Ilyashi lya Bakabilisha ba Bufumu

‘Icebo ca kwa Lesa Caliluma’

ABANTU abengi pa cishi ca Caribbean ku Jamaica apo akasuba kabalika bwino, baliishiba Baibolo. Na kuba Baibolo wa King James Version, alasangwa mupepi na mu ng’anda yonse, na bantu bamo balishiba ukuti “Icebo ca kwa Lesa ca mweo, kabili caliluma.” (AbaHebere 4:12) Uku kuluma kuti kwayalula abantu, nge fyo ilyashi lyalakonkapo lilelangilila.

Inte ya kwa Yehova yatandalile umwaume we shina lya Cleveland ninshi e lyo afikile fye pa ng’anda ukufuma ku ncito. Pa numa yakulanshanya nankwe ifyebo fimo mu Malembo, Nte amushilile citabo ca kumwafwa ukusambilila Baibolo ica Ukwishiba Uko Kutungulula ku Mweo wa Muyayaya. Cleveland taakutulwike ifyo Icebo ca kwa Lesa cali no kuluma mu bumi bwakwe.

Cleveland alepepa imiku itatu cila bushiku, ukulomba Lesa ukumwafwa ukusanga inshila yalungama iya kupepelamo Wene. Cleveland alishininkishe ukuti abafyashi bakwe tabalepepa mu nshila yalungama, lelo, pa numa ya kubebeta imipepele imbi, taikushiwe. Nangu line alyumfwile ulwa Nte sha kwa Yehova, aletwishika nga balikwete icine. Te mulandu no kutwishika kwakwe, Cleveland asumine ukulasambilila Baibolo na Nte wamutandalile. Mulandu nshi? Pantu alefwaya ukushinina baNte ukuti baliluba!

Tapakokwele Cleveland asambilile ukuti imyendele yakwe iya bucisenene na banakashi babili tayalesekesha Lesa. (1 Abena Korinti 6:9, 10) Pa numa ya kusambilila fye imiku ibili, alishipile no kupwisha bucibusa bwakwe na balya banakashi. Atendeke no kusangwa ku kulongana ku Ng’anda ya Bufumu. Lelo, ubu na bo bwali bwesho.

Cleveland aleteya sana umupila mwi bumba lyali mu ncende aleikala, kabili ubu bwangalo bwalemupumfyanya ukusangwa ku kulongana. Cinshi ali no kucita? Te mulandu no kupatikisha kwa bakateya wa mupila banankwe no mukalamba we bumba lyabo, e lyo ne fibusa, Cleveland apingwilepo ukuleka ukuteya umupila. Cine cine, Icebo ca kwa Lesa catendeke ukuluma, ukumucincisha ukucita ifingamunonsha!

Amaka ya Cebo ca kwa Lesa yalimoneke na kabili ilyo Cleveland atendeke ukwebako bambi pa fya mu Baibolo ifyo aishibe. (Imilimo 1:8) Ne ci calengele babili pa bo aleteya na bo umupila kale ukutendeka ukusangwa ku kulongana kwa Nte sha kwa Yehova. Ilyo Cleveland afikilepo ukuba kasabankanya wa mbila nsuma, alesanga insansa nga nshi mu mulimo wa kushimikila, alebomfya Icebo ca kwa Lesa ku kwafwa bambi.

Apo atwalilile ukucincishiwa ne Cebo ca kwa Lesa, Cleveland asukile alanga ukuipeela kwakwe kuli Yehova pa kubatishiwa mu menshi kabili alikwata ishuko lya kuba umutumikishi wa nshita yonse kabili umubomfi utumikila mu cilonganino abamo.

Mu Jamaica na mu calo conse, imintapendwa ya bantu balisambilila ukuti cine cine Icebo ca kwa Lesa “ca mweo, kabili caliluma.”

[Mapu ne Cikope pe bula 8]

(Nga mulefwaya ukumona mapu ne cikope, moneni muli magazini)

JAMAICA

[Abatusuminishe]

Mapu ne cibulungwa ce sonde: Mountain High Maps® Copyright © 1997 Digital Wisdom, Inc.