Aba Nsansa pa Mulandu wa Kusambilila Ukubelenga!

MU NCENDE shimo shimo isha fishi fya Solomon Islands, mupepi na bapesenti 80 aba Nte sha kwa Yehova baali no bwafya bwa kukanaishiba ukubelenga. Ici e calelenga ukwasukapo kwabo pa kulongana kwa cila mulungu ukuba ukwa patali patali fye e lyo kabili calelenga ubwafya bwa kusambilisha bambi icine ca Bufumu ukukoselako. Bushe cine cine abakalamba abashatala abekatapo na kalembelo kuti baishiba ukubelenga?

Akatabo ka mutwe wa kuti Sambilileni Ukubelenga no Kulemba, akalembwa ne Nte sha kwa Yehova, kalibomfiwa mu masukulu ya shibukeni mupepi fye na mu filonganino fyonse ifya Nte sha kwa Yehova ifya pa fishi fya Solomon Islands. Ifya kukumanya fyakonkapo filelanga ifyo abengi nga nshi bayafwiwa ukuwamyako ukulamuka kwabo ukupitila muli uyu programu. Icacilanapo ukucindama ca kuti, ukusambilila ukubelenga kwabalenga ukushimikila bwino pa citetekelo cabo.—1 Petro 3:15.

Mishonari uwaebelwe ukubombela mu cilonganino umwaba bakasabankanya ba Bufumu abacilile pali 100 amwene ukuti pa kusambilila Baibolo ukwa cila mulungu ukubomfya magazini wa Ulupungu lwa kwa Kalinda, banono fye balekwata bamagazini mu minwe e lyo nga ba kwasukapo bena ba ncepela fye. Mulandu nshi? Abengi tabaishibe kubelenga. Ilyo icilonganino cabilishe ukuti isukulu lya kusambilisha ukubelenga no kulemba nalipangwa, uyu mishonari aliitemenwe ukuba kafundisha. Pa kubalilapo, abaleisa baali fye aba kupenda, lelo mu kuya kwa nshita abacilile pali 40 aba mishinku yonse balesangwako.

Finshi fyafuminemo? Mishonari ashimiko kuti: “Bwangu bwangu fye pa numa ya kutendeka shibukeni, naile ku maliketi pa 6:00 hrs ulucelo ku kushita ifya kulya fya bamishonari. Kulya namweneko abasambi ba shibukeni bamo ukusanshako fye na baice sana, baleshitisha ingashi no musalu. Nga cinshi? Ni co balefwaya ukusanga  indalama sha kushitamo bopeni ne buuku ifya kubomfya mwi sukulu lya shibukeni! Kabili, ukusangwa kuli shibukeni kwalebacincisha ukulaikwatila magazini wa Ulupungu lwa kwa Kalinda.” Kabili atila: “Nomba pe Sambililo lya Ulupungu lwa kwa Kalinda mu cilonganino, abaice kumo na bakalamba bonse balaasukapo, kabili isambililo lilaba ilyacincimuka.” Uyu mishonari alicililepo ukuba ne nsansa ilyo bane aba mwi sukulu lya shibukeni balombele ukuti na bo baleshimikilako ku cintubwingi pantu, nga fintu abene balondolwele abati, “tabali no mwenso na kabili.”

Ubusuma ubo isukulu lya shibukeni lileletela abasambi bwalicila pa kwishiba fye ukubelenga no kulemba. Ku ca kumwenako, pa myaka iingi muka Nte umo uushasumina alecusha sana icilonganino. Aletoba abantu amabwe nga bamukalifya fye panono kabili alebobaula na banakashi banankwe kwi pulanga. Ilyo atila kankonke abalume ku kulongana kwa Bwina Kristu limo limo, alemufubila nga nshi ica kuti umulume apingwilepo ukulafwala amakalashi yafiita pa kuti umukashi etila alelolesha abanakashi bambi.

Lelo bwangu bwangu fye ilyo shibukeni yatendeke, uyu mwanakashi aipwishe mu kantepentepe ati: “Bushe na ine kuti nalembeshako?” Alisuminishiwe. Ukutule lyo tabalile apuswa kuli shibukeni nelyo ku kulongana kwa cilonganino. Alibombeshe sana mu masambililo yakwe aya kusambilila ukubelenga kabili alilundulwike icipesha amano, ne ci camulengele ukuba ne nsansa nga nshi. Icakonkelepo alombele ati: “Bushe na ine teti ndesambililako Baibolo?” Mu nsansa umulume atendeke ukusambilila na wene, kabili alitwalilila ukulunduluka mu mibelengele yakwe na mu milembele na mu kwishiba kwakwe ukwa Baibolo.

Umuntu uwa myaka 50 uushabala ekatapo akalembelo, ukwikata fye bopeni ku kulemba ifilembo ifya muli alufabeti kuti kwaba mulimo uwakosa icine cine. Bamo balaba ne fitusha mu minwe pa mulandu wa kutitikisha pensulo pe pepala mu fiputulwa fyabo ifya kubalilapo ilyo balesambilila. Pa numa ya kushomboka ne fya kwikata no kubomfya pensulo, abasambi bamo balamwentula nga nshi pa kusoso kuti: “Pali ino nshita pa kulemba nkumyapo fye pe pepala!” Ukumona ukulunduluka kwa basambi kulalenga na bakafundisha ukusekelela. Kafundisha umo atile: “Ukusambilisha shibukeni kulaleta insansa, kabili abasambi balatasha Yehova nga nshi pali ili sukulu ilingi line ukupitila mu kutoota pa mpela ya kusambilila kumo kumo.”

Ishi Nte ishaishiba ukubelenga nomba shilesekelela pamo na bamishonari. Mulandu nshi? Pantu nomba kuti babomfya ukulamuka kwabo ukwa kubelenga no kulemba ku kucindika Yehova.

[Ifikope pe bula 8, 9]

Abaice na bakalamba kumo balatasha pe sukulu lya shibukeni