Icalo Icimwena Bucishinka Mumbi

BUSHIKU bumo icungulo pali Cisano ninshi nakukaba mu Tel Aviv, mu Israel, umulumendo aile pe bumba lya bacaice abalelolela pa nse ya kalabu. Tapapitile na nshita kwali icapuukile pe bumba.

Akapondo kambi kapuushishe ibomba no kuipaila pamo na bacaice bambi 19. Pa numa dokota aebele bakalemba ba malyashi ati: “Kwali ifilundwa fya mubili konse konse, bonse bali bacaice, abaice sana, ici cali cintu cakutiinya nga nshi ico nshabalile mona.”

Thurstan Brewin alembele mu lupapulo lwa The Lancet ati: “Imibele iyo abengi bakumbwa nga bucishinka . . . , e ingalenga sana inkondo ukutendeka no kwafya sana ukuipwisha.” Ca cine ukutendekela ku Nkondo Kristendomu alelwa ukufika ku kwipayaula kwateyanishiwe na baNazi Germany, ilyashi lya bantunse ilya kale lilanda sana pa kwipayaula kwacitwa pa mulandu wa bucishinka.

Ukubulwa Bucishinka Kulekuma Abengi

Ukwabula ukutwishika, bucishinka bwacila mu cipimo kuti bwaleta ubonaushi, lelo ukubulwa bucishinka na ko kuti kwaonaula ubwikashi. Icitabo ca Webster’s New Encyclopedic Dictionary citila, ukuba na bucishinka kwalola mu kuba no ‘busumino ku muntu nelyo ku cintu’ kabili “kusanshamo ukutwalilila ukukakatila ku co wasuminamo nangu utunkwe shani ukusuula nelyo ukufutuka ico cintu.” Nangu line abengi batila balakumbwa ubu bucishinka, mu bwikashi muli sana ukubulwa bucishinka nangu fye ni mu ndupwa umo bucishinka bwacindamisha sana. Abalelekana balefulilako, ne filelenga kufwaisha ukuisekesha, amasakamika na mafya ya mikalile, ne fifuma mu bucende bwanene. Kabili abacaice aba kaele ilingi balasanswa nga balya basanshilwe ilyo ibomba lyapuukile mu Tel Aviv.

Lipoti imo yatile: “Amasomo ya mwana ilingi yaba pa fipumfyanishiwa mu lupwa nga mwaba amafya yafuma mu kulekana, ukupaatukana, no kukushiwa ku mufyashi umo fye.” Cimoneka kwati bakalume maka maka abakushiwa na banyinabo fye abashimbe, balafilwa ukusambilila, balaipaya, no kucita imisoka icitwa na baice. Cila mwaka abana bonse pamo abo abafyashi balekana mu United States bafika kuli 1,000,000, kabili mu mwaka umo, citika wa bana abafyalwa ku bafyashi abaupana muli cilya calo, pa kuti bakumanye imyaka 18 ninshi abafyashi babo balilekana. Ifipendo filangilila ukuti ukulekana kulalungulusha na bacaice abengi mu ncende shimbi isha calo.

 Bushe Bucishinka Bwalicilamo Ica Kuti Umo Teti Afikepo?

Pali ndakai ukufilwa ukuba na bucishinka kulenga amashiwi ya Mfumu Davidi ukuba ayalinga sana pali lelo. Yatila: “Pususheni, mwe Yehova, pantu ababila bapwa; pantu aba cishinka bapoba ukufuma mu bana ba bantu.” (Amalumbo 12:1) Cinshi ukubulwa bucishinka kubelele mpanga yonse? Roger Rosenblatt, alembele muli magazini wa Time ati, “Nangu ca kuti bucishinka busuma nga nshi, abantu balatiina sana, balaitwishika, baliitemwa kabili balafwaisha ukulumbuka ica kuti tabenekela fwe bantunse abanaka ukukakatila kuli bucishinka.” Baibolo ilondolola inshita tulimo ukwabula no kulamba ati: “Abantu bakaba abaitemwa, . . . abashashila, abaumalala.”—2 Timote 3:1-5.

Apo bucishinka nelyo ukubulwa bucishinka kulakuma ukutontonkanya nelyo imicitile ya muntu, kuti twaipusha ati, ‘Ni kuli nani tufwile ukuba na bucishinka?’ Moneni ifyo icipande cikonkelepo calayasuka ico cipusho.

[Abatusuminishe Ukubomfya Icikope pe bula 3]

Icikope cili pa muulu: © AFP/CORBIS