Ilyashi Lya Bakabilisha Ba Bufumu

Ukusanga Icine mu Ncende Ishingenekelwa

LESA afwaya “abantu bonse ukupusuka no kufika ku kwishibe Cine.” (1 Timote 2:3, 4) Pa kubomba uyu mulimo, Inte sha kwa Yehova balipulinta no kusabankanya amaBaibolo ne mpapulo shafwilisha ukusambilila Baibolo ishingi nga nshi. Inshita shimo, ishi mpapulo shalyafwa abafumacumi ukusambilila icine mu nshila shishingenekelwa. Ukukuma kuli ici, bakabila ba Bufumu mu Freetown, ku Sierra Leone, bashimika ici icacitike.

Osman ali e mwana mwaume wa bubili mu lupwa lwa bana 9. Apo akulile mu lupwa umo balepepa, lyonse aleya ku kupepa na bawishi. Lelo, Osman alecushiwa nga nshi pa fyo balesambilisha pali helo ku calici uko alepepa. Taleumfwikisha ifyo Lesa wa luse engalungulusha abantu ababifi pa kuboca mu mulilo. Fyonse ifyo balondolwele Osman ku kumwafwa ukumfwikisha icisambilisho ca mulilo wa pe tafyapwishishe ukusakamikwa kwakwe.

Bushiku bumo, ninshi Osman nomba ali ne myaka 20, amwene icitabo ca makumbi makumbi icali mu ng’ungulu. Apo alitemenwe ukubelenga ifitabo, alicibulile, aliciwemye, no kumona umutwe cakwete, uwaleti Icine Icitungulula ku Bumi bwa Ciyayaya. *

Osman aipwishe ati ‘bushe ici icine cinshi?’ Apo alefwaisha ukwishiba, Osman asendele ici citabo ku ng’anda no kucibelenga conse apo pene. Ala alitemenwe ukwishiba ukuti Lesa alikwata ishina, Yehova! (Amalumbo 83:18) Osman kabili asambilile ukuti imibele ikalamba Lesa akwata kutemwa no kuti nangu fye lipange lya kulungulusha abantu mu mulilo lilamuselausha. (Yeremia 32:35; 1 Yohane 4:8) Osman asambilile no kuti nomba line Yehova akaleta paradise wa pe sonde umo abantu bakekala umuyayaya. (Amalumbo 37:29; Ukusokolola 21:3, 4) Kwena ici cine cawamisha ukufuma kuli Lesa wa luse kabili uwa kutemwa! Osman atashishe Yehova ukufuma pa nshi ya mutima pa kumuleka asanga icine mu ncende ashaleenekela ukucisanga.

Ilyo papitile inshiku shinono, pa kwafwilishiwa ne fibusa, Osman asangile ukwabelele Ing’anda ya Bufumu iya Nte sha kwa Yehova no kusangwa ku kulongana umuku wa kubalilapo. Ilyo ali kulya, alombele Nte ukumusambilisha Baibolo. Nangu balemukaanya nga nshi ku lupwa, Osman atwalilile ukulunduluka ku mupashi kabili alibatishiwe. (Mateo 10:36) Ndakai, ni eluda mu cilonganino. Ca kupapusha ukuti fyonse ifi fyacitike pa kusanga ulupapulo lulanda pa fya mu Baibolo mu ng’ungulu!

[Futunoti]