Ifipusho Ukufuma ku Babelenga

Ni lilali cingalinga umwanakashi wa Bwina Kristu ukufwala icifimbo ku mutwe pa milandu ikumine amapepo?

Umutumwa Paulo alembele ati: “Umwanakashi onse uulepepa atemwa alesesema nafimbulwa ku mutwe, alengo mutwe wakwe insoni.” Mulandu nshi? Ni pa mulandu wa cishinte ca buLesa icitila: “Umutwe wa mwanakashi mwaume.” Ukupepa nelyo ukushimikila mu cilonganino ca Bwina Kristu mulimo wa mwaume. E co, ilyo umwanakashi wa Bwina Kristu alebomba imilimo ikumine ukupepa iyo ilingi line ibombwa no mulume wakwe nelyo umwaume wabatishiwa, afwile ukufwala icifimbo ku mutwe.—1 Abena Korinti 11:3-10.

Kuti kwaba inshita shimo mu cupo ilyo umwanakashi wa Bwina Kristu afwile ukufwala icifimbo ku mutwe. Ku ca kumwenako, ilyo ulupwa lwalongana pamo kwi sambililo lya Baibolo nelyo ku ca kulya, umulume ilingi line eubasambilisha no kubapepelako kuli Lesa. Lelo, nga ca kutila umulume tasumina, uyu mulimo kuti waba wa mukashi. E co, nga aleipepela umwine kabili alepepelako na bambi mu kupongomoka nelyo nga aletungulula isambililo lya Baibolo ku bana bakwe no mulume e po ali, nkashi wa Bwina Kristu afwile ukufwala icifimbo ku mutwe. Umulume wakwe nga talipo, umukashi tafwile ukufwala icifimbo ku mutwe, apo Lesa alimusuminisha ukusambilisha abana.—Amapinda 1:8; 6:20.

Na lyo line, ni shani nga ca kuti  umwana wenu umwaume aliipeela, kabili mubomfi wa kwa Yehova Lesa uwabatishiwa? Apo uyo mwana aba mu cilonganino ca Bwina Kristu, afwile ukusambilishiwa ku baume ba mu cilonganino. (1 Timote 2:12) Nga ca kuti wishi alisumina, e ufwile ukusambilisha umwana wakwe umwaume. Lelo wishi nga talipo, lyena nyina afwile ukufwala icifimbo ku mutwe pa kutungulula isambililo lya Baibolo ku mwana wakwe umwaume uwabatishiwa na ku bana bambi. Umwine e wingapingulapo nga alefwaya umwana wakwe uwabatishiwa ukupepa pe sambililo nelyo pa nshita ya ca kulya. Nalimo kuti amona ukuti talafikapo ukupepa kabili kuti apepa umwine. Nga apingulapo ukupepa umwine pali iyo nshita, afwile ukufwala icifimbo ku mutwe.

Ilyo abanakashi ba Bwina Kristu balebomba imilimo imo iya cilonganino, kuti bakabila ukufwala icifimbo ku mutwe. Ku ca kumwenako, pa kukumana kwa kuya mu mulimo wa mwi bala mu kati ka mulungu, kuti kwasangwa fye bankashi ba Bwina Kristu, ukwabula abaume babatishiwa. Kuti kwaba inshita shimbi ilyo abaume babatishiwa tabaliko ku kulongana kwa cilonganino. Nga nkashi e walabomba imilimo iibombwa na munyina pa kukumana kwateyanishiwa ne cilonganino nelyo ukukumana kwa kuya mwi bala, afwile ukufwala icifimbo ku mutwe.

Bushe abanakashi ba Bwina Kristu bafwile ukufwala icifimbo ku mutwe ilyo balepilibula amalyashi ya Baibolo mu lulimi lwa bacibulu nelyo ilyo balebelenga pa cintubwingi amaparagrafu mu lupapulo lwa kutwafwa ukusambilila Baibolo ulubomfiwa pa kulongana kwa cilonganino? Iyo. Bankashi balebomba iyi milimo tabaletungulula nelyo ukusambilisha. Na kabili, bankashi tabafwile ukufwala icifimbo ilyo bali mu filangililo, ilyo baleshimika icacitike, nelyo nga balelanda amalyashi ya busambi mwi Sukulu lya Butumikishi bwa Teokrasi.

Nangu line abaume babatishiwa e bafwile ukusambilisha mu cilonganino, bonse bene abaume na banakashi balikwata umulimo wa kushimikila no kusambilisha ku nse ya cilonganino. (Mateo 24:14; 28:19, 20) Kanshi nga ca kutila umwanakashi wa Bwina Kristu ali no mwaume uuli ni Nte ya kwa Yehova ilyo alelanda no muntu umbi uushili Nte pa lwa Cebo ca kwa Lesa, talekabila ukufwala icifimbo ku mutwe.

Lelo, capusanako nga ca kuti nkashi ali no mwaume uwaipeela kabili uwabatishiwa ilyo aletungulula isambililo lya lyonse ilya Baibolo pa ng’anda. Iyi ni nshita yatantikilwa libela ku kusambilisha iyo uuletungulula isambililo e utungulula fyonse pe sambililo. Nga cabe fi, isambililo liba lubali lwa cilonganino. Nga umwanakashi Nte uwabatishiwa aletungulula ilyo isambililo e lyo no mwaume Nte uwabatishiwa e po ali, afwile ukufwala icifimbo ku mutwe. Lelo, munyina wabatishiwa afwile ukupepa. Nkashi teti apepe na munyinefwe waipeela e po ali kano nga kuli icalenga, tutile munyinefwe takwata amaka ya kulanda.

Nkashi wa Bwina Kristu limo limo kuti aya kwi sambililo lya Baibolo no mwaume kasabankanya wa Bufumu uushabatishiwa. Nkashi nga alefwaya kuti amweba ukutungulula isambililo. Lelo apo te kuti eminineko bwino nkashi wabatishiwa mwi pepo kuli Yehova, kuti cawama e wapepa pe sambililo. Nga nkashi e uletungulula isambililo no kupepa, afwile ukufwala icifimbo ku mutwe. Nangu line umwaume kasabankanya talabatishiwa, aba ku nse bamwishiba ukuti wa mu cilonganino pa mulandu wa kuti alashimikila.

Umutumwa Paulo alembele ati, “umwanakashi afwile ukuba ne ciishibilo ca kutekwa pa mutwe, pa mulandu wa bamalaika.” Cine cine, bankashi ba Bwina Kristu balikwata ishuko lya kuba ifya kumwenako fisuma ku mintapendwa ya bamalaika abo abatwalilila ukunakila Yehova. Mwandi calilinga abanakashi ba buLesa ukupoosako amano ukufwala icifimbo ku mutwe ilyo calinga ukucita ifyo!

[Ifikope pe bula 26]

Ukufwala icifimbo ku mutwe cishiibilo ca kuba no mucinshi kuli bumutwe