“Iseni Kuli Ine, . . . na Ine Nalamupeelo Kutusha”

“Tubombe Icisuma Kuli Bonse”

UKUSHIMIKILA no kusambilisha imbila nsuma ya Bufumu bwa kwa Lesa e mulimo ukalamba uo Yesu abombele. (Marko 1:14; Luka 8:1) Apo abasambi ba kwa Kristu bafwaya ukumupashanya, bamona umulimo wa kusambilisha ubukombe bwa mu Baibolo pa lwa Bufumu bwa kwa Lesa ukuba umulimo wa ntanshi mu bumi bwabo. (Luka 6:40) Inte sha kwa Yehova balasekelela ukumona uko ubukombe bwa Bufumu bulenga ababupokelela ukutuusha umuyayaya—nga fintu fye bwalengele na bambi ukutuusha ilyo Yesu ali pe sonde.—Mateo 11:28-30.

Yesu alesambilisha Icebo ca kwa Lesa, kabili alibombele ne milimo imbi iisuma, pamo nga ukuundapa abalwele no kupeela abali ne nsala ifya kulya. (Mateo 14:14-21) E fyo ne Nte sha kwa Yehova bacita, balabomba umulimo wa kusambilisha Baibolo ne milimo imbi iya kwafwilisha abantu mu fyo balekabila. Na kuba, Amalembo yapangasha Abena Kristu “ku kubombo mulimo onse usuma” kabili yabakonkomesha ukucita “icisuma kuli bonse.”—2 Timote 3:16, 17; Abena Galatia 6:10.

“Bamunyinefwe E ko Baali”

Mu September 1999, icalo ca Taiwani calitenshiwe ku cinkukuma cikalamba. Papitile fye imyeshi inono, imfula ya citalawe na menshi makasa fyaletele ubonaushi bwabipisha mu Venezuela. Tapakokwele apo ilyeshi lyabunshishe icalo ca Mozambique. Muli ifi fyalo fyonse fitatu, Inte sha kwa Yehova balile bwangu bwangu mu ncende shaponenwe na masanso ninshi nabasenda ne fya kulya, amenshi, umuti, ifya kufwala, amatenti, ne fya kwipikilamo abasanshilwe. Abaishiba ifya cipatala aba kuitemenwa bapangileko ifipatala fya pa nshita inono ku kundapilamo abacenekwe, kabili bakabomba ba kuitemenwa aba makuule bakuulile amayanda ya bantu abo amayanda yabo yabongolweke.

Abasanshilwe balitemenwe sana pa kwafwa bapokelele pa nshita yalinga. Malyori, uo ing’anda yakwe yaonawilwe ku menshi makasa mu Venezuela, atile, “ilyo twapelelelwe sana, bamunyina balishile.” Pa numa bakabomba ba kuitemenwa bakuulile ulupwa lwakwe ing’anda ipya, Malyori alipapile  no kusosa ati: “Tatwishibe ne fyo twingatasha Yehova pali fyonse ifyo atucitila!” Kabili ilyo abaponenwe ne lyeshi mu Mozambique bapokele amakii ya mu mayanda yabo ayapya, ibumba lyonse apo pene lyatendeke ukwimba ulwimbo lwa Bufumu ulutila “Yehova E Cubo Cesu.” *

Ukwafwilisha abalekabila kwalisansamwishe na bakabomba ba kuitemenwa. Ba Marcelo, abali ni banasi mu nkambi ya mbutushi mu Mozambique, batile: “Nali ne nsansa ukwafwilisha aba bamunyinane abaculile nga nshi.” Ba Huang, bakabomba ba kuitemenwa mu Taiwan, batile: “Nali ne nsansa ishingi ukutwalako ifya kulya na matenti kuli bamunyinefwe abalekabila ifi fintu. Icitetekelo candi calikoseleko.”

Umulimo wa Kuitemenwa Uuleta Ifisuma

Umulimo wa kuitemenwa na kabili walyafwilishe lwa ku mupashi imintapendwa ya bafungwa mu calo conse. Mu nshila nshi? Mu myaka ya nomba line, Inte sha kwa Yehova baliteyanya impapulo shilanda pa fya mu Baibolo ku bantu 30,000 ababa mu fifungo nalimo 4,000 ifya mu United States mweka. Kabili, uko bashikaanya, Inte sha kwa Yehova balaya mu kutandalila ififungo ku kusambilila Baibolo na bafungwa no kutungulula ukulongana kwa Bwina Kristu. Bushe abafungwa balamwenamo?

Abafungwa bamo abasambilila Baibolo batendeka ukwebako abafungwa banabo amafundisho yasuma ayaba mu Cebo ca kwa Lesa. E co, mu fifungo ifingi mu calo conse muli amabumba ya bafungwa abapepela Yehova capamo. Umufungwa umo uwa mu Oregon, ku United States of America, mu 2001, atile: “Ibumba lyesu lilekulilako, tukwete bakasabankanya ba Bufumu 7 kabili tuletungulula amasambililo ya Baibolo 38. Abantu ukucila pali 25 balasangwa ku lyashi lya ku cintubwingi ne sambililo lya Ulupungu lwa kwa Kalinda, kabili abasangilwe ku Cibukisho [ca mfwa ya kwa Kristu] bali 39. Na bambi batatu bali no kubatishiwa nomba line!”

Ifyo Tumwenamo E lyo ne Fitusansamusha

Abalashi ba fifungo balimona ukuti uyu mulimo wa bakabomba ba kuitemenwa ulabomba bwino. Ico abalashi bacifungo batemenwe sana fintu kuba ukumwenamo kushipwa muli uyu mulimo wa kuitemenwa. Ilyashi limo lyatile: “Mu myaka 10 iyo uyu mulimo wabomba, takwatala akuba umufungwa nelyo umo uwafuma mu cifungo uubwelelamo na kabili pa numa ya kubatishiwa no kuba Inte ya kwa Yehova—balapusanako ku mabumba ya bantu bambi ababwelela mu cifungo.” Pa mulandu wa fyatumbwike mu mulimo wa kuitemenwa uo baNte babomba, shimapepo wa pa cifungo mu Idaho alembele kalata ku maofeshi ya kalamba aya Nte sha kwa Yehova umo atile: “Nangu line nshasumina ifyo mwasuminamo, nalitemwa ukuteyanya kwenu.”

Kabili ukwafwa ababa mu cifungo kulalambula bakabomba ba kuitemenwa. Pa numa ya kutungulula ukulongana kwi bumba lya bafungwa abaimbile ulwimbo lwa Bufumu pa muku wa kubalilapo, kabomba wa kuitemenwa alembele ati: “Nalikoseleshiwe pa kumona abaume 28 baleimbila Yehova amalumbo. Kabili balepongomoka pa kwimba! Mwandi lyali lishuko lyaibela ukusangwako pali iyi nshita!” Kabomba wa kuitemenwa uwatandalile ififungo fya ku Arizona, atile: “Mwandi lipaalo nga nshi ukubombako uyu mulimo waibela!”

Bakabomba ba kuitemenwa, baNte ababa mu calo conse balasuminishako amashiwi ya kwa Yesu, uwatile: “Ukupeela ce shuko ukucilo kupokelela.” (Imilimo 20:35) Na kabili bashininkishe ukuti ukuumfwila ukufunda kwa Baibolo ukwa kucita icisuma kuli bonse kulakosha nga nshi.—Amapinda 11:25.

[Futunoti]

[Icikope pe bula 8]

Venezuela

[Icikope pe bula 8]

Taiwan

[Icikope pe bula 8]

Mozambique