi,—kabili alimwibishe.” (Imilimo 8:38) Kanshi, uulebatishiwa afwile ukutumpikwa onse mu menshi.—Mateo 3:16; Marko 1:10.

Yesu aebele abasambi bakwe ati: ‘E ico kabiyeni, kalengeni aba nko shonse ukuba abasambi, mulebabatisha.’ (Mateo 28:19, 20) E co, Inte sha kwa Yehova balateyanya ukubatishisha mu fishiba, muli babemba, mu mimana, nelyo ku ncende shimbi ukuli amenshi ayengi aya kuti umuntu kuti aibishiwa onse. Apo ulubatisho lwa kwibishiwa onse lulafwaikwa ukulingana na Malembo, abantunse tabakwata amaka ya kutila uyu te kuti abatishiwe. Kanshi, umuntu afwile ukubatishiwa nangu cakabila ukucita icishicitwa lyonse pa mulandu wa musango abelelemo. Ku ca kumwenako, abakote nelyo maka maka abanakuka pa mulandu wa bulwele balabatishiwa muli fibafwa. Amenshi ya muli cibafwa kuti yakafiwako, ica kuti ulebatishiwa abikwamo mu mutekatima kabili panono panono kabili, ilyo abelela mu menshi, kuti nomba abatishiwa.

Na bantu abalemana sana balibatishiwa. Ku ca kumwenako, bamo abalepwilwe umukolomino ku cipatala ica kuti bakwata ne cipunda pa mukoshi, nelyo ababomfya bamashini ba kubafwa ukupeema balibishiwa. Ca cine, ishi mbatisho shonse shikabila ukupekanisha bwino. Kuti cawama nga pali na nasi nelyo dokota. Lelo nga kuli ukupoosako amano muli fyonse, ilingi tapaba ubwafya bwa kubatishiwa. Kanshi, cailanga fye ukuti kufwile kwaba ukucita fyonse ifingacitwa pa kuti umuntu abatishiwe mu menshi nga e kuli ukufwaya kwakwe ukwa bufumacumi kabili nga naipekanya ukusumina ifingatumbukamo.