Lundeniko Bukapepa ku Kushipikisha Kwenu

“Ku citetekelo cenu lundeniko . . . ukushipikisha, na ku kushipikisha lundeniko bukapepa.”—2 PETRO 1:5, 6.

1, 2. (a) Kukula kwa musango nshi kwenekelwa ku mwana? (b) Bushe ukukula kwa ku mupashi kwacindama shani?

UKUKULA kwalicindama ku mwana, lelo te mubili fye ufwile ukufufumuka. Cenekelwa ukuti afwile ukukula mu mano na mu nkuntu. Mu kuya kwa nshita, umwana akaleka imisango ya bwaice no kuba umwaume nelyo umwanakashi umukalamba. Umutumwa Paulo alandile pali ci ilyo alembele ati: “Ilyo nali umwaice, nalelanda ngo mwaice, naleumfwa ngo mwaice, naletontonkanya ngo mwaice; lelo nomba ndi mukalamba, nindeke fya bwaice.”—1 Abena Korinti 13:11.

² Amashiwi ya kwa Paulo yalanda icintu cimo icacindama pa kukula kwa ku mupashi. Abena Kristu bafwile ukukula ukufuma ku bwaice bwa ku mupashi no kuba ‘abakalamba mu mitima.’ (1 Abena Korinti 14:20) Bafwile ukutinamina no kufika “ku bukalamba, ku mulingo wa mushinku wa mwisulo wa kwa Kristu.” Lyena tabakabe “abaice abasensenunwa kabili abapepelulwa ku mwela onse we sambilisho.”—Abena Efese 4:13, 14.

3, 4. (a) Cinshi tufwile ukucita nga tulefwaya ukukula ukufikapo lwa ku mupashi? (b) Mibele nshi iya bukapepa tulingile ukulanga, kabili yacindama shani?

³ Kuti twakula shani ukufikapo lwa ku mupashi? Ilintu ukukula kwa ku mubili kuishila fye ukwine nga fyonse fili bwino, ukukula kwa ku mupashi kwena kano wabombelapo. Kutendekela pa kusambilila ukwishiba kwine kwine ukwa Cebo ca kwa Lesa no kucita ifyo tulesambilila. (AbaHebere 5:14; 2 Petro 1:3) Ici nomba, e cilenga tulelanga imibele ya bukapepa. Nga fintu fye caba ku kukula kwe fumbi ne fyayampanako, imibele ya bukapepa iyalekanalekana ilingi line ikulila pamo. Umutumwa Petro alembele ati: “Pali ici cine lundeniko ukucincila konse, ku citetekelo cenu lundeniko ubulumba, na ku bulumba lundeniko ukwishiba, na ku kwishiba lundeniko ukuiteka, na ku kuiteka lundeniko ukushipikisha, na ku kushipikisha lundeniko bukapepa, na kuli bukapepa lundeniko ukutemwa aba bwananyina, na ku kutemwa aba bwananyina lundeniko ukutemwa.”—2 Petro 1:5-7.

⁴ Imibele imo na imo iyo Petro alandapo yalicindama, kabili tapali ifwile ukushalako. Asosa no kuti: “Ifintu ifi nga fyaba muli imwe no kufulisha, kuti fyamucita abapilikita, kabili abatwale fisabo mu kwishiba Shikulwifwe Yesu Kristu.” (2 Petro 1:8) Lekeni tulande sana pa fyo twingalunda bukapepa ku kushipikisha kwesu.

Ukushipikisha Kulakabilwa

5. Mulandu nshi tukabila ukushipikisha?

⁵ Petro na Paulo bonse baikatanya bukapepa no kushipikisha. (1 Timote 6:11, NW) Ukushipikisha te kukosa fye ilyo tuli na mafya no kutwalilila uwashangila. Kwabamo no kutekanya, ubukose, ukukoselela, ukukanapelelwa ilyo twaba ne fya kwesha, ifipindami, amatunko, nelyo ilyo tulepakaswa. Apo twikala “umwabela bukapepa muli Kristu Yesu,” twenekela ukuti tukapakaswa. (2 Timote 3:12) Tufwile ukushipikisha nga tulefwaya ukushininkisha ifyo twatemwa Yehova no kulundulula imibele ikabilwa pa kupusuka. (Abena Roma 5:3-5; 2 Timote 4:7, 8; Yakobo 1:3, 4, 12) Ukwabula ukushipikisha, tatwakakwate umweo wa muyayaya.—Abena Roma 2:6, 7; AbaHebere 10:36.

6. Ukushipikisha ukufika ku mpela e kutila kucita nshi?

 ⁶ Te mulandu no kutendeka bwino, icipendwa kwi pele pele kushipikisha. Yesu atile: “Uwashipikisha ukufika ku mpela, wene akapusuka.” (Mateo 24:13) Cine cine, tufwile ukushipikisha ukufika ku mpela, atemwa impela ya buno bumi bwesu nelyo impela ya buno bwikashi bubifi. Te mulandu ni mpela ya musango nshi, tufwile ukutwalilila na bumpomfu bwesu kuli Lesa. Lelo, nga tatulundileko bukapepa ku kushipikisha kwesu, te kuti tutemune Yehova, kabili tatwakakwate mweo wa muyayaya. Lelo bushe bukapepa cinshi?

Cintu Bukapepa Bwaba

7. Bushe bukapepa cinshi, kabili cinshi butucincisha ukucita?

⁷ Bukapepa bwaba kucindikisha, ukupepa, no kubombela Yehova Lesa pa mulandu wa bucishinka kuli bumulopwe bwakwe ubwa mu kubumbwa konse. Pa kuti tucite umwabela bukapepa kuli Yehova, tukabila ukumwishiba bwino bwino no kwishiba imibele yakwe. Tulingile ukufwaya ukwishiba Lesa pa lwakwe, ukumwishibisha. Ici cikatulenga ukumutemwa ukufuma ku mutima, ico cikamonekela ku micitile yesu ne mikalile. Tufwile ukwesha na maka ukupala Yehova—ukupashanya inshila shakwe no kulanga imibele yakwe no buntu bwakwe. (Abena Efese 5:1) Cine cine, bukapepa butucincisha ukufwaya ukutemuna Lesa muli fyonse tucita.—1 Abena Korinti 10:31.

8. Bushe bukapepa no kupepa Lesa eka fye fyayampana shani?

⁸ Pa kuti tulecita umwabela bukapepa, tufwile ukupepa Yehova eka fye, ukukanaleka icili conse ukupyana pa cifulo cakwe mu mitima yesu. Apo e Kabumba wesu, e wawamina ukupepa eka fye. (Amalango 4:24; Esaya 42:8) Lelo, Yehova tatupatikisha ukumupepa. Afwaya tuleitemenwa fye ukuipeelesha kuli wene. Ukutemwa twatemwa Lesa, ukushintilila pa kumwishiba bwino bwino, e kulenga ukuti tusangulule imikalile yesu no kuipeela kuli wene ukwabula ifya kupindikapo e lyo no kwikala ukulingana no ko kuipeela.

Lundululeni Bucibusa na Lesa

9, 10. Kuti twacita shani pa kulundulula bucibusa bwa pa mutima na Lesa no kutwalilila na bo?

⁹ Pa numa ya kulanga ukuipeela kwesu kuli Lesa mu lubatisho, tulekabila ukutwalilila bucibusa bwa pa mutima na wene. Kanshi ukufwaya ukucite fi no kubombela Yehova no busumino kutulenga ukutwalilila ukusambilila Icebo cakwe no kwetetulapo. Ilyo tuleleka umupashi wa kwa Lesa ukubomba mu mintontonkanya yesu ne mitima, e lyo tucilamo ukutemwa Yehova. Bucibusa bwesu na wene butwalilila ukuba e cacindamisha mu bumi bwesu. Tumona Yehova nge Cibusa ca pa mutima kabili tufwaya ukumutemuna inshita shonse. (1 Yohane 5:3) Ukubekelwa kwesu muli bucibusa bwawamisha na Lesa kulakula, kabili tulatasha pa kuti alatufunda mu kutemwa no kutulungika apo cakabilwa.—Amalango 8:5.

¹⁰ Bucibusa bwesu ubwa mutengo na Yehova kuti bwashibantukila, kano nga lyonse tulebombelapo ku kubukosha. Nga bwashibantukila, teti ube mulandu wa kwa Lesa, pantu wena “taba kutali kuli ifwe bonse.” (Imilimo 17:27) Ifyo citusansamusha ukwishiba ukuti Yehova talenga catukosela ukumupalama! (1 Yohane 5:14, 15) Lelo kwena, tulingile ukutukuta ukusungilila bucibusa bwa pa mutima na Yehova. Lelo, alatwafwa ukupalama kuli wene ukupitila mu kutupeela ifyo tukabila fyonse pa kulundulula no kutwalilila ukuba na bukapepa. (Yakobo 4:8) Kuti twacita shani pa kuti tubomfye umupwilapo ifyo atupeela?

Twalilileni Abakosa lwa ku Mupashi

11. Finshi fimo twingalangilako bukapepa bwesu?

¹¹ Ukutemwa kwalimba ne mishila muli ifwe uko twatemwa Lesa kuli no kutulenga ukulanga apo bukapepa bwesu bwapela, ukulingana no kufunda kwa kwa Paulo ukwa kuti: “Cincilo kuipeela kuli Lesa ngo wasuminishiwa, umubomfi uushingaba na ca kukwatilapo insoni, uulungiko kusose cebo ca Cine.” (2 Timote 2:15) Icifwaikwa pa kucite fi kutantika bwino isambililo lya Baibolo lyonse,  ukusangwa ku kulongana, no kubombako mu butumikishi bwa mwi bala. Kuti twapalama kuli Yehova no kupitila mu ‘kulapepa no kukanaleka.’ (1 Abena Tesalonika 5:17) Ifi fintu e filanga bwino bukapepa bwesu. Nga twalekelesha cimo pali fi kuti twalwala lwa ku mupashi no kwingililwa mu kwanguka ku micenjelo ya kwa Satana.—1 Petro 5:8.

12. Kuti twacita shani pa kuti tucimfye ifya kwesha?

¹² Ukuba abakosa lwa ku mupashi no kulabomba na co cilatwafwa ukulolenkana ne fya kwesha ifituponena. Ifya kwesha kuti fyafuma ku fintu ifingatwesha icine cine. Ukushangwako, ukukaanya, no kupakaswa kuti fyalenga cakosa sana ukushipikisha nga fyafuma ku ba mu ng’anda, balupwa, nelyo abanensu. Ku ncito nelyo ku sukulu kuti kwaba ukutitikisha kwa mucenjelo ukwa kulenga twasuusuka ku fishinte fyesu ifya Bwina Kristu. Ukufuupulwa, ukulwala, no kupopomenwa kuti fyatembaula imibili yesu no kulenga citukosele ukushipikisha ifya kwesha icitetekelo. Lelo kuti twacimfya ifya kwesha nga twakoselela “mu mibele ya mushilo kabili iya bukapepa, abalolela no kufulukisho kwisa kwa Bushiku bwa kwa Lesa.” (2 Petro 3:11, 12) Kabili kuti twatwalilila aba buseko mu kucite fyo, no kucetekela ukuti Lesa akatupaala.—Amapinda 10:22.

13. Cinshi tufwile ukucita nga tulefwaya ukutwalilila ukucita umwabela bukapepa?

¹³ Nangula Satana atonta sana pa bafwaya ukucito mwabela bukapepa, tatufwile ukutiina. Mulandu nshi? Pantu “Shikulu aishibo kupokolola bakapepa ku ca kwesha.” (2 Petro 2:9) Pa kuti tushipikishe ifya kwesha no kupokololwa, tufwile “[ukukaana] ukubulapepa ne fya lunkumbwa fya pano isonde, kabili tube no mweo wa kutekanya, kabili uwa bulungami, kabili umwabela bukapepa mu bwikashi buno bwa nomba.” (Tito 2:12) Apo tuli Bena Kristu, tufwile ukuibaka epali ubunake bwa lunkumbwa lwa mubili ne micitile fyaingilila bukapepa bwesu no kubonaula. Lekeni nomba tulandepo fimo fimo ifingonaula bukapepa.

Cenjeleni ku Fingonaula Bukapepa

14. Cinshi tulingile ukwibukisha ilyo twabelelekwa ku citeyo ca kutemwe fikwatwa?

¹⁴Ukutemwe fikwatwa citeyo ku bengi. Napamo kuti twalaibepa no kuibepa, “pa kutila bukapepa ca kunonkelamo [ifikwatwa].” Ico kuti calenga twapama no kupama twalashukila bubi bubi ukucetekela abasumina banensu batucetekela. (1 Timote 6:5) Napamo kuti twaluba no kutontonkanya ukuti caliba fye bwino ukupatikisha Umwina Kristu wa cuma ukutukongwesha ifyo napamo tushakabweshe na kubwesha. (Amalumbo 37:21) Lelo ni bukapepa e bwaba ne “cilayo ku bwikashi bwa nomba no bukesa,” te kunonka ifikwatwa fya ku mubili iyo. (1 Timote 4:8) Apo “tatwaletele kantu pa kwisa pano isonde, kabili tatwingafumyapo kantu,” lekeni tupampamine pa kukonkelela “bukapepa pamo no kuteko mutima” no kuleka ‘tuteke mitima pa kuba ne fya kulya ne fya kufwala.’—1 Timote 6:6-11.

15. Cinshi twingacita nga ca kuti cilemoneka kwati ukukonkelela umusamwe kwalafimbilisha bukapepa bwesu?

¹⁵Ukukonkelela umusamwe kuti kwafimbilisha bukapepa. Bushe napamo tulekabila ukuteuluka  nomba line muli fi? Ca cine, mwalibako ubunonshi mu kutukusho mubili no kukokoloka. Lelo ubo bunonshi bunono nga kubulinganya ku mweo wa muyayaya. (1 Yohane 2:25) Ilelo, abengi “batemwo kwangala ukucisho kutemwa Lesa; abantu abakwate mimonekele ya bukapepa, lelo abakaana amaka ya buko,” kabili tulekabila ukutaluka ku bantu ba musango yo. (2 Timote 3:4, 5) Abo abakoselela sana kuli bukapepa “[baitutilile] fyuma fisuma ifya bwikashi ubukesa, ukuti bekate ku mweo uwabo mweo wine wine.”—1 Timote 6:19.

16. Lunkumbwa nshi ulwa lubembu lulenga bamo ukufilwa ukwikala umwabela ififwaya Lesa ifyalungama, kabili kuti twacimfya shani ulu lunkumbwa?

¹⁶Ifya kunwa fikola no kubomfya bubi bubi imiti, bucisenene, no lunkumbwa lwa lubembu kuti fyaonaula bukapepa bwesu. Nga twanakila ku kucite fi ninshi teti twikale umwabela ififwaya Lesa ifyalungama. (1 Abena Korinti 6:9, 10; 2 Abena Korinti 7:1) Nangu fye ni Paulo aleshomboka lyonse no mubili wakwe uwa lubembu. (Abena Roma 7:21-25) Cikabila ukucita ukubombesha pa kufumyapo ulunkumbwa lwa fyalubana. Ica kubalilapo, tufwile ukufwaya sana ukutwalilila ne mibele yasanguluka. Paulo atweba ati: “Mulenge fifwe ifya filundwa fyenu ifya pano nse: ubulalelale, ukukowela, umufimbila, ulwinso, bucilende, ulunkumbwa (e kupepo tulubi).” (Abena Kolose 3:5) Pa kwipaya ifilundwa fyesu ifya mubili ukukuma ku membu sha musango yo kano pali umupampamina wa kufifumyapo, ukufilofya. Ipepo lya mukoosha ilya kulomba ukwafwa kwa kwa Lesa e likalenga ukukaana ulunkumbwa no kukonkelela ubulungami na bukapepa muli buno bwikashi bubifi.

17. Tufwile ukumona shani ukusalapula?

¹⁷Ukufuupulwa kuti kwanasha ukushipikisha kwesu no konaula bukapepa bwesu. Ababomfi ba kwa Yehova abengi balifuupulwapo. (Impendwa 11:11-15; Esra 4:4; Yona 4:3) Ukufuupulwa kuti kwatubongolola sana maka maka nga pali no kufiitwa pa mulandu wa kukalifiwa nelyo ukwebaulwa atemwa ukusalapulwa. Lelo, ukwebaula no kusalapula bushininkisho bwa kuti Lesa alitwangwako mu kutemwa. (AbaHebere 12:5-7, 10, 11) Ukusalapula takufwile fye ukumonwa ngo kulimunwa lelo kufwile ukumonwa nge nshila ya kutukanshishamo ukulola ku bulungami. Nga twaicefya, tuli no kutasha no kupokelela ukufunda, ukwishiba ukuti “ukwebaula kwa kusalapula ni nshila ya ku mweo.” (Amapinda 6:23) Ici kuti catwafwa ukulunduluka bwino mu fya ku mupashi mu kukonkelela bukapepa.

18. Mulimo nshi twakwata ukukuma ku filubo ficitwa kuli ifwe?

¹⁸Ukukanaumfwana ne fyo batukalifya kuti  fyaba busanso kuli bukapepa bwesu. Kuti fyaleta amasakamika nelyo ukulenga bamo ukutampa ukuitalusha kuli bamunyinabo ba Bwina Kristu na bankashi ukwabula ukupelulula bwino bwino. (Amapinda 18:1) Lelo tulingile ukwibukisha ukuti ukufiitwa nelyo ukwenda ne cikonko ku mukoshi kuti fyaonaula bucibusa bwesu na Yehova. (Ubwina Lebi 19:18) Na kuba, “uushatemwa munyina uo amona, te kuti atemwe Lesa uo ashamona.” (1 Yohane 4:20) Mu Lyashi lyakwe ilya pa Lupili, Yesu akomaile pa kubombelapo mu kwangufyanya ku kupikulula amafya tukwata na bambi. Aebele bakoomfwa wakwe ati: “E ico nga watwale ca bupe cobe pa ciipailo, no kwibukisha palya ukuti munonko ali na kantu kuli iwe, leke ca bupe cobe ku cinso ca ciipailo, kabili uye, ubale uwikishanye no mubiyo, e lyo wise no kutuule ca bupe cobe.” (Mateo 5:23, 24) Ukulombo bwelelo kuti kwayafwako ukucefyako ubukali bwalengelwe na mashiwi yabipa. Bucibusa kuti bwawamishiwa no mutende ukubwela nga ca kuti twalombo bwelelo no kusumina ukuti twalilufyenye. Yesu alifundile na fimbi pa fya kubomba na mafya. (Mateo 18:15-17) Tulasekelela sana ilyo twatunguluka mu kupikulula amafya!—Abena Roma 12:18; Abena Efese 4:26, 27.

Konkeni Ica Kumwenako ca kwa Yesu

19. Mulandu nshi cacindamina nga nshi ukupashanya ica kumwenako ca kwa Yesu?

¹⁹ Ifya kwesha fyena fikatuponena, lelo tafifwile ukutupaasula ku lubilo lwa kuya ku mweo wa muyayaya. Ibukisheni ukuti Yehova kuti atupokolola ku ca kwesha. Ilyo ‘tulefuule cifinine conse’ no ‘kubutuka no mukoosha ulubilo ulwabikilwa ifwe,’ lekeni “[tutonte] amenso kuli Yesu, kelenganya kabili kawaminisha wa citetekelo cesu.” (AbaHebere 12:1-3) Ukubebetesha ica kumwenako ca kwa Yesu no kutukuta ukumupashanya mu misosele ne micitile kukatwafwa ukulundulula bukapepa no kucishamo ukubulanga.

20. Filambu nshi fifuma mu kukonkelela ukushipikisha na bukapepa?

²⁰ Ukushipikisha na bukapepa fyendela pamo mu kwikasha ipusukilo lyesu. Nga tulelanga iyi mibele yaumo mutengo, kuti twatwalilila aba busumino mu kubombela Lesa umulimo washila. Na lintu tuleeshiwa, tukaba aba nsansa ilyo tuleumfwa icitemwishi ca kwa Yehova ne paalo pantu twalishipikisha kabili tulecita umwabela bukapepa. (Yakobo 5:11) Kabinge, Yesu umwine atulaya ati: “Mu kushipikisha kwenu e mo mukamwene myeo yenu.”—Luka 21:19.

Kuti Mwayasuka Shani?

• Mulandu nshi ukushipikisha kwacindamina?

• Bukapepa cinshi, kabili bulangwa shani?

• Kuti twalundulula shani bucibusa bwa pa mutima na Lesa kabili kuti twacita shani pa kutwalilila no bo bucibusa?

• Fintu nshi fimo ifingonaula bukapepa bwesu, kabili kuti twafisengauka shani?

[Amepusho]

[Ifikope pe bula 12, 13]

Bukapepa bulangwa mu nshila ishingi

[Ifikope pe bula 14]

Cenjeleni ku fingonaula bukapepa bwenu