Inshita ya Kusokolola Inkama

Ukusunga inkama shimo kuti kwalenga umutende nelyo ukukansana. Lelo bushe kwaliba inshita ya kusokolola inkama? Moneni ico kasesema Amose asosa pali Lesa wakwe: “Yehova tacita kantu, kano abala asokolwele ca nkama cakwe ku babomfi bakwe bakasesema.” (Amose 3:7) Aya mashiwi kuti yatusambilisha fimo pa lwa kusunga inkama. Yehova kuti asunga inkama pa fintu fimo e lyo mu kupita kwa nshita asokolwela abantu bamo. Kuti twapashanya shani Yehova mu kusunga inkama?

Inshita shimo, bakacema basontwa aba mu cilonganino ca Bwina Kristu basanga ukuti cilawama ukukanasokolola umulandu umo. (Imilimo 20:28) Ku ca kumwenako, ilyo baletontonkanya pa cingawamina icilonganino, kuti basunga inkama ya kutantika kumo nelyo ukwaluka mu milimo ya cilonganino ukufikila inshita yalinga.

Nga cabe fi, calicindama ukweba bwino abalesunga inkama ine yo, inshita, ne nshila ikasokolwelwamo. Ukwishiba ilyo inkama ikasokololwa ku cintubwingi kuti kwabafwa ukuisunga.—Amapinda 25:9.