Bushe Tufwile Ukumona Shani Amesho?

AMESHO! Umuntu onse afwile ukweshiwa. Amesho yamo yesa pa mulandu wa kupusana kwa fifyalilwa, ukwafya kwa mikalile, ukulwalilila, amatunko, ukupatikishiwa ku fibusa ukucita icabipa, ukupakaswa, amafya yesa pa mulandu wa kukanaitumpa mu fya calo nelyo ukukanapepa utulubi, ne fintu fimbi ifingi. Te mulandu na mesho yatuponena, ilingi line yalatusakamika sana. Bushe kuti twashipikisha shani amesho bwino bwino? Bushe yalatwafwako mumo mumo?

Ukwafwa Kwawamisha

Davidi, imfumu ya ku kale alikwete amesho mu bumi bwakwe bonse, lelo afwile na bucishinka. Cinshi calengele ukuti ashipikishe? Alandile uko alefumya ubukose ilyo atile: “Yehova e mucemi wandi; nshibulwa.” Lyene atile: “Kabili ilyo nyenda mu mupokapoka wa kufiita kwa mfwa, nshitiina bubi; pantu imwe muli pamo na ine: inkonto yenu no mutambu wenu filansansamusha.” (Amalumbo 23:1, 4) Ca cine, Yehova e ntulo ya kwafwa ukushipelela. Atungulwile Davidi mu nshita ya mafya, kabili aliiteyanya ukucita cimo cine na kuli ifwe ilyo cakabilwa.

Kuti twaba shani no kwaafwa kwa kwa Yehova? Baibolo itweba ifyo twingacita ilyo itila: “Sondeni no kumono kuti aliwama Yehova.” (Amalumbo 34:8) Ubu bwite busuma, lelo bwalola mwi? Bukoselesha ukubombela Yehova no kwalula ubumi bwesu bonse no kucita ukufwaya kwakwe. Ukucite fyo kwalola mu kuti twafumyako ubuntungwa bumo, ukuipusula. Limo kuti calenga kwaba na mesho—ukupakaswa no kucula. Lelo, abayankula ku bwite bwa kwa Yehova no mutima onse tabafwile ukulanguluka ukuti cinshi nasuminine ubu bwite. Yehova akaba umusuma sana kuli bena. Akabatungulula no kubasakamana mu fya ku mupashi. Akabakosha ukushipikisha amesho ukupitila mu Cebo cakwe, umupashi wakwe uwa mushilo, na mu cilonganino ca Bwina Kristu. Na kuli pele pele akabapeela umweo wa muyayaya.—Amalumbo 23:6; 25:9; Esaya 30:21; Abena Roma 15:5.

Balya abasalapo ukubombela Yehova kabili abashitelula ubuyo bwabo basanga ukuti Yehova alafishapo amalayo yakwe yonse. Ico e co abena Israele abakonkele Yoshua mu Calo ca Bulayo baimwenene. Ilyo bayabwike Yordani,  kwali amesho bali no kushipikisha, bali no kulwa imbuli, kabili bali no kusambilila amasambililo ya bulanda. Na lyo line ilya nkulo yali iya cishinka ukucila bashibo abafumine mu Egupti no kufwila mu matololo. E ico, Yehova alitungilile aba cishinka bakwe, kabili ulwa mikalile yabo ukufika na lintu Yoshua afwile, Baibolo itila: “Yehova alengele kube ukutusha kuli bene ukushinguluka, umwabelele conse ico alapile kuli bashibo . . . Tapawilepo nangu cimo ca mu fintu fyonse fisuma ifyo Yehova asosele ku ba ng’anda ya kwa Israele; conse caishilebapo.” (Yoshua 21:44, 45) E fyo cingaba na kuli ifwe nga twacetekela umupwilapo pali Yehova ilyo tuli na mesho na pa nshita shonse shimbi.

Cinshi cinganasha ukucetekela kwesu muli Yehova? Yesu alandile pali cimo ilyo atile: “Takuli uwingabombela bashikulu wakwe babili. . . . Te kuti mubombele Lesa na Mamone.” (Mateo 6:24) Nga twacetekela muli Yehova, tatwakafwaye umutelelwe kumbi uko abengi muno calo baufwaya, e kuti mu fikwatwa. Yesu afundile abasambi bakwe ati: “Lelo mubale mufwaye ubufumu bwa kwa Lesa no bulungami bwakwe, ne fi fyonse [ifikwatwa tukabila] fikalundwako kuli imwe.” (Mateo 6:33) Umwina Kristu uwashikatala mu fyo amona ifikwatwa kabili uubika intanshi Ubufumu bwa kwa Lesa mu mikalile yakwe alisala bwino. (Lukala Milandu 7:12) Ukwabula ukutwishika afwile ukuipusulako fimo. Nalimo aipusula ifikwatwa. Lelo ali no kulobolola ifilambu ifingi. Kabili Yehova akamwafwa.—Esaya 48:17, 18.

Ico Amesho Yatusambilisha

Ukusalapo ‘ukusonda no kumono kuti aliwama Yehova’ takucingilila umo ku ca mankumanya nelyo ku kusansa kwa kwa Satana no kwa bantu bakwe. (Lukala Milandu 9:11) Ici kuti calenga Umwina Kristu ukweshiwa pali bucishinka bwakwe no mupampamina wakwe. Mulandu nshi Yehova ashicingilila bakapepa bakwe ku mesho ya musango yo? Umutumwa Petro alandile cimo icilenga ilyo alembele ati: “Mulengwo bulanda inshita inono (nga e fyo cifwile ukuba) ku fya kwesha ifingi, ukuti bucishinka bwa citetekelo cenu, icafinisha ukucila golde (uonaika nelyo waeshiwa ku mulilo), cisangwe ukulola ku kutasha no lulumbi no mucinshi pa kusokololwa kwa kwa Yesu Kristu.” (1 Petro 1:6, 7) Ca cine, amesho yalenga twalanga umusango wa citetekelo twakwata ne fyo twatemwa Yehova. Kabili yalatwafwa ukwasuka ku kuseebanya no kushinina kwa kwa Satana Kaseebanya.—Amapinda 27:11; Ukusokolola 12:10.

Amesho yalatwafwa na kabili ukulundulula imibele imbi iya Bwina Kristu. Ku ca kumwenako, tontonkanyeni pa mashiwi ya kwa kemba wa malumbo, ayatila: “[Yehova] alolesha abasokopala, na batakalala abeshibilo kutali.” (Amalumbo 138:6) Fwe bengi tatwaba ne cifyalilwa ca kuicefya, lelo amesho kuti yatwafwa ukulundulula iyi mibele ifwaikwa. Ibukisheni icacitike kale mu nshiku sha kwa Mose ilyo bamo mu Israele batendelwe ukulya mana cila mulungu kabili cila mweshi. Ukwabula no kutwishika, ubu bwali bwesho kuli bene, nangu line mana cali cilyo caleteyanishiwa mu cisungusho. Cinshi ubu bwesho bwabeleleko? Mose abebele ati: “[Yehova] uwamulishishe mana mu matololo . . . ku kuleka amucushe [“muicefye,” NW] kabili ku kuleka amweshe.”—Amalango 8:16.

Ne fwe bene kuti twaeshiwa ukumona nga twaliicefya. Kuti twaeshiwa shani? Ku ca kumwenako, tucita shani ilyo kwaba ukwaluka mu kuteyanya kwesu? (Esaya 60:17) Bushe tulafwilisha no mutima onse umulimo wa kushimikila no kusambilisha? (Mateo 24:14; 28: 19, 20) Bushe tulasumina bwangu ubulondoloshi bwa cine ca mu Baibolo ukufuma ku “musha wa cishinka kabili uwashilimuka”? (Mateo 24:45-47; Amapinda 4:18) Bushe tulacincintila itunko lya kukwata ifibombelo fya muno nshiku ifyo nalimo fishingakabilwa no kukabilwa, ukukwatako fashoni mupya uwa ca kufwala, nelyo motoka wa muno nshiku umupya? Umuntu waicefya akasuka ukuti ee ku fipusho fya musango yu.—1 Petro 1:14-16; 2 Petro 3:11.

Amesho yalatwafwa ukulundulula imibele na imbi iyacindama, ukushipikisha. Umusambi Yakobo atile: “Ishibeni ukuti ca kusekelela fye, mwe bamunyinane, ilintu mwawila mu fya kwesha fya misango misango, pa kwishibo kuti ukulabulwa kwa citetekelo cenu kucito kushipikisha.” (Yakobo 1:2, 3) Ukushipikisha amesho ilyo tushintilile umupwilapo pali Yehova kulenga twaba abashangila, abashibwelela numa, kabili aba bumpomfu. Kutukosha ukucincintila ukusansa kwa kwa Satana ku nshita ya ku ntanshi, uko lesa wa kaluka uwa cino calo engatusansa.—1 Petro 5:8-10; 1 Yohane 5:19; Ukusokolola 12:12.

Mwilamwena Mumbi Amesho

Mwana Lesa uwapwililika, Yesu Kristu, aponenwe na mesho ayengi ilyo ali pano isonde kabili alimwenenemo ifilambu ifingi pa kushipikisha yene. Paulo alembele ati Yesu “asambilile icumfwila kuli ifyo aculileko.” (AbaHebere 5:8) Bucishinka bwakwe ukufika na ku mfwa bwalengele ishina lya kwa Yehova ukulumbanishiwa kabili bwalengele na Yesu ukutuula umutengo wa bumi bwakwe ubwapwililika ubwa buntunse icilubula ca bantu. Ici caiswile inshila ya kuba ne subilo lya mweo wa muyayaya ku bakwete citetekelo muli Yesu. (Yohane 3:16) Apo Yesu atwalilile uwa cishinka mu mesho, nomba aba ni Shimapepo wesu Umukalamba kabili alibikwa pa Bufumu.—AbaHebere 7:26-28; 12:2.

Nga ifwe? Ukuba aba cishinka mu mesho kulaleta amapaalo yakalamba. Ku baba ne subilo lya ku muulu, Baibolo itila: “Alishuko muntu uushipikisha ku ca kwesha, pa kuti ilyo akaansha akapokelele cilongwe ca mweo, icalailwe abo abatemwa Shikulu.” (Yakobo 1:12) Abasubila ukwikala pe sonde balicetekela ukuti nga bashipikisha mu busumino, bakapyana umweo wa muyayaya muli paradise wa pe sonde. (Ukusokolola 21:3-6) Kabili icacilapo ukucindama ca kuti ukushipikisha kwabo ukwa cishinka kulenga ishina lya kwa Yehova ukulumbanishiwa.

Ilyo tulekonka mu nkasa sha kwa Yesu, kuti twacetekela ukuti amesho yonse ayatuponena muli buno bwikashi kuti twayashipikisha bwino bwino. (1 Abena Korinti 10:13; 1 Petro 2:21) Kuti twacita shani ifyo? Pa kucetekela muli Yehova, uupeela “ukucishamo kwa maka” ku bamucetekela. (2 Abena Korinti 4:7) Shi natube nga Yobo, uwashipikishe amesho yatapatapa no kusumina ukufuma pa nshi ya mutima ukuti: “Ilyo andabula, kuti nafuma nga golde.”—Yobo 23:10.

[Icikope pe bula 31]

Bucishinka bwa kwa Yesu ilyo aponenwe na mesho bwalengele ishina lya kwa Yehova ukulumbanishiwa. Ne fwe bene kuti twacita cimo cine