Ukwenda mu Nshila sha kwa Yehova Kulalambula Apakalamba

BUSHE mwalyendapo ulwendo lwalepa mu mpili? Nga ni fyo, napamo mwaumfwile kwati muli pa muulu wa calo. Ifyo caweme ukupeema umwela usuma, ukulolesha akatalamukila, no kumona ukuyemba kwa fyabumbwa! Nalimo amasakamika mwakwata yamoneke nga yashacindama sana.

Inshita sha kukokolokako isha musango yo tashimonwamonwa ku bengi, lelo nga muli Bena Kristu baipeela, mwalyenda mu calo ca mpili pa nshita yalepa—e kutila lwa ku mupashi. Nge fyacitile kemba wa malumbo uwa ku kale, na imwe ukwabulo kutwishika mwalipepa ati: “Inshila shenu munenge ukushishiba, mwe Yehova; no mwa kuya mwenu munsambilishe.” (Amalumbo 25:4) Bushe muleibukisha ifyo mwaumfwile ilyo mwaile ku lupili lwa ng’anda ya kwa Yehova pa muku wa kubalilapo no kutendeka ukwenda umwasansama? (Mika 4:2; Habakuki 3:19) Ukwabula no kutwishika, bwangu bwangu mwalilwike ukuti ukwenda muli shi nshila shasansama isha kupepa kwa cine kwamulengele ukuba no bucingo no buseko. Mwatampile ukuumfwa nge fyaumfwile kemba wa malumbo uwatile: “Balishuka abantu abaishiba akapundu ka mushilo; mwe Yehova, mu lubuuto lwa cinso cenu e mo bendela.”—Amalumbo 89:15.

Lelo inshita shimo, abende nyendo shalepa mu mpili balashomboka pa kupita mu mikunkuluko yasulukisha. Amolu yalatendeka ukukalipa, kabili balafunshika. Na ifwe kuti twasanga amafya mu mulimo wesu uwa kuli Lesa. Napamo muli shino nshiku, kuti amolu yesu yalafunshinka. Kuti twanonka shani amaka cipya cipya no buseko? Ica kubalilapo kwishiba ifyo inshila sha kwa Yehova shapulamo.

Amafunde ya kwa Yehova Ayasumbuka

Inshila sha kwa Yehova ‘shalipulamo ukucile sha muntu,’ kabili ukupepa Lesa ‘kwalipampamikwa pa muulu wa mpili no kusumbulwo kucilo tupili.’ (Esaya 55:9; Mika 4:1) Amano ya kwa Yehova “mano ayafuma mu muulu.” (Yakobo 3:17) Amafunde yakwe yalisumbuka ukucila yonse yambi. Ku ca kumwenako, pa nshita ilyo abena Kaanani baletuula amalambo ya bunkalwe aya koca abana babo, Yehova apeele abena Israele amafunde ayasuma kabili ayalimo inkumbu. Abebele ati: “Wilabisha mulanda, kabili wilacindika cinso ca mukulu. . . . Umulebeshi . . . aleba kuli imwe ngo mwana calo uwa muli imwe, kabili ulemutemwa nga we mwine.”—Ubwina Lebi 19:15, 34.

 Imyanda ya myaka 15 pa numa, Yesu alandilepo ifya kumwenako na fimbi pa ‘malango yacindama’ aya kwa Yehova. (Esaya 42:21) Mu Lyashi lya pa Lupili, aebele abasambi bakwe ati: “Temweni abalwani benu, pepeleni abamulamata; ukuti mube abana ba kwa Shinwe uuli mu muulu.” (Mateo 5:44, 45) Alundilepo no kuti: “E ico fyonse ifyo mufwayo kuti abantu bacite kuli imwe, e fyo na imwe mucite kuli bene; pantu ici e Malango na bakasesema.”—Mateo 7:12.

Aya malango yasumbuka yalabomba mu mitima ya bantu bankulako, ukubacincisha ukupashanya Lesa bapepa. (Abena Efese 5:1; 1 Abena Tesalonika 2:13) Tontonkanyeni pa kwaluka Paulo ayalwike. Ilyo tumfwa pali wene umuku wa kubalilapo, ‘alesuminishanya na baleipaya’ Stefani kabili “aleonaulo lukuta.” Ilyo papitile fye imyaka inono, aali uwanakilila ku Bena Kristu mu Tesalonika ngo “uonsha uulelela abana bakwe bene.” Isambilisho lya bulesa lyalyalwile Paulo ukufuma ku kuba kapakasa ukwisaba Umwina Kristu uusakamana. (Imilimo 8:1, 3; 1 Abena Tesalonika 2:7) Cine cine aletasha pa kuti ubuntu bwakwe bwamumungilwe kwi sambilisho lya kwa Kristu. (1 Timote 1:12, 13) Ni shani fintu ukutasha kwapala uku kwingatwafwa ukutwalilila ukwenda mu nshila sha kwa Lesa ishasansabala?

Ukwenda mu Kutasha

Abende nyendo shalepa mu mpili balatemwa ukumona ifyo ifintu fimoneka ifyayemba ilyo bali apasansuka. Na kabili balaipakisha utuntu utunono tunono ilyo baleenda mu kashila, ifintu pamo nge fimabwe ifyeni, iluba lyayemba, nelyo ukumona inama mpanga. Na lwa ku mupashi, tulingile ukupempwila ku filambu—ifikalamba ne finono—ififuma mu kwenda na Lesa. Uku kupempwila kuti kwatukosha no kwalula ulwendo lwa kunasha ukuba ulwa kukosha. Kuti twasuminisha amashiwi ya kwa Davidi ayatila: “Nengeni ukuumfwo luse lwenu ulucelo, pantu ni mwe natetekela; nengeni ukwishibe nshila iyo mfwile ukwendamo.”—Amalumbo 143:8.

Maria, uwaenda mu nshila sha kwa Yehova pa myaka iingi atila: “Ilyo nalolesha ifyo Yehova abumba, mona ifintu fyalengwa ifyapikana e lyo ne mibele ya kwa Lesa iya kutemwa. Nampo nga ni nama, icuni, nelyo akashishi, cimo na cimo caliikwatila imibele yaibela, caba ca kucincimusha. E kubekwa kumo kwine ukufuma mu cine ca ku mupashi nga cileya cileumfwika mu kupita kwa myaka.”

Kuti twacita shani pa kuti ukutasha kwesu kukulileko? Cimo twingacita, kukanayangusha ifyo Yehova atucitila. Paulo alembele ati: “Pepeni no kukanaleka; muli fyonse tooteleni.”—1 Abena Tesalonika 5:17, 18; Amalumbo 119:62.

Isambililo lya pa lwesu lilalenga tuletasha. Paulo acincishe Abena Kristu ba ku Kolose ati: “Ifyo fine endeni muli [Kristu Yesu], . . . abalefusho kutootela.” (Abena Kolose 2:6, 7) Ukubelenga Baibolo no kwetetula pa fyo tubelenga kulakosha icitetekelo cesu kabili kulatupalamika kuli Katendeka wa Baibolo. Muli Baibolo yonse mwaba ifyuma ifingatucincisha ‘ukufusho kutootela.’

Ukubombela Yehova capamo na bamunyinefwe na co cilalenga inshila ukwanguka. Kemba wa malumbo alandile pa fyo alecita umwine ati: “Ndi munabo kuli bonse abamutiina.” (Amalumbo 119:63) Inshita shimo tusansamuka sana ni lilya tuba ku kulongana kukalamba ukwa Bwina Kristu atemwa ilyo tuli na bamunyinefwe. Twalishiba ukuti icalenga ulupwa lwesu  ulwa mwi sonde lyonse ulwa Bena Kristu ukubako, ni nshila sha kwa Yehova ishasansama.—Amalumbo 144:15b.

Ukulunda pa kutasha, ukusakamana na ko kulatukosha ukutwalilila ukuya pa ntanshi mu nshila shasansama isha kwa Yehova.

Ukusakamana pa Kwenda

Abenda inyendo shalepa balasakamana pantu baleshiba ukuti balekabila ukupoosako amano nga tabalefwaya ukuluba nelyo ukupalamina sana ukwasuluka. Apo tuli fibumbwa ifiisalila, Yehova alitupeela ubuntungwa bwalinga na mano. Lelo ubo buntungwa bufwaya ukusakamana ilyo tulebomba imilimo yesu iya Bwina Kristu.

Ku ca kumwenako, Yehova alicetekela ababomfi bakwe ukuti bakangwako ukufishapo imilimo yabo. Tatupimina amaka tulingile ukubomfya nelyo inshita tulingile ukupoosa mu milimo ya Bwina Kristu nelyo ubwingi bwa ndalama tulingile ukusangula nelyo ifintu fimbi. Lelo, amashiwi ya kwa Paulo ku bena Korinti yalabomba kuli ifwe bonse aya kuti: “Onse acite umo apangile mu mutima wakwe.”—2 Abena Korinti 9:7; AbaHebere 13:15, 16.

Ukupeela kwa Bena Kristu abangwako kusanshako ukushimikilako bambi imbila nsuma. Na kabili tulanga ukuti twalisakamana ilyo tusangula indalama ku mulimo wa Bufumu uwa mwi sonde lyonse. Gerhardt, eluda, alondolola ukuti wene no mukashi wakwe balilundileko indalama basangula pa numa ya kutandalila ukulongana kukalamba kumo mu fyalo fya ku Kabanga ka Bulaya. Atila: “Twamwene ukuti bamunyinefwe kulya bakwata fye utunono; lelo balatasha sana pa mpapulo shesu ishilanda pa fya mu Baibolo, e ico twapingwilepo ukuti twalefwaya ukutungilila bamunyinefwe ababulisha mu fyalo fimbi ukufika apo twingapesha.”

Ukukushako Ukushipikisha Kwesu

Pa kwenda mu ncende sha mpili kano uli uwashansha. Abende nyendo shalepa balatukusha umubili ilyo lyonse bashukile nshita, kabili ilingi line balenda na makasa intamfu ishipi ku kuipekanishisha inyendo shalepa. Paulo na o atile cisuma ukuba uwapamfiwa mu milimo ya bulesa nga tuli no kutwalilila ukuba abashansha lwa ku mupashi. Paulo atile abafwaya ‘ukwenda umwawamina Shikulu’ no ‘kukoshiwa,’ balingile ‘ukulatwale fisabo mu mulimo onse usuma.’—Abena Kolose 1:10, 11.

Ukucincishiwa na ko e kulenga uwa lwendo lwalepa ukutwalilila na maka. Kucita shani ifyo? Ukutonta pa buyo bumoneka, pamo ngo lupili luli akatalamukila, kulacincisha. Kabili ilyo uli pa lwendo lutali afika pa fifulo fimo mu nshila ifyaishibikwa, kuti apima ifyo endele ukulola ku buyo bwakwe. Ilyo alolesha ku numa intamfu endele, alomfwa bwino.

Na ifwe bene, isubilo lyesu ilya mweo wa muyayaya lilatutungilila no kutucincisha. (Abena Roma 12:12) Pali ino nshita, ilyo tuleenda mu nshila sha kwa Yehova, tumona ukuti tulapwishisha fimo nga tuleimika amabuyo ya Bwina Kristu no kuyafikapo. Kabili fintu tusekelela ilyo twalolesha ku myaka yapita iya mulimo wa busumino nelyo ukumona ifyo twayaluka mu buntu bwesu!—Amalumbo 16:11.

Pa kuti aba lwendo lwalepa bende intamfu itali no kutwalilila na maka, bafwile ukwenda pa musenselo walinga. E fyo caba na kuli ifwe, ukusangwa ku kulongana lyonse no kubomba umulimo wa mwi bala fikatwafwa ukulola ku buyo bwesu. E ico Paulo akoseleshe Abena Kristu banankwe ati: “Muli ico cine e mo twendele.”—Abena Filipi 3:16.

Kwena, tatuba fweka ilyo tuleenda mu nshila sha kwa Yehova. Paulo alembele ati: “Natutontonkanye ifya kucincimushanya ku kutemwa kabili ku kubombe milimo isuma.” (AbaHebere 10:24, New International Version) Ukubishanya na ba bumupashi kukalenga cikanguke ukutwalilila no musenselo umo wine ilyo tuleenda na basumina banensu.—Amapinda 13:20.

Ica kulekelesha, kabili icacindamisha, te kwesha ukulaba amaka Yehova apeela. Abakwata amaka muli Yehova “balaya mu bulamba na mu bulamba.” (Amalumbo 84:5, 7) Nangu ca kuti inshita shimo tulapita umwayafya, kuti twatunguluka ku kwafwa kwa kwa Yehova.