“Bushe Namwishiba Ico Nabwesesha Indalama Shenu?”

BA NANA, abashimbe abali na bakalume batatu abekala mu citungu ca Kaspi mu calo ca Republic of Georgia balelanguluka abati: “Iye, ala ndakabila indalama nga nshi.” Bushiku bumo mu nshita ya lucelo basangile ico balekabila. Basangile indalama ya malari 300 mupepi na pa kapokola. Tapali nelyo umo. Ishi ndalama shali ishingi. Na kuba ba Nana tabatalile abamonapo ibula lya ndalama ya malari 100 mu myaka isano ukutula apo indalama ya lari yatendekele ukubomba. Bashimakwebo ba muli ilya ncende tabatalile abasangapo ilya ndalama pa numa ya kubomba imyaka iingi.

Ba Nana bapelulwile ukuti: ‘Cinshi ningamwenamo muli iyi ndalama nga ca kuti nshikwete icitetekelo candi, akatiina ka buLesa, na bumupashi?’ Balundulwile imibele ya Bwina Kristu, kabili balishipikishe ukupakasa kwabipisha no kupumwa pa mulandu wa cisumino cabo.

Ilyo baile ku kapokola, ba Nana bamwene bakapokola basano bali nga balefwayafwaya fimo. Balishibe ukuti balefwaya indalama, e co baile kuli bakapokola no kubepusha ati: “Bushe pali ifyo mulufishe?”

Bakapokola bayaswike ati, “Natulufya indalama.”

“Shinga?”

“300 lari!”

Ba Nana batile, “Ni ntola indalama shenu.” Lyena baipwishe ati: “Bushe namwishiba ico nabwesesha indalama?” Tabaishibe.

Batile, “pantu ndi Nte ya kwa Yehova. Nga te ine Nte nga nshibweseshe ndalama shenu.”

Umukalamba wa bakapokola uwalufishe shilya ndalama abulilepo indalama amalari 20 no kupeela ba Nana ku kubatasha pali bucishinka bwabo.

Mu kwangufyanya ilyashi lyalisabankene mu citungu conse ica Kaspi. Ubushiku bwakonkelepo, umwanakashi walebomba incito ya kuwamya pa kapokola aebele ba Nana ukuti: “[Umukalamba wa ba kapokola] lyonse alasunga impapulo shenu mu ofeshi yakwe. Nomba ifi nalimo alatemenwako impapulo shenu.” Kapokola umo asosele fye no kuti: “Abantu bonse nga bali ni Nte sha kwa Yehova, ni ani engaba intalamisoka?”