Talukeni ku Kubepwa

UKUBEPA kwa kale ngo muntu. Ukubepa na ko kwaba pa fintu fyalembelwe intanshi mu lyashi lya kale. Ukubepa kwatendeke ilyo Satana abeleleke Efa mwi bala lya Edene.—Ukutendeka 3:13; 1 Timote 2:14.

Nangu line ukutula lilya ukubepa e ko kwaba pe sonde, pali ndakai e lyo kucililemo. Ukumwena libela inshiku sha nomba, Baibolo yasokele ati: “Abantu ababifi kabili abafutika bakalundulukila ku kubipo kucila, abalufya kabili abalufiwa.”—2 Timote 3:13.

Kwaba imilandu yalekanalekana iilenga abantu ukubepwa. Abafutika na balaya ifya bufi bafinsha bambi indalama. Bapolitishani bamo balabepa ababasala, ico bapampaminapo kufwaya ukutwalilila pa cifulo babapo te mulandu ne fibimbilwemo. Nangu fye bantu abene balaibepa. Apo tabafwaya kusumina ifya cine ifyo bashitemenwe, balaishinina abene ukuti ukucita ifintu ifingabaletela ubwafya, pamo nga ukupeepa, ukubomfya bubi bubi imiti, nelyo bucisenene takwabipa.

Lyene kwaba no kubepa mu fya mapepo. Bashimapepo ba mu nshiku sha kwa Yesu balebepa abantu. Ilyo Yesu alelanda pali balya bakabepa, atile: “Ni ntungulushi mpofu; lelo nge mpofu itungulule mpofu, shonse shibili shikawila mu cilindi.” (Mateo 15:14) Na bantu abene fye balaibepa mu fya mapepo. Amapinda 14:12 yatila: “Kuli inshila iyawama ku cinso ca muntu, lelo ku mpela ya iko ni nshila sha mfwa.”

Nga fintu cali mu nshiku sha kwa Yesu, na lelo line abengi balabepwa mu fya mapepo kabili te ca kupapa! Umutumwa Paulo atile Satana ‘alipofwishe mitima ya bashitetekela, ku kulesho kuca kuli bene ulubuto lwa mbila nsuma ya bukata bwa kwa Kristu, uuli cipasho ca kwa Lesa.’—2 Abena Korinti 4:4.

Nga twabepwa ku ufinsha, tulalufye ndalama. Politishani nga atubepa, kuti twalufya insambu shesu shimo. Lelo nga ca kutila Satana atubepa pa kuti tusuule icine pa lwa kwa Yesu Kristu, tatwakakwate umweo wa muyayaya! E ico, talukeni ku kubepwa. Isuleni umuntontonkanya wenu no mutima ilyo mulebebeta intulo ya cine iya shininkishiwa, Baibolo, iilanda pa lwa mipepele. Fingi twingaipusula nga tatucitile ifyo.—Yohane 17:3.