Aba Kutuuka Insala Baleisa!

NAPAMO kuti mwaipusha ukuti, ‘Ni nsala nshi iyo?’ Ni nsala ya ca kulya ca ku mupashi! Kasesema wa kale umuHebere asobele ulwa iyi nsala ati: “Moneni, inshiku shikesa, cisemo ca kwa Shikulu Yehova, ilyo nkatume nsala mu calo, te nsala ya cilyo kabili te cilaka ca menshi, lelo ica kuumfwe cebo ca kwa Yehova.” (Amose 8:11) Pa kwafwilisha ukutuuka iyi nsala ya ku mupashi, abantu 48 abali mwi kalasi lyalenga 112 ilye Sukulu lya Baibolo Ilya Gileadi ilya Watchtower, ku Patterson, New York, baleya mu fyalo 19 ne fishi fya pali bemba.

Baleya nabaipangasha no kwishiba, ukubelesha, no kukanshiwa tabali na kuipangasha umunani wa nama nelyo icilyo ca cine cine. Pa myeshi isano balyobelwe sana na masomo ya Baibolo ayabelako ukukosha icitetekelo cabo ilyo baya mu mulimo wa bumishonari mu fyalo fimbi. Pa March 9, 2002, abantu 5,554 abasangilwe kuli programu wa kupwisha isukulu balikutike no kusekelela.

Ba Stephen Lett, ababa mwi Bumba Litungulula ilya Nte sha kwa Yehova, balicincimwike pa kutendeka programu. Basengeele abatandashi abengi abafumine mu ncende she sonde ishalekanalekana. Lyena balandile amashiwi ayo Yesu alandileko aya kuti, “Imwe muli lubuuto lwa pano isonde” ukulosha ku mulimo wa bumishonari uwabalalilile. (Mateo 5:14) Balondolwele ukutila: ‘Ilyo mulebomba imilimo yenu “mukasanikila” imilimo ya kupapusha iya kwa Yehova, no kulenga abafumacumi ukumona ubusuma bwa kwa Yehova no bufwayo bwakwe.’ Munyina Lett akoseleshe bamishonari ukubomfya ulubuuto lwa Cebo ca kwa Lesa ku kuleta pa bwelu imfifi ya fisambilisho fya bufi no kuteyanya ubutungulushi ku balefwaya ukusambilila icine.

Pa Kutunguluka Imisango Isuma Ilakabilwa

Pa numa ba ceyamani bapwishishe ukulanda mashiwi ya kwiswila, ba Baltasar Perla, ababa muli Komiti wa Musambo uwa United States, balandile ilyashi lya kubalilapo pa malyashi ya kukonkana ayapekanishiwe ku kwaafwa abalepwisha isukulu ukuba bamishonari batunguluka. Balandile ilyashi lyakwete umutwe waleti “Kosa, Kabili Talila, Kabili Cita.” (1 Imilandu 28:20) Imfumu Solomone iyaleteka Israele wa pa kale yapokelele umulimo wakosa uo ishabalile aibombapo—umulimo wa kukuula itempele mu Yerusalemu. Solomone alicitile, kabili Yehova alimwafwile ukupwisha itempele. Pa kulungatika ifi fyebo ku bali mwi kalasi, Munyina Perla atile: ‘Namupokelela umulimo upya, uwa kuba bamishonari, kabili mulingile ukuba abakosa no kutalila.’ Ukwabula ukutwishika abasambi balisansamushiwe ku mashiwi ya kuti Yehova takabashe kulila fye batwalilila ukupalama kuli wena. Munyina Perla alengele abantu batemwa ilyo pa kusondwelela ilyashi ashimike ifyo aimwena ukuti: ‘Bamishonari kuti mwabomba ifintu ifingi. Bamishonari e baletele icine ku lupwa lwesu na kuli ine!’

Ilyashi lyalandile ba Samuele Herd, na bo ababa mwi  Bumba Litungulula, lyaleti, “Lolesheni Kuli Yehova pa Kuti Mwingatunguluka.” Abasambi baletendeka umulimo wa bumishonari, kabili pa kuti bengatunguluka isenge lyabo na Yehova lilingile ukuba ilisuma. Munyina Herd abakonkomeshe ukuti: ‘Namwishiba ifingi ifya mu Baibolo ukupitila mu masambililo ya pa Gileadi. Mwali ne nsansa ilyo mwalepokelela. Nomba, pa kuti mukatunguluke bwino bwino, mufwile na imwe ukutendeka ukupeela ifyo mwasambilile.’ (Imilimo 20:35) Bamishonari bali no kukwata amashuko ayengi aya kubombelamo iyi milimo lintu ‘baleitulula’ abene pa mulandu wa bambi.—Abena Filipi 2:17.

Bushe fyebo nshi bakafundisha bakwatile abasambi babo ilyo balelayana? Umutwe wa lyashi ba Mark Noumair balandile wafumine pali Ruti 3:18, waleti, “Ikala Usuke Wishibe Ifyo Umulandu Uleba.” Ba Mark Noumair bashimike ica kumwenako ca kwa Naomi na Ruti, pa kukoselesha abalepwisha isukulu no kubalenga ukucetekela sana amateyanyo yantu ukuteyanya kwa kwa Lesa ukwa pe sonde kwabikako e lyo no kucindika ubulashi bwa bulesa. Munyina Noumair afikile abasambi pa mutima ilyo atile: ‘Nalimo kukaba inshita imo ilyo mushakomfwikishe umulandu icintu cimo cacitilwa kuli imwe nelyo nalimo mukamona ukuti  icintu cimo cali no ukubombelwa mu nshila imbi. Mukacita shani? Bushe mukema no kucita ifyo mulefwaya nelyo muli no ‘kwikala,’ ukucetekela ubutungulushi bwa kwa Lesa, ukwenekela ukuti, pa nshita yalinga, akalenga ubusuma ukutumbukamo.’ (Abena Roma 8:28) Ukupanda amano kwa kuti bamishonari balingile ‘ukutonta amaka yabo pa kutwala ifya Bufumu pa ntanshi, no kumona ifyo ukuteyanya kwa kwa Yehova kulecita ukucila ukulolekesha pa bantunse,’ ukwabula ukutwishika kukaafwa sana bamishonari mu milimo bakayabomba mu calo cimbi.

Ba Wallace Liverance, ababombeleko bumishonari kale kabili pali ndakai babomba umulimo wa bukafundisha pa Gileadi, balandile ilyashi lya kulekelesha mu malyashi yakonkene aya kubalilapo. Umutwe wa lyashi balandile waleti “Tonteni pa co Mulecita, Twalilileni no Mulimo wa kwa Lesa.” Balangile ukuti kasesema Daniele ailwike ilyo amwene ukuwa kwa Babele kabili alilwike ku fyasobele Yeremia ukuti ukulubuka kwa bena Israele ukufuma mu busha kwali mupepi. (Yeremia 25:11; Daniele 9:2) Daniele alishibe ifyo Yehova atantike inshita, kabili ico camwafwile ukutonta amenso pa fyo ubufwayo bwa kwa Lesa bwalefikilishiwa. Kumfwa, abena Israele baliko pa nshita ya kwa kasesema Hagai bena baleti: “Tailaisa inshita.” (Hagai 1:2) Tabapoosele amano ku nshita baleikalamo, baobelwe fye ku fya bwanalale no kuikusha, no kusha umulimo balubwililwe mu Babele, e kutila umulimo wa kukuula itempele. Pa kusondwelela ilyashi Munyina Liverance atile: “E co beni abalola lyonse muletontonkanya pa bufwayo bwa kwa Yehova.”

Ba Lawrence Bowen bakafundisha ba pa Gileadi batungulwile ukulanshanya pa mutwe wa lyashi uwaleti “Yehova Alapaala Ababomfya Icebo ca Mweo.” (AbaHebere 4:12) Uku kulanshanya kwashimpilwe pa fyo abali mwi kalasi bakumenye, ukukomaila pa fyo Yehova apaala ababomfya Baibolo ilyo baleshimikila no kusambilisha. Balondolwele ukuti Yesu Kristu ashilile bonse abatumikishi ba kwa Lesa ica kumwenako cisuma: ‘E co Yesu mu cishinka alandiile ukuti ifyo asambilishe tafyali fyakwe, lelo alelanda Icebo ca kwa Lesa.’ Aba mitima ya bufumacumi balishibe ukuti ico alesambilisha cali cine kabili balyankwileko bwino. (Yohane 7:16, 17) Na lelo line e fyo caba.

Ukukansha kwa pa Gileadi Kulapangasha Umuntu Ukubomba Umulimo Onse Uusuma

Abakonkelepo ni ba Richard Abrahamson na ba Patrick LaFranca ababa mu lupwa lwa Bethel kabili ababomba imyaka iingi, baipwishe abantu 6 abapitile kale mwi sukulu lya Gileadi abo pali nomba babomba umulimo wa nshita yonse uwaibela uwalekanalekana. Abalepwisha ikalasi lyalenga 112 balikoseleshiwe pa kuumfwa ukuti pa numa ya myaka iingi balya 6, te mulandu ne milimo balebomba pali nomba, balitwalilila ukucita ifyo basambilile pa Gileadi ilyo bali pe sambililo lya Baibolo, ilyo balesokota, na lintu balebomba na bantu bambi.

Ba Theodore Jaracz, ababa mwi Bumba Litungulula, balandile ilyashi likalamba pali ulya programu. Lyali no mutwe waleti “Ifibombwa Ilyo Kwaba Ukushipikisha Ulupato lwa kwa Satana.” Mu myeshi isano iyapita, abasambi baleikala pa ncende iisuma kabili iya buLesa. Na lyo line, twikala mu calo ca bulwani, nga fintu cakomailwepo mu masambililo yabo mu kalasi. Mwi sonde lyonse abantu ba kwa Yehova bali pa kusanswa. (Mateo 24:9) Munyina Jaracz alandile ifintu ifingi ifya mu Baibolo pa kulanga ukuti ‘ni fwe Kaseebanya atontapo sana. Tufwile ukukosha isenge lyesu na Yehova kabili ukuba abakosa ilyo tuleeshiwa.’ (Yobo 1:8; Daniele 6:4; Yohane 15:20; Ukusokolola 12:12, 17) Munyina Jaracz asondwelele ukuti nangu line ulupato luletwalilila ku bantu ba kwa Lesa, ‘takuli icilwilo icafulilwa ifwe, icikashuka, nga fintu Esaya 54:17 alanda. Yehova akamona ukuti twalubulwa mu nshita yakwe umwine ne nshila.’

Apo abapwishishe ikalasi lyalenga 112 ilya Gileadi bali ‘nabaiteyanya,’ ukwabula ukutwishika bakayabomba imilimo iingi ku kutuuka insala ya ca kulya ca ku mupashi mu fyalo umo bakayabombela. (2 Timote 3:16, 17) Twakulalolela ukuumfwa ifyo bakulaeba abantu ubukombe bushaiwamina muli ifi fyalo.

[Akabokoshi pe bula 23]

IFIPENDO FYA BALI MU KALASI

Bafumine ku fyalo: 6

Batuminwe ku fyalo: 19

Impendwa ya basambi: 48

Imyaka nga kwakanya pali bonse: 33.2

Imyaka baba mu cine nga kwakanya pali bonse: 15.7

Imyaka baba mu mulimo wa nshita yonse nga kwakanya pali bonse: 12.2

[Icikope pe bula 24]

Ikalasi Lyalenga 112 Ilyapwishishe Isukulu lya Watchtower Bible School of Gilead

Mu mutande uli pe samba, umulongo wa basambi umo na umo ulependwa ukufuma pa ntanshi ukulola ku numa, amashina yabo yena yatantikwe ukufuma ku kuso ukulola ku kulyo mu mulongo umo umo.

(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.