Ifipusho Ukufuma ku Babelenga

Kupanda amano nshi kwaba mu Malembo pa lwa kusambilisha abana nga ca kuti umufyashi umo ni Nte ya kwa Yehova umbi iyo?

Kwaba ifishinte fikalamba fibili ifya mu Malembo ifipanda amano pa lwa kusambilisha abana ku mufyashi Inte uwakwata umwina mwakwe uushili Nte. Cimo ni ci: “Tuli no kunakila Lesa ukucilo kunakila abantu.” (Imilimo 5:29) Cimbi na co ni ci: “Umulume e mutwe wa mukashi, ifyo na Kristu e mutwe wa lukuta.” (Abena Efese 5:23) Icishinte ca bumutwe bwa mwaume tacibomba fye ku bakashi abali Inte abakwata abalume Inte, lelo cibomba na ku baupwa ku bashili Nte. (1 Petro 3:1) Bushe umufyashi Nte, nampo nga mwaume nelyo mwanakashi, kuti alinganya shani ifi fishinte ilyo alesambilisha abana bakwe?

Nga ca kuti umulume ni Nte ya kwa Yehova, alikwata umulimo wa kuteyanishisha ulupwa lwakwe ifya ku mupashi ne fya ku mubili. (1 Timote 5:8) Nangu ca kuti nyina uushatetekela napamo e upoosa inshita ikalamba na bana babo, wishi uuli Nte alingile ukusambilisha abana bakwe ifya ku mupashi pa ng’anda e lyo no kubasenda ku kulongana kwa Bwina Kristu, uko bali no kusambilishiwa imibele isuma no kuipakisha ukubishanya kusuma.

Ni shani nga ca kuti umukashi uushatetekela akosapo fye ukuti afwile ukusenda abana uko apepa nelyo ukubasambilisha ifya ku calici apepa? Napamo amafunde ya mu calo yalimupeela insambu ya kucite fyo. Icikapima sana nampo nga abana bali no kukonka ifyo basambilisha ku calici kuli nyinabo, caba musango wa kusambilisha kwa ku mupashi ukwa kwa wishi. Ilyo abana baleya balekula, amasomo ya mu Malembo wishi abasambilisha yalingile ukubaafwa ukukonka icine ca mu Cebo ca kwa Lesa. Fintu wishi watetekela engasansamuka nga ca kuti abana basalapo ukuba mu cine!

Nga ca kuti nyina e Nte ya kwa Yehova, alacindika icishinte ca bumutwe lelo alangwa na ku fili no kwambukila abana bakwe ku ciyayaya. (1 Abena Korinti 11:3) Ilingi line, umulume uushatetekela takaleshe umukashi uwatetekela ukufunda abana ifya ku mupashi ne mibele isuma, kabili ukwafwa mu kusambilishe fi kulasangwa ku kulongana kwa bantu ba kwa Yehova. Nyina kuti ayafwa umulume wakwe uushatetekela ukumona ubusuma bwa masomo ayo abana bakwe balesambilila ukupitila mu kuteyanya kwa kwa Yehova. Mu kucenjela kuti akomaila pa busuma bwa kusambilisha abana babo imibele isuma iya mu Baibolo, pantu e fyo bakumanya ilyo baleikala muli cino calo cakwata imibele yabipa.

Lelo, napamo umulume uushatetekela kuti akosapo ukuti abana bakwe baleya nankwe uko apepa, ukubasenda ku mapepo no kubasambilisha ifya ku calici ku mwankwe. Nelyo umulume kuti limbi alipata imipepele yonse no kusoso kuti abana bakwe tabafwile ukusambilishiwa ifya mapepo. Apo e mutwe wa lupwa, mulimo wakwe uwa kupingula ifya musango yo. *

Ilyo alecindika bumutwe bwa mulume wakwe, umukashi nga Mwina Kristu waipeela, alingile ukwibukisha imibele ya mutumwa Petro na Yohane,  abatile: “Ifwe twafilwa ukuleko kulande fyo twamwene no kuumfwa.” (Imilimo 4:19, 20) Pa kulangulukilako bumupashi bwa bana bakwe, nyina uuli ni Nte akasanga inshita ya kufunda abana imibele isuma. Alikwata umulimo pa ntanshi ya kwa Yehova uwa kusambilisha bambi ifyo aishiba ukuti e cine, kabili abana bakwe na bo bafwile ukusanshiwamo muli uko kusambilishiwa. (Amapinda 1:8; Mateo 28:19, 20) Bushe nyina uuli ni Nte kuti abomba shani pali ubu bwafya?

Ku ca kumwenako, tontonkanyeni pa mulandu wa kutetekela Lesa. Umukashi Nte napamo te kuti akwate ishuko lya kusambilila Baibolo mu mutekatima na bana bakwe pantu umulume alilesha. Bushe ninshi afwile ukulabako fye ku kweba abana bakwe ifili fyonse pali Yehova? Iyo. Ifyo asosa ne fyo acita fili no kulanga ukuti alitetekela Kalenga wakwe. Ukwabula no kutwishika, abana kuti bakwata amepusho pali co. Kuti caba fye bwino ukubomfya ubuntungwa bwakwe ubwa maipepele no kulanda pa cisumino cakwe muli Kalenga, no kwebako abana bakwe. Nangula te kuti atungulule isambililo lya Baibolo na bana bakwe nelyo ukubasenda ku kulongana lyonse, kuti abasambilisha pali Yehova Lesa.—Amalango 6:7.

Pa lwa kwampana kwa kwa Nte no mwina mwakwe uushatetekela, umutumwa Paulo alembele ati: “Uushatetekela nashishiwa mu mukashi wakwe, no mukashi uushatetekela ashishiwa mu wa bwananyina uo aupwako; ninshi nga bana benu baba abakowela, lelo nomba ba mushilo.” (1 Abena Korinti 7:14) Yehova amona ico cupo nge ca mushilo pantu uyo uushatetekela uwakwata umwina mwakwe uwatetekela amonwa ngo wa mushilo kuli Yehova pamo pene na bana. Umukashi uuli ni Nte afwile ukwesha na maka ukwafwa abana bakwe ukumfwikisha icine, no kushiila ifya kufumamo mu maboko ya kwa Yehova.

Ilyo abana balekula, kuti bapingula ifyo bali no kucita ukukuma ku fya mapepo ukushintilila pa fyebo baumfwile ku bafyashi babo. Napamo kuti basala ukucita umwabela amashiwi ya kwa Yesu aya kuti: “Uwatemwa wishi nangu ni nyina ukucilo kuntemwa, tawamina ine.” (Mateo 10:37) Na kabili baebwa abati: “Mwe bana, nakileni abafyashi benu muli Shikulu.” (Abena Efese 6:1) Imisepela iingi yasalapo ‘ukunakila Lesa’ ukucila ukunakila umufyashi uushili Nte, te mulandu ne fyo uyo mufyashi engabacululusha. Fintu cingaba icisuma ku mufyashi Nte ukumona abana basalapo ukubombela Yehova te mulandu no kubakaanya!

[Futunoti]