‘Belelaneni Uluse’

BUSHE mwalisumina ukuti Lesa alimwelela imembu shenu? Mu United States, cimoneka kwati abakalamba abengi balasumina. Dokota Loren Toussaint, umutanshi ukulemba ifyo basangile mu masomo ya pa University of Michigan Institute for Social Research, ashimike ati pa bena Amerika 1,423 abo baipwishe, aba kalamba nalimo 1,138 abacilile imyaka ya kufyalwa 45 batile Lesa alyelela imembu shabo.

Na lyo line, icapapwishe ca kuti pa bantu baipwishe, pali fye abantu nalimo 811 e babelela bambi uluse. Ifi fipendo fyatucinkulako amashiwi ya kwa Yesu ayo alandile mu Lyashi lya pa Lupili, aya kuti: “Nga mwalekelela abantu amampuulu yabo, Shinwe wa mu muulu akalekelela na imwe; lelo nga tamulekelela abantu amampuulu yabo, Shinwe takalekelele amampuulu yenu.” (Mateo 6:14, 15) Ca cine, Lesa talekelela fye ukwabula imwe ukucitapo fimo, cimo ico twingacita kulekelela bambi ukwabula ukupatikishiwa.

Umutumwa Paulo acinkwileko Abena Kristu ba mu Kolose pa lwa ici cishinte. Abakonkomeshe ukuti: ‘Mulebelelano luse nga umo aba na kafiimbo ku mubiye; ifyo Shikulu amubelelo uluse, e fyo na imwe mubelele uluse.’ (Abena Kolose 3:13) Ca cine, ukubelelo luse te lyonse kwaba ukwayanguka. Ku ca kumwenako, nga ni mwe umuntu aeba ifyabulamo amano nelyo ifibi, kuti camwafya ukwelela uyo muntu.

Lelo, tulamwenamo ifingi nga twabelela uluse. Dokota David R. Williams, uwasoma ifya kwikala na bantu, ukulingana no kufwailisha kwakwe, atile: “Twasangile ukuti ukwelela bambi kwalyampana sana no butuntulu bwa mutontonkanya ku ba mushinku wa pa kati na bakalamba abena Amerika.” Aya mashiwi yaumfwana ne fyalandile Imfumu ya mano Solomone, apapita ne myaka 3,000 ukutula apo alembele amashiwi yaleti: “Umutima uwatekanya mweo wa mubili.” (Amapinda 14:30) Apo ukulekelela kulalenga twaba bacibusa basuma na Lesa na ku bena mupalamano besu, natukwata umulandu usuma uwa kulemenena ku kubelelano luse mu kuitemenwa ukufuma pa nshi ya mutima.—Mateo 18:35.