“Uli Mwanakashi wa Cishinka”

Umukashana umwina Moabu e o baebele aya mashiwi ya kutasha. Ali ni mukamfwilwa uo baleita ati Ruti, nafyala wa kwa Naomi, umwanakashi umwina Israele. Ruti uwaleikala mu Israele nalimo imyaka 3000 iyapita, pa nshita abapingushi baleteka, aipangile ishina pa kuba uwa cishinka. (Ruti 3:11) Cali shani pa kuti eshibikwe ukuti wa cishinka? Ni bani benganonkelamo mu ca kumwenako cakwe?

Apo talelya “icilyo ca bumbokoya,” Ruti alebomba amaawala ayengi kabili alebombesha ukusota imyangashi mu ma bala, ica kuti ukukosa akosele mu milimo kwamulengele ukutashiwa. Nelyo kwamoneka aba kumwafwa, alekonkanyapo fye ukuwishikana ne cisendo, ica kuti alebombesha ukucila pa fyo aleenekelwa ukubomba. Alifikilepo sana pa bulondoloshi bwa mu Baibolo ubwa mukashi uutashiwa, uwa bunyinu kabili uwapikintika.—Amapinda 31:10-31; Ruti 2:7, 15-17.

Imibele ya kwa Ruti iya ku mupashi—ukuicefya, ukuipusula no kutemwa kwakwe ukwa cishinka, e yalengele sana ukuti aipangile ishina lisuma. Ukwabula ne subilo line line ilya kuti akopwa no kwikala bwino, Ruti ashile abafyashi bakwe ne calo ca ku mwabo, no kuya na Naomi. Pa nshita imo ine, Ruti alangile ukuti alefwaya ukubombela Yehova, Lesa wa kwa nafyala. Pa kukomaila pa busuma bwakwe, Amalembo yatila ali “umusuma kuli [Naomi] ukucila abana baume cinelubali.”—Ruti 1:16, 17; 2:11, 12; 4:15.

Nangu ca kutila bantu e batashishe bucishinka bwa kwa Ruti, icacindamisha ca kuti Lesa alimwene no kutasha imibele yakwe kabili amupaalile ukuba nacikolwe wa kwa Yesu Kristu, icintu icacindama nga nshi. (Mateo 1:5; 1 Petro 3:4) Mwandini Ruti aba ca kumwenako cisuma ku banakashi ba Bwina Kristu na kuli bonse abatila bapepa Yehova!