Bushe Mukasunga Bumpomfu Bwenu?

NI NSEBA shinga shafwile mailo? Takuli uwishibe, kabili nalimo banono fye bangwako. Kwaba ifyuni ifingi. Na lyo line, Yehova alafisakamana. Ilyo Yesu alelanda pa lwa ifi fyuni ifimoneka kwati tafyacindama, aebele abasambi bakwe ati: “Nangu lumo pali isho te kuti lupone pa nshi ukwabula Shinwe ukusuminisha.” Kabili atile: “Mwitiina; imwe umutengo mwacilamo apakalamba ku nseba.”—Mateo 10:29, 31.

Limbi limbi fye e lyo abasambi baumfwikishe ifyo Yehova abacindamike. Umutumwa umo, uyu ni Yohane, alembele ukuti: “Muli ici e mwasokolwelwo kutemwa kwa kwa Lesa muli ifwe, mu kuti Lesa natuma Mwane uwafyalwa eka ukuti ese pano isonde, ukuti tube no mweo muli wene.” (1 Yohane 4:9) Yehova aliteyanya icilubula kabili alilaya ababomfi bakwe bonse ukuti: “Nshakakupoose nakalya, nangu kukusha nakalya.”—AbaHebere 13:5.

Ukwabula ukutwishika, ukutemwa Yehova atemwa abantu bakwe kuntu kwakosa. Na lyo line, kuti kwaba icipusho ca kuti, ‘Bushe twaba ku lubali lwa kwa Yehova ica kuti teti tufumeko?’

Ukwesha kwa kwa Satana ku Konaula Bumpomfu Bwesu

Ilyo Yehova alandile kuli Satana pa lwa bumpomfu bwa kwa Yobo, Satana ayaswike ati: “Bushe Yobo atiinina Lesa apa fye?” (Yobo 1:9) Atungile ukuti abantu te kuti babe na bucishinka kuli Lesa kano ‘bapeelwa ifintu fimo.’ Aya mashiwi nga ya cine, ninshi bumpomfu bwa Mwina Kristu onse kuti bwapwa—kulila fye bamupeela icingamukubulo mutima sana.

Kuli Yobo, Satana pa kubala atungile ukuti bucishinka bwa kwa Yobo kuli Lesa kuti bwapwa nga ca kutila ifikwatwa atemenwe sana fyaloba. (Yobo 1:10, 11) Ilyo aya mashiwi ya musalula yaishibikwe ukuti bufi, Satana atungile ati: “Conse ico umuntu akwata kuti apeelela pa mweo wakwe.” (Yobo 2:4) Nangu line ukutunga kwa kwa Satana nalimo kuli bamo kuti kwaba kwa cine, Yobo alikeene ukuleka bumpomfu bwakwe. Ilyashi lya kale lishinina ukuti Yobo alisungile bumpomfu bwakwe. (Yobo 27:5; 42:10-17) Bushe na imwe mwaba na bucishinka bwa musango uyu? Nelyo bushe kuti mwaleka Satana ukonaula bumpomfu bwenu? Tontonkanyeni pali imwe mwe bene ilyo tuleceeceeta ifishinka fimo ifikumine onse Umwina Kristu.

Umutumwa Paulo alisumine ukuti bucishinka bwa Bwina Kristu kuti bwaba ubwakosa. Alembele ati: “Pantu ndesuubila, ndeti, nangu ni mfwa, nangu mweo . . . nangu fintu ifyabapo nangu fintu ifikesabako . . . nangu icibumbwa cimbi, te kuti cibe na maka ya kutupaatululako ku kutemwa kwa kwa Lesa ukwa muli Kristu Yesu Shikulwifwe.” (Abena Roma 8:38, 39) Na ifwe kuti twaba abashininwa nga ca kuti ukutemwa twatemwa Yehova kwalikosa. Ukutemwa kwa musango yo te kuti konaulwe kabili nangu fye ni mfwa te kuti ikucimfye.

Bucibusa bwesu na Lesa nga bwabe fi,  tatwakepushe ati, ‘Bushe nkatwalilila ukubombela Yehova mu myaka inono iileisa?’ Ukutwishika kwa musango yo kuti kwalanga ukuti bucishinka bwesu kuli Lesa bwashintilila pa fingacitika kuli ifwe ilyo tuli abomi. Ifya ku nse te kuti fyonaule bumpomfu bwine bwine. Bumpomfu bushintilila pa buntu bwesu ubwa mu kati. (2 Abena Korinti 4:16-18) Nga twalitemwa Yehova no mutima wesu onse, tatwakamulenge nsoni.—Mateo 22:37; 1 Abena Korinti 13:8.

Na lyo line, tufwile ukwibukisha ukuti, Satana lyonse afwaya ukonaula bumpomfu bwesu. Kuti atutunka ukunakila ku lunkumbwa lwa mubili, ukunakila ku mupatikisha wa fibusa, nelyo ukuleka ubwafya bumo bwatulenga ukusha icine. Icalo canunuka kuli Lesa cibombela pamo na Satana muli uku kusansa, nangu ca kutila ukukanapwililika kwesu kulenga camwangukila ukonaula bumpomfu bwesu. (Abena Roma 7:19, 20; 1 Yohane 2:16) Na lyo line, twalikwata amashuko ayengi muli ubu bulwi, ishuko limo lyakukanaluba amapange ya kwa Satana.—2 Abena Korinti 2:11.

Bushe amapange ya kwa Satana finshi? Paulo ayalondolola muli kalata wakwe alembeele ku bena Efese ukuti “fya kubeleleka.” (Abena Efese 6:11) Satana abika ifya kubeleleka mu nshila yesu pa kuti engonaula bumpomfu bwesu. Ico tutasha ca kuti, tuleshiba ifi fya kubeleleka, apo inshila Kaseebanya abomfya shalilembwa mu Cebo ca kwa Lesa. Ukwesha kwa kwa Satana ukwa kufwaya ukonaula bumpomfu bwa kwa Yesu na Yobo kulanga inshila shimo isho afwaya ukubomfya pa kuti engonaula bumpomfu bwa Bwina Kristu.

Bumpomfu bwa kwa Yesu Tabwaonawilwe

Pa kutendeka kwa butumikishi bwa kwa Yesu, Satana alipamine pa kutunka Mwana Lesa no kumusonsomba ukuti asangule amabwe ukuba umukate. Mwandi kwali kubeleleka! Yesu alikeele inshiku 40 ukwabula ukulya, e co ukwabula ukutwishika ali ne nsala. (Luka 4:2, 3) Satana atubulwile ukuti Yesu kuti aikusha insala ya cifyalilwa mu kwangufyanya, ukubomfya inshila yapusana no kufwaya kwa kwa Yehova. Na lelo line e fyo caba, abakubanya ifyebo mu calo bakoselesha ukwikushiwa apo pene fye, ukwabula no kutontonkanya pa fingatumbukamo. Batila, ‘Ufwile ukukwata ici ili line fye,’ nelyo ati, ‘Cita ico ulefwaya!’

Yesu ekusha ukukalipwa ku nsala ukwabula no kulanguluka ifyali no kutumbukamo, Satana nga amulengele ukonaula bumpomfu bwakwe. Yesu amwene uyu mulandu mu nshila yali no kusekesha Yehova, kabili mu kushipa ayaswike ati: “Calembwa, aciti, Umuntu te kuti ekale no mweo ku ca kulya ceka iyo.”—Luka 4:4; Mateo 4:4.

Lyena Satana abomfeshe inshila imbi. Kaseebanya apotongenye Amalembo ayo Yesu aleyambula no kukoselesha Yesu ukuipoosa pa nshi ukufuma pa muulu wa cibumba ce tempele. Satana atile, ‘Malaika akakulamisha.’ Yesu tatontonkenye pa kweba Wishi ukuti amusakamane no kumucingilila mu cipesha amano.  Yesu atile, “Wilaesha Sokulu Lesa obe.”—Mateo 4:5-7; Luka 4:9-12.

Inshila ya kulekelesha iyo Satana abomfeshe yali ya kulungatika nga nshi. Aeseshe ukupangana na Yesu ukuti nga amupepako fye umuku umo ena alamupeele sonde lyonse no bukata bwabamo. Satana atambike fyonse. Lelo bushe Yesu kuti apepa shani umulwani mukalamba uwa kwa Wishi? Yesu tatontonkenye ulwa kucita ica musango yu! Yesu ayaswike ati, “Ulepepa Sokulu Lesa obe, kabili wene eka e o ulepyungila.”—Mateo 4:8-11; Luka 4:5-8.

Pa numa ya kufilwa miku itatu, Satana ‘afumine pali Yesu ikasuke aise nshita.’ (Luka 4:13) Ici cilelanga fye ukuti Satana lyonse alefwailisha apa kwesesha bumpomfu bwa kwa Yesu. Inshita yalishile pa numa ya myaka ibili na hafu ilyo Yesu atendeke ukwafwa abasambi bakwe pa fyo bali no kumona imfwa yakwe iyali mupepi. Umutumwa Petro atile: “Ifyo te fyo, mwe Shikulu, ici tacakamuponene.”—Mateo 16:21, 22.

Bushe Yesu amwene ukuti kulya kupanda amano ukwalemoneka kwati kusuma kwali fye bwino, apo kwafumine ku musambi wakwe? Bwangu bwangu Yesu ailwike ukuti kulya kulanda kwalangile ukutontonkanya kwa kwa Satana, te kwa kwa Yehova. Kristu mu kushipa atile: “Kabiye ku numa yandi, we Satana: uli ca kupunwisha kuli ine; pa kuti tauleangwe fya kwa Lesa, kano ifya bantu.”—Mateo 16:23.

Apo Yesu lyonse alitemenwe Yehova, Satana alifililwe ukonaula bumpomfu bwakwe. Conse ico Kaseebanya atambike, kumo no bwesho ubwabipisha, tafyanashishe bucishinka bwa kwa Yesu kuli Wishi wa ku muulu. Bushe na ifwe tukapingulapo ukucita cimo cine ilyo ifintu fyabipa fyalenga catwansha ukusunga bumpomfu bwesu? Ica kumwenako ca kwa Yobo calatwafwa ukumfwikisha amafya yakalamba ayo twingakwata.

Bucishinka pa Kushipikisha Ubwafya

Yobo asangile ukuti amafya kuti yatuponena inshita ili yonse. Alikwete icupo ca nsansa na bana 10 kabili aleyangwa bwino ne fya ku mupashi mu mikalile yakwe. (Yobo 1:5) Lelo, bumpomfu bwa kwa Yobo bwabalamwine ifikansa mu muulu ukwabula ukuti eshibe, kabili Satana apingwilepo ukonaula bumpomfu bwakwe mu nshila ili yonse.

Tapapitile na nshita, icuma Yobo akwete calipwile. (Yobo 1:14-17) Na lyo line, bumpomfu bwa kwa Yobo tabwapwile pantu tacetekele indalama. Ilyo Yobo aibukishe icuma akwete, atile: “Nga nacita golde ica kucetekelako candi, . . . nga nasamwa pantu cafule cuma candi, . . . ico na co mampuulu . . . pantu ninshi nabepa Lesa wa mu muulu.”—Yobo 31:24, 25, 28.

Na lelo line, kuti cacitika fyonse ifyo twakwata fyaloba pa nshita imo ine. Umo shimakwebo, Inte ya kwa Yehova baalimufinshishe indalama ishingi, ukumusha fye ne ndalama shinono sana. Mu bufumacumi asumina ukuti: “Kwashele fye panono nga nalilwele ubulwele bwa ku mutima. Kwena ambulaba cibusa wa kwa Lesa, nga nalilwele. Na lyo line, ici cacitike canengele ukwibusha icishinka ca kuti nshabikile intanshi ifya ku mupashi mu mikalile yandi. Naleumfwa bwino ukupanga indalama ica kuti nshaleangwa na ku fintu fimbi.” Ukutula lilya uyu Nte alicefyanyako amakwebo yakwe, kabili libili libili alabombako bupainiya bwa kwaafwilisha, ukubomba amaawala 50 no kucilapo cila mweshi mu butumikishi bwa Bwina Kristu. Kwena, amafya yamo, yalabipisha ukucila fye na pa kuloba kwa fikwatwa.

Yobo ali acili alekutika ku bukombe pa lwa kuloba kwa cuma cakwe lintu bamwebele ukuti abana bakwe 10 nabafwa. Talekele ukusosa ukuti: “libe ilyapaalwa ishina lya kwa Yehova.” (Yobo 1:18-21) Bushe kuti twaba na bumpomfu nga ca kuti mu kupumikisha balupwa besu abengi bafwa? Ba Francisco, bakangalila ba Bwina Kristu mu Spain, bafwililwe abana babo babili mu busanso bwa pa musebo. Balisansamushiwe pa kupalama kuli Yehova no kulundako umulimo wabo uwa butumikishi bwa Bwina Kristu.

Nangu fye ni pa numa ya kupelenganishiwa  ku mfwa ya bana bakwe, amacushi ya kwa Yobo tayapwile. Satana amupamine ku bulwele bwabipisha, ubwatapata. Pali ilya ine nshita umukashi wakwe amupandile amano yabipa. Amwebele ati, “Tukeni Lesa, no kufwa!” Yobo asulile ukupanda amano kwakwe, kabili “tabembwike ku milomo yakwe.” (Yobo 2:9, 10) Bumpomfu bwakwe bwashimpilwe pali bucibusa bwakwe na Yehova, te pa kutungililwa no lupwa lwakwe.

Ba Flora, abo abalume babo ne beli lyabo ilyaume bashile nshila ya Bwina Kristu ukucila pa myaka 10 iyapita, balyumfwikisha ifyo Yobo aculile. Batila, “Nga mu kupumikisha washala weka ukwabula no wa kukutungilila mu lupwa, cilaleta ubulanda. Lelo nalishibe ukuti takuli uko ningasanga insansa ukucila mu kuteyanya kwa kwa Yehova. E co nalikosele no kubika Yehova pa ntanshi ninshi uku ndeesha ukuba lyonse umukashi na nyina musuma. Nalepepa lyonse, kabili Yehova alinkoseshe. Ndi uwa nsansa pantu, nalisambilila ukucetekela umupwilapo pali Yehova, nangu line abalume bandi bapampamina pa kukaanya.”

Cimbi ico Satana abomfeshe ku konaula bumpomfu bwa kwa Yobo banankwe batatu. (Yobo 2:11-13) Afwile alishikitike nga nshi ilyo batendeke ukumulengulula. Omfwila ifyo balelanda, ukucetekela kwakwe muli Yehova Lesa nga kwalipwile. Ukufunda kwabo ukubi nga kwalimukalifye kabili nga kwaonawile na bumpomfu bwakwe bwine, na mapange ya kwa Satana nga yalibombele.

Lelo, Yobo akoselepo fye ati: “Nsuke ndeke umweo te kuti ndeke bumpomfu bwandi.” (Yobo 27:5) Tatile, ‘nshaleke imwe mwe baume ukonaula bumpomfu bwandi!’ Yobo alishibe ukuti bumpomfu bwakwe bwashintilile pa mwine e lyo no kutemwa atemenwe Yehova.

Ubwile bwa Kale Ubwa Kwikatilako Umupya

Na ndakai line Satana alabomfya ukufunda kubi nelyo amashiwi yabula amano ukufuma ku fibusa na basumina banensu. Ukufupulwa ku baba mu cilonganino mwine kuti mu kwanguka kwanasha ukucetekela kwesu ukucila ubwesho bufuma ku bashaba mu cilonganino. Eluda wa Bwina Kristu uwalwileko inkondo kale ilyo ali umushilika acilenye ilya nkondo ku bukali aculile pa mulandu wa mashiwi yabulamo amano ne micitile ya Bena Kristu banankwe bamo. Ukulanda pa lwa kukalifiwa ku Bena Kristu banensu, atila: “E cintu cabipisha pa fyo napitamo.”

Cimbi na co ca kutila, ukukanapwililika kwa basumina banensu kuti kwatukalifya ica kuti twaleka no kusosha bamo kabili twalapuswa na ku kulongana kwa Bwina Kristu. Nalimo ico twingalakabila sana kusansamushiwa pa filetukalifya. Lelo, kuti cabipa sana ukulatontonkanya ifyo no kulenga icikwatwa cesu icacindama sana—bucibusa bwesu na Yehova—ukunaka pa mulandu wa fyo bambi balecita nelyo ukulanda. Nga twasuminisha ica musango yo ukucitika, kuti twabelelekwa ku bwile bwa kale ubo Satana abomfya.

Ca cine, twenekela imibele isuma nga nshi mu cilonganino ca Bwina Kristu. Lelo nga twaenekela ifyacilamo kuli bakapepa banensu, abashapwililika, tukalengwa insoni. Yehova tenekela ifyacilamo ku babomfi bakwe. Nga twamupashanya, tukashipikisha ukukanapwililika kwabo. (Abena Efese 4:2, 32) Umutumwa Paulo apandile amano ukuti: “Kalipeni, lelo mwibembuka; mwileka kasuba kawe mucili no bukali, kabili mwipeela Kaseebanya apa kwikala.”—Abena Efese 4:26, 27.

Nga fintu Baibolo isambilisha bwino, Satana abomfya ifya kubeleleka fyalekanalekana pa kuti nga asanga apa konawila, engonaula bumpomfu bwa Bwina Kristu. Ubwile bwakwe bumo bulasonga umubili wa lubembu, bumbi buleta ukukalipwa. Ifyo twakolobondamo, kuti fyamwafwa ukukanapulikilwa fye. Lekeni ukutemwa mwatemwa Lesa ukwaba mu mitima yenu kulenge mupingulepo ukushinina Kaseebanya ukuti wa bufi, no kulenga umutima wa kwa Yehova ukusamwa. (Amapinda 27:11; Yohane 8:44) Muleibukisha ukuti bumpomfu bwa Bwina Kristu tabufwile ukunashiwa, nangu amesho ya musango shani yese pali ifwe.